Read Northwest Gbaya HEBREU 10 Bible Online

HEBREU 10 - Northwest Gbaya bible

HEBREU 10

¹Heembea duk nɛ́ gi̧ɔ̧ kpasamɔ nɛ̀ tɛ́ hɔ, ɓɛɛ bó nɛ́ usi nɛ́ mgbák kiitɛ mɔ‘i na. Hegɔ, a̧ bó nɛ̀ ŋgai tikiɗi, kóó nɛ̀ oi kpɔk ɗafa-sɔ̧ ɓɔnsɛnɛ pɛ lɛŋ yaknɛ‘i, mɛ́ de ha̧ o wi nɛ̀ tɛ́ pii tɛ́ Sɔ̧ mɛ́ nyɛm sɛnɛ na.

²Kà bó só hegɔ na, wa tɛ̀ɛ́ e so ɗafa-sɔ̧ duk, wen war-tɛ-wa nyɛma sɛnɛ war kpɔk kaɗi, ɓɛɛ wa beka ta so mɔ zu ɗaŋmɔ ɓɔna.

³Ɓɛɛ mɔ nɛ̀ de'i, o ɗafa-sɔ̧ nɔ‘i mbaŋ nɛ́ tɛ o bíí wen ɗaŋmɔ kɔ-wa tɛ́ pɛ kpɔk kpɔk,

⁴wen tɔk o wiwii-ndai in o vala-gbadua beka nyɛm mɛ́ ba ɗaŋmɔ yinɛ tɛ-wi na.

⁵Hegɔ ŋgimbi nɛ̀ Krist tɛ̀ɛ́ ye so nɛnɛ zaŋnu’ɛ, a̧ tɔ̧ɔ̧ ha̧ Sɔ̧: «Bó nɛ́ ɛ́nɛ́ kɔ̧ɔ̧ so nɛ́ ɗafa'nɛ́ in ha̧a̧mɔ h’ɛ́nɛ́ na; ɓɛɛ ɛ́nɛ́ de kiitɛ ha̧‘m.

⁶Dɔɔ-kpoo-sɔ̧ in ɗafa'nɛ́ wen zu ɗaŋmɔ de so tɛ‘nɛ́ na.

⁷Hegɔ mi tɔ̧a̧: Mí nɛ́ mɔ'ɔ, wen mɛ̀ nɛ́ mi a̧ Yɔramɔ tɔ̧ɔ̧ wen zu-a zaŋ kara kalata'e: Sɔ̧, mi tɛ̀ɛ́ mɛ́ de mɔ n’ɛ̀nɛ̀ kɔ̧a̧.»

⁸A̧ tɔ̧ɔ̧ so'e: «Bó nɛ́ ɛ́nɛ́ kɔ̧ɔ̧ so o ɗafa'nɛ́, o ha̧a̧mɔ, o dɔɔ-kpoo-sɔ̧ in o ɗafa'nɛ́ wen zu ɗaŋmɔ na; wa de so tɛ‘nɛ́ na.» O mɔɔ nɔ‘i nɛ́ heembea a̧ tɔ̧ɔ̧ so'e a̧‘i dé.

⁹Hegɔ a̧ tɔ̧a̧: «Mí nɛ́ mɔ'ɔ, mi tɛ̀ɛ́ mɛ́ de mɔ n’ɛ̀nɛ̀ kɔ̧a̧.» Nɛ́ mɔ'ɔ nɛ̀ Sɔ̧ yaia kuti yuwar gasa a̧ yinɛ, e nɛ̀ yiitoo-aa.

¹⁰Mɔ nɛ̀ Sɔ̧ kɔ̧a̧ nɛ́ mɔ nɛ̀ Jesu Krist dea ha̧ nɛ̀ tɛ-wi war kpɔk ha̧ war-tɛ yɛ mɛ́ sa̧.

¹¹Wi-ɗafi-sɔ̧ lɛŋ yor ŋgɔn wese kpɔk kpɔk de nɛ̀ tom kɔ‘i, ɗafi nɛ̀ Sɔ̧ ɓɔnsɛnɛ tɛ̀ kpɔk yuwar-a nɛ̀ nyɛm mɛ́ ba ɗaŋmɔ yinɛ tɛ-wi na ndó-ndó-ndó.

¹²Ɓɛɛ nɛ̀ war ko Krist, ɗoŋ n'aa ha̧a̧ tɛ-a ɗafi nɛ̀ Sɔ̧ war kpɔk wen ɗaŋmɔ kaɗi, ɓɛɛ a̧ dúk nù nɛ̀ war wii-er Sɔ̧ kpoo nɛ kpoo.

¹³A̧ duk hi̧i̧ pɛm nɛ̀ ŋgimbi nɛ̀ Sɔ̧ tɛ́ de ha̧ a̧ mɛ́ kpa ŋgai zu o wi-sɛn-a.

¹⁴Ha̧a̧ tɛ-a n'aa ha̧a̧ war kpɔk'i dee ha̧ mɔ ko o bíí n'aa de ha̧ war-tɛ-wa mɛ́ sa̧‘i mɛ́ nyɛm sɛnɛ kpoo nɛ kpoo.

¹⁵Ɓɛɛ Sa̧a̧ Ɔmi mbɛt dee sedaako wen'i h’ɛ́ɛ́, tɔ̧ nɛnɛ‘e:

¹⁶«Nɔɔ-tɔk n'am tɛ́ nɔ in wa, h’ɛ́ɛ́ mɛ́ ndaɗi in ŋmaa ɗoŋ ŋgimbi'i nɛ́ mɔ'ɔ: Gasa Wan tɔ̧a̧‘e: o heembea kɔ‘m n'am tɛ́ ha̧ ha̧ wa'i, mi tɛ́ e kɔ̧ see-wa, ɓɛɛ mi yɔra tɛ̀ taamɔ kɔ-wa mbɛt.

¹⁷Ɓɛɛ tɛ‘m beka mbaŋ ɗoŋ o ɗaŋmɔ in yɔɔ-kaya kɔ-wa na ndó-ndó-ndó.»

¹⁸Wen fara nɛ̀ ea-ɗaŋmɔ a̧a̧ sɛnɛ, wi beka ha̧ mɔ wen zu ɗaŋmɔ ɓɔna.

¹⁹Hegɔ, o nya'm, ɛ́ɛ́ iŋa nɛ̀ mbetɛ ɛ́ɛ́ tɛ́ ye si kɔ̧ sa̧a̧-fara nɛ̀ ɗoŋ tɔk tɛ Jesu.

²⁰A̧ hu̧i̧a̧ mbe yuwar h’ɛ́ɛ́ ɓir nɛ̀ tɛ́ babir-laa yak; yuwar'i nɛ́ mɔ nɛ̀ duk kpasa wen mɛ̀ nɛ́ kiitɛ-a.

²¹Ɛ́ɛ́ a̧a̧ nɛ̀ wi-ɗafi-sɔ̧ nɛ̀ ɔ gasa nɛ̀ Sɔ̧ ee mɛ duk zu tua kɔ‘i.

²²Hegɔ, ɛ̀ɛ̀ ɗɔ́ŋ si katɛ Sɔ̧ nɛ̀ sa̧a̧-see, nɛ̀ kpasa kɔ̧ɔ̧ɗɔɔwen, kɔ̧ see yɛ sa̧a̧ tɛ o ɗaŋ taamɔ, ɓɛɛ wa zui yɛ nɛ̀ de gɛɗa yi mbɛt.

²³Ɛ̀ɛ̀ yór nɛ̀ nɔa-a zu mɔ n’ɛ̀ɛ̀ e nɛ̀ ta, n’ɛ̀ɛ̀ tɔ̧ wen-aa nɛnɛ'ɛ, wen Sɔ̧, wi nɛ̀ ha̧a̧ nú, nɛ́ wi-yor-ɗoŋ-wen kɔ‘i.

²⁴Ɛ̀ɛ̀ tɔ̧́ mbɔrɔ ha̧ nɛ̀ nɔɔ-ŋgiɗi ha̧ ŋmaa, h’ɛ́ɛ́ mɛ́ kɔ̧ ŋmaa de nɛ̀ demɔ ha̧ ŋmaa in o ŋmaa.

²⁵K’ɛ́ɛ́ e mɔi̧a-a k’ɛ́ɛ́ in o ŋmaa dúk hee mɔ'ɔ nɛ̀ o ŋma bíí de’ɛ ga na; ɓɛɛ ɛ̀ɛ̀ tɔ̧́ mbɔrɔ ha̧ nɛ̀ nɔɔ-ŋgiɗi ha̧ o ŋmaa, gan gan hee mɔ'ɔ n’ɛ̀nɛ̀ zɔk'e Wese ko Gasa Wan a̧ hɛɗi tɛnɛ‘i ga.

²⁶Wen k’ɛ̀ɛ̀ nɛ́ saka yí-ɛɛ de nɛ̀ ɗaŋmɔ ɗoŋ n’ɛ̀ɛ̀ iŋa mgbák kpasawen kaɗi, ŋma ɗafa-sɔ̧ nɛ̀‘i tɛ́ ɗafi mɛ́ ba ɗaŋmɔ‘i yinɛ bo na.

²⁷Ɓaa mɔ nɛ̀ tɛ́ kpa yɛ ɗoŋ-aa nɛ́ kita in ŋga wee nɛ̀ tɛ́ dɔ o wi-ŋgazu yinɛ.

²⁸Kà ŋma bíí mbo zu tɛ heembea ko Moisɛ na, wi beka de ko ha̧ wi’ɛi na; o wi-sedaako nɛ́ bòò yiitoo kóó taar zu mɔ‘i, ko wi’ɛi kànà nɛ́ fio ɓɛɛ.

²⁹Ɓɛɛ wi nɛ̀ e Bem ko Sɔ̧ tɛ̀ geemɔ, zɔk tɔk ha̧a̧nú ko Sɔ̧ nɛ̀ dee ha̧ war-tɛ-a mɛ́ sa̧ hee kpasamɔ ga na; a̧ ɗaŋ nɛ́ nin Sa̧a̧ Ɔmi, wan-de-mɔ nɛ̀ ta-tɛ. Ɛ̀nɛ̀ tá war ŋga bɔnɛ nɛ̀ tɛ́ tik zu wi’ɛi!

³⁰Wen ɛ́ɛ́ iŋa wi nɛ̀ tɔ̧ɔ̧ wen’ɛ: «Kifa-er nɛ́ kɔ‘m, nɛ́ mi'i tɛ́ ha̧ mɔɔ-oi-tom kɔ-wa ha̧ wa.» A̧ tɔ̧ɔ̧ woyo'e: «Gasa Wan tɛ́ gɔn kita zu dukbíí kɔ‘i.»

³¹Tika-a kɔ̧ er Sɔ̧ nɛ̀ duk kpasa nɛ́ ŋgayamɔ nyɛmna.

³²Tɛ‘nɛ́ a̧ mbáŋ ɗoŋ mɔ nɛ̀ hɔɔ so zu'nɛ́ nɛti ŋgimbi n’ɛ̀nɛ̀ kpaa só nɛ̀ sa̧a̧mɔ nɛ̀ mbe-a: bɔnɛ tika zu'nɛ́ ɓɛɛ ɛ́nɛ́ yor nɛ̀ nɔa-a.

³³Ɓan na, ɓɛɛ wa da̧a̧‘nɛ́, de nɛ̀ bɔnɛ in'nɛ̀ɛ́ mgbara o bíí; ɓan na, ɓɛɛ ɛ́nɛ́ yee ɗoŋ o bíí nɛ̀ wa de bɔnɛ in wa mbɛt.

³⁴Ɛ́nɛ́ zɔka só bɔnɛ in o wi-zɔɓɔ kpɔk, ɓɛɛ ɛ́nɛ́ ya nɛ̀ desee ŋgimbi nɛ̀ o bíí kaia o mɔ k’ɛ́nɛ́ yaknɛ mbɛt, wen ɛ́nɛ́ iŋa'e, ɛ́nɛ́ a̧a̧ nɛ̀ mbɔi nɛ̀ gana i̧i̧ nɔ‘i, ɓɛɛ nɛ̀ tɛ́ duk ɓɔnsɛnɛ.

³⁵Ɓɛɛ ká gɛ̧ɛ̧mɔ bá‘nɛ́ tɛ̀ ee-ta k’ɛ́nɛ́ na, wen gasa mɔɔ-oi-aa a̧a̧ sɛnɛ.

³⁶Ɛ̀nɛ̀ kpá nɔɔ-ŋgiɗi, wen nɛ́ mɔ‘i a̧ tɛ́ de h’ɛ́nɛ́ mɛ́ de nɛ́ mɔ nɛ̀ Sɔ̧ kɔ̧a̧, h’ɛ́nɛ́ mɛ́ kpa mɔ n'aa ha̧a̧ so nú sɛnɛ:

³⁷«Wen ɗoŋ-aa nyɛi̧ ɓɔna, ɗoŋ ŋgimbi nyɛi̧ na, ɓɛɛ wi nɛ̀ tɛ́ tɛ‘i hɔa, a̧ beka nik naŋ-a na.

³⁸Wi-de-mɔ nɛ̀ yuwar-a yí‘m, tɛ́ duk kpasa wen zu kɔ̧ɔ̧ɗɔɔwen, ɓɛɛ kà a̧ zik tɛ-a sí ɗoŋ, sɔ̧-tɛ‘m beka kpa desee zu a̧ ɓɔna.»

³⁹Ɓɛɛ k’ɛ́ɛ́, ɛ́ɛ́ bó nɛ́ o wi-zik-tɛ si ɗoŋ wen yɔa-a na; ɛ́ɛ́ nɛ́ o wi nɛ̀ kɔ̧ɔ̧ ɗɔaa ha̧ sɔ̧-tɛ-ɛɛ mɛ́ kpasi.