Read Northwest Gbaya 1 PIERRE 4 Bible Online

1 PIERRE 4 - Northwest Gbaya bible

1 PIERRE 4

¹Héé Krist zɔka bɔnɛ tɛ́ kiitɛ-wi ga, ɛ́nɛ́ mbɛt ɛ̀nɛ̀ dúk nɛ̀ pɛrti taamɔ kɔ̧-a̧, wen wi nɛ̀ nɔ́ ŋgiɗi zaŋ bɔnɛ tɛ́ kiitɛ-wi kɛ̧ɛ̧ tɛ̀ nɛ̀ ɗaŋmɔ kaɗi.

²Ɓɛɛ tɛ́ oi ŋgimbi duka-a k’ɛ́nɛ́ zaŋnu’ɛ, ɛ́nɛ́ beka duk tɛ dee wɔ-mɔɔ-zaŋnu ɓɔna, ɓɛɛ ɛ́nɛ́ tɛ́ de nɛ́ wɔ-mɔ nɛ̀ Sɔ̧ kɔ̧a̧.

³Mɔ n’ɛ̀nɛ̀ dee so nɛti nyɛma'nɛ́ kaɗi, wen ɛ́nɛ́ duka so de nɛ́ mɔ ko o wi nɛ̀ iŋ Sɔ̧ na: nɛ́ dàlà, ɗaŋ dee wɔ-mɔ, gbɛɛ dɔ̧ɔ̧, dee ɗaŋ saa, nɔ nɛ̀ ŋgamɔ in gasa géé-sɔ̧.

⁴Ɓɛɛ kinii ɗɛɗɛ o wi nɔ‘i gɔna, wen ɛ́nɛ́ duk tɛ̀ dee o ɗaŋmɔ nɔ‘i in wa ɓɔna, nɛ́ hegɔ sa wa da̧‘nɛ́.

⁵Ɓɛɛ wa tɛ́ ɓa kànà wen-aa ti wan nɛ̀ hɛɗa mɛ́ gɔn kita zu o wi nɛ̀ duk kpasa in o wi nɛ̀ fea.

⁶Mɛ̀ nɛ́ mɔ‘i n'aa tɔ̧ɔ̧ nɛ̀ De Mbe Wen ha̧ o wi nɛ̀ fee so mbɛt, wen kita nɛ̀ ba bíí lɛŋ zaŋnu’ɛ baa so wa kaɗi, ɓɛɛ ha̧ wa mɛ́ duk kpasa hee mɔ'ɔ nɛ̀ Sɔ̧ duk ga nɛ̀ ŋgai ko Sa̧a̧ Ɔmi.

⁷Ndaa mɔ lɛŋ hɛɗa mɛ́ kpo kaɗi. Ɛ̀nɛ̀ tɔ̧́ wen tɛ iŋa-mgbara-mɔ, ɓɛɛ ɛ̀nɛ̀ dúk nɛ̀ gɛɗa yí‘nɛ́ wen kɔfa-sɔ̧.

⁸Zu-a'i lɛŋ, ɛ̀nɛ̀ kɔ̧́ ŋmaa ɓɔnsɛnɛ nɛ̀ kpasa-a, wen kɔ̧ɔ̧mɔ kpe nɛ́ zu o dɔka ɗaŋmɔ.

⁹K’ɛ̀nɛ̀ nɛ́ gɛnɛ tɛ ŋmaa in o ŋmaa, ɓɛɛ n’ɛ̀nɛ̀ kpɛ́k ŋmaa nɛ̀ de-a, k’ɛ́nɛ́ ku̧i̧ mɔ na.

¹⁰Sɔ̧ ha̧a̧ mɔ nɛtɛ nɛtɛ dam'nɛ́ lɛŋ, hegɔ, ɓɛɛ ɛ̀nɛ̀ dúk nɛ́ o kpasa wi-de-tom nyɛm nɛ̀ ɗoŋ o mɔ nɛtɛ nɛtɛ nɛ̀ Sɔ̧ ha̧a̧ nɛ̀ ta-tɛ h’ɛ́nɛ́‘i.

¹¹Kà ŋma bíí tɔ̧́ wen, ɓɛɛ a̧ a̧ wé nɛ́ ɗoŋ wen ko Sɔ̧ tɛ́ wen'i; bíí nɛ̀ de tom, a̧ a̧ dé tom'i nyɛm ɗoŋ ŋgai nɛ̀ Sɔ̧ ha̧a̧ ha̧ a̧ mɛ́ de nɛnɛ, wen ha̧ mɔ lɛŋ mɛ́ gasi nin Sɔ̧ nɛ̀ ɗoŋ Jesu Krist, wen gasamɔ in ɔɔ-wan nɛ́ ko Sɔ̧ kpoo nɛ kpoo. Aamɛn!

¹²O sɛm kɔ‘m n'am kɔ̧ɔ̧ nyɛmna, ɛ́nɛ́ ba nɛ́ wee tɛ̀ weamɔ, ɓɛɛ ká ɗɛɗɛ‘nɛ́ gɔn na, wen mɔ‘i bó nɛ́ ŋma mbe mɔ na.

¹³Ɓɛɛ hee mɔ'ɔ n’ɛ̀nɛ̀ zɔk bɔnɛ wen zu Krist ga, ɛ̀nɛ̀ dúk nɛ̀ desee wen h’ɛ́nɛ́ mɛ́ duk nɛ̀ tortɛ ŋgimbi zɔka gasamɔ kɔ̧-a̧.

¹⁴Kà bíí tɔ̧́ ɗaŋ wen zu'nɛ́ wen nɛ̀ ɛ́nɛ́ nɛ́ o ŋgaiwi ko Krist wó, ɓɛɛ ɛ̀nɛ̀ dúk nɛ̀ desee wen Sa̧a̧ Ɔmi ko gasamɔ nɛ̀ dúk nɛ́ Sa̧a̧ Ɔmi ko Sɔ̧ a̧a̧ zu'nɛ́.

¹⁵Ká ŋma bíí mgbara'nɛ́ zɔk bɔnɛ wen gbɛɛ-zu, kóó wen zuzu, kóó wen dee ŋgamɔ na mbɛt.

¹⁶Ɓɛɛ kà ŋma bíí nɛ́ zɔka bɔnɛ wen a̧ nɛ́ bíí ko Krist wó, ká foe de a̧ na; ɓɛɛ a̧ a̧ gásí nɛ́ Sɔ̧ wen zu nin'i.

¹⁷Ŋgimbi ha̧ Sɔ̧ mɛ́ ku̧ naŋ gɔna kita kɔ̧ tua kɔ‘i hɔɔ kaɗi. Ɓɛɛ hee mɔ‘i ku̧u̧ naŋ nɛ̀ zu yɛ ga, sɔŋkur mɔ ko o wi nɛ̀ kpɛk De mbe wen ko Sɔ̧ na tɛ́ duk hee ge nde?

¹⁸Wen kà mɔ‘i nɛ́ duka nɛ́ ŋgayamɔ wen ha̧ wi-de-mɔ nɛ̀ yuwar-a mɛ́ kpasi, ɓɛɛ war ko o wi-ɗaŋ, in o wi-iŋ-sɔ̧-na tɛ́ duk hee ge nde?

¹⁹Hegɔ, o wi nɛ̀ zɔk bɔnɛ nyɛm nɛ̀ ɗoŋ mɔ nɛ̀ Sɔ̧ kɔ̧a̧ a̧ é sɔ̧-tɛ-wi er Wan nɛ̀ dee mɔ lɛŋ nɛ̀ kpai nú tɛ́ wen kɔ‘i na, ɓɛɛ wa a̧ dé nɛ́ demɔ.