Read Northwest Gbaya 2 TIMOTEE 1 Bible Online

2 TIMOTEE 1 - Northwest Gbaya bible

2 TIMOTEE 1

¹Nɛ́ mi Paul, nɛ̀ duk nɛ́ betom ko Jesu Krist nyɛm nɛ̀ ɗoŋ mɔ nɛ̀ Sɔ̧ kɔ̧a̧ in nyɛm nɛ̀ ɗoŋ ha̧a̧nú zu duka-kpasa nɛ̀ a̧a̧ tɛ Jesu Krist,

²a̧ tom kalata’ɛ ha̧ bem kɔ‘m Timotee n'am kɔ̧ɔ̧ nyɛmna. Deemɔ nɛ̀ ta-tɛ, deako, in ga̧a̧mɔ ko Dáà k’ɛ́ɛ́ Sɔ̧ in Gasa Wan k’ɛ́ɛ́ Jesu Krist a̧ dúk in'nɛ̀ɛ́.

³Mi de osoko ha̧ Sɔ̧, wan n'am de tom ha̧ a̧ nɛ̀ sa̧a̧-see, hee mɔ'ɔ nɛ̀ o zɔmdáa kɔ‘m dee so ga. Zɛ nɛ wese ɓɔnsɛnɛ, tɛ‘m bi ɗoŋ mɛ́ tɛ kɔfa Sɔ̧ kɔ‘m na.

⁴Kà tɛ‘m mbaŋ ɗoŋ miikɔ̧a̧ kɔ-mɛ, ɓɛɛ mi kɔ̧ɔ̧ nyɛmna mɛ́ zɔk mɛ́ woyo ha̧‘m mɛ́ kpa desee.

⁵Tɛ‘m mbaŋa ɗoŋ kpasa kɔ̧ɔ̧ɗɔɔwen nɛ̀ duk tɛ-mɛ, pɛrti kɔ̧ɔ̧ɗɔɔwen'i duka so tɛ́ zɔmnaa kɔ-mɛ Lois, in nàà kɔ-mɛ Eunis, ɓɛɛ mi iŋa nɛ̀ de-a'e, kale kpɔk kɔ̧ɔ̧ɗɔɔwen'i a̧a̧ tɛ-mɛ mbɛt.

⁶Nɛ́ mɔ‘i s'am mbaŋ tɛ-mɛ nde, mɛ̀ de ha̧ ha̧a̧mɔ ko Sɔ̧ nɛ̀ a̧a̧ tɛ-mɛ ku̧u̧naŋ-a n'am ee nɛ̀ er zu-mɛ‘i mɛ́ duk kpasa siti.

⁷Bó nɛ́ Sɔ̧ ha̧a̧ nɛ́ taamɔ-kíì h’ɛ́ɛ́ na, ɓɛɛ a̧ ha̧a̧ nɛ́ Sa̧a̧ Ɔmi wan mɛ́ ha̧ ŋgai, kɔ̧ɔ̧mɔ, in kasa zu h’ɛ́ɛ́.

⁸Hegɔ ká foe de mɛ́ tɛ̀ dee sedaako wen Gasa Wen k’ɛ́ɛ́ na; ká foe de mɛ́ wen zu'm n'am duk nɛ́ wi-zɔɓɔ wen zu a̧ na mbɛt. Ɓɛɛ mɛ̀ zɔ́k nɛ́ bɔnɛ in am wen zu De Mbe Wen, e nɛ̀ ta nɛ̀ ŋgayamɔ ko Sɔ̧,

⁹nɛ̀ kpasa yɛ, ɓɛɛ sa yɛ nɛ̀ kpasa sa̧a̧ saa-sara, bó nɛ́ wen zu ŋma tom k’ɛ́ɛ́ na, ɓɛɛ nɛ́ wen zu ee-zu-mɔ in deemɔ nɛ̀ ta-tɛ kɔ̧-a̧. Deemɔ nɛ̀ ta-tɛ‘i, a̧ dee so h’ɛ́ɛ́ nɛ̀ ɗoŋ Jesu Krist nɛti ha̧ ŋgimbi lɛŋ,

¹⁰ɓɛɛ mɔ‘i hɔɔ gba̧a̧ kinii tɛ tɛa-a ko Wan-kpasi yɛ, Jesu Krist. Nɛ́ à̧ á̧ ɗaŋa fio yinɛ, ba nɛ̀ duka-kpasa in duka-a kpoo nɛ kpoo e tɛ̀ sa̧a̧mɔ nɛ̀ ɗoŋ De Mbe Wen.

¹¹Sɔ̧ ea'm nɛ̀ mɔ-geŋa, betom, in wi-usi De Mbe Wen.

¹²Nɛ́ mɔ‘i s'am zɔk o bɔnɛ nɔ'ɔ, ɓɛɛ foe de'm na, wen mi iŋa wi n'am kɔ̧ɔ̧ ɗɔaa ha̧ a̧, ɓɛɛ mi e ta'e, a̧ a̧a̧ nɛ̀ ŋgai mɛ́ kasi mɔ n'aa ee er am hɔ tɛ wese'i.

¹³Mɛ̀ ndák nɛ́ ɗoŋ mgbák wen nɛ̀ mɛ́ zia nú‘m, duk nɛnɛ zaŋ kɔ̧ɔ̧ɗɔɔwen in kɔ̧ɔ̧mɔ nɛ̀ a̧a̧ tɛ Jesu Krist.

¹⁴Mɛ̀ kásí demɔ nɛ̀ a̧a̧ tɛ-mɛ‘i nɛ̀ ŋgai ko Sa̧a̧ Ɔmi nɛ̀ dúk tɛ yɛ.

¹⁵Hee mɛ́ iŋa ga, o be Azii lɛŋ ea'm duk, ɓɛɛ Figɛl in Hɛrmɔgɛn a̧a̧ mgbara wa mbɛt.

¹⁶Sɔ̧'ɔ̧ dé ko ha̧ o bíí kɔ̧ tua ko Onesifɔr, wen foe de a̧ tɛ́ zɔɓɔ n'am duk sɛnɛ‘i na, ɓɛɛ ɓɔnsɛnɛ a̧ ha̧ nɛ́ nɔɔ-ŋgiɗi ha̧‘m.

¹⁷A̧ hɔɔ Rɔm hegɔ in kia'm nɛ̀ kpasa-a, ɓɛɛ a̧ kpa'm.

¹⁸Gasa Wan a̧ dé ha̧ a̧ mɛ́ kpa deako er Gasa Wan sɛn tɛ Wese'i. Ɓɛɛ ŋma bíí nɛ̀ iŋa o gbakamɔ lɛŋ n'aa gbaka nɛ̀‘m sɛn Efɛz hee mɛ́ ga bo na.