Read Northwest Gbaya JOSUE 3 Bible Online

JOSUE 3 - Northwest Gbaya bible

JOSUE 3

¹Josue kura mɛ tutuyɛ sut in o be Israɛl lɛŋ; wa kura sɛn Sitim hɔ ká̧ zaŋ Jurdɛn, wa ɔɔ hi̧i̧ sɛka wa ku yì.

²Tɛ taar zɛ, o gasawi yara dam kɔ̧ gbagari.

³Wa tɔ̧ɔ̧ ha̧ o dukbíí hee mɔ'ɔ ga: «K’ɛ̀nɛ̀ nɛ́ zɔka Kuɓa nɔɔ-tɔk ko GASA WAN Sɔ̧ k’ɛ́nɛ́ nɛ o wi-ɗafi-sɔ̧, o be Levii tɛ gɔ, ɓɛɛ ɛ̀nɛ̀ kúr fara n’ɛnɛ ya'i, ɛ̀nɛ̀ ndák pata a̧.

⁴Ɓɛɛ mgbara'nɛ́ in kuɓa tɛ duk nɛ kilomɛtrɛ kpɔk ɓɔnsɛnɛ; k’ɛ́nɛ́ ɗɔŋ pii katɛ a̧ na, hegɔ ɛnɛ tɛ iŋ yuwar n’ɛnɛ tɛ ba, wen ɛnɛ tɛ ɓir nɛ hɛ̧ɛ̧ nɛti hɔ̧ɔ̧ na.»

⁵Josue tɔ̧ɔ̧ ha̧ o dukbíí: «Ɛ̀nɛ̀ ɗáfí war-tɛ‘nɛ́, wen sa̧a̧mɔ GASA WAN tɛ de o gasa mɔɔ-usi-mɔ mgbara'nɛ́.»

⁶Ɓɛɛ a̧ tɔ̧ ha̧ o wi-ɗafi-sɔ̧: «Ɛ̀nɛ̀ gɔ́ Kuɓa nɔɔ-tɔk, ɓɛɛ ɛ̀nɛ̀ yák ti ha̧ dukbíí.» O wi-ɗafi-sɔ̧ baa Kuɓa nɔɔ-tɔk, ɓɛɛ wa yak ti ha̧ dukbíí.

⁷GASA WAN tɔ̧ɔ̧ ha̧ Josue: «Sɔsɔɔ mi tɛ ku̧ naŋ dee gásì ha̧ mɛ ti o be Israɛl lɛŋ, ha̧ wa mɛ iŋ‘e ndé, mi tɛ duk in mɛɛ hee mɔ'ɔ n'am duka so nɛnɛ in Moisɛ ga.

⁸Mɛ̀ tɔ̧́ ha̧ o wi-ɗafi-sɔ̧ nɛ gɔ Kuɓa nɔɔ-tɔk'e, kà wa nɛ́ hɔɔ nú Jurdɛn, wa a̧ yor ɗɔɔ yì.»

⁹Josue tɔ̧ɔ̧ ha̧ o be Israɛl: «Ɛ̀nɛ̀ ɗɔ́ŋ pii ti ɛ̀nɛ̀ zíí wen ko GASA WAN Sɔ̧ k’ɛ́nɛ́.»

¹⁰A̧ tɔ̧ɔ̧ woyo: «Sɛn tɛ mɔ'ɔ, ɛnɛ tɛ iŋ ndé, Sɔ̧ nɛ̀ duk kpasa a̧a̧ mgbara'nɛ́. Ɓɛɛ a̧ tɛ ndak o be Kanaŋ, o be Hit, o be Hiv, o be Periz, o be Girgas, o be Amɔr in o be Jebus yinɛ sɛn ti'nɛ́ nɛ mbetɛ.

¹¹Kuɓa nɔɔ-tɔk ko GASA WAN Sɔ̧ nɛ ɔɔ wan zu nù'ɛ lɛŋ tɛ ku Jurdɛn nɛti h’ɛ́nɛ́.

¹²Ɛ̀nɛ̀ hók o wiwii ɓu-zua-yiitoo mgbara o duk be Israɛl kpɔk kpɔk dam nɛ zuduk kɔ-wa.

¹³Wen ŋgimbi nɛ o wi-ɗafi-sɔ̧ nɛ gɔ Kuɓa nɔɔ-tɔk ko GASA WAN Sɔ̧ nɛ ɔ wan zu nù lɛŋ, bé tɛ̀ɛ́ pi̧ naŋ ɗɔɔ yí Jurdɛn, yì tɛ gɔn, yì mɛ si zu-zer tɛ yor hee gba-zu ga.»

¹⁴O bíí gbina nɛ kɔ̧ gbagari wen nɛa-a mɛ ku Jurdɛn, ɓɛɛ nɛ́ o wi-ɗafi-sɔ̧ nɛ gɔ Kuɓa nɔɔ-tɔk a̧ yaa ti ha̧ wa.

¹⁵Ŋgimbi'i duka nɛ ŋgimbi mɔi̧a-nyɔnɔ nɛ̀ Jurdɛn ha̧ nɛnɛ hɔ nú ŋgere yiitoo lɛŋ. Ŋgimbi nɛ o wi-ɗafi-sɔ̧ nɛ tui Kuɓa nɔɔ-tɔk'i hɔɔ nú ŋgere, nɛ̀ wa pi̧i̧ naŋ-wa ɗɔɔ yì,

¹⁶yì nɛ fok tɛnɛ nɛ ŋgɔn gɔna, ɓɛɛ duk kpɔk oi hee gba-zu ga nɛ nyɛi̧a-a, ku̧u̧naŋ-a nɛ Adam, ye nɛ duk ká̧ Sartaŋ mɛ; yì nɛ fok si ɗɔɔ tɔp Araba nɛ‘i sa'e gba-tɔp Tɔŋ kaɗa foka-a, ɓɛɛ o bíí ku Jurdɛn tan nɛ Jeriko.

¹⁷O wi-ɗafi-sɔ̧ nɛ gɔ Kuɓa nɔɔ-tɔk ko GASA WAN yora zu lembe Jurdɛn nɛ ɔ̧sa̧, ɓɛɛ o be Israɛl lɛŋ ku yì nɛ kora naŋ hɔ ŋgimbi nɛ bíí lɛŋ daŋa yak.