Read Northwest Gbaya 1 TIMOTEE 2 Bible Online

1 TIMOTEE 2 - Northwest Gbaya bible

1 TIMOTEE 2

¹Kuti-mɔ n'am kɔ̧ɔ̧ ha'i mɛ́ de, mɛ̀ nɛ́ ha'i mɛ́ ak mɔ, kɔfi nɛ̀ Sɔ̧, ai nɛ̀ nú, de nɛ̀ osoko ha̧ a̧ wen o bíí lɛŋ,

²wen o wannu in o gasawi nɛ̀ duk zu o bíí, wen h’ɛ́ɛ́ mɛ́ ya keɗeŋ tɛ ga̧a̧mɔ, tɛ yuu-kíí Sɔ̧, in tu̧u̧-tɛ-mɔ.

³Mɔ nɛ̀ ɔ dee, nɛ̀ dee yí Sɔ̧, Wan-kpasi yɛ,

⁴nɛ̀ kɔ̧ɔ̧ ha̧ bíí lɛŋ mɛ́ kpasi in mɛ́ iŋ kpasawen, nɛ́ mɔ‘i.

⁵Wen Sɔ̧ nɛ́ kpɔk, in wi-ɗafi-mgbara-bíí in Sɔ̧ kpɔk ɓɛɛ; wi’ɛi nɛ́ Jesu Krist.

⁶A̧ nɛ́ wi nɛ̀ ha̧a̧ tɛ-a gɔn nɛ̀ zu o bíí lɛŋ; mɔ‘i nɛ́ mɔɔ-sedaako n'aa dea tɛ́ ŋgimbi nɛ̀‘i gɔna,

⁷ɓɛɛ a̧ e'm nɛ̀ mɔ-geŋa in betom-aa wen ha̧‘m mɛ́ usi mɔ zu yuwar kɔ̧ɔ̧ɗɔɔwen in kpasawen ha̧ o gɔni-dùk. Nɛ́ kpasawen a̧‘m tɔ̧, ndela bo na.

⁸Mi kɔ̧ɔ̧ ha̧ o wiwii mɛ́ kɔfi Sɔ̧ fara lɛŋ, gɔm nɛ̀ er, nɛ̀ sa̧a̧-see, bó nɛ́ nɛ̀ nyimsea in kpɛri na.

⁹Ɓɛɛ nɛ̀ ko okoo, wa a̧ pí̧ laa nɛ̀ de-a; tu̧u̧-tɛ-mɔ a̧ dúk tɛ ɗafa-tɛ kɔ-wa, ká wa á káná-lɔr in kísí, ɗafi nɛ̀ mui̧-zu, a nɛ̀ de laa yak zale na.

¹⁰Ɓɛɛ ɗafa-tɛ kɔ-wa a̧ dúk nɛ́ de tom nɛ̀ nyɛma yí deemɔ ko okoo-yu-kíí Sɔ̧.

¹¹Ŋgimbi usamɔ, okoo a̧ duk kéɗéŋ nɛ̀ mboozu.

¹²Mi kpɛk ha̧ okoo mɛ́ usi mɔ, kóó mɛ́ duk zu wiwii na. A̧ a̧ dúk nɛ̀ oi nú.

¹³Wen Sɔ̧ dee nɛ́ Adam ti sɛka a̧ biti de Ɛvɛ.

¹⁴Ɓɛɛ bó nɛ́ Adam á̧ mɔ ɔra na; nɛ́ Ɛvɛ á̧ mɔ ɔra, ɓɛɛ a̧ gbin heembea.

¹⁵Zu-a'i, a̧ tɛ́ kpasi wen zu kóó bem, kà a̧ nɛ́ yora nɛ̀ nɔa-a tɛ̀ kɔ̧ɔ̧ɗɔɔwen, tɛ kɔ̧ɔ̧mɔ in duka-a nɛ̀ sa̧a̧-a̧, ká bá nɛ̀ deemɔ nyɛm sɛnɛ.