Read Northwest Gbaya HEBREU 12 Bible Online

HEBREU 12 - Northwest Gbaya bible

HEBREU 12

¹Hegɔ war k’ɛ́ɛ́, hee mɔ'ɔ nɛ̀ gíí o wi-sedaako a̧a̧ sɛnɛ zik yɛ ga, ɛ̀ɛ̀ síŋ o tui a nù lɛŋ, in ɗaŋmɔ nɛ̀ ɓan na, ndaɗa tɛ̀ yɛ'ɛ, ɓɛɛ ɛ̀ɛ̀ má yi nɛ̀ kpee-see tɛ yuwar nɛ̀ duk ti yɛ‘i.

²Yí-ɛɛ a̧ dúk ɓɔn tɛ̀ wi nɛ̀ de ha'i mɛ́ kpa kɔ̧ɔ̧ɗɔɔwen de nɛnɛ ha'i mɛ́ nyɛm sɛnɛ. Wi’ɛi nɛ́ Jesu nɛ̀ ee kpaa desee kɔ‘i dúk; a̧ kpɛka fio, ɓɛɛ foe wen búù nɛ̀ ba wi nɛ̀ fe zu te-diŋa de a̧ na, ɓɛɛ a̧ duk nù ká̧ damti ko Sɔ̧ nɛ̀ war wii-er.

³Ɛ̀nɛ̀ tá mɔ wen wi nɛ̀ nɔɔ só ŋgiɗi zu pɛrti sɛnmɔ ko o ɗaŋwi hegɔ, wen ká dita-see tɛ̀ɛ́ ba ŋgai k’ɛ́nɛ́ na.

⁴Tɛ́ biro n’ɛ̀nɛ̀ bí in ɗaŋmɔ, tɔk-tɛ‘nɛ́ tɛ́ a nù hɔ̧ɔ̧ na,

⁵nɛ́ mɔ'ɔ nɛ̀ tɛ‘nɛ́ bíí ɗoŋ mbɔrɔ nɛ̀ Sɔ̧ tɔ̧ɔ̧ so h’ɛ́nɛ́ hee ha̧ o bem kɔ‘i ga, wen a̧ tɔ̧ɔ̧ so'e: «Bem kɔ‘m, kà Gasa Wan gúsí mɛ́, ká mɛ́ kpa ɗaŋsee na. Ɓɛɛ ká gɛ̧ɛ̧mɔ ba mɛ́ ŋgimbi n'aa gai mɛ́ na.

⁶Wen Gasa Wan gusi nɛ́ bíí n'aa kɔ̧a̧, a̧ usi bɔnɛ usi ha̧ o bem n'aa kpɛk.»

⁷Bɔnɛ n’ɛ̀nɛ̀ zɔk'i, nɛ́ wen h’ɛ́nɛ́ mɛ́ iŋ mɔ; Sɔ̧ de mɔ in'nɛ̀ɛ́ hee mɔ'ɔ nɛ̀ dáa-wan-bem de nɛnɛ in bem kɔ‘i ga. Ŋma bem nɛ̀ dáà gusi na so sɛnɛ?

⁸Sɔ̧ gusi o bem kɔ‘i lɛŋ gusi, ɓɛɛ kà a̧ gúsí so ɛ́nɛ́ na, ɛ́nɛ́ nɛ́ o be-dàlà, nɛ̀ bó nɛ́ mgbák o bem na.

⁹Ɛ́ɛ́ a̧a̧ so nɛ̀ o dáà k’ɛ́ɛ́ mɛ́ zaŋnu’ɛ nɛ̀ usa so mɔ h’ɛ́ɛ́, ɓɛɛ nɛ́ mɔ'ɔ n’ɛ̀ɛ̀ mbòó zu ha̧ wa; ɓɛɛ bó nɛ́ ɛ́ɛ́ tɛ̀ɛ́ mbo so zu gan ha̧ Dáà k’ɛ́ɛ́ mɛ́ yiwese, wen duka-kpasa na nde?

¹⁰O dáà k’ɛ́ɛ́ mɛ́ zaŋnu’ɛ gusa yɛ tɛ ŋma be ŋgimbi nyɛm nɛ̀ ɗoŋ taamɔ kɔ-wa, ɓɛɛ nɛ̀ war ko Sɔ̧, kà a̧ gúsí yɛ, mɛ̀ nɛ́ wen gbaka yɛ, h’ɛ́ɛ́ mɛ́ kpa duka-a nɛ̀ sa̧a̧-a̧ hee war kɔ̧-a̧ ga.

¹¹Gusa-wi lɛŋ bó nɛ́ mɔɔ-desee tɛ ŋgimbi-a na, mɛ̀ nɛ́ mɔɔ-tu̧u̧-see; ɓɛɛ nɛ̀ ɗoŋ, waya mɔɔ-oi-gusa-wi'i nɛ́ ga̧a̧mɔ in deemɔ nɛ̀ yuwar-a mbɛt.

¹²Wen hegɔ, ɛ̀nɛ̀ nyáfí er'nɛ́ nɛ̀ mɔka, in o zugur'nɛ́ nɛ̀ dora,

¹³ɓɛɛ ɛ̀nɛ̀ ɗáfí nɛ́ tana war ha̧ naŋ‘nɛ́, wen ha̧ naŋ wi-kum mɛ́ nyafi, nɛ̀ bó nɛ́ ha̧ mɛ́ nyun nú ŋmaa na.

¹⁴Ɛ̀nɛ̀ kíí h’ɛ́nɛ́ mɛ́ duk tɛ̀ ga̧a̧mɔ in o bíí lɛŋ, ɓɛɛ ɛ̀nɛ̀ kíí ha̧ war-tɛ‘nɛ́ mɛ́ sa̧ mbɛt, wen kà bó hegɔ na, wi beka zɔk Gasa Wan na.

¹⁵Ɛ̀nɛ̀ mbó ta'nɛ́ wen ká ŋma bíí mgbara'nɛ́ tɛ́ɛ̀ yu zaŋ deemɔ nɛ̀ ta-tɛ ko Sɔ̧; ɛ̀nɛ̀ mbó ta'nɛ́ wen ká ŋma bíí mgbara'nɛ́ tɛ́ɛ̀ duk hee paŋ kunin-te ga, ká a̧ tɛ́ɛ̀ ɓɔ, sakali nɛ ɛ́nɛ́, a nɛ̀ ma̧a̧da̧ tɛ̀ bíí nɛ̀ dɔka-a.

¹⁶Ɛ̀nɛ̀ mbó ta'nɛ́ wen ká ŋma bíí mgbara'nɛ́ tɛ́ɛ̀ ye tɛ́ dàlà, kóó ká a̧ tɛ́ɛ̀ fɛŋ mɔ ko Sɔ̧, hee mɔ'ɔ nɛ̀ Esau dee so ɗɔr nɛ̀ duka-kaya-bem kɔ‘i wen bera-kam kpɔk’ɛ ga.

¹⁷Wen ɛ́nɛ́ iŋa'e wa foo a̧ yinɛ ŋgimbi n'aa kɔ̧ɔ̧ só mɛ́ kpa toka-de-yoŋgo mɛ́ ɗoŋ, ɓɛɛ ŋma yuwar ha̧ a̧ mɛ́ kpai mɔ woyo, kóó nɛ̀ aia-nú in hi̧a̧-kɔ̧a̧ mbɛt bo na.

¹⁸Bó nɛ́ ɛ́nɛ́ hɛɗa katɛ mɔ nɛ̀‘i nyɛma mɛ́ fo nɛ̀ er na[2], hee wee nɛ̀ nyɛk, tum, gba-tum in ŋga búk-kórò ga na,

¹⁹giti mbia in giti tiger na mbɛt. O bíí nɛ̀ zia só giti tiger tɔ̧a̧‘e wi kɔ̧ zia wen'i siti na,

²⁰wen wa nyɛm só mɛ́ kasi tɔ̧́ɔ̧́-wen’ɛ na: «Wi nɛ̀ tɛ́ fo kaya’ɛ, kóó nɛ́ saɗi mbɛt, wi tɛ́ yo a̧ nɛ̀ ta gbɛ.»

²¹Mɔ‘i duka só nɛ́ mɔɔ-kíì nyɛmna, ɓɛɛ Moisɛ tɔ̧: «Tɛ‘m nak nak tututu nɛ̀ kíì.»

²²Ɓɛɛ k’ɛ́nɛ́, ɛ́nɛ́ nɛ̀ɛ́ si katɛ kaya Siɔŋ, in ye ko Sɔ̧ nɛ̀ duk kpasa; ye'i nɛ́ Jerusalɛm wan mɛ́ yiwese, fara nɛ̀ gba gíí betom mɛ yiwese mɔi̧ de gbaŋa sɛnɛ.

²³Ye'i nɛ́ fara-mɔi̧ ko o kaya-bem ko Sɔ̧ nɛ̀ nin-wa yɔra yiwese mɛ̀; nɛ́ fara ko Sɔ̧ wan-gɔn-kita zu o bíí lɛŋ in fara ko ɔmi ko o wi-de-mɔ nɛ̀ yuwar-a, wa nɛ́ bíí nɛ̀ nyɛma sɛnɛ kaɗi.

²⁴Fara'i nɛ́ ye ko Jesu, wi nɛ̀ dee ha̧ mbe nɔɔ-tɔk mɛ́ hɔ gba̧a̧ in fara ko tɔk nɛ̀‘i misa̧, nɛ̀ tɔ̧ wen gan war ko Abɛl[3].

²⁵Ɛ̀nɛ̀ mbó ta'nɛ́ wen k’ɛ́nɛ́ tɛ́ɛ̀ bɛ̧ wen nú wi nɛ̀ tɔ̧ wen h’ɛ́nɛ́'ɛ. Wen kà bɔnɛ nɛ́ nyuna zu wa ŋgimbi nɛ̀ wa bɛ̧ɛ̧ nɛ̀ zia wen nú wi nɛ mbaŋa so tɛ-wa zaŋnu’ɛ, ɓɛɛ bó nɛ́ bɔnɛ tɛ́ tik zu yɛ, ɛ́ɛ́ nɛ̀ zik ɗoŋ e ha̧ wi nɛ̀ tɔ̧ wen h’ɛ́ɛ́ nɛ̀ yiwese mɛ na nde?

²⁶Wi nɛ̀ tiger dee só ha̧ nù mɛ́ nak tɔ̧́ nɛ́ wen’ɛ kinii'i: «Mi tɛ́ de ha̧ nù mɛ́ nak woyo, ɓɛɛ bó nɛ́ nù ɓɛɛ na, yiwese mbɛt.»

²⁷Wen nɛ̀ tɔ̧a̧‘e, woyo'i, usi'e mɔ nɛ̀ Sɔ̧ dea tɛ́ nak ɓɛɛ yaka yambali, wen ha̧ mɔ nɛ̀ duk mgbítíŋ mɛ́ ɓɔn.

²⁸Hee mɔ'ɔ n’ɛ̀ɛ̀ tɛ́ ye zaŋ wan ko Sɔ̧ nɛ̀ duk mgbítíŋ ga, ɛ̀ɛ̀ dé osoko ha̧ a̧ tɛ yuwar mɔ nɛ̀ dee tɛ a̧ nɛ̀ yuu kíí Sɔ̧ in nɛ̀ dee kíí a̧.

²⁹Wen Sɔ̧ k’ɛ́ɛ́ nɛ́ ŋga wee-dɔ-mɔ.