Read Northwest Gbaya JOSUE 22 Bible Online

JOSUE 22 - Northwest Gbaya bible

JOSUE 22

¹Nɛ mɔ'ɔ nɛ Josue saa o bezaŋ zuduk ko Rubɛn, ko Gad in reeta zuduk ko Manase.

²A̧ tɔ̧ɔ̧ ha̧ wa: «Ɛnɛ kasa mɔ lɛŋ nɛ Moisɛ, wi-de-tom ko GASA WAN tɔ̧ɔ̧ h’ɛ́nɛ́, in ɛnɛ mboo zu tɛ mɔ lɛŋ n'am tɔ̧ɔ̧ h’ɛ́nɛ́ mbɛt.

³Pɛ ɔ dɔka hɔ sɔsɔɔ, ɛnɛ e o nya'nɛ́ duk na. Ɛnɛ mboo zu tɛ o wen ko GASA WAN Sɔ̧ k’ɛ́nɛ́.

⁴Kinii, hee mɔ'ɔ nɛ GASA WAN Sɔ̧ k’ɛ́nɛ́ ha̧a̧ ɔma-tɛ ha̧ o nya'nɛ́ hee mɔ'ɔ n'aa tɔ̧ɔ̧ so nɛnɛ ha̧ wa ga, ɛnɛ nyɛma mɛ si ɗoŋ sitɛ nù k’ɛ́nɛ́, sitɛ nù nɛ Moisɛ wi-de-tom ko GASA WAN ee'nɛ́ sɛnɛ nɛ̀ war kur Jurdɛn ɓi.

⁵Mɔ kpɔk, ɛ̀nɛ̀ dé h’ɛ́nɛ́ mɛ de mɔ nyɛm nɛ ɗoŋ geŋa in Heembea nɛ Moisɛ wi-de-tom ko GASA WAN ha̧a̧ h’ɛ́nɛ́. Ɛ̀nɛ̀ kɔ̧́ GASA WAN Sɔ̧ k’ɛ́nɛ́, ɛ̀nɛ̀ bá yuwar kɔ̧-a̧, ɛ̀nɛ̀ kásí geŋa kɔ̧-a̧, ɛ̀nɛ̀ ndáɗí in a̧, ɛ̀nɛ̀ dé tom ha̧ a̧ nɛ see kpɔk in nɛ kiitɛ‘nɛ́ lɛŋ.»

⁶Josue toka de yoŋgo ha̧ wa, a̧ ee wa, ɓɛɛ wa yak si nù kɔ-wa.

⁷Moisɛ ha̧a̧ so ŋma nù sɛn Basaŋ ha̧ reeta zuduk ko Manase, ɓɛɛ Josue ha̧ ŋma oi reeta nù‘i ha̧ ɓii zuduk ko Manase mgbara o nya-wa nɛ kur Jurdɛn si war yee-wese. Ŋgimbi nɛ Josue ee nɛ wa mɛ si tɛ nù kɔ-wa, a̧ toka de yoŋgo ha̧ wa mbɛt.

⁸A̧ tɔ̧ɔ̧ ha̧ wa: «Ɛ̀nɛ̀ sí tɛ k’ɛ́nɛ́ nɛ̀ kpaamɔ nɛ dɔka-a: o mɔ-dai nɛ dɔka-a, bu-mbɔi, lɔr, ndɛrɛ, boi in o laa nɛ dɔka-a; ɛ̀nɛ̀ kɛ̧́ mɔɔ-oi wisɛn k’ɛ́nɛ́ nɛ̀ ŋmaa in o nya'nɛ́.»

⁹Nɛ mɔ'ɔ nɛ o bezaŋ Rubɛn in o bezaŋ Gad sii ɗoŋ in reeta zuduk ko Manase. Wa ee o be Israɛl duk sɛn Silo, sɛn Kanaŋ, ha̧ wa mɛ si ɗoŋ si nú Galad, nù nɛ̀ duka so nɛ́ kɔ-wa in nɛ wa yaa so sɛnɛ nyɛm nɛ ɗoŋ wen nɛ GASA WAN tɔ̧a̧ nɛ̀ nú Moisɛ.

¹⁰O bezaŋ Rubɛn, o bezaŋ Gad in reeta zuduk ko Manase hɔɔ Gelilot[8] ká̧ nú Jurdɛn nɛ duk nú Kanaŋ, ɓɛɛ wa mbo fara-ɗafi-sɔ̧ hi̧i̧. Mɛ̀ nɛ́ ŋma zɔm fara-ɗafi-sɔ̧ nyɛmna.

¹¹Nyɛrɛmɔ‘i aa zer o be Israɛl, hee ge ndé, o bezaŋ Rubɛn, o bezaŋ Gad in reeta zuduk ko Manase mboo fara-ɗafi-sɔ̧ sɛn Gelilot ká̧ nú Jurdɛn, nú Kanaŋ nɛ war katɛ o be Israɛl.

¹²Tɛ nyɛrɛmɔ‘i, gíí o be Israɛl mɔi̧a ŋmaa kpa sɛn Silo ha̧ wa mɛ nɛ̀ɛ́ ba zu duk nɛ̀ wa mɛ bi biro in wa.

¹³O be Israɛl hɔɔ tɛ wi-ɗafi-sɔ̧ Pinas, bem ko Eleazar, ɓɛɛ wa tom a̧ sitɛ o bezaŋ Rubɛn, o bezaŋ Gad in reeta zuduk ko Manase si nú Galad mɛ.

¹⁴Wa toma o gasawi ɓu in a̧ mbɛt; mɛ̀ nɛ́ o gasawi kpɔk kpɔk nyɛm nɛ zuduk be Israɛl kpɔk kpɔk; ɓɛɛ wi nɔ‘i kpɔk kpɔk lɛŋ duk nɛ́ gasawi nutua mgbara o bíí nú-gara sɛn Israɛl.

¹⁵Wa hɔɔ tɛ o bezaŋ Rubɛn, o bezaŋ Gad in reeta zuduk ko Manase sɛn nú Galad kaɗi, ɓɛɛ wa tɔ̧ ha̧ wa hee mɔ'ɔ ga:

¹⁶«Akamɔ ko o be Israɛl lɛŋ nɛ mɔ'ɔ: Gba̧a̧ ŋgazu n’ɛnɛ de in Sɔ̧ ko Israɛl hee ge? Wen ge ɛnɛ zik ɗoŋ‘nɛ́ ha̧ GASA WAN ge? Wen ge ɛnɛ mboo ŋma fara-ɗafi-sɔ̧ nɛtɛ zik nɛ ɗoŋ‘nɛ́ e ha̧ GASA WAN ge?

¹⁷Ɗaŋmɔ ko Pɛɔr nyɛm yɛ na nde? Kóó nɛ oi ŋgamɔ nɛ tika zu o bíí ko GASA WAN'i, war-tɛ-ɛɛ tɛ sa̧ na hɔ sɔsɔɔ!

¹⁸Ɓɛɛ k’ɛ́nɛ́, ɛnɛ ee GASA WAN duk sɔsɔɔ, ɛnɛ de nɛ ŋgazu in GASA WAN; sa̧a̧mɔ, nɛ́ see-aa a̧ tɛ tu̧ zu o be Israɛl lɛŋ.

¹⁹Ɓɛɛ kà nù k’ɛ́nɛ́ nɛ́ sa̧a̧ ti GASA WAN na, ɛ̀nɛ̀ pii ɗoŋ píí tɛ nù ko GASA WAN, nɛ̀ fara-duk kɔ̧-a̧ a̧a̧ sɛnɛ‘i. Ɛ̀nɛ̀ ba fara mgbara yɛ, ɓɛɛ k’ɛ́nɛ́ de ŋgazu in GASA WAN na, k’ɛ́nɛ́ de ŋgazu in yɛ̀ɛ́, mbo nɛ̀ fara-ɗafi géé-sɔ̧ e katɛ GASA WAN Sɔ̧ k’ɛɛ na.

²⁰Ŋgimbi nɛ Akaŋ bem ko Zera dee nɛ̀ ŋgazu ba nɛ mɔ nɛ a̧a̧ ɗɔɔ fom, bó nɛ́ nyimsea ko Sɔ̧ tika zu gíí be Israɛl lɛŋ na nde? Bó nɛ́ a̧ ɛ̀nɛ́-à a̧ fee wen ɗaŋmɔ kɔ̧-a̧ ɓɛɛ na.»

²¹O bezaŋ Rubɛn, Gad in reeta zuduk ko Manase kifa nú ha̧ o gasawi nú-gara ko o be Israɛl:

²²«Sɔ̧, GASA WAN, GASA WAN Sɔ̧ iŋa nɛ mbetɛ, ɓɛɛ Israɛl tɛ iŋ mbɛt. K’ɛ̀ɛ̀ nɛ́ dee ŋgazu in k’ɛ̀ɛ̀ nɛ́ mboo zu ha̧ GASA WAN na, ká a̧ kpasi yɛ sɔsɔɔ na.

²³Ɓɛɛ k’ɛ̀ɛ̀ nɛ́ mboo so fara-ɗafi géé-sɔ̧ h’ɛ́ɛ́ mɛ dɔ nɛ kpoo-sɔ̧ ha̧ nɛ mɔ, k’ɛ̀ɛ̀ nɛ́ tɛ̀ɛ́ ha̧ mɔ-gaŋmɔ, GASA WAN a̧ dé bɔnɛ in yɛɛ.

²⁴Nɛ́ zaŋ kíì in mɔ nɛ nyɛma mɛ hɔ mɛ sa̧a̧mɔ ɛ́ɛ́ dèé nɛ mɔ hegɔ. Ŋma wese o bem k’ɛ́nɛ́ nyɛma mɛ ak o bem k’ɛɛ‘e: ‹Nɛ́ ge a̧ a̧a̧ mgbara'nɛ́ in GASA WAN Sɔ̧ ko Israɛl ge nde?

²⁵GASA WAN ee gbìsì mgbara yɛ in'nɛ̀ɛ́ nɛ Jurdɛn, ɛnɛ o bezaŋ Rubɛn in o bezaŋ Gad. Ŋma mɔ k’ɛ́nɛ́ bo tɛ GASA WAN na.› O bem k’ɛ́nɛ́ tɛ nyɛm mɛ de ha̧ o bem k’ɛɛ mɛ kaɗi yuu GASA WAN.

²⁶Hegɔ ɛɛ tɔ̧a̧, ɛɛ tɛ mbo fara-ɗafi-sɔ̧ e, bó nɛ́ wen dɔɔ kpoo-sɔ̧, kóó wen ɗafa sɔ̧ na,

²⁷ɓɛɛ hee sedaako mgbara yɛ in'nɛ̀ɛ́, in mgbara o bezaŋ yɛ ga. Nɛ́ tom ko GASA WAN ɛ̀ɛ̀ dé ti a̧ nɛ̀ o dɔɔ-kpoo-sɔ̧ k’ɛɛ, o ɗafa-sɔ̧-gaŋmɔ k’ɛɛ wen ká o bem k’ɛ́nɛ́ tɛɛ tɔ̧ mɛ sa̧a̧mɔ ha̧ o bem k’ɛɛ‘e, wa bó nɛ̀ ŋma mɔ er GASA WAN na.

²⁸Ɛɛ taa so'e kà wa tɔ̧́ pɛrti wen’ɛ h’ɛ́ɛ́, kóó ha̧ o bezaŋ yɛ tɛ ŋma ŋgimbi nɛ ɗoŋ, wa tɛ kifi nú: ‹Ɛ̀nɛ̀ zɔ́k fara-ɗafi-sɔ̧ nɛ o dáà k’ɛɛ mboo so nɛ hɔɔ ŋmaa in fara-ɗafi-sɔ̧ ko GASA WAN. Wa mbo so fara-ɗafi-sɔ̧‘i wen dɔɔ kpoo-sɔ̧ in ɗafa sɔ̧ na, ɓɛɛ ha̧ mɔ‘i mɛ duk nɛ́ mɔɔ-sedaako mgbara yɛ in'nɛ̀ɛ́.›

²⁹Ɛɛ ta so mɔ wen dee ŋgazu in GASA WAN zik nɛ̀ ɗoŋ yɛ ha̧ a̧, mbo nɛ̀ ŋma fara-dɔ-kpoo-sɔ̧, wen o ha̧a̧mɔ in o ɗafa-sɔ̧ yak zu fara-ɗafi GASA WAN Sɔ̧ k’ɛɛ nɛ̀ duk ti fara-duk kɔ̧-a̧ na.»

³⁰Ŋgimbi nɛ wi-ɗafi-sɔ̧ Pinas in o gasawi zu o be Israɛl lɛŋ in o gasawi nú-gara zia wen nɔ‘i nɛ o bezaŋ Rubɛn, o bezaŋ Gad, in o bezaŋ Manase tɔ̧a̧‘i, see-wa fea.

³¹Pinas bem ko Eleazar wi-ɗafi-sɔ̧ tɔ̧ɔ̧ ha̧ o bezaŋ Rubɛn, o bezaŋ Gad in o bezaŋ Manase ndé: «Ɛɛ iŋa sɔsɔɔ‘e, GASA WAN a̧a̧ mgbara yɛ wen nɛ̀ ɛnɛ de ŋma ŋgazu in a̧ na. Ɛnɛ kpasa o be Israɛl tɛ nyimsea ko GASA WAN.»

³²Pinas bem ko Eleazar wi-ɗafi-sɔ̧ in o gasawi ee o bezaŋ Rubɛn in o bezaŋ Gad duk, wa pia nɛ̀ nú Galad pii nú Kanaŋ katɛ o be Israɛl. Wa baa kifa-nú piinɛ ha̧ wa.

³³Mɔ‘i ha̧a̧ desee ha̧ o be Israɛl. Wa zɔna Sɔ̧, ɓɛɛ wa tɔ̧ wen daŋa-a mɛ bi biro in mɛ ɗaŋ nù nɛ̀ o bezaŋ Rubɛn, in o bezaŋ Gad ɔ sɛnɛ‘i ɓɔna.

³⁴O bezaŋ Rubɛn in o bezaŋ Gad saa fara-ɗafi-sɔ̧‘i'e «Sedaako», wen wa tɔ̧a̧‘e fara'i nɛ́ mɔɔ-sedaako mgbara wi'e, GASA WAN nɛ́ Sɔ̧.