Read Northwest Gbaya HEBREU 4 Bible Online

HEBREU 4 - Northwest Gbaya bible

HEBREU 4

¹Hee mɔ'ɔ nɛ̀ ha̧a̧nú h’ɛ́ɛ́ mɛ́ kpa yea-a tɛ ɔma-tɛ kɔ̧-a̧ biti hɔ kinii ga, ɛ̀ɛ̀ mbó ta-ɛɛ wen ká ŋma bíí mgbara'nɛ́ tɛ̀ɛ́ tɔ̧‘e ŋgimbi-a yaka kaɗi.

²Wen ɛ́ɛ́ mbɛt zia De Mbe Wen hee o wi nɔ‘i ga, ɓɛɛ wen nɛ̀ wa zia'i gbak wa na, wen wa kpɛk wen'i nɛ̀ kɔ̧ɔ̧ɗɔɔwen na.

³K’ɛ́ɛ́, o wi n’ɛ̀ɛ̀ kɔ̧ɔ̧ ɗɔaa, ɛ́ɛ́ kpaa yea-a tɛ ɔma-tɛ n'aa tɔ̧ɔ̧ nɛnɛ‘e ndé: «Ɓɛɛ mi kan mɔ nɛ̀ ɗaŋsee'e: ‹Kóó kpɔk mgbara wa beka kpa yea-a tɛ ɔma-tɛ kɔ‘m na!› » A̧ dee tom kɔ̧-a̧ kaɗi tɛ́ ku̧u̧naŋ dee nù mɛ̀,

⁴wen mɔ nɛ̀ Yɔramɔ tɔ̧ɔ̧ zu mɔɔrɔ-ɗoŋ-yiitoo zɛ nɛ́ mɔ'ɔ: «Tɛ́ mɔɔrɔ-ɗoŋ-yiitoo zɛ, Sɔ̧ ɔma tɛ̀ tɛ́ tom kɔ‘i lɛŋ.»

⁵Yɔramɔ zaŋ kalata k’ɛ́ɛ́ tɔ̧ɔ̧ woyo'e: «Wa beka kpa yea-a tɛ ɔma-tɛ kɔ‘m na.»

⁶O kuti bíí nɛ̀ zia so De Mbe Wen ye tɛ ɔma-tɛ‘i na wen ŋgazu kɔ-wa. Ɓɛɛ hee mɔ'ɔ n'aa ee zu-a'e, o ŋma bíí tɛ́ ye kànà sɛnɛ wó ga,

⁷a̧ gɔna mbe ŋgimbi woyo; ŋgimbi'i nɛ́ sɔsɔɔ, n'aa tɔ̧ɔ̧ wen-aa nɛ̀ ɗoŋ, tɛ́ wen nɛ̀ David tɔ̧a̧‘e: «Sɔsɔɔ, k’ɛ̀nɛ̀ zíí tiger-a, k’ɛ́nɛ́ ŋgai see'nɛ́ na», wó‘i.

⁸Wen kà Josue de so ha̧ wa mɛ́ kpa yea-a tɛ ɔma-tɛ gáà, bó nɛ́ Sɔ̧ tɛ̀ɛ́ tɔ̧ so wen zu mbe wese sɛn ɗoŋ mɔ‘i woyo ɓɔna.

⁹Mɛ̀ nɛ́ wen hegɔ, dukbíí ko Sɔ̧ tɛ́ kpa kànà ɔma-tɛ nɛ̀ tɛ́ hɔ ŋmaa in ɔma-tɛ wan mɛ́ mɔɔrɔ-ɗoŋ-yiitoo zɛ.

¹⁰Wen wi nɛ̀ kpaa yea-a tɛ ɔma-tɛ ko Sɔ̧, ɔm nɛ́ tɛ̀ tɛ̀ war tom kɔ‘i, hee mɔ'ɔ nɛ Sɔ̧ ɔma so nɛ̀ tɛ̀ tɛ́ tom kɔ‘i ga.

¹¹Hegɔ, ɛ̀ɛ̀ kíí nɛ̀ ŋgaya-a mɛ́ kpa yea-a tɛ ɔma-tɛ‘i, wen ká pɛrti dee ŋgazu so'i tɛ́ɛ̀ de ha̧ ŋma bíí mgbara yɛ mɛ́ tik.

¹²Wen ko Sɔ̧ dúk kpasa, a̧ a̧a̧ nɛ̀ ŋgai, nú-a ɔ tɔ̧a̧ gan gba-paa nɛ̀ a̧a̧ nɛ̀ nú yiitoo. Wen'i kɛ̧ɛ̧ mgbara sɔ̧-tɛ in taamɔ ko bíí, a̧ kɛ̧ nɛ́ mgbara gba̧a̧-tɛ-wi in mbɔ-tɛ, ɓɛɛ a̧ kɛ̧ɛ̧ mgbara mɔ nɛ̀ bíí kɔ̧ɔ̧ mɛ́ de in taamɔ mɛ́ kɔ̧ see-wi mbɛt.

¹³Ŋma mɔ nɛ̀ Sɔ̧ dea, nɛ̀ dúk nɛ̀ hu̧sa̧-a̧ yí-a, bo na; ŋma mɔ n'aa zɔk na, bo na; mɔ lɛŋ duk yí-a, ɓɛɛ ɛ́ɛ́ tɛ́ we ɗoŋ mɔ k’ɛ́ɛ́ lɛŋ ha̧ a̧.

¹⁴Ɛ́ɛ́ a̧a̧ nɛ̀ gasa wan-ɗafi-sɔ̧ nɛ̀ daŋa yak hɔ yiwese ŋgɔn mɛ̀; wi’ɛi nɛ́ Jesu Bem ko Sɔ̧. Hegɔ, ɛ̀ɛ̀ yór zu kɔ̧ɔ̧ɗɔɔwen k’ɛ́ɛ́ nɛ̀ nɔa-a.

¹⁵Ɛ́ɛ́ a̧a̧ nɛ̀ gasa wan-ɗafi-sɔ̧ k’ɛ́ɛ́ nɛ̀ nyɛma mɛ́ de ko h’ɛ́ɛ́ tɛ ɓɔsi k’ɛ́ɛ́. Wen mɔ lɛŋ nɛ̀ we yɛ, wee so a̧ mbɛt, ɓɛɛ a̧ de ɗaŋmɔ na.

¹⁶Hegɔ, ɛ̀ɛ̀ nɔ́ ŋgiɗi, ɓɛɛ ɛ̀ɛ̀ ɗɔ́ŋ si ká̧ damti-deemɔ nɛ̀ ta-tɛ ko Sɔ̧, wen ha̧ a̧ mɛ́ de ko h’ɛ́ɛ́, de nɛ̀ mɔ nɛ̀ ta-tɛ h’ɛ́ɛ́, gbak nɛ̀ ɛ́ɛ́ tɛ́ mɔ nɛ̀ ba tɛ-ɛɛ tɛ ŋgimbi-a.