Read Northwest Gbaya JOSUE 21 Bible Online

JOSUE 21 - Northwest Gbaya bible

JOSUE 21

¹O gasawi zuduk ko o be Levii tɛɛ kpa Eleazar wi-ɗafi-sɔ̧, Josue bem ko Nun in o gasawi zuduk ko o be Israɛl.

²Ŋgimbi'i ká wa a̧a̧ so sɛn Silo sɛn nú Kanaŋ. Wa tɔ̧ɔ̧ ha̧ wa: «GASA WAN tɔ̧ɔ̧ so nɛ nú Moisɛ ndé, wa a̧ é ye in o fara-nyɔŋ-mɔ ko o mɔ-dai h’ɛ́ɛ́ mɛ ya sɛnɛ.»

³O be Israɛl ha̧a̧ o ye nɔ‘i, in o fara-nyɔŋ-mɔ ko o mɔ-dai mgbara mɔɔ-oi kɔ-wa ha̧ o be Levii, nyɛm nɛ ɗoŋ wen ko GASA WAN.

⁴Tani baa nɛ o bíí nú-gara ko o bezaŋ Kehat nɛti. Mgbara o wi nɔ‘i, o bezaŋ wi-ɗafi-sɔ̧ Arɔŋ kpaa gasa ye ɓu-zua-taar tɛ nù ko zuduk ko Juda, ko Simɛɔŋ in ko Bɛnjamin.

⁵O oi bem ko Kehat kpaa kɔ‘i nɛ ye ɓu tɛ nù ko Efraim, Dan in reeta zuduk ko Manase, nyɛm nɛ ɗoŋ nú-gara kɔ-wa.

⁶Tani baa ye ɓu-zua-taar sɛn Basaŋ tɛ nù ko zuduk ko Isakar, Asɛr, Nɛftalii in reeta zuduk ko Manase ha̧ o bem ko Gɛrsɔŋ.

⁷O bezaŋ Mɛrari kpaa kɔ‘i nɛ ye ɓu-zua-yiitoo tɛ nù ko zuduk ko Rubɛn, zuduk ko Gad in zuduk ko Zabulɔŋ, nyɛm nɛ ɗoŋ nú-gara kɔ-wa.

⁸O be Israɛl pi̧i̧ tani kɛ̧ nɛ ye nɔ‘i in o fara-nyɔŋ-mɔ ko o mɔ-dai ha̧ o be Levii, nyɛm nɛ ɗoŋ wen ko GASA WAN nɛ tɔ̧ɔ̧ so nɛ̀ nú Moisɛ.

⁹Tɛ nù ko zuduk ko Juda in ko zuduk ko Simɛɔŋ, o ye nɛ wa ha̧a̧

¹⁰ha̧ o bezaŋ Arɔŋ nú-gara ko Kehat mgbara o be Levii nɛ́ mɔɔ nɔ'ɔ, wen nɛ̀ tani baa nɛ́ wa nɛti.

¹¹Wa ha̧a̧ nɛ Kiriat-Arba nɛ‘i sa'e Hebrɔŋ mgbara kaya ko Juda in o fara-nyɔŋ-mɔ ko o mɔ-dai nɛ yaa ká̧ a̧ ha̧ wa. Arba baa duk so nɛ́ dáà ko Anɔk.

¹²Ɓɛɛ nɛ ko zaŋbɛɛ nɛ a̧a̧ ká̧ gasa ye'i in o be ye nɛ a̧a̧ nɛ ɗoŋ-aa, wa ha̧a̧ so ha̧ Kalɛb bem ko Yefunɛ.

¹³Wa ha̧a̧ Hebrɔŋ, ye-hu̧si-sɛnɛ ko o wi-gbɛ-zu in o fara-nyɔŋ-mɔ ko o mɔ-dai nɛ ya ká̧ a̧ ha̧ o bezaŋ wi-ɗafi-sɔ̧ Arɔŋ, ká bá nɛ̀ Libna,

¹⁴Yatir, Ɛstɛmɔa,

¹⁵Hɔlɔŋ, Debir,

¹⁶Ain, Yuta in Bɛt-Sɛmɛs in o fara-nyɔŋ-mɔ ko o mɔ-dai nɛ a̧a̧ ká̧ wa. Nɛ́ ye mɔɔrɔ-ɗoŋ-naar a̧ wa baa tɛ nù ko o zuduk nɔ‘i yiitoo'i.

¹⁷Nɛ̀ war ko zuduk ko Bɛnjamin, nɛ́ Gabaɔŋ, Geba,

¹⁸Anatot, in Almɔŋ, gasa ye naar in o fara-nyɔŋ-mɔ ko o mɔ-dai nɛ a̧a̧ ká̧ wa.

¹⁹Dɔka ye ko o wi-ɗafi-sɔ̧, o bezaŋ Arɔŋ nɛ́ ɓu-zua-taar in o fara-nyɔŋ-mɔ ko o mɔ-dai.

²⁰Ɓɛɛ nɛ̀ ko o oi nú-gara ko o bezaŋ Kehat, bem ko Levii, tani usa nɛ́ o ye tɛ nù ko zuduk ko Efraim ha̧ wa.

²¹Ye-hu̧si-sɛnɛ ko o wi-gbɛ-zu nɛ wa ha̧a̧ ha̧ wa nɛ́ Sikɛm in o fara-nyɔŋ-mɔ ko o mɔ-dai mgbara kaya Efraim. Wa ha̧a̧ Gezɛr,

²²Kibsayim, in Bɛt-Hɔrɔŋ in o fara-nyɔŋ-mɔ ko o mɔ-dai. Nɛ́ gasa ye naar.

²³Tɛ nù ko zuduk ko Dan, nɛ́ Ɛlteke, Gibetɔŋ,

²⁴Ayalɔŋ, in Gat-Rimɔŋ in o fara-nyɔŋ-mɔ ko o mɔ-dai a̧ wa ha̧a̧ ha̧ wa. Nɛ́ gasa ye naar.

²⁵Tɛ nù ko reeta zuduk ko Manase, nɛ́ Tanak, in Gat-Rimɔŋ[7] in o fara-nyɔŋ-mɔ ko o mɔ-dai nɛ a̧a̧ ká̧ wa. Nɛ́ gasa ye yiitoo.

²⁶Lɛŋ nɛ́ gasa ye ɓu nɛ o fara-nyɔŋ-mɔ ko o mɔ-dai wen oi o bíí nú-gara ko o bezaŋ Kehat nɛ̀ ɓɔna so.

²⁷Ko o bezaŋ Gɛrsɔŋ nú-gara ko o be Levii, ye-hu̧si-sɛnɛ nɛ wa ha̧a̧ ha̧ wa tɛ nù ko reeta zuduk ko Manase nɛ́ Golaŋ sɛn Basaŋ in o fara-nyɔŋ-mɔ ko o mɔ-dai. Wa ha̧a̧ Bɛstɛra, bá nɛ̀ o fara-nyɔŋ-mɔ ko o mɔ-dai ha̧ wa mbɛt. Nɛ́ gasa ye yiitoo.

²⁸Tɛ nù ko zuduk ko Isakar nɛ́ Kisiɔŋ, Dabɛrat,

²⁹Yarmut in Ɛn-Ganim bá nɛ̀ fara-nyɔŋ-mɔ ko o mɔ-dai a̧ wa ha̧a̧ ha̧ wa. Nɛ́ gasa ye naar.

³⁰Tɛ nù ko zuduk ko Asɛr nɛ́ Miseal, Abdɔŋ,

³¹Hɛlkat, in Rehob in o fara-nyɔŋ-mɔ ko o mɔ-dai. Nɛ́ gasa ye naar.

³²Tɛ nú ko zuduk ko Nɛftalii, ye-hu̧si-sɛnɛ ko wi-gbɛ-zu nɛ‘i ha̧a̧ nɛ́ Kɛdɛs sɛn Galilee, in o fara-nyɔŋ-mɔ ko o mɔ-dai. Wa ha̧a̧ Hamot-Dɔr, in Kartaŋ in o fara-nyɔŋ-mɔ ko o mɔ-dai mbɛt. Nɛ́ gasa ye taar.

³³Ye ko o bezaŋ Gɛrsɔŋ nyɛm nɛ ɗoŋ nú-gara kɔ-wa nɛ́ ɓu-zua-taar in o fara-nyɔŋ-mɔ ko o mɔ-dai.

³⁴Ko o nú-gara ko o bezaŋ Mɛrari, oi o be Levii, wa ha̧a̧ nɛ Yoknɛam, Karta, Dimna in Nahalal ká bá nɛ̀ o fara-nyɔŋ-mɔ ko o mɔ-dai ha̧ wa tɛ nù ko zuduk ko Zabulɔŋ. Nɛ́ gasa ye naar.

³⁶Tɛ nù ko zuduk ko Rubɛn nɛ́ Besɛr, Yahas,

³⁷Kɛdɛmɔt in Mɛfat ká bá nɛ̀ o fara-nyɔŋ-mɔ ko o mɔ-dai a̧ wa ha̧a̧ ha̧ wa. Nɛ́ gasa ye naar.

³⁸Tɛ nù ko zuduk ko Gad, wa ha̧a̧ Ramot nú Galad nɛ̀ ye-hu̧si-sɛnɛ ko o wi-gbɛ-zu, in o fara-nyɔŋ-mɔ ko o mɔ-dai nɛ a̧a̧ ka a̧ há̧ wa, ɓɛɛ wa ha̧ Mahanayim,

³⁹Hɛsbɔŋ, in Yazɛr in o fara-nyɔŋ-mɔ ko o mɔ-dai ha̧ wa mbɛt. Nɛ́ gasa ye naar.

⁴⁰Ye lɛŋ nɛ tani baa ha̧ o be Mɛrari, o oi bezaŋ Levii, nyɛm nɛ ɗoŋ nú-gara kɔ-wa nɛ́ ye ɓu-zua-yiitoo.

⁴¹Dɔka ye lɛŋ nɛ wa ha̧a̧ ha̧ o be Levii tɛ nù ko o be Israɛl nɛ́ ɓu-naar-zua-mɔɔrɔ-ɗoŋ-taar, in o fara-nyɔŋ-mɔ ko o mɔ-dai.

⁴²O ye nɔ‘i lɛŋ kpɔk kpɔk a̧a̧ nɛ̀ fara-nyɔŋ-mɔ ko o mɔ-dai zik nɛ̀ ɗoŋ-aa. Kànà nɛ́ kpɔk mɔ wen o ye nɔ‘i lɛŋ.

⁴³Mɛ̀ nɛ́ hegɔ a̧ GASA WAN ha̧a̧ nɛ nù ha̧ o be Israɛl, nù n'aa kana so mɔ‘e wi tɛ ha̧ ha̧ o dáà kɔ-wa. Wa baa nù‘i ɓɛɛ wa de ye hi̧i̧.

⁴⁴GASA WAN ha̧a̧ ga̧a̧mɔ ha̧ wa tɛ gbìsì kɔ-wa lɛŋ hee mɔ n'aa ha̧a̧ so nɛ nú ha̧ o dáà kɔ-wa ga. Ɓɛɛ sɛn mgbara o wisɛn kɔ-wa lɛŋ, ŋma kpɔk nɛ yora ŋgɔn ti wa bo na. GASA WAN ee so o wisɛn kɔ-wa lɛŋ kɔ̧ er-wa.

⁴⁵O de wen lɛŋ nɛ GASA WAN tɔ̧ɔ̧ so ha̧ o bíí nutua ko Israɛl ŋma tik nù kóó kpɔk na. Mɔ lɛŋ hɔɔ gba̧a̧.