Read Northwest Gbaya 1 JEAN 3 Bible Online

1 JEAN 3 - Northwest Gbaya bible

1 JEAN 3

¹Ɛ̀nɛ̀ zɔ́k gasa kɔ̧ɔ̧mɔ nɛ̀ Dáà kɔ̧ɔ̧ nɛ̀ ɛ́ɛ́, ha'i mɛ́ sa ɛ́ɛ́‘e o bem ko Sɔ̧, ɓɛɛ ɛ́ɛ́ nɛ́ o bem kɔ̧-a̧ nɛ̀ mbetɛ. Hegɔ, o bíí zaŋnu iŋ yɛ na, wen wa iŋ Sɔ̧ na.

²Ɛ́nɛ́ o wi n'am kɔ̧ɔ̧ nyɛmna, kinii ɛ́ɛ́ nɛ́ o bem ko Sɔ̧, ɓɛɛ wi tɛ iŋ hee mɔ'ɔ n’ɛ̀ɛ̀ tɛ́ duk ga hɔ̧ɔ̧ na; ɓaa mɔ n’ɛ̀ɛ́ iŋa nɛ́ mɔ'ɔ: ŋgimbi nɛ̀ Jesu be tɛ̀ɛ́ tɛ̀, ɛ́ɛ́ tɛ́ hɔ ŋmaa in a̧, wen ɛ́ɛ́ tɛ́ zɔk a̧ hee mɔ'ɔ n'aa dúk ga.

³Ɓɛɛ kóó o ndé nɛ̀ e ta hegɔ nɛ̀ a̧, de ha̧ tɛ-wi mɛ́ sa̧ hee war ko Jesu ga.

⁴Kóó o ndé nɛ̀ de ɗaŋmɔ gbin nɛ́ heembea, wen dee ɗaŋmɔ nɛ́ gbina heembea.

⁵Ɓɛɛ ɛ́nɛ́ iŋa'e Jesu tɛ̀ɛ́ mɛ́ ba ɗaŋmɔ yinɛ, ɓɛɛ ɗaŋmɔ bó tɛ́ a̧ na.

⁶Kóó o ndé nɛ̀ duk tɛ a̧ de ɗaŋmɔ ɓɔna, ɓɛɛ wi nɛ̀ de ɗaŋmɔ zɔk a̧ kà íŋ nɛ̀ a̧ na mbɛt.

⁷O bem kɔ‘m, ká ŋma bíí ɔr'nɛ́ na. Wi nɛ̀ de mɔ nɛ̀ yuwar-a nɛ́ wi-de-mɔ nɛ yuwar-a hee Jesu ga.

⁸Wi nɛ̀ de ɗaŋmɔ nɛ́ bíí ko wan-ɗaŋmɔ, wen wan-ɗaŋmɔ nɛ́ wi-de-ɗaŋmɔ nɛ̀ ku̧u̧naŋ-a mɛ̀ tɛnɛ; mɛ̀ nɛ́ wen hegɔ, Bem ko Sɔ̧ tɛa mɛ́ ɗaŋ tom ko Satan yinɛ.

⁹Kóó o ndé nɛ̀ Sɔ̧ ko a̧, de ɗaŋmɔ ɓɔna, wen kpar-mɔ ko Sɔ̧ dúk tɛ̀ wi’ɛi; wi’ɛi nyɛm mɛ́ de ɗaŋmɔ siti ɓɔna wen nɛ̀ Sɔ̧ koo a̧.

¹⁰Mɔ nɛ̀ tɛ́ kɛ̧ mgbara o bem ko Sɔ̧ in o bem ko wan-ɗaŋmɔ nɛ́ mɔ'ɔ: kóó o ndé nɛ̀ de mɔ nɛ̀ yuwar-a na bó nɛ́ bem ko Sɔ̧ na; wi nɛ̀ kɔ̧ nya-wi na bó nɛ́ bem ko Sɔ̧ na mbɛt.

¹¹Mɔ n’ɛ̀nɛ̀ baa zii nɛ̀ ku̧u̧naŋ-a mɛ̀ tɛnɛ nɛ́ mɔ'ɔ: ɛ̀ɛ̀ kɔ̧́ ŋmaa in o ŋmaa;

¹²bó nɛ́ hee ko Kain, bíí ko Wan-ɗaŋ nɛ̀ gɔna so ger nya-wi ga na. Kain gɔna so ger nya-wi wen ge? Wen tom kɔ̧-a̧ de so na, ɓɛɛ ko nya-a̧ duka so nɛ̀ yuwar-a.

¹³O nya'm, kà o bíí zaŋnu nɛ́ sɛna'nɛ́, ká ɗɛɗɛ‘nɛ́ gɔn na.

¹⁴K’ɛ́ɛ́, ɛ́ɛ́ iŋa'e ɛ́ɛ́ gboo tɛ́ fio h’ɛ́ɛ́ mɛ́ duk kpasa wen ɛ́ɛ́ kɔ̧ɔ̧ o nya-ɛɛ. Wi nɛ̀ kɔ̧ ŋma-wi na, ɓɔna tɛ́ fio.

¹⁵Kóó o ndé nɛ̀ sɛn nya-wi nɛ́ wi-gbɛ-zu, ɓɛɛ ɛ́nɛ́ iŋa'e ŋma wi-gbɛ-zu beka dúk kpasa kpoo nɛ kpoo na.[4]

¹⁶Mɔ n’ɛ̀ɛ̀ iŋa nɛ̀ kɔ̧ɔ̧mɔ nɛ́ mɔ'ɔ: Jesu ha̧a̧ tɛ-wi mɛ́ fe wen zu yɛ, ɓɛɛ ɛ́ɛ́ mbɛt tɛ́ ha̧ kànà tɛ̀ yɛ fe nɛnɛ wen zu o nya yɛ.

¹⁷Wi nɛ̀ a̧a̧ nɛ̀ kpaamɔ zaŋnu’ɛ, kà a̧ zɔ́k nya-a̧ tɛ́ san, ɓɛɛ kà a̧ gbák a̧ na, kɔ̧ɔ̧mɔ ko Sɔ̧ tɛ́ duk tɛ a̧ hee ge?

¹⁸O bem kɔ‘m, k’ɛ́ɛ́ kɔ̧ ŋma yɛ nɛ̀ wen in nɛ̀ ndàrá-nú géè na; ɓɛɛ ɛ̀ɛ̀ kɔ̧́ wa, tɛ́ tom-aa in tɛ́ kpasawen.

¹⁹K’ɛ̀ɛ̀ dé hegɔ, ɛ́ɛ́ tɛ́ iŋ‘e, kpasawen a̧a̧ tɛ̀ yɛ, ɓɛɛ ɗɛɗɛ yɛ beka gɔn ti Sɔ̧ na.

²⁰Kà see yɛ fé zu mɔ n’ɛ̀ɛ́ dea na, ɛ́ɛ́ iŋa'e Sɔ̧ gana see yɛ, ɓɛɛ a̧ iŋa mɔ lɛŋ.

²¹O wi n'am kɔ̧ɔ̧ nyɛmna, kà see yɛ fé zu mɔ n’ɛ̀ɛ́ dea, ɛ́ɛ́ tɛ́ ak mɔ in Sɔ̧ nɛ̀ nɔɔ-ŋgiɗi,

²²ɓɛɛ mɔ lɛŋ n’ɛ̀ɛ̀ tɛ́ ak er-a, a̧ tɛ́ ha̧ h’ɛ́ɛ́, wen ɛ́ɛ́ kasi nɛ́ o heembea kɔ̧-a̧, de nɛ̀ mɔ nɛ̀ dee tɛ-a.

²³Heembea ko Sɔ̧ nɛ́ mɔ'ɔ: ɛ̀ɛ̀ kɔ̧́ ɗɔaa nɛ̀ nin Bem kɔ̧-a̧ Jesu Krist, ɛ̀ɛ̀ kɔ̧́ ŋmaa in o ŋmaa hee mɔ'ɔ nɛ̀ heembea kɔ̧-a̧ usa h’ɛ́ɛ́ ga.

²⁴Wi nɛ̀ kasi o heembea kɔ̧-a̧, wi’ɛi dúk tɛ́ Sɔ̧, ɓɛɛ Sɔ̧ dúk tɛ́ a̧ mbɛt; nɛ́ Sa̧a̧ Ɔmi n'aa ha̧a̧ h’ɛ́ɛ́ a̧ usi'e a̧ dúk tɛ yɛ.