Read Northwest Gbaya JOSUE 5 Bible Online

JOSUE 5 - Northwest Gbaya bible

JOSUE 5

¹O wannu ko o be Amɔr nɛ yaa so kur Jurdɛn nɛ war yee-wese in o wannu ko o be Kanaŋ nɛ yaa tan nɛ Gba-tɔp zia'e GASA WAN dee ha̧ yí Jurdɛn mɛ ɔ̧si̧ ti o be Israɛl hɔ ŋgimbi nɛ wa kuu yì wó, ɓɛɛ ɗɛɗɛ o wannu nɔ‘i gɔn; kíì dee wa mbɛt ti o be Israɛl.

²GASA WAN tɔ̧ɔ̧ ha̧ Josue: «Mɛ̀ dé paa nɛ ta-kórò, ɓɛɛ mɛ̀ gɔ́n bɔr o be Israɛl.»

³Josue dee paa nɛ ta-kórò, ɓɛɛ a̧ gɔn bɔr o be Israɛl sɛn zu kaya Mbii.

⁴Mɔ nɛ dee ha̧ Josue mɛ gɔn nɛ bɔr-wa nɛ mɔ'ɔ: o wi nɛ gboo so nɛ Egiptɛ, o wiwii, o wi-biro lɛŋ fea so sɛn ŋga-gbárà nɛ yuwar.

⁵Mɛ̀ nɛ́ o wi nɔ‘i nɛ gboo nɛ Egiptɛ‘i a̧ gɔna so ɓor. O wan nɛ wa koa sɛn ŋga-gbárà nɛ yuwar tɛ gboa-a nɛ Egiptɛ tɛ gɔn so kɔ‘i hɔ̧ɔ̧ na.

⁶O be Israɛl yambala so pɛ ɓu-naar hɔ ŋgimbi nɛ o bíí nɛ gboo so nɛ Egiptɛ nɛ yaa so nɛ́ o wi-biro lɛŋ fea. Wa mbo so zu tɛ wen ko GASA WAN na, ɓɛɛ a̧ kan mɔ ndé, wi beka e ha̧ wa mɛ zɔk nù nɛ̀ yibere in gɔrɔ fok sɛnɛ nɛ‘i baa kan so mɔ ha̧ o dáà k’ɛɛ‘e, wi tɛ ha̧ h’ɛ́ɛ́ na.

⁷Mɛ̀ nɛ́ o bem kɔ-wa a̧ yaa oi wa, ɓɛɛ mɛ̀ nɛ́ o bem nɔ‘i a̧ Josue gɔna bɔr-wa, wen bo nɛ wa gɔna so kɔ-wa nɛ̀ yuwar na.

⁸Ŋgimbi nɛ gɔna bɔr dukbíí lɛŋ kaɗa, wa ɔma tɛ-wa kɔ̧ gbagari zɛm nɛ wia-a sɛ.

⁹Ɓɛɛ GASA WAN tɔ̧ ha̧ Josue: «Sɔsɔɔ, mi baa mɔɔ-búù ko Egiptɛ yinɛ zu'nɛ́.» Wa aa nin fara'i'e Gilgal, nɛ̀ duk hɔ sɔsɔɔ.

¹⁰O be Israɛl baa gbagari sɛn Gilgal, ɓɛɛ wa de gbaŋa Paska tɛ ɔɔ-zɛ ɓu-zua-naar tɛ fio-zɛ‘i nɛ ga̧a̧mɔ sɛn bɔkɔ-nú Jeriko.

¹¹Ɔɔ mɔ sa̧ ɗoŋ Paska, ɓɛɛ wa nyɔŋ nɛ nyɔnɔ nù‘i. Mɛ̀ nɛ́ brɛt nɛ hao bo sɛnɛ na in ha̧na gba̧a̧-nyɔnɔ.

¹²Kpɔk wese nɛ wa nyɔŋa nɛ nyɔnɔ nù‘i, man kaɗa aa nù. O be Israɛl kpa man ɓɔna, wa nyɔŋa nɛ nyɔnɔ nú Kanaŋ ti pɛ‘i.

¹³Josue hɛɗa ká̧ Jeriko, a̧ baa yí-a nɛ ŋgɔn, ɓɛɛ a̧ zɔk ŋma bíí nɛ yor ti a̧ nɛ gba-paa nɛ‘i daka kɔ̧ koɓo-a er; Josue nɛɛ sitɛ a̧, ɓɛɛ ak a̧: «Mɛ́ nɛ́ bíí k’ɛɛ náà, kóó mɛ́ nɛ́ wisɛn k’ɛɛ nde?»

¹⁴Ɓɛɛ wi’ɛi kifi nú ha̧ a̧: «Weyaa, mi nɛ wi-duk-zu o wi-biro ko GASA WAN ɛ̧; mi hɔa kinii ɓɛɛ.» Josue ba yí gu nù, gbɛɛ zugur nù ti a̧ tɔ̧ nɛnɛ: «Nyaa, nɛ́ ge ɛ́nɛ́ kɔ̧a̧ mɛ tɔ̧ ha̧ wi-de-tom k’ɛ́nɛ́ ge?»

¹⁵Ɓɛɛ wi-duk-zu o wi-biro ko GASA WAN kifi nú ha̧ a̧: «Mɛ̀ kpɔ̧́í̧ ndárà naŋ-mɛ yinɛ, wen fara nɛ mɛ duk sɛnɛ‘i nɛ sa̧a̧-fara.» Ɓɛɛ Josue de hee mɔ'ɔ n'aa tɔ̧ɔ̧ ha̧ a̧ ga.