Read Northwest Gbaya 2 TIMOTEE 3 Bible Online

2 TIMOTEE 3 - Northwest Gbaya bible

2 TIMOTEE 3

¹Mɛ̀ íŋ mɔ'ɔ nɛ̀ de-a: mɔ tɛ́ duk nɛ̀ ŋgaya-a nyɛmna tɛ̀ o sɔŋkur ŋgimbi.

²O bíí tɛ́ kɔ̧ nɛ́ war mɔ kɔ‘i mɛ́ tɛ-wi, wa tɛ́ kɔ̧ mbɔi gan, wa tɛ́ ya nɛ́ o wi-ndikiri-wen, o wi-ŋmaŋ-tɛ, o wi-tɔ̧-ɗaŋ-wen, o wi-de-ŋgazu in dáà in nàà kɔ‘i, o wi nɛ̀ iŋ dee osoko na, in o wi-tu̧-tɛ-mɔ ko Sɔ̧ na,

³o wi-ŋga-see nɛ̀ bó nɛ̀ ko na, o wi-kai-ndaa-wi, o wi-saka-yi, o wi-de-ŋgamɔ, o wi-sɛn-demɔ,

⁴o wi-e-ɗɔra tɛ-wi, o wi-gɔ-tɛ, o wi nɛ̀ gasa-zu ba nɛ̀ ŋgai kɔ-wa; dee wɔ-mɔ tɛ́ duk nɛ́ sɛm kɔ-wa gan Sɔ̧.

⁵Wa tɛ́ usi tɛ-wa nɛ̀ zan hee o wi-yu Sɔ̧ ga; mɔ‘i hegɔ, wa bɛ̧ɛ̧ ŋgayamɔ nɛ̀ a̧a̧ tɛ̀ yuu Sɔ̧ kaɗi. Ká mɛ́ gbam in o pɛrti wi nɔ‘i na.

⁶O ŋma bíí mgbara o wi nɔ‘i nɛ́ o wi nɛ̀ ndɛn nɛ̀ kɔ̧ tua nɛnɛ, ɔr nɛ̀ o ziɓa okoo nɛ̀ ɗaŋmɔ gana zu wa, nɛ̀ ndak nɛ́ ɗoŋ o wɔ-mɔ nɛtɛ nɛtɛ,

⁷duk nɛnɛ tɛ́ yamba mɔ ɓɔnsɛnɛ, ɓɛɛ wa nyɛm mɛ́ iŋ kpasawen na.

⁸Hee mɔ'ɔ nɛ̀ Janɛs in Jambrɛs baa so zu dúk nɛ̀ Moisɛ ga, mɛ̀ nɛ́ hegɔ a̧ o wi nɔ‘i ba nɛ̀ zu dúk nɛ̀ kpasawen mbɛt. Wa nɛ́ o bíí nɛ̀ taamɔ kɔ-wa de na, nɛ̀ kɔ̧ɔ̧ɗɔɔwen kɔ-wa bó nɛ́ kpasamɔ na mbɛt.

⁹Wa beka nɛ́ hɔ ti na, wen o mgbele taamɔ kɔ-wa'i tɛ́ gbo zan yí bíí lɛŋ, hee mɔ ko Janɛs in Jambrɛs ga.

¹⁰Ɓɛɛ kɔ-mɛ, mɛ́ ndaka nɛ́ ɗoŋ usamɔ kɔ‘m nɛ̀ de-a, in deemɔ kɔ‘m, mɔ n'am ta mɛ́ de, kɔ̧ɔ̧ɗɔɔwen kɔ‘m, munyal, kɔ̧ɔ̧mɔ in nyɔŋa-nin kɔ‘m,

¹¹ká bá nɛ̀ ŋgamɔ in o bɔnɛ nɛ̀ kpaa'm sɛn Antiok, Ikonium in Listrɛ. Bɔnɛ n'am zɔka bó nɛ́ mɔɔ-tɔ̧ na, ɓɛɛ Gasa Wan kpasa'm tɛ mɔ'ɔ nɔ‘i lɛŋ.

¹²Wen bíí lɛŋ nɛ̀ kɔ̧ɔ̧ mɛ́ yu Sɔ̧ tɛ Jesu Krist tɛ́ zɔk kànà bɔnɛ.

¹³Ɓɛɛ ko o ɗaŋwi in o wi-ɔr-wi, wa tɛ́ de kànà ɗaŋmɔ siti, ɔr nɛ̀ o bíí in tɛ-wa mbɛt.

¹⁴Ɓɛɛ nɛ̀ war kɔ-mɛ, mɛ̀ yór nɛ̀ nɔa-a tɛ́ mɔ nɛ̀ mɛ́ yamba, nɛ̀ mɛ́ kpɛka'e nɛ́ kpasawen; mɛ́ iŋa wi nɛ̀ mɛ́ yamba mɔ tɛ-a mbɛt.

¹⁵Mɛ́ iŋa sa̧a̧ Yɔramɔ nɛ̀ bem mɛ̀ tɛnɛ; ɓɛɛ nɛ́ sa̧a̧ Yɔramɔ‘i a̧ nyɛma mɛ́ ha̧ iŋa-mgbara-mɔ nɛ̀ tɛ́ mgbɔ mɛ́ tɛ yuwar-kpasa-a nɛ̀ ɗoŋ kɔ̧ɔ̧ɗɔɔwen kɔ-mɛ nɛ̀ a̧a̧ tɛ Jesu Krist.

¹⁶Yɔramɔ lɛŋ tɛ̀ɛ́ nɛ̀ tɛ́ Sɔ̧, ɓɛɛ ɔ dee wen usa-a ha̧ bíí, wen tɔ̧ɔ̧ mbɔrɔ gai nɛ̀ bíí tɛ yɔɔ-kaya, gbak nɛ̀ bíí mɛ́ de mɔ nɛ̀ yuwar-a,

¹⁷wen ha̧ bíí ko Sɔ̧ mɛ́ nyɛm sɛnɛ, dúk nɛ̀nɛ́ nɛ̀ mɔ n'aa tɛ́ de nɛ̀ de tom lɛŋ.