Read Northwest Gbaya HEBREU 5 Bible Online

HEBREU 5 - Northwest Gbaya bible

HEBREU 5

¹Gasa wan-ɗafi-sɔ̧ lɛŋ nɛ̀‘i hok mgbara o bíí, mɛ̀ nɛ́ wen ha̧ a̧ mɛ́ duk oi nú o bíí sɛn ti Sɔ̧, ɓɛɛ tom kɔ̧ a̧ nɛ́ ha̧a̧ mɔ ha̧ Sɔ̧, in ɗafa-sɔ̧ wen ɗaŋmɔ ko bíí.

²A̧ tɛ́ duk nɛ́ wi nɛ̀ tɛ́ zii mgbara mɔ ko o wi nɛ̀ iŋ mɔ na, in nɛ̀ yɔ nɛ́ kaya, wen a̧ nɛ̀ tɛ-a nɛ́ ɓɔsa-wi hee o oi bíí ga.

³Hegɔ, a̧ tɛ́ ɗafi Sɔ̧ wen ɗaŋmɔ kɔ̧-a̧ mɛ́ tɛ-a, in wen ɗaŋmɔ ko o dɔka bíí mbɛt.

⁴Bó nɛ́ wi duk tɛ̀ gasa tom'i nɛ̀ zu-wi na, ɓɛɛ nɛ́ Sɔ̧'ɔ̧ sa bíí mɛ́ duk tɛ́ tom'i, hee mɔ'ɔ n'aa saa so nɛ̀ Arɔŋ ga.

⁵Mɛ̀ nɛ́ hegɔ mbɛt, bó nɛ́ Krist kia gasamɔ nɛ̀ see-zu wen tɛ-wi, mɛ́ duk gasa wan-ɗafi-sɔ̧ na, ɓɛɛ nɛ́ wi nɛ̀ tɔ̧ɔ̧ ha̧ a̧‘e: «Mɛ́ nɛ́ Bem kɔ‘m, mi koo mɛ́ sɔsɔɔ,» a̧ ea a̧ tɛ gasamɔ‘i.

⁶Mɔ‘i yee ŋmaa in ŋma wen nɛ̀ tɔ̧a̧‘e: «Mɛ́ nɛ́ wi-ɗafi-sɔ̧ nɛ̀ tɛ́ duk ɓɔnsɛnɛ hee war ko Mɛlkisedɛk ga.»

⁷Ŋgimbi nɛ̀ Jesu duka so nɛnɛ zaŋnu’ɛ, a̧ kɔfa Sɔ̧, ai nɛ̀ nú nɛ̀ ŋgaya-a, hi̧i̧ nɛ̀ kɔ̧a̧ mbɛt ha̧ wi nɛ̀ nyɛma so mɛ́ kpas'a tɛ́ fio. Ɓɛɛ Sɔ̧ kpɛk a̧ tɛ aia-nú kɔ̧-a̧‘i, wen mboozu kɔ̧-a̧.

⁸Zu-a nɛ̀ a̧ nɛ́ bem ko Sɔ̧‘i, nɛ́ bɔnɛ n'aa zɔka á̧ usa mboozu kɔ̧-a̧.

⁹Ɗoŋ nɛ̀ bɔnɛ n'aa zɔka dee ha̧ a̧ mɛ́ nyɛm sɛnɛ kaɗi, a̧ kifa duk nɛ́ wi nɛ̀ de ha̧ o bíí lɛŋ nɛ̀ mbo zu ha̧ a̧, mɛ́ kpa yuwar-kpasa-a kpoo nɛ kpoo.

¹⁰Ɓɛɛ Sɔ̧‘e a̧ nɛ́ gasa wan-ɗafi-sɔ̧ hee war ko Mɛlkisedɛk ga.

¹¹Ɛ́ɛ́ a̧a̧ nɛ̀ mɔ nɛ̀ dɔka-a mɛ́ tɔ̧ in mɛ́ we ɗoŋ-aa h’ɛ́nɛ́ tɛ́ mɔ‘i, ɓɛɛ nɛ́ kɛ̧ɛ̧-mgbara-a a̧ tɛ́ ŋgai, wen kinii ɛ́nɛ́ zii mgbara mɔ nɛ̀ haya-a ɓɔna.

¹²Ɛ́nɛ́ tɛ̀ɛ́ ya so nɛ́ o wan-usi-mɔ ɓeemɛ, nɛ́ mɔ'ɔ n’ɛ̀nɛ̀ kɔ̧ɔ̧ a'i usi nɛ́ kuti mɔ nɛ̀ a̧a̧ tɛ́ wen ko Sɔ̧ h’ɛ́nɛ́ woyo; h’ɛ́nɛ́ mɛ́ ak nɛ́ ŋga nyɔŋmɔ wó, ɛ́nɛ́ tɛ̀ɛ̀ ák k’ɛ́nɛ́ nɛ́ yibere.

¹³Kóó o ndé nɛ̀ ɓɔna tɛ́ nɔɔ yibere, beka zii mgbara usamɔ zu deemɔ nɛ̀ yuwar-a na, wen wi’ɛi biti kɔ‘i nɛ̀ obem.

¹⁴O gasawi nyɔŋ kɔ‘i nɛ́ ŋga nyɔŋmɔ, wen wa nɛ́ o bíí tɛ deemɔ nɛ̀ nyɛma mɛ́ kɛ̧ mgbara demɔ in ɗaŋmɔ.