Read Northwest Gbaya JOSUE 4 Bible Online

JOSUE 4 - Northwest Gbaya bible

JOSUE 4

¹Ŋgimbi nɛ dukbíí lɛŋ kuu Jurdɛn kaɗi, GASA WAN tɔ̧ɔ̧ ha̧ Josue:

²«Ɛ̀nɛ̀ hók bíí ɓu-zua-yiitoo mgbara o zuduk be Israɛl kpɔk kpɔk,

³ha̧ wa mɛ kai ta ɓu-zua-yiitoo mgbák fara nɛ o wi-ɗafi-sɔ̧ yora sɛnɛ yaknɛ si fara n’ɛnɛ tɛ ɔ sɛnɛ sɔsɔɔ.»

⁴Josue saa o bíí nɔ‘i ɓu-zua-yiitoo n'aa hoka mgbara o be Israɛl‘i, bíí kpɔk kpɔk dam zuduk lɛŋ,

⁵ɓɛɛ a̧ tɔ̧ ha̧ wa: «Ɛ̀nɛ̀ yák ti ha̧ Kuɓa nɔɔ-tɔk ko GASA WAN Sɔ̧ k’ɛ́nɛ́, ɛ̀nɛ̀ nɛ́ si see Jurdɛn, ɓɛɛ ɛ̀nɛ̀ bá ta kpɔk kpɔk e zu kóŋgó-ɓaa'nɛ nyɛm nɛ ɗoŋ zuduk be Israɛl,

⁶wen ha̧ wa mɛ ya nɛ́ ŋma mɔɔ-mbaŋ tɛ-wi; ŋma wese, o bezaŋ‘nɛ́ be tɛ̀ɛ́ ak mɔ‘e: ‹O ta nɔ'ɔ usi nɛ ge nde?›

⁷Ɓɛɛ ɛnɛ tɛ kifi nú ha̧ wa: ‹Yí Jurdɛn kɛ̧ɛ̧ so ti Kuɓa nɔɔ-tɔk ko GASA WAN ŋgimbi n'aa kuu nɛ yì'ɛ. Yì ɔ̧sa̧ lɛŋ, ɓɛɛ o ta nɔ'ɔ ya nɛ́ mɔɔ-mbaŋ tɛ o be Israɛl ɓɔnsɛnɛ.› »

⁸O be Israɛl mboo zu tɛ wen ko Josue, ɓɛɛ wa kai o ta nɔ‘i ɓu-zua-yiitoo'i see Jurdɛn dam ɗoŋ zuduk be Israɛl nyɛm nɛ ɗoŋ wen nɛ GASA WAN tɔ̧a̧ ha̧ Josue. Wa kaia o ta nɔ‘i hɔ fara-ɔ, ɓɛɛ wa kai a nù.

⁹Josue nɛka o ŋma ta ɓu-zua-yiitoo zu ŋmaa woyo sɛn see Jurdɛn oi naŋ o wi-ɗafi-sɔ̧ nɛ gɔɔ Kuɓa nɔɔ-tɔk ko GASA WAN'i. Ta nɔ‘i a̧ ya kànà hɔ sɔsɔɔ‘i.

¹⁰O wi-ɗafi-sɔ̧ nɛ gɔɔ Kuɓa nɔɔ-tɔk yora see Jurdɛn hegɔɔ hɔ ŋgimbi nɛ wen nɛ GASA WAN tɔ̧ ha̧ Josue mɛ tɔ̧ ha̧ o dukbíí hɔɔ gba̧a̧, nyɛm nɛ ɗoŋ mɔ lɛŋ nɛ Moisɛ tɔ̧ɔ̧ so ha̧ Josue; ɓɛɛ dukbíí ku yì nɛ haya-a.

¹¹Ŋgimbi nɛ o bíí lɛŋ kuu yì kaɗi, kuɓa ko GASA WAN yaka ti ha̧ o bíí ká bá nɛ̀ o wi-ɗafi-sɔ̧.

¹²O bem ko Rubɛn in ko Gad ká bá nɛ̀ reeta zuduk ko Manase kuu yì ti o be Israɛl nɛ̀ boi-biro er-wa hee mɔ'ɔ nɛ Moisɛ tɔ̧ɔ̧ so ha̧ wa mɛ de ga.

¹³Nɛ́ bíí hee booro-ɓu-naar ga a̧ hɛra tɛ wen biro ti GASA WAN yak si bɔkɔ-nú Jeriko.

¹⁴Wese'i, GASA WAN dee gásì ha̧ Josue nɛ yí o be Israɛl, ɓɛɛ wa tu̧ tɛ-a hee mɔ'ɔ nɛ wa tu̧u̧ so nɛ tɛ Moisɛ ŋgimbi n'aa duka so nɛnɛ kpasa ga.

¹⁵Ɓɛɛ GASA WAN tɔ̧ ha̧ Josue:

¹⁶«Mɛ̀ tɔ̧́ ha̧ o wi-ɗafi-sɔ̧ nɛ gɔ Kuɓa nɔɔ-tɔk, wa a̧ daŋ ɗɔɔ Jurdɛn pii zan.»

¹⁷Josue tɔ̧a̧ ha̧ o wi-ɗafi-sɔ̧: «Ɛ̀nɛ̀ dáŋ ɗɔɔ Jurdɛn pii zan.»

¹⁸Ŋgimbi nɛ o wi-ɗafi-sɔ̧ nɛ gɔ Kuɓa nɔɔ-tɔk ko GASA WAN daŋa ɗɔɔ Jurdɛn pii zan, nɛ wa hu̧i̧a̧ naŋ-wa e nú ŋgere, yí Jurdɛn pia ɗoŋ oi-aa fok nɛnɛ hee nɛti ga.

¹⁹Duka nɛ kuti fio-zɛ tɛ ɔɔ-zɛ ɓu a̧ dukbíí daŋa nɛnɛ ɗɔɔ Jurdɛn, ɓɛɛ wa ba gbagari sɛn Gilgal ká̧ Jeriko nɛ war daŋa-wese.

²⁰Josue nɛka o ta ɓu-zua-yiitoo nɛ wa kaia so ɗɔɔ Jurdɛn'i a ŋgɔn sɛn Gilgal.

²¹A̧ tɔ̧ɔ̧ ha̧ o be Israɛl: «Ŋma wese nɛ̀ o bezaŋ‘nɛ́ be tɛ̀ɛ́ ak o dáà kɔ-wa'e: ‹O ta nɔ'ɔ usi nɛ ge nde?›

²²Ɓɛɛ ɛnɛ tɛ tɔ̧ ha̧ o bem k’ɛ́nɛ́ mɛ iŋ‘e, o be Israɛl kuu so Jurdɛn nɛ̀ kora naŋ.

²³GASA WAN Sɔ̧ k’ɛ́nɛ́ dea ha̧ yí Jurdɛn mɛ ɔ̧si̧ ti'nɛ́ h’ɛ́nɛ́ mɛ ku, hee mɔ'ɔ nɛ GASA WAN Sɔ̧ k’ɛ́nɛ́ dee so tɛ Gbɛ̧ gba-tɔp nɛ yì ɔ̧sa̧ nɛnɛ k’ɛɛ ku so'i ga,

²⁴wen ha̧ zuduk bíí zaŋnu lɛŋ mɛ iŋ‘e, er GASA WAN ɔ nɔa, in h’ɛ́nɛ́ mɛ yu GASA WAN Sɔ̧ k’ɛ́nɛ́ wese ɓɔnsɛnɛ.»