Read Northwest Gbaya JOSUE 18 Bible Online

JOSUE 18 - Northwest Gbaya bible

JOSUE 18

¹O be Israɛl lɛŋ mɔi̧a ŋmaa sɛn Silo, ɓɛɛ wa yai Tua-kpa-ŋmaa e nù. Ŋgimbi'i ká wa baa nù kaɗi.

²Ɓɛɛ sɛn mgbara o be Israɛl, zuduk ɓɔna mɔɔrɔ-ɗoŋ-yiitoo nɛ bo so kɔ‘i nɛ̀ mɔɔ-oi na.

³Josue tɔ̧ɔ̧ ha̧ wa: «Ɛnɛ tɛ pɛm mɔ hɔ ge ŋgimbi ge sɛk’ɛnɛ nɛɛ mɛ́ bà nù nɛ GASA WAN Sɔ̧ ko dáà k’ɛ́nɛ́ ha̧a̧‘nɛ́ ge?

⁴Ɛ̀nɛ̀ hók bíí taar tɛ zuduk kpɔk kpɔk, ɓɛɛ mi tɛ tom wa ha̧ wa mɛ nɛ̀ɛ́ yar tɛ nù, wa tɛ tɔ̧ mɔ nɛ nyɛma yí-wa tɛ nu'i, ɓɛɛ nɛ ɗoŋ, wa tɛ pii ɗoŋ pii tɛ‘m.

⁵Ɛ́nɛ́ tɛ kɛ̧ nù tɛ fara mɔɔrɔ-ɗoŋ-yiitoo. O bezaŋ Juda tɛ duk tɛ nù kɔ‘i nɛ̀ ká̧-zan-mɛ́-ɗɔɔ, ɓɛɛ bezaŋ Jozɛf duka tɛ nù kɔ‘i nɛ̀ war ká̧-zan-mɛ́-ŋgɔn.

⁶Ɛnɛ tɛ zɔk mɔ nɛ a̧a̧ tɛ nù‘i nyɛm nɛ fara mɔɔrɔ-ɗoŋ-yiitoo, ɓɛɛ ɛnɛ tɛ̀ɛ̀ tɔ̧́ ha̧‘m hɛ̧ɛ̧. Mi tɛ pi̧ tani kɛ̧ nɛnɛ h’ɛ́nɛ́ ti GASA WAN Sɔ̧ k’ɛɛ sɛn hɛ̧ɛ̧.

⁷War ko o bezaŋ Levii, wa beka kpa kɔ-wa ŋma mɔ mgbara'nɛ́ na, wen tom-ɗafa GASA WAN tɛ duk nɛ́ mɔɔ-oi kɔ-wa; ɓɛɛ nɛ̀ ko Gad in Rubɛn sɛka reeta zuduk ko Manase, wa kpaa mɔɔ-oi kɔ-wa nɛ war kur Jurdɛn ɓi si war daŋa-wese; nɛ́ mɔɔ-oi nɛ Moisɛ wi-de-tom ko GASA WAN ha̧a̧ so ha̧ wa kaɗi.»

⁸O wi nɛ wa hoka ɗafa mɔ mɛ yak wen kpee naŋ nù. Josue ha̧a̧ nú hee mɔ'ɔ ga ha̧ o wi nɔ‘i: «Ɛ̀nɛ̀ nɛ́, ɛ̀nɛ̀ yár tɛ nù‘i, ɛ̀nɛ̀ zɔ́k mɔ nɛ sa̧a̧-a̧ sɛnɛ, ɓɛɛ ɛ̀nɛ̀ píí ɗoŋ kpa'm, ɓɛɛ mi tɛ pi̧ tani h’ɛ́nɛ́ nɛ yí GASA WAN sɛn Silo hɛ̧ɛ̧.» Ɓɛɛ o wi nɔ‘i kur yak.

⁹O wi nɔ‘i yaka, wa yara tɛ nù‘i; wa yɔra mɔ nɛ wa zɔka tɛ o ye nɔ‘i tɛ fara mɔɔrɔ-ɗoŋ-yiitoo, ɓɛɛ wa ba pii ɗoŋ ha̧ Josue sɛn kɔ̧ gbagari sɛn Silo.

¹⁰Nɛ mɔ'ɔ nɛ Josue pi̧i̧ tani ha̧ o be Israɛl sɛn Silo ti GASA WAN, kɛ̧ nɛ nù ha̧ wa dam nɛ nú-gara kɔ-wa.

¹¹Tani baa nù ha̧ zuduk ko Bɛnjamin nyɛm nɛ ɗoŋ nú-gara kɔ-wa. Nù kɔ-wa duka mgbara nù ko o bezaŋ Juda in nù ko o bezaŋ Jozɛf.

¹²Gbìsì kɔ-wa nɛ̀ ká̧-zan-mɛ́-ŋgɔn ku̧u̧ naŋ nɛ̀ Jurdɛn daŋ si ká̧ naŋ kaya nɛ war ká̧-zan-mɛ́-ŋgɔn ká̧ Jeriko daŋ nɛ mgbara kaya si war yee-wese, haɗi nɛnɛ ŋga-gbárà sɛn Bɛt-Avɛn.

¹³Sɛn hi̧i̧ gbìsì ɓira si Luz, ká̧ naŋ kaya Luz nɛ war ɗɔɔ, wen nɛ tɔ̧ Bɛtɛl. Gbìsì nɛɛ woyo si Atrɔt-Adar si zu kaya nɛ a̧a̧ nɛ̀ ká̧-zan-mɛ́-ɗɔɔ ká̧ Bɛt-Hɔrɔŋ mɛ ɗɔɔ.

¹⁴Gbìsì zira si ɗɔɔ ɓɛɛ zik si yee-wese nɛ war ká̧-zan-mɛ́-ɗɔɔ, ku̧u̧naŋ nɛ kaya nɛ duk ti Bɛt-Hɔrɔŋ nɛ ká̧-zan-mɛ́-ɗɔɔ, ɓɛɛ haɗi sɛn Kiriat-Bal nɛ‘i sa'e Kiriat-Yearim gasa ye ko o bezaŋ Juda; gbìsì nɛ war yee-wese nɛ́ mɔ‘i.

¹⁵Gbìsì nɛ war ká̧-zan-mɛ́-ɗɔɔ nɛ́ mɔ'ɔ. Ku̧u̧naŋ-a nɛ Kiriat-Yearim, yak si war yee-wese si war zu-zer Nɛftoa,

¹⁶ɓɛɛ nɛ si ndɔŋ nú kaya nɛ duk ti gboŋgo Hinɔm nɛ ká̧-zan-mɛ́-ŋgɔn ká̧ bɔkɔ-nù ko o be Refaim. Gbìsì baa gboŋgo Hinɔm si ɗɔɔ nɛ ká̧ kaya Jebus nɛ ká̧-zan-mɛ́-ɗɔɔ si Ɛn-Rogɛl.

¹⁷Gbìsì zira si ɗɔɔ woyo nɛ war ká̧-zan-mɛ́-ŋgɔn haɗi sɛn Ɛn-Sɛmɛs in Gelilot nɛ duk tan nɛ yuwar daŋa-a si Adumim, ɓɛɛ zir sitɛ Ta ko Bohan bem ko Rubɛn.

¹⁸Gbìsì ɓira nɛ ká̧ naŋ kaya nɛ war ká̧-zan-mɛ́-ŋgɔn tan nɛ ɗɔŋgɔ Jurdɛn, ɓɛɛ zir woyo si nú Jurdɛn.

¹⁹Gbìsì ɓira nɛ ká̧ naŋ kaya Bɛt-Hogla nɛ war ká̧-zan-mɛ́-ŋgɔn hɔ nɛnɛ nú gba-tɔp Tɔŋ nɛ ká̧-zan-mɛ́-ŋgɔn, fara nɛ Jurdɛn a ɗɔɔ gba-tɔp Tɔŋ sɛnɛ. Gbìsì nɛ war ká̧-zan-mɛ́-ɗɔɔ nɛ́ mɔ‘i.

²⁰Gbìsì nɛ war daŋa-wese duka nɛ́ Jurdɛn. Mɔɔ-oi ko o bezaŋ Bɛnjamin nyɛm nɛ ɗoŋ o nú-gara kɔ-wa ká bá nɛ̀ mgbii-aa lɛŋ nɛ mɔ‘i.

²¹O gasa ye ko zuduk ko o bezaŋ Bɛnjamin nyɛm nɛ ɗoŋ nú-gara kɔ-wa nɛ́ Jeriko, Bɛt-Hogla, Emɛk-Kesis,

²²Bɛt-Araba, Semaraim, Bɛtɛl,

²³Abim, Para, Ofra,

²⁴Kefar-Amɔna, Ofni in Geba. Nɛ́ o gasa ye ɓu-zua-yiitoo in o geɗek-a.

²⁵Sɛka Gabaɔŋ, Rama, Bɛrot,

²⁶Mispɛ, Kefira, Mɔsa,

²⁷Rekɛm, Yirpɛl, Tareala,

²⁸Sela, Elɛf ye ko o be Jebus nɛ‘i sa'e Jerusalɛm, in Gibea-Kiriat: o gasa ye ɓu-zua-naar in o geɗek-a. Mɔɔ-oi ko o bezaŋ Bɛnjamin nyɛm nɛ ɗoŋ o nú-gara kɔ-wa nɛ́ mɔ‘i.