Read Northwest Gbaya 2 TIMOTEE 4 Bible Online

2 TIMOTEE 4 - Northwest Gbaya bible

2 TIMOTEE 4

¹Mi ee mɛ́ in Sɔ̧ in Jesu Krist nɛ̀ tɛ́ tɛ̀ mɛ́ gɔn kita zu o bíí nɛ̀ ya kpasa in nɛ̀ fea, in nɛ̀ nin pia-ɗoŋ in ɔɔ-wan kɔ̧-a̧:

²mɛ̀ tɔ̧́ wen ko Sɔ̧ tɛ̀ de ŋgimbi kóó tɛ̀ ɗaŋ ŋgimbi mbɛt, mɛ̀ kímíí o bíí, gai nɛ̀ wa, ha̧ nɛ̀ nɔɔ-ŋgiɗi ha̧ wa, usi nɛ̀ mɔ nɛ̀ munyal ɓɔnsɛnɛ.

³Ŋgimbi tɛ́ hɔ nɛ̀ o ŋma bíí beka kɔ̧ zia kpasa usamɔ ɓɔna, wa tɛ́ ndak nɛ́ ɗoŋ o wɔ-mɔ kɔ-wa; hegɔ wa tɛ́ hok o gíí wi-usi-mɔ nɛ̀ tɛ́ usi nɛ́ mɔ nɛ̀ wa kɔ̧ɔ̧ mɛ́ zii.

⁴Wa tɛ́ kpe zer-wa tɛ kpasawen zik nɛ̀ tɛ-wa mɛ́ zii nɛ́ o géé to.

⁵Ɓɛɛ kɔ-mɛ, mɛ̀ kásí zu-mɛ tɛ mɔ lɛŋ, mɛ̀ nɔ́ ŋgiɗi tɛ bɔnɛ, ɓɛɛ mɛ̀ dé nɛ́ tom tɔ̧ɔ̧ De Mbe Wen, e nɛ̀ see-mɛ tɛ tom nɛ̀ Sɔ̧ ha̧a̧ ha̧ mɛ́.

⁶Kinii, mi nɛ́ zɛzɛ nɛ̀‘i tɛ́ a, wen ŋgimbi yaka-a kɔ‘m hɔɔ kaɗi.

⁷Mi bìí kpasa biro, mi maa yì hɔ nduti-a, mi kasa kɔ̧ɔ̧ɗɔɔwen.

⁸Mɔ nɛ̀ pɛm am kinii nɛ́ laasɔ̧i̧-wan oi deemɔ nɛ̀ yuwar-a nɛ̀ Gasa Wan, wi-gɔn-kita nɛ̀ yuwar-a, tɛ́ ha̧ ha̧‘m Wese'i; bó nɛ́ ha̧‘m ɛ̀n'am ɓɛɛ na, ɓɛɛ ha̧ o bíí lɛŋ nɛ̀ pɛm pia-ɗoŋ kɔ̧-a̧ nɛ̀ desee.

⁹Mɛ̀ kíí yuwar mɛ́ tɛ̀ɛ́ zɔk am nɛ̀ haya-a,

¹⁰wen Demas ea'm duk, wen n'aa kɔ̧ɔ̧ mɔɔ-zaŋnu wan mɛ́ kinii. A̧ yaka si Tesalonik, Kresaŋ yaka si Galatii, ɓɛɛ Titɛ yak kɔ‘i si Dalmatii mɛ̀.

¹¹Nɛ́ Luk kpɔk a̧ duk in am ɓɛɛ. Mɛ̀ mgbɔ́ Mark tɛnɛ in mɛ̀ɛ́ wen a̧ nɛ́ mgbák wi-gbak-am tɛ́ tom.

¹²Mi toma Tikik si Efɛz mɛ̀.

¹³Ŋgimbi nɛ̀ mɛ́ be tɛ̀ɛ́ tɛ̀, mɛ̀ bá gba-laa kɔ‘m n'am ee tɛ ko Karpas sɛn Troas tɛnɛ ha̧‘m in o kalata kɔ‘m mbɛt, gana gan o kalata-ndàrá.

¹⁴Alɛkzandrɛ, wi-dui-ndɛrɛ dee ɗaŋmɔ in am nyɛmna, ɓɛɛ Gasa Wan tɛ́ kifi er ha̧ a̧ nyɛm nɛ̀ ɗoŋ tom kɔ̧-a̧.

¹⁵Mɛ́ mbɛt, mɛ̀ zɔ́k tɛ-mɛ nɛ̀ a̧, wen a̧ sɛna so wen k’ɛ́ɛ́ nyɛmna.

¹⁶Tɛ́ kuti ɓaa wen kɔ‘m, ŋma bíí mɛ́ yor katɛ‘m bo na; wa pɛsa lɛŋ e'm ɛ̀n'am, ɓɛɛ ká Sɔ̧ é mɔ‘i zu wa na.

¹⁷Nɛ́ Gasa Wan a̧ yora katɛ‘m, ha̧ nɛ̀ ŋgai ha̧‘m, wen ha̧‘m mɛ́ tɔ̧ wen ko Sɔ̧ nɛ̀ oi-aa lɛŋ ha̧ o gɔni-dùk mɛ́ zii dam ŋmaa. Gasa Wan kpasa'm kɔ̧ nú dila.

¹⁸Gasa Wan tɛ́ gbo'm yinɛ tɛ́ ɗaŋmɔ lɛŋ, a̧ tɛ́ kpas'am ha̧‘m mɛ́ ye tɛ́ Wan kɔ̧-a̧ yiwese mɛ̀. Gasamɔ a̧ dúk nɛ́ kɔ̧-a̧ kpoo nɛ kpoo! Aamɛn.

¹⁹Mɛ̀ fán Priska, Akilas in o bíí kɔ̧ tua ko Onesifɔr.

²⁰Ɛrast ɓɔna Kɔrint mɛ̀. Mi ee Trofim nɛ̀ zɛ́ɛ́ ɓɔn Milɛt.

²¹Mɛ̀ kíí yuwar mɛ́ hɔ hɛ̧ɛ̧ sɛka ɓar dea. Eubul, Pudɛns, Lin in Klodia fana mɛ́ ká bá nɛ̀ o nya-ɛɛ lɛŋ.

²²Gasa Wan a̧ dúk in mɛ̀ɛ́. Deemɔ nɛ̀ ta-tɛ ko Sɔ̧ a̧ dúk in'nɛ̀ɛ́ lɛŋ.