Read Northwest Gbaya 1 PIERRE 5 Bible Online

1 PIERRE 5 - Northwest Gbaya bible

1 PIERRE 5

¹Mi ai nú ha̧ o kuti-wi nɛ̀ duk mgbara'nɛ́; wen mi nɛ́ kuti-wi hee wa ga, in mi nɛ́ wi-sedaako bɔnɛ ko Krist; mi tɛ kpa war gasamɔ kɔ‘m ŋgimbi nɛ̀ gasamɔ‘i tɛ́ hɔ nɛnɛ. Mi'e:

²k’ɛ́nɛ́ dai duk sami ko Sɔ̧ nɛ̀ ee er'nɛ́ hee mɔɔ-doole ga na, ɓɛɛ nɛ̀ desee nyɛm nɛ̀ ɗoŋ mɔ nɛ̀ Sɔ̧ kɔ̧a̧; bó nɛ́ wen mbɔi na mbɛt, ɓɛɛ nɛ́ tɛ̀ ha̧a̧ tɛ‘nɛ́ tɛ́ tom-aa.

³K’ɛ́nɛ́ duk zu o wi nɛ̀‘i ee er'nɛ́ hee ŋma mɔɔ-wan ga, nɛ̀ ŋgai na, ɓɛɛ ɛ̀nɛ̀ yá nɛ́ o wi nɛ̀ wa tɛ́ zɔk nɛ́ ɗoŋ deemɔ k’ɛ́nɛ́.

⁴Ɓɛɛ ŋgimbi nɛ̀ gasa wi-dai-sami tɛ́ hɔ, ɛ́nɛ́ tɛ kpa laasɔ̧i̧-wan gasamɔ nɛ̀ beka ɗaŋ na.

⁵O ŋgaiwi, ɛ́nɛ́ mbɛt, ɛ̀nɛ̀ mbó zu ha̧ o gasawi k’ɛ́nɛ́. Mɔka-see a̧ dúk nɛ́ laa-pi̧-tɛ k’ɛ́nɛ́ lɛŋ wen gbaka ŋmaa in o ŋmaa, wen Sɔ̧ ha̧ mɔ ha̧ o wi-gɔ-tɛ na, ɓɛɛ a̧ de nɛ́ ko ha̧ o wi-mbo-zu.

⁶Ɛ̀nɛ̀ dúk nɛ̀ mɔka-see ɗɔɔ ŋgai mɛ́ er Sɔ̧, kà bé dè ká a̧ baa'nɛ́ nɛ̀ ŋgɔn tɛ́ ŋgimbi n'aa gɔna'i.

⁷Ɓɛɛ ɛ̀nɛ̀ síŋ tui-taamɔ k’ɛ́nɛ́ lɛŋ pi̧ zu a̧ wen nɛ́ a̧ a̧ zɔk'nɛ́.

⁸Ɛ̀nɛ̀ kásí zu'nɛ́, k’ɛ́nɛ́ ɔ ya na! Wen wisɛn k’ɛ́nɛ́ wan-ɗaŋmɔ zik nɛ́ ɛ́nɛ́ hee dila ga, hiɗi nɛ̀ mɔ, kíí nɛ̀ bíí mɛ́ nyɔŋ.

⁹K’ɛ́nɛ́ e tɛ‘nɛ́ ha̧ a̧ na; ɛ̀nɛ̀ yór nɛ̀ nɔa-a tɛ̀ kɔ̧ɔ̧ɗɔɔwen k’ɛ́nɛ́, ɓɛɛ ɛ̀nɛ̀ íŋ‘e o nya'nɛ́ zaŋnu lɛŋ zɔk nɛ́ kale bɔnɛ‘i.

¹⁰Sɔ̧ wan-de-mɔ nɛ̀ ta-tɛ lɛŋ, nɛ̀ saa'nɛ́ sitɛ gasamɔ kɔ‘i nɛ̀ duk kpoo nɛ kpoo tɛ́ Krist tɛ́ e'nɛ́ oi-aa woyo, ɗoŋ n’ɛ̀nɛ̀ zɔka bɔnɛ tɛ̀ be ŋgimbi tikiɗi. A̧ a̧ há̧ ŋgai, dé nɛnɛ h’ɛ́nɛ́ mɛ́ duk nɛ̀ nɔa-a in ha̧ naŋ‘nɛ́ mɛ́ nɔ nù.

¹¹Ɔɔ-wan a̧ dúk nɛ́ kɔ̧-a̧ kpoo nɛ kpoo! Aamɛn.

¹²Nɛ́ Silas[3] á̧ gbaka'm tɛ̀ yɔra be dɔ̧ kalata’ɛ, ɓɛɛ mi zɔka'e a̧ nɛ́ kpasa nya-wi. Kalata’ɛ mɛ̀ nɛ́ wen ha̧a̧ nɔɔ-ŋgiɗi in wen mbaŋa tɛ‘nɛ́‘e, ɛ́nɛ́ ndaɗa tɛ̀ mgbák deemɔ nɛ̀ ta-tɛ ko Sɔ̧.

¹³Gíí o bíí nɛ̀ Sɔ̧ hoka nɛ̀ duk Babilɔŋ in bem kɔ‘m Mark fana'nɛ́.

¹⁴Ɛ̀nɛ̀ fán ŋmaa in o ŋmaa nɛ̀ fanamɔ ko o bíí ko Sɔ̧. Ga̧a̧mɔ a̧ dúk in'nɛ̀ɛ́ lɛŋ nɛ̀ a̧a̧ tɛ́ Krist.