Read Northwest Gbaya HEBREU 1 Bible Online

HEBREU 1 - Northwest Gbaya bible

HEBREU 1

¹Sɔ̧ tɔ̧ɔ̧ so wen ha̧ o zɔmdáa k’ɛ́ɛ́ ɓeemɛ war ɔ dɔka in tɛ̀ yuwar-a nɛtɛ nɛtɛ mbɛt nɛ̀ nú o wi-tɔ̧-wen oi nú-a.

²Ɓɛɛ tɛ́ sɔŋkur ŋgimbi n’ɛ̀ɛ̀ ya sɛnɛ'ɛ, a̧ tɔ̧ɔ̧ wen h’ɛ́ɛ́ nɛ̀ ɗoŋ Bem kɔ̧-a̧. Nɛ̀ ɗoŋ à̧ á̧ Sɔ̧ dee nɛ̀ mɔ lɛŋ, ɓɛɛ nɛ́ à̧ á̧ Sɔ̧ ea wen ha̧ mɔ lɛŋ mɛ́ duk nɛ́ kɔ̧-a̧.

³Bem’ɛi nɛ́ sa̧a̧mɔ nɛ̀ usi nɛ́ gasamɔ ko Sɔ̧, mɔ nɛ̀ a̧a̧ tɛ́ a̧ a̧a̧ tɛ́ Sɔ̧, ɓɛɛ nɛ́ a̧ a̧ kasi mɔ lɛŋ tɛ ŋgayamɔ ko wen kɔ̧-a̧. Ɗoŋ n'aa tɛ̀ɛ́ ɗafi war-tɛ o bíí wen ɗaŋmɔ kɔ-wa kaɗi, a̧ nɛ̀ɛ́ dúk nù nɛ̀ war wii-er Sɔ̧ Wan nɛ̀ ɔ gasa ŋgɔn mɛ.

⁴Nin nɛ̀ Bem’ɛi kpaa gana ko o betom mɛ yiwese mɛ̀; nɛ́ hegɔ mbɛt á̧ à̧ gana nɛ̀ wa lɛŋ.

⁵Mgbara o betom lɛŋ Sɔ̧ tɛ tɔ̧ ha̧ ŋma'e: «Mɛ́ nɛ́ Bem kɔ‘m, mi koo mɛ́ sɔsɔɔ,» kóó‘e: «Mi tɛ́ duk nɛ́ Dáà kɔ̧-a̧ ɓɛɛ a̧ duka nɛ́ Bem kɔ‘m», hɔ̧ɔ̧ na.

⁶Ɓɛɛ ŋgimbi n'aa ee nɛ̀ kaya-bem kɔ̧-a̧ sɛn zaŋnu, a̧ tɔ̧ɔ̧‘e: «O betom ko Sɔ̧ lɛŋ a̧ gú nù ti a̧.»

⁷Nɛ̀ war ko o betom mɛ yiwese, a̧ tɔ̧a̧: «Nɛ́ a̧ a̧ dé ha̧ o betom kɔ̧-a̧ mɛ́ ya hee búk ga, in ha̧ o wi-de-tom kɔ̧-a̧ mɛ́ ya hee leɓe-wee ga.»

⁸Ɓɛɛ a̧ tɔ̧ɔ̧ ha̧ Bem kɔ̧-a̧ hee mɔ'ɔ ga: «Sɔ̧, damti kɔ-mɛ tɛ́ duk ɓɔnsɛnɛ. Dɔra-wan kɔ-mɛ tɛ́ duk nɛ́ dɔra deemɔ nɛ̀ yuwar-a.

⁹Mɛ́ kɔ̧ɔ̧ so nɛ́ deemɔ nɛ̀ yuwar-a, ɓɛɛ mɛ́ sɛn ɗaŋmɔ; mɛ̀ nɛ́ hegɔ, sa Sɔ̧, Sɔ̧ kɔ-mɛ, tɛn nɔ̧́-tortɛ a zu mɛ́, ba nɛ̀ mɛ́ e ŋgɔn mgbara o ŋmà-mɛ lɛŋ.»

¹⁰A̧ tɔ̧ɔ̧ woyo mbɛt'e: «Gasa Wan, nɛ́ ɛ́nɛ́'ɛ dee nù nɛ̀ ku̧u̧naŋ-a mɛ, ɓɛɛ yiwese nɛ́ tom nɛ̀ er'nɛ́ dea.

¹¹O mɔɔ nɔ‘i lɛŋ tɛ́ ɗaŋ, ɓɛɛ kànà nɛ́ ɛ́nɛ́'ɛ tɛ́ duk ɓɔnsɛnɛ. Duka-a ko o mɔɔ nɔ‘i hɔɔ ŋmaa in laa nɛ̀ sɔk, ɓɛɛ a̧ka̧ a nù'ɛ ga.

¹²Ɛ́nɛ́ tɛ́ gbin wa a zu ŋmaa hee mɔ'ɔ nɛ̀‘i gbin nɛ̀ gba-laa’ɛ ga. Ɛ́nɛ́ tɛ́ kpai wa hee mɔ'ɔ nɛ‘i kpai nɛ̀ laa’ɛ ga. Ɓɛɛ k’ɛ́nɛ́, ɛ́nɛ́ kpai na, nduti pɛ duka-a k’ɛ́nɛ́ bó na hegɔɔ kpoo nɛ kpoo.»

¹³Sɔ̧ tɔ̧ɔ̧ ha̧ ŋma betom'e: «Mɛ̀ dúk nù nɛ̀ war wii-er-am hɔ ŋgimbi n'am tɛ́ de ha̧ mɛ́ mɛ́ kpa ŋgai zu o wi-sɛn-mɛ», kaɗi nde?

¹⁴Bó nɛ́ o betom mɛ yiwese lɛŋ nɛ́ o ɔmi nɛ̀ ya wen dee tom, nɛ̀ Sɔ̧ tom wa mɛ́ gbak o bíí nɛ̀ tɛ́ kpa yuwar-duka-kpasa nɛ̀ mɔɔ-oi na nde?