Read Northwest Gbaya JOSUE 24 Bible Online

JOSUE 24 - Northwest Gbaya bible

JOSUE 24

¹Josue mɔi̧a o zuduk be Israɛl lɛŋ sɛn Sikɛm, ɓɛɛ sa o gasawi kɔ-wa, o wan kɔ-wa, o wi-gɔn-kita kɔ-wa, in o mɔ-geŋa kɔ-wa, ɓɛɛ wa mɔi̧ ti Sɔ̧.

²Josue tɔ̧ɔ̧ ha̧ o dukbíí lɛŋ: «Tɔ̧ɔ̧-wen ko GASA WAN Sɔ̧ ko Israɛl nɛ mɔ'ɔ: ‹Ɓeemɛ o zɔmdáa k’ɛ́nɛ́ ɔɔ so nɛ̀ kur Efrat mɛ. Mɛ̀ nɛ́ Tera dáà ko Abraham in Nahɔr, ɓɛɛ wa gasa so nɛ o ŋma sɔ̧.

³Hegɔ mi baa dáà k’ɛ́nɛ́ Abraham nɛ̀ war kur gasa yì‘i, ɓɛɛ mi mgbɔ a̧ ɓir nɛ Kanaŋ, mi dee ha̧ bezaŋ-aa mɛ dɔk, ɓɛɛ mi ha̧ Izak ha̧ a̧.

⁴Mi ha̧a̧ Jakob in Esau ha̧ Izak. Mi ha̧a̧ kaya Sɛir ha̧ Esau nɛ̀ kɔ̧-a̧, ɓɛɛ Jakob in o bem kɔ‘i zir kɔ‘i si Egiptɛ.

⁵Nɛ mɔ'ɔ n'am toma Moisɛ in Arɔŋ nɛnɛ si Egiptɛ, ɓɛɛ mi pi̧ gasa bɔnɛ hi̧i̧, ɓɛɛ nɛ̀ ɗoŋ mi gboo'nɛ́ yinɛ.

⁶Mi gboo o dáà k’ɛ́nɛ́ nɛ nú Egiptɛ ɓɛɛ ɛnɛ hɔ tɛ Gbɛ̧ gba-tɔp. O be Egiptɛ ndaka o dáà k’ɛ́nɛ́ nɛ̀ o keekee-nyaŋa in o wi-daŋ-nyaŋa hɔ nú Gbɛ̧ gba-tɔp.

⁷O dáà k’ɛ́nɛ́ aia nú sitɛ GASA WAN nɛ̀ pi̧i̧ gasa tum mgbara'nɛ́ in o be Egiptɛ. A̧ dee ha̧ gba-tɔp mɛ pii ɗoŋ kpe zu wa. Ɛnɛ zɔka mɔ n'am dea in o be Egiptɛ nɛ yí‘nɛ́, in ɛnɛ duka sɛn ŋga-gbárà ɗoŋ-aa nyɛi̧ mbɛt.

⁸Mi mgbɔɔ‘nɛ́ hɔ tɛ nù ko o be Amɔr nɛ ɔɔ so kɔ-wa nɛ̀ kur Jurdɛn mɛ; wa dee biro in'nɛ̀ɛ́, ɓɛɛ mi e wa kɔ̧ er'nɛ́, hegɔ ɛnɛ baa nù kɔ-wa, mi kuma wa yinɛ ti'nɛ́.

⁹Ɓɛɛ Balak bem ko Sipɔr, wannu Mɔab, kur mɛ bi biro in Israɛl. A̧ toma sá Balam bem ko Beɔr mɛ fom'nɛ́.

¹⁰Ɓɛɛ mi zii kɔ‘m fom kɔ̧-a̧‘i na; Balam pia ɗoŋ tok nɛ de yoŋgo zu'nɛ́, ɓɛɛ mi kpasi'nɛ́ er a̧.

¹¹Ɛnɛ kuu Jurdɛn ɓɛɛ ɛnɛ hɔ Jeriko; o wannu Jeriko in o be Amɔr, o be Periz, o be Kanaŋ, o be Hit, o be Girgas, o be Hiv in o be Jebus dee biro in'nɛ̀ɛ́, ɓɛɛ mi e wa kɔ̧ er'nɛ́.

¹²Mi dee ha̧ zɔm ɓɔrɔ mɛ ai pi̧ nɛ̀ kíì tɛ o wannu Amɔr yiitoo ndak nɛ wa yinɛ ti'nɛ́, ɓɛɛ bó nɛ́ góò k’ɛ́nɛ́ in gba-paa k’ɛ́nɛ́ a̧ dee mɔ‘i na.

¹³Mi ha̧a̧ nù nɛ̀ bó nɛ́ ɛnɛ zɔka nɛ bɔnɛ ba nɛnɛ na h’ɛ́nɛ́. Ɛnɛ ɔ nɛ tɛ ye nɛ̀ bó nɛ́ ɛnɛ a̧ mboo na, ɛnɛ nyɔŋ nɛ o waya-nyak-dɔ̧ɔ̧ in o waya-te nɛ̀ bó nɛ́ ɛnɛ a̧ guna na.›

¹⁴«Kinii, ɛ̀nɛ̀ yú GASA WAN, ɓɛɛ ɛ̀nɛ̀ dé tom ha̧ a̧ nɛ yuwar-a in nɛ mboozu. Ɛ̀nɛ̀ é o sɔ̧ nɛ̀ o dáà k’ɛ́nɛ́ dee so tom ha̧ wa ŋgimbi nɛ wa a̧a̧ kur gasa nana-yì in sɛn Egiptɛ duk, ɓɛɛ ɛ̀nɛ̀ dé tom ha̧ GASA WAN.

¹⁵K’ɛ̀nɛ̀ nɛ́ kɔ̧ɔ̧ dee tom ha̧ GASA WAN na, ɛ̀nɛ̀ hók wi n’ɛnɛ kɔ̧ɔ̧ mɛ de tom ha̧ a̧‘i sɔsɔɔ: kóó nɛ́ o sɔ̧ nɛ o dáà k’ɛ́nɛ́ dee so tom ha̧ wa nɛ̀ kur nana-yì mɛ, kóó nɛ o sɔ̧ ko o be Amɔr n’ɛnɛ ɔ tɛ nù kɔ-wa. Kɔ‘m in o bíí nutua kɔ‘m, ɛɛ tɛ de k’ɛɛ tom ha̧ GASA WAN.»

¹⁶O bíí kifa nú: «Kóó tikiɗi, ɛɛ beka e GASA WAN duk, h’ɛ́ɛ́ mɛ gasi nɛ o ŋma sɔ̧ na.

¹⁷GASA WAN Sɔ̧ k’ɛɛ nɛ́ wan nɛ gboo ɛɛ, ɛɛ in o dáà k’ɛɛ, nɛ̀ nú Egiptɛ nɛ kɔ̧ tua-bara in nɛ́ a̧ a̧ dee o zɔm mɔɔ-usi-mɔ nɛ yí-ɛɛ, zɔk nɛ ɛɛ nɛ yuwar n’ɛɛ baa so, in nɛ́ a̧ a̧ zɔka so ɛɛ mgbara o dɔka dukbíí n’ɛɛ ɓira so nɛnɛ yak.

¹⁸GASA WAN ndaka o dukbíí nɔ'ɔ yinɛ sɛn ti ɛɛ in o be Amɔr nɛ ɔɔ tɛ nù'ɛ mbɛt. Ɛɛ mbɛt, ɛɛ kɔ̧ɔ̧ mɛ gasi nɛ GASA WAN wen a̧ nɛ́ Sɔ̧ k’ɛɛ.»

¹⁹Josue tɔ̧ɔ̧ ha̧ dukbíí: «Ɛnɛ nyɛm mɛ de tom ha̧ GASA WAN na, wen a̧ nɛ́ Sɔ̧ nɛ ɔ sa̧a̧, a̧ nɛ́ Sɔ̧ nɛ de gɔya dee, nɛ beka kɔ̧ ɗɔɔ ŋgazu k’ɛ́nɛ́ in ɗaŋmɔ k’ɛ́nɛ́ na.

²⁰K’ɛ̀nɛ̀ e GASA WAN duk mɛ de tom ha̧ o gɔni sɔ̧, a̧ tɛ kur in'nɛ̀ɛ́ mɛ de ɗaŋmɔ in'nɛ̀ɛ́, ɓɛɛ a̧ kuma'nɛ́ kóó nɛ̀ oi dee demɔ n'aa dee in'nɛ̀ɛ́ nɛ ti'i.»

²¹Dukbíí kifa nú ha̧ Josue: «Weyaa, ɛɛ tɛ de nɛ tom ha̧ GASA WAN ɓɛɛ.»

²²Josue tɔ̧ɔ̧ ha̧ wa: «Ɛ́nɛ́ nɛ̀ tɛ‘nɛ́ nɛ́ wi-sedaako nɛ̀ ɛ́nɛ́ hoka nɛ́ GASA WAN mɛ de tom ha̧ a̧.» Wa kɔ̧ɔ̧ ɗɔaa: «Ɛɛ nɛ́ wi-sedaako.»

²³«Kinii, ɛ̀nɛ̀ káí o gɔni sɔ̧ nɛ ya mgbara'nɛ́ yinɛ, ɓɛɛ ɛ̀nɛ̀ zík see'nɛ́ sitɛ GASA WAN Sɔ̧ ko Israɛl.»

²⁴Dukbíí kifa nú ha̧ Josue: «Nɛ́ GASA WAN Sɔ̧ k’ɛɛ ɛ̀ɛ̀ tɛ de tom ha̧ a̧, ɛɛ tɛ mbo zu tɛ wen kɔ̧-a̧.»

²⁵Wese'i, Josue nɔɔ tɔk in dukbíí, ɓɛɛ ha̧ o heembea in o yuwar duka-a ha̧ wa sɛn Sikɛm.

²⁶Josue yɔra o wen nɔ‘i sɛn zaŋ Kalata Heembea ko Sɔ̧, ba gasa ta e ŋgɔn ti ɗɔɔ gasa te[9] nɛ duk tɛ sa̧a̧-fara ko Sɔ̧.

²⁷A̧ tɔ̧ɔ̧ ha̧ dukbíí lɛŋ: «Ta’ɛ tɛ duk nɛ́ mɔɔ-sedaako wen yɛ, wen n'aa zia wen ko GASA WAN lɛŋ ŋgimbi nɛ GASA WAN tɔ̧ɔ̧ nɛ wen h’ɛ́ɛ́. Ta’ɛ tɛ duk nɛ́ mɔɔ-sedaako wen'nɛ́, wen k’ɛ́nɛ́ tɛɛ kafi Sɔ̧ k’ɛ́nɛ́.»

²⁸Josue ee dukbíí ɓɛɛ o ndé si tɛ nù kɔ‘i.

²⁹Ɗoŋ mɔɔ nɔ‘i, Josue bem ko Nun wi-de-tom ko GASA WAN fee nɛ̀ pɛ gɔmŋmaa nɛ̀ pɛ ɓu.

³⁰Wa guna a̧ tɛ nù nɛ wa ha̧a̧ so ha̧ a̧ nɛ̀ mɔɔ-oi sɛn Timnat-Sɛra nɛ duk mgbara kaya Efraim ká̧-zan-mɛ́-ŋgɔn ha̧ kaya Gas.

³¹Israɛl dee tom ha̧ GASA WAN ŋgimbi nɛ Josue duka kpasa in ŋgimbi nɛ o kuti-wi nɛ̀ iŋa so mɔ lɛŋ nɛ GASA WAN dea wen Israɛl duka kpasa oi Josue.

³²Nɛ̀ war ko gba̧a̧ Jozɛf nɛ̀ o be Israɛl kaia so tɛnɛ nɛ Egiptɛ, wa guna sɛn Sikɛm tɛ be mgbii fɔ nɛ Jakob hi̧fa so er o bezaŋ Hamɔr dáà ko Sikɛm tɛ kɔya sede gɔmŋmaa. O gba̧a̧ nɔ‘i yee tɛ nù ko o bezaŋ Jozɛf.

³³Eleazar bem ko Arɔŋ fea mbɛt, ɓɛɛ wa gun a̧ zu kaya ko bem kɔ̧-a̧ Pinas nɛ wa ha̧a̧ so ha̧ a̧ sɛn mgbara kaya Efraim.