Read Northwest Gbaya TITƐ 1 Bible Online

TITƐ 1 - Northwest Gbaya bible

TITƐ 1

¹Nɛ́ mi Paul, wi-de-tom ko Sɔ̧, nɛ̀ duk nɛ́ betom ko Jesu Krist mbɛt a̧ tom kalata’ɛ. Sɔ̧ ea'm mɛ́ mgbɔ o bíí n'aa hoka ha̧ wa mɛ́ kɔ̧ ɗɔaa ha̧ a̧, ha̧ wa mɛ́ iŋ kpasawen nyɛm nɛ̀ ɗoŋ yuu Sɔ̧,

²in ha̧ wa mɛ́ e ta nɛ̀ duka-kpasa kpoo nɛ kpoo. Sɔ̧ nɛ̀ de ndela na, ha̧a̧ so nú h’ɛ́ɛ́ zu-a nɛti ku̧u̧naŋ ŋgimbi mɛ̀.

³Ŋgimbi n'aa gɔna'i nyɛma kaɗi, ɓɛɛ a̧ usi wen kɔ̧-a̧ tɛ tom n'aa ee er-am'i, nyɛm nɛ̀ ɗoŋ mɔ nɛ̀ Sɔ̧, Wan-kpasi yɛ tɔ̧a̧.

⁴Mi tom kalata’ɛ ha̧ mɛ́ Titɛ, nɛ̀ duk nɛ́ mgbák bem kɔ‘m nɛ̀ ɗoŋ kɔ̧ɔ̧ɗɔɔwen. Deemɔ nɛ̀ ta-tɛ in ga̧a̧mɔ ko Sɔ̧ Dáà in ko Krist Jesu Wan-kpasi yɛ a̧ dúk in mɛ̀ɛ́.

⁵Mɔ n'am ee nɛ̀ mɛ́ ɓɔn sɛn Krɛt'i, mɛ̀ nɛ́ wen ha̧ mɛ́ mɛ́ ɗafi oi-mɔ lɛŋ nɛ̀ ɓɔna, in ha̧ mɛ́ mɛ́ e o kuti-wi zu zuduk bíí ko Sɔ̧ tɛ̀ o ye nɔ‘i kpɔk kpɔk, hee mɔ'ɔ n'am tɔ̧ɔ̧ so ha̧ mɛ ga.

⁶Kuti-wi tɛ́ duk nɛ́ wi nɛ̀ wen bo zu a̧ na, nɛ̀ a̧a̧ nɛ̀ kóò kpɔk, o bem kɔ̧-a̧ tɛ́ duk nɛ́ o bem nɛ̀ kɔ̧ɔ̧ ɗɔaa nɛ̀ duk nɛ̀ mboozu, nɛ̀ deemɔ kɔ-wa ɔ dee.

⁷Gasawi nɛ̀ duk zu zuduk bíí ko Krist tɛ́ duk kànà nɛ́ bíí nɛ̀ wen bó zu a̧ na wen a̧ nɛ́ gasawi zu tom ko Sɔ̧; a̧ beka duk nɛ́ wi-gasi-zu, wi-de-nyimsea, wi-gbɛ-dɔ̧ɔ̧, wi-de-ŋgamɔ, kóó wi-nyɔŋ-yí-bíí na mbɛt.

⁸Wi’ɛi tɛ́ duk nɛ́ wi-kpɛk-gɛnɛ, wi-de-demɔ, wi-kasi-zu, wi-de-mɔ nɛ̀ yuwar-a, wi nɛ̀ deemɔ kɔ̧-a̧ ɔ sa̧a̧ nɛ̀ duk mgbítíŋ mbɛt.

⁹Duka-a kɔ̧-a̧ tɛ́ ndaɗi in kpasawen nɛ̀ nyɛma ha'i mɛ́ kɔ̧ ɗɔaa, nyɛm nɛ̀ ɗoŋ usamɔ nɛ̀‘i usa ha̧ a̧; hegɔ, a̧ nyɛma usa mgbák mɔ tɔ̧ nɛ̀ mbɔrɔ ha̧ o bíí wen kpee nú o wi-si-kafɛ.

¹⁰O wi-ŋgazu, o wi-bur-wen géè, in o wi-ɔr-wi a̧a̧ sɛnɛ nɛ̀ dɔka-a, gan gan sɛn mgbara o Juif.

¹¹Mɛ̀ kpé nú-wa; wa sakali nɛ́ o tua-nam nɛ̀ oi-aa lɛŋ nɛ̀ usamɔ nɛ̀‘i nyɛm so mɛ́ usi na wen kpaa mbɔi tɛ̀ ɔramɔ.

¹²Ŋma bíí kpɔk mgbara o be Krɛt, nɛ̀ duk nɛ́ mgbák wi-tɔ̧-wen oi nú Sɔ̧ kɔ-wa tɔ̧ɔ̧ so'e: «Mɔ ko o be Krɛt kànà nɛ́ dee ndela ɓɔnsɛnɛ, wa nɛ́ o boko-nam in o wi-tɛɛri nɛ̀ iŋa nɛ́ nyɔŋa mɔ ɓɛɛ.»

¹³Wen'i nɛ́ kpasawen; wen hegɔ mɛ̀ gái wa nɛ̀ ŋgaya-a, wen ha̧ kɔ̧ɔ̧ɗɔɔwen kɔ-wa mɛ́ duk nɛ́ kpasa kɔ̧ɔ̧ɗɔɔwen.

¹⁴Ɓɛɛ ká wa ndák ɗoŋ géé wen ko o Juif in ɗoŋ heembea ko o wi nɛ̀ zika ɗoŋ e ha̧ kpasawen na.

¹⁵Mɔ lɛŋ dúk nɛ̀ sa̧a̧-a̧ wen o wi nɛ̀ war-tɛ ɔ sa̧a̧. Ɓɛɛ ko o wi nɛ̀ war-tɛ sa̧ na, nɛ̀ bɛ̧ɛ̧ kɔ̧ɔ̧ ɗɔaa ha̧ Sɔ̧, mɔ kɔ-wa sa̧ na; iŋamɔ in taamɔ kɔ-wa duk nɛ̀ ndiŋ.

¹⁶Wa'e ndé, wa nɛ́ o wi nɛ̀ iŋa Sɔ̧ wó, ɓɛɛ deemɔ kɔ-wa usi'e wa iŋ Sɔ̧ na. Tom kɔ-wa duk nɛ́ mɔɔ-nyɛr, wa nɛ́ o wi-ŋgazu nɛ̀ nyɛm mɛ́ de ŋma demɔ kpɔk na.