Read Northwest Gbaya 2 PIERRE 3 Bible Online

2 PIERRE 3 - Northwest Gbaya bible

2 PIERRE 3

¹O de sɛm kɔ‘m, yiitoo kalata ha̧‘m mɛ yɔr h’ɛ́nɛ́ nɛ́ mɔ'ɔ; zaŋ o kalata nɔ'ɔ yiitoo’ɛ, mi mbaŋ nɛ́ tɛ‘nɛ́ h’ɛ́nɛ́ mɛ kpa taamɔ nɛ̀ de-a.

²Tɛ‘nɛ́ a̧ mbáŋ ɗoŋ wen nɛ̀ o sa̧a̧ wi-tɔ̧-wen oi nú Sɔ̧ tɔ̧ɔ̧ so nɛti, in heembea ko Gasa Wan, Wan-kpasi-wi nɛ̀ o betom k’ɛ́nɛ́ usa so h’ɛ́nɛ́ mbɛt.

³Hegɔ, ɛ̀nɛ̀ íŋ‘e, tɛ́ sɔŋkur ŋgimbi o wi-si-kafɛ zɛkɛɗi nɛ̀ bíí tɛ́ hɔ; o wi nɔ‘i nɛ́ o wi nɛ̀ ndak nɛ́ ɗoŋ wɔ-mɔ kɔ-wa mɛ́ tɛ-wa

⁴tɔ̧ nɛnɛ‘e: «Ha̧a̧nú wen pia-ɗoŋ kɔ̧-a̧‘i dee bɔɔ hee ge? Nɛ̀ o zɔmdáa fee so nɛnɛ mɛ̀ hɔ kinii, mɔ lɛŋ duk kànà kɔ‘i hee mɔ'ɔ nɛ̀ duka so nɛnɛ tɛ̀ ku̧u̧naŋ dee nù mɛ̀ ga.»

⁵Tɛ́ wen'i nɛ̀ wa tɔ̧ hegɔ‘i, tɛ-wa bìí ɗoŋ-aa'e yiwese in nù duka so ɓeemɛ, ɓɛɛ nɛ́ tɛ́ wen ko Sɔ̧ a̧ nù gboo nɛnɛ tɛ́ yì, ɓɛɛ yì kasi nɛ̀ nù dúk nɛnɛ mbɛt.

⁶Nɛ́ kale yì‘i á̧ ha̧a̧ só hur zu kuti nù kúm nɛ̀ mɔ.

⁷Ɓɛɛ nɛ́ kpɔk Wen ko Sɔ̧‘i a̧ kasi o yiwese in nù nɛ̀ dúk kinii’ɛ pɛm nɛ̀ wee. A̧ e wa pɛm nɛ̀ wese-gɔna-kita zu o ɗaŋwi ha̧ wa mɛ́ yɔ.

⁸Ŋma mɔ a̧a̧ sɛnɛ kpɔk, o sɛm kɔ‘m, ɓɛɛ ká tɛ‘nɛ́ bí ɗoŋ-aa na: Gasa Wan zɔk kɔ‘i zɛ kpɔk hee pɛ booro ga, ɓɛɛ a̧ zɔk pɛ booro hee zɛ kpɔk ga.

⁹O ŋma bíí ta kɔ‘i'e Gasa Wan zik nɛ́ mɔ, ɓɛɛ a̧ zik mɔ zu mɔ n'aa ha̧a̧ nú-a sɛnɛ na; mɔ‘i, a̧ de nɛ́ kó h’ɛ́nɛ́, wen a̧ kɔ̧ ha̧ bíí mɛ́ yɔ na, ɓɛɛ a̧ kɔ̧ɔ̧ ha̧ o bíí lɛŋ mɛ́ kpai duka-a kɔ-wa.

¹⁰Wese ko Gasa Wan tɛ́ hɔ hee wi-zuzu ga; wese'i, yiwese tɛ́ yambali nɛ̀ zɔm gitimɔ, o mɔ nɛ̀ duk yiwese tɛ́ bìì wee ɗaŋ a nù, ɓɛɛ Sɔ̧ gɔna kita zu nù in o mɔ nɛ̀ a̧a̧ zaŋ-aa lɛŋ.

¹¹Hee mɔ'ɔ nɛ̀ mɔ lɛŋ tɛ́ ɗaŋ ga, duka-a k’ɛ́nɛ́ tɛ́ duk hee ge? War deemɔ k’ɛ́nɛ́ a̧ dúk nɛ̀ sa̧a̧-a̧, ɓɛɛ ɛ̀nɛ̀ tú̧ tɛ́ Sɔ̧.

¹²Mi tɔ̧ wen'i h’ɛ́nɛ́ o wi-pɛm-mɔ nɛ̀ kíí ha̧ wese ko Sɔ̧ mɛ́ hɔ nɛ̀ haya-a, wese'i nɛ́ wese nɛ̀ yiwese tɛ́ bìì wee ɗaŋ, ɓɛɛ o mɔ nɛ̀ duk yiwese tɛ́ bìì wee yeli a nù mbɛt.

¹³Ɛ́ɛ́ pɛm nɛ́ mbe yiwese in mbe nù nyɛm nɛ̀ ɗoŋ ha̧a̧nú ko Sɔ̧; nɛ́ fara'i a̧ deemɔ nɛ̀ yuwar-a duk sɛnɛ.

¹⁴Wen hegɔ, o sɛm kɔ‘m, tɛ̀ pɛma mɔ‘i, ɛ̀nɛ̀ kíí wen ha̧ Sɔ̧ mɛ́ kpa'nɛ́ tɛ̀ ga̧a̧mɔ, tɛ̀ duka-a nɛ̀ yuwar-a nɛ̀ ŋma wen bó zu'nɛ́ na.

¹⁵Ɓɛɛ ɛ̀nɛ̀ íŋ nɛ̀ de-a'e, deako nɛ̀ Gasa Wan de ɗoŋ-aa nyɛi̧‘i, mɛ̀ nɛ́ wen h’ɛ́nɛ́ mɛ́ kpa yuwar-kpasa-a. Mɛ̀ nɛ́ wen mɔ‘i a̧ nya yɛ Paul, nɛ̀ dúk nɛ́ sɛm k’ɛ́ɛ́ mbɛt, yɔra nɛ̀ kalata h’ɛ́nɛ́ nyɛm nɛ̀ ɗoŋ iŋa-mgbara-mɔ nɛ̀ Sɔ̧ ha̧a̧ ha̧ a̧.

¹⁶Nɛ́ kpɔk wen'i a̧ a̧ tɔ̧ mbɛt zaŋ o kalata lɛŋ n'aa yɔr zu mɔ‘i. O ŋma wen zaŋ o kalata kɔ̧-a̧ ɔ ŋgaya ha'i mɛ́ zii gba̧a̧-a̧; ɓɛɛ o ŋma bíí nɛ̀ iŋ mɔ na, nɛ̀ yambi mɔ dɔk na, tɔ̧ gba̧a̧ wen-aa nyɛm sɛnɛ na; nɛ́ kpɔk mɔ‘i a̧ wa de tɛ o ŋma Yɔramɔ, ɓɛɛ nɛ́ mɔ‘i a̧ tɛ́ yɔ wa.

¹⁷Hegɔ o sɛm kɔ‘m, mi mbaŋa tɛ‘nɛ́ kaɗi; ɛ̀nɛ̀ dúk zu naŋ‘nɛ́, k’ɛ́nɛ́ e ha̧ o ɗaŋwi nɛ̀ yɔ mɔ nɛnɛ mɛ́ dak'nɛ́ pi̧ tɛ̀ yɔɔ-kaya na, k’ɛ́nɛ́ e ha̧ wa mɛ́ fo'nɛ́ yinɛ tɛ́ mɔ n’ɛ̀nɛ̀ e nɛ̀ ta'nɛ́ na mbɛt.

¹⁸Ɓɛɛ ɛ̀nɛ̀ gásí siti tɛ̀ deemɔ nɛ̀ ta-tɛ ko Sɔ̧ in tɛ̀ iŋa Gasa Wan in Wan-kpasi-wi k’ɛ́ɛ́, Jesu Krist. Gasamɔ a̧ dúk nɛ́ kɔ̧-a̧ kinii hegɔ kpoo nɛ kpoo! Aamɛn.