Read Northwest Gbaya HEBREU 6 Bible Online

HEBREU 6 - Northwest Gbaya bible

HEBREU 6

¹Wen hegɔ, ɛ̀ɛ̀ é o kuti usamɔ zu Krist nɛ̀ ɗoŋ, h’ɛ́ɛ́ mɛ́ nɛ̀ siti tɛ war usamɔ ko gasawi. K’ɛ́ɛ́ si ɗoŋ tɛ̀ o kuti usamɔ ɓɔna, hee ee o géé tom nɛ̀ gbak bíí na duk in kɔ̧ɔ̧ ɗɔaa ha̧ Sɔ̧ ga.

²K’ɛ́ɛ́ si ɗoŋ tɛ̀ usamɔ zu zuia-bíí, ee-er zu bíí, kura-ŋgɔn ko o fio in sɔŋkur gɔna-kita mbɛt ɓɔna.

³Kà Sɔ̧ nɛ́ ee war h’ɛ́ɛ́, ɛ́ɛ́ beka si ɗoŋ tɛ o mɔɔ nɔ‘i ɓɔna.

⁴O ŋma bíí duka so tɛ̀ sa̧a̧mɔ nɛti, wa kpaa so be ha̧a̧mɔ mɛ́ yiwese, ɓɛɛ wa kpa Sa̧a̧ Ɔmi mbɛt;

⁵wa iŋa so de ɔ̧ɔ̧ nyɔ̧ɔ̧ wen ko Sɔ̧, ɓɛɛ wa iŋ mgbara o gasamɔ nɛ̀ tɛ́ hɔ nɛ̀ ɗoŋ mbɛt.

⁶Ɓɛɛ zu-a'i, wa tika; o pɛrti wi nɔ‘i beka kpai duka-a kɔ-wa war yiitoo ɓɔna, wen wa mgboi nɛ́ Bem ko Sɔ̧ zu te-diŋa woyo, pi̧ nɛ̀ búù zu a̧ ti o bíí mbɛt.

⁷Sɔ̧ tɛ́ tok de yoŋgo zu nù nɛ̀ kórò hɔ a zu-a ɓɔnsɛnɛ, nɛ̀ de ha̧ o nyɔnɔ mɛ́ dɛm nɛ̀ de-a ha̧ o wi-wa-fɔ.

⁸Ɓɛɛ kà nù‘i nɛ́ dɛma nɛ́ o tɛn in o naakɔɓa, wi tɛ́ zɔk fara'i hee ɗaŋ fara nɛ̀‘i tɛ́ fom fom ga, ɓɛɛ sɔŋkur-aa nɛ́ dɔa-a nɛ̀ wee yinɛ.

⁹Ɓɛɛ nɛ̀ k’ɛ́nɛ́, o wi n'am kɔ̧ɔ̧ nyɛmna, k’ɛ̀ɛ̀ tɔ̧́ wen hegɔ a zu'nɛ́, taamɔ k’ɛ́ɛ́ usa nɛ̀ mbetɛ‘e, ɛ́nɛ́ ba nɛ́ de war, wan mɛ́ duka-kpasa.

¹⁰Sɔ̧ nɛ́ wi-de-mɔ nɛ̀ yuwar-a; tɛ-a beka bi ɗoŋ tom k’ɛ́nɛ́ in kɔ̧ɔ̧mɔ n’ɛ̀nɛ̀ usa wen nin-a na, wen ɛ́nɛ́ duka so gbak nɛ̀ o sa̧a̧-bíí nɛti, ɓɛɛ nɛ́ kale mɔ‘i ɛ̀nɛ̀ de nɛ́nɛ́ kinii mbɛt.

¹¹Ɓɛɛ mɔ n’ɛ̀ɛ̀ kɔ̧a̧, mɛ̀ nɛ́ ha̧ o ndé mgbara'nɛ́ mɛ́ e see tɛ́ tom n'aa duk tɛ̀ dea-a'i hɔ sɔŋkur-aa, wen ha̧ mɔ n’ɛ̀nɛ̀ e nɛ̀ ta'i mɛ́ hɔ gba̧a̧.

¹²Ká gɛ̧ɛ̧mɔ ba'nɛ́ tɛ́ tom k’ɛ́nɛ́ na, ɓɛɛ ɛ̀nɛ̀ zɔ́k ɗoŋ deemɔ ko o bíí nɛ̀ kpa mɔɔ-oi nɛ̀ Sɔ̧ ha̧a̧ so nú mɛ́ ha̧ ha̧ wa, wen zu kɔ̧ɔ̧ɗɔɔwen in nɔɔ-ŋgiɗi kɔ-wa.

¹³Ŋgimbi nɛ̀ Sɔ̧ ha̧a̧ nɛ̀ nú ha̧ Abraham, a̧ kàná nɛ́ tɛ-a nɛ̀ tɛ-a, wen nɛ̀ ŋma bíí nɛ̀ gana a̧ bó só ha̧ a̧ mɛ́ kan na.

¹⁴A̧ tɔ̧a̧: «Ii, ko toka-de-yoŋgo, mi tɛ́ tok de yoŋgo zu mɛ́, ɓɛɛ nɛ̀ ko bezaŋ-mɛ, bezaŋ-mɛ tɛ́ dɔk.»

¹⁵Nɛ́ mɔ'ɔ nɛ̀ Abraham nɔɔ ŋgiɗi, ɓɛɛ ha̧a̧nú‘i hɔ gba̧a̧.

¹⁶Duka-a ko o bíí nɛ̀ duk’ɛ, bíí kan nɛ́ mɔ nɛ̀ ɔ gasa gan wi, ɓɛɛ nɛ́ kanamɔ a̧ de ha̧ kafɛ mɛ́ ga̧ mgbara wi.

¹⁷Sɔ̧ kàná mɔ zu ha̧a̧nú kɔ̧-a̧, wen a̧ kɔ̧ɔ̧ so mɛ́ usi nɛ̀ sa̧a̧-a̧ ha̧ o wi n'aa ha̧a̧ nú ha̧ wa'e, mɔ nɛ̀‘i yora zu-a kaɗi'i, wi nyɛm mɛ́ e duk ɓɔna.

¹⁸Hegɔ, mɔ a̧a̧ sɛnɛ yiitoo nɛ̀ beka kpai na, mɛ̀ nɛ́ ha̧a̧nú in kanamɔ, ɓɛɛ Sɔ̧ nyɛm mɛ́ de ndela tɛ́ mɔ‘i na. Hee mɔ'ɔ n’ɛ̀ɛ̀ hu̧sa̧ ɗoŋ-aa ga, ɛ́ɛ́ tɛ́ kpa ŋgai mɛ́ nɔ ŋgiɗi, kasi nɛ̀ mɔɔ-e-nɛ-ta n'aa ee ti yɛ‘i.

¹⁹Mɔɔ-e-nɛ-ta'i nɛ́ mɔ nɛ̀ kasi sɔ̧-tɛ yɛ nɛ̀ nɔa-a hee nyak-kun-kombon ga, ɓɛɛ nɛ́ mɔ‘i a̧ gboo yak si ɗoŋ babir-laa kɔ̧ Tua ko Sɔ̧ mɛ̀.

²⁰Jesu nɛ́ gasa wan-ɗafi-sɔ̧ nɛ̀ tɛ́ duk kpoo nɛ kpoo hee war ko Mɛlkisedɛk ga, ɓɛɛ nɛ́ fara'i á̧ à̧ yee sɛnɛ ti h’ɛ́ɛ́, wen zu yɛ.