Read Northwest Gbaya JOSUE 7 Bible Online

JOSUE 7 - Northwest Gbaya bible

JOSUE 7

¹O be Israɛl dee gasa ɗaŋmɔ wen zu o mɔ nɛ GASA WAN tɔ̧ɔ̧ so'e ká‘i ba na. Ŋma be zuduk ko Juda nɛ̀ nin-a nɛ́ Akaŋ bem ko Karmi, be-koo Zabdi, nú-gara ko Zera, kaia o ŋma mɔɔ nɔ‘i, ɓɛɛ see GASA WAN nyim zu o be Israɛl.

²Josue toma o ŋma bíí nɛ̀ Jeriko si Ai, ye nɛ duk ká̧ Bɛt-Avɛn, nɛ war daŋa-wese ha̧ Bɛtɛl, ɓɛɛ tɔ̧ ha̧ wa: «Ɛ̀nɛ̀ dáŋ, ɛ̀nɛ̀ nɛ́ɛ̀ kpé naŋ nù.» Ɓɛɛ o wi nɔ‘i daŋ nɛ́ɛ̀ kpe naŋ Ai.

³Wa pia ɗoŋ pii katɛ Josue kaɗi, ɓɛɛ wa tɔ̧ ha̧ a̧: «Ká bíí lɛŋ daŋ si Ai na; bíí booro-yiitoo, kóó booro-taar a̧ nɛ́ɛ̀ bi Ai ɓɛɛ. K’ɛ́nɛ́ tom bíí lɛŋ nɛnɛ géè na, wen o wi nɔ‘i dɔk na.»

⁴Bíí hee booro-taar ga baa yuwar yak biro, ɓɛɛ wa nɛɛ yu mɔ ti o be Ai.

⁵O be Ai gbɛɛ bíí hee ɓu-taar-zua-mɔɔrɔ-ɗoŋ-kpɔk ga mgbara wa, ɓɛɛ ndak wa yak nú garo ye hɔ sɛn Sɛbarim. Wa gbɛɛ wa sɛn tɛ zira kaya. Gba̧a̧-tɛ o be Israɛl gbina, ɓɛɛ wa ziɓi.

⁶Josue a̧ka̧ laa tɛ, hɔ̧fi̧ tik nù, ɓɛɛ ba yi gu nɛ nù ti Kuɓa nɔɔ-tɔk ko GASA WAN hɔ ga̧a̧mɔ, a̧ in o gasawi Israɛl lɛŋ. Wa aa fuunu zu wa.

⁷Josue tɔ̧a̧: «Ho! GASA WAN Sɔ̧, wen ge ɛnɛ foo o wi nɔ'ɔ ku nɛ Jurdɛn ge? Ɛnɛ kɔ̧ɔ̧ so mɛ fo yɛ a kɔ̧ er o be Amɔr ha̧ wa mɛ kum yɛ nde? Gana so ɛ̀ɛ̀ dé so ye nɛ̀ kur Jurdɛn ɓíì!

⁸GASA WAN, mi aia nú h’ɛ́nɛ́, Israɛl zika ɗoŋ e ha̧ wisɛn kɔ‘i; mi tɛ tɔ̧ nɛ́ ge?

⁹O be Kanaŋ in o bíí tɛ nù'ɛ tɛ zii nyɛrɛ-a, ɓɛɛ wa dika a zu yɛ mɛ bi nin yɛ yinɛ tɛ nù'ɛ. Ɓɛɛ nɛ́ ge ɛ̀nɛ̀ tɛ de nɛ hura nin'nɛ́ ge?»

¹⁰GASA WAN kifa nú ha̧ Josue: «Mɛ̀ kúr ŋgɔn. Wen ge mɛ ba yí-mɛ gu nɛ nù ge?

¹¹O be Israɛl dee ɗaŋmɔ. Nɛ mbetɛ, wa gbina nɔɔ-tɔk kɔ‘m n'am nɔɔ in wa. Wa kaia o mɔɔ-fom n'am dora wa tɛ kaia-a; wa zu̧u̧ mɔɔ nɔ‘i, ɓɛɛ wa kai hu̧si mgbara tui kɔ-wa;

¹²o be Israɛl beka nyɛm mɛ yor ti o wisɛn kɔ-wa na; wa tɛ zik ɗoŋ e ha̧ o wisɛn kɔ-wa, wen fom baa wa. K’ɛ̀nɛ̀ bá fom nɛ a̧a̧ mgbara'nɛ́ yinɛ na, mi tɛ kaɗi duka-a in'nɛ̀ɛ́.

¹³Mɛ̀ kúr, mɛ̀ ɗáfí war-tɛ dukbíí. Mɛ̀ tɔ̧: ‹Ɛ̀nɛ̀ ɗáfí war-tɛ‘nɛ́ wen sa̧a̧mɔ. Tɔ̧ɔ̧-wen ko GASA WAN Sɔ̧ ko Israɛl nɛ́ mɔ'ɔ: o be Israɛl, mɔɔ-fom a̧a̧ mgbara'nɛ́. Ɛnɛ beka yor ti o wisɛn k’ɛ́nɛ́ na hɔ ŋgimbi n’ɛnɛ baa mɔɔ-fom nɛ a̧a̧ mgbara'nɛ́ yinɛ.›

¹⁴Sa̧a̧mɔ mɛ tutuyɛ, ɛnɛ tɛ nɛk nɛ̀ zuduk zuduk, ɓɛɛ zuduk nɛ GASA WAN tɛ usi nɛ tani, tɛ nɛk nɛ̀ nú-gara; ɓɛɛ nú-gara nɛ GASA WAN tɛ usi tɛ nɛk nɛ̀ nutua; ɓɛɛ nutua nɛ GASA WAN tɛ usi tɛ nɛk nɛ̀ bíí kpɔk kpɔk.

¹⁵Wi-de-mɔɔ-fom nɛ tani tɛ ba, wì dɔ́ a̧ yí wee in o mɔ kɔ̧-a̧ lɛŋ, wen a̧ gbina nɔɔ-tɔk ko GASA WAN, a̧ foo búù pi̧ zu Israɛl.»

¹⁶Nɛ mɔ'ɔ nɛ Josue kura mɛ tutuyɛ sut; a̧ mɔi̧a o be Israɛl a nɛ̀ zuduk, ɓɛɛ tani ba zuduk ko Juda.

¹⁷A̧ saa o bíí tɛ o nú-gara ko Juda pii ti, ɓɛɛ tani ba nú-gara ko o be Zera. A̧ saa o bíí nú-gara ko Zera pii ti, ɓɛɛ tani ba nɛ nutua ko Zabdi.

¹⁸A̧ saa o bíí nutua ko Zabdi kpɔk kpɔk pii ti, ɓɛɛ tani ba nɛ Akaŋ, bem ko Karmi, be-koo Zabdi, nú-gara ko Zera, zuduk ko Juda.

¹⁹Josue tɔ̧ɔ̧ ha̧ Akaŋ: «Bem kɔ‘m, mɛ̀ gásí GASA WAN Sɔ̧ ko Israɛl, mɛ̀ tɔ̧́ kpasawen ti a̧, mɛ̀ tɔ̧́ mɔ nɛ mɛ dea ha̧‘m, ká mɛ́ hu̧si nɛ‘m na.»

²⁰Akaŋ kifa nú ha̧ Josue: «Nɛ́ kpasawen, mɛ̀ nɛ́ mi a̧ dee ɗaŋmɔ in GASA WAN Sɔ̧ ko Israɛl. Mɔ n'am dea nɛ́ mɔ'ɔ:

²¹mi zɔka ŋma laa, wan mɛ nú Sinɛar nɛ dee nyɛmna sɛn mgbara mɔɔ-oi-biro, kɔya bu-mbɔi gɔmŋmaa-yiitoo in lɔr tɛ reeta kilo. Wɔ-a gbɛa'm ɓɛɛ mi kai. Mi hu̧sa̧ mɔɔ nɔ‘i lɛŋ ɗɔɔ nù sɛn kɔ̧ tua kɔ‘m, ɓɛɛ bu-mbɔi a̧a̧ nɛ ɗɔɔ-aa mɛ.»

²²Josue toma o bíí, ɓɛɛ wa ma yì nɛnɛ hɔ kɔ̧ tua ko Akaŋ; wa nɛɛ kpa gasa laa n'aa hu̧sa̧, nɛ̀ bu-mbɔi a̧a̧ ɗɔɔ-aa'i kɔ̧ tua kɔ̧-a̧.

²³Wa kaia mɔɔ nɔ‘i lɛŋ tɛnɛ ti Josue in o be Israɛl. Wa kaia a nù ti GASA WAN.

²⁴Josue in o be Israɛl lɛŋ mgbɔɔ Akaŋ bem ko Zera in o bem kɔ̧-a̧ mɛ wiwii-a in be-okoo-a, o ndai, o tuifuu ká bá nɛ̀ geɗek mɔ-dai kɔ̧-a̧ si kɔ̧ ɗɔŋgɔ Akɔr. Wa kaia bu-mbɔi kɔ̧-a̧, de gasa laa kɔ̧-a̧, tua-laa kɔ̧-a̧ in o mɔ kɔ̧-a̧ lɛŋ si hi̧i̧ mbɛt.

²⁵Ɓɛɛ Josue ak a̧: «Wen ge mɛ baa bɔnɛ pi̧ mgbara yɛ ge? GASA WAN a̧ tui bɔnɛ pi̧ zu mɛ sɔsɔɔ mbɛt.» Ɓɛɛ o be Israɛl lɛŋ yo a̧ nɛ ta gbɛ; wa yoo o bíí kɔ̧-a̧ lɛŋ nɛ ta gbɛ mbɛt, ɓɛɛ wa pi̧ wee tɛ mɔ lɛŋ.

²⁶Wa mɔi̧a ta nɛ kusa-a a zu Akaŋ. Ta nɔ‘i a̧ ya hɔ sɔsɔɔ‘i. See GASA WAN ga̧a̧. Nɛ́ mɔ‘i a̧ dea ha̧ wa mɛ sa fara'i ɗɔŋgɔ Akɔr.[2] Nin'i a̧ duk hɔ sɔsɔɔ‘i.