Read Northwest Gbaya O WI-GƆN-KITA 1 Bible Online

O WI-GƆN-KITA 1 - Northwest Gbaya bible

O WI-GƆN-KITA 1

¹Ɗoŋ fio ko Josue, o be Israɛl aka mɔ in GASA WAN hee mɔ'ɔ ga: «Nɛ́ ge zuduk ge mgbara yɛ a̧ tɛ yak ti wen bíí biro in o be Kanaŋ ge?»

²GASA WAN kifa nú: «Nɛ́ zuduk ko Juda a̧ tɛ yak ti, mi ee nú kɔ̧ er-wa kaɗi.»

³Zuduk ko Juda tɔ̧ɔ̧ ha̧ o nya-wi o bezaŋ Simɛɔŋ: «Ɛ̀nɛ̀ dáŋ in yɛɛ pii tɛ nù k’ɛɛ, ɛ̀ɛ̀ bí o be Kanaŋ; ɓɛɛ ɛ́ɛ́ mbɛt, ɛɛ tɛ nɛ in'nɛ̀ɛ́ sitɛ nù k’ɛ́nɛ́.» Ɓɛɛ o bezaŋ Simɛɔŋ nɛ in wa.

⁴Zuduk ko Juda daŋa in zuduk ko Simɛɔŋ, ɓɛɛ GASA WAN e o be Kanaŋ in o be Periz kɔ̧ er-wa; wa gbɛɛ o bíí booro-ɓu sɛn Bezɛk.

⁵Wa kpaa Adonibezɛk sɛn saaye Bezɛk, ɓɛɛ wa bi a̧; wa bìì o be Kanaŋ in o be Periz.

⁶Adonibezɛk yuu mɔ yak, ɓɛɛ wa ndak a̧ ba a̧, ɓir gbokoto er-a in o gbokoto naŋ-a yinɛ.

⁷Nɛ mɔ'ɔ nɛ Adonibezɛk tɔ̧a̧: «O wannu ɓu-mɔɔrɔ-ɗoŋ-yiitoo nɛ‘i ɓira so o gbokoto er-wa in o gbokoto naŋ-wa yinɛ dɔr só nɛ́ oi nyɔŋmɔ nɛ̀ tik nù er-am; nɛ́ mɔ n'am dea, á̧ Sɔ̧ kifi er-a ha̧‘m.» Wa mgbɔɔ a̧ si Jerusalɛm ɓɛɛ a̧ fe hi̧i̧.

⁸Zuduk ko Juda tika zu Jerusalɛm, ɓɛɛ wa ba; wa gbɛɛ o bíí saaye nɛ̀ gba-paa, ɓɛɛ wa pi̧ wee tɛ ye.

⁹Ɗoŋ mɔ‘i, wa zira mɛ bi o be Kanaŋ nɛ̀ ɔ zu kaya, ŋga-gbárà Nɛgɛb, in hira-nù.

¹⁰Wa nɛɛ bi o be Kanaŋ nɛ̀ dee so ye sɛn nú Hebrɔŋ nɛ‘i sa so nɛti'e Kiriat-Arba. Wa bìí Sesai, Aiman in Talmai mbɛt.

¹¹Zuduk ko Juda duka hi̧i̧ nɛ́ɛ̀ bi nɛ o be Debir nɛ‘i sa so nɛti'e Kiriat-Sefɛr.

¹²Kalɛb tɔ̧a̧: «Wi nɛ tɛ bi Kiriat-Sefɛr in nɛ tɛ ba a̧, mi tɛ ha̧ bem kɔ‘m Aksa nɛ kóò ha̧ a̧.»

¹³Otniɛl bem ko Kɛnaz, be-ɗoŋ Kalɛb baa ye'i, ɓɛɛ Kalɛb ha̧ bem kɔ‘i Aksa nɛ kóò ha̧ a̧.

¹⁴Nɛ̀ Aksa hɔɔ er wíì kɔ‘i kaɗi, wíì kɔ̧-a̧[1] aa wen ha̧ a̧ mɛ nɛ̀ɛ́ ak fɔ er dáà kɔ̧-a̧. Aksa zira nɛ̀ zu tuifuu, ɓɛɛ Kalɛb ak a̧: «Mɛ kɔ̧ɔ̧ nɛ́ ge?»

¹⁵Ɓɛɛ a̧ kifi nú ha̧ a̧: «Ɛ̀nɛ̀ dé ko ha̧‘m; hee mɔ'ɔ n’ɛnɛ ha̧a̧ nú Nɛgɛb ha̧‘m ga, ɔ dee ɛ̀nɛ̀ há̧ o be-zer ha̧‘m mbɛt.» Ɓɛɛ Kalɛb ha̧ o be-zer mɛ ŋgɔn in mɛ ɗɔɔ ha̧ a̧.

¹⁶O bezaŋ Kɛn, for Moisɛ daŋa nɛ̀ saaye nɛ‘i sa'e ye-ndɛŋgɛ in bezaŋ Juda nɛ̀ a̧a̧ si Arad nɛ war ká̧-zan-mɛ́-ɗɔɔ, ɓɛɛ wa nɛ́ɛ̀ de ye in o be Amalɛk.

¹⁷O bezaŋ Juda in o nya kɔ-wa, o bezaŋ Simɛɔŋ kura ba biro duk nɛ̀ o be Kanaŋ nɛ ɔ sɛn Sɛfat. Wa kuma o bíí saaye'i a nù lɛŋ, ɓɛɛ wa ɗaŋ ye'i in o mɔ nɛ a̧a̧ sɛnɛ lɛŋ mbɛt. Wa aa mbe nin ha̧ ye'i'e: Ɔrma, mɛ nɛ wen nɛ tɔ̧: «Ye nɛ tika».

¹⁸O bezaŋ Juda baa ye Gaza in nù nɛ oi-aa, ku̧u̧naŋ-a nɛ Askelɔŋ hɔ Ekrɔŋ, gu nɛ o nù nɛ ya zik a̧.

¹⁹GASA WAN nɛ̀ see zu yora ɗoŋ wa, ɓɛɛ wa ba nù nɛ a̧a̧ si zu kaya. Mɔ kpɔk, wa nyɛm so mɛ ndak o bíí nɛ a̧a̧ kɔ̧ ɗɔŋgɔ na, wen o wi nɔ‘i a̧a̧ so nɛ̀ o keekee-boi.

²⁰Wa ha̧a̧ ye Hebrɔŋ ha̧ Kalɛb nyɛm nɛ ɗoŋ wen ko Moisɛ. Kalɛb baa ye'i, ɓɛɛ ndak o bem ko Anak taar, o be-wan tɛ nù‘i yinɛ.

²¹Ɓɛɛ nɛ war ko o be Jebus nɛ ɔ so sɛn Jerusalɛm, o bezaŋ Bɛnjamin nyɛm so mɛ ndak wa na. Nɛ́ mɔ‘i a̧ dee ha̧ o be Jebus mɛ ɓɔn mgbara o bezaŋ Bɛnjamin, ɔ nɛ̀ ye Jerusalɛm in wa hɔ sɔsɔɔ.

²²O bíí nutua ko Jozɛf nɛɛ mɛ bi Bɛtɛl mbɛt, ɓɛɛ GASA WAN duk in wa.

²³Wa toma bíí mɛ nɛ̀ɛ́ kpe naŋ Bɛtɛl, nɛ wa sa so nɛti'e Luz.

²⁴O wi-kpe-naŋ-mɔ zɔka ŋma bíí fara gboa-a nɛ saaye, ɓɛɛ wa tɔ̧ ha̧ a̧: «Mɛ̀ úsí fara n’ɛɛ tɛ ye nɛnɛ si saaye h’ɛ́ɛ́, ɓɛɛ ɛɛ tɛ de demɔ in mɛɛ.»

²⁵Wi’ɛi usa fara yea-a si saaye ha̧ wa, ɓɛɛ wa gbɛ o bíí saaye lɛŋ nɛ gba-paa. Wa ee wi’ɛi duk in o bíí nú-gara kɔ̧-a̧.

²⁶Wi’ɛi yaka si nù ko o be Hit, ɓɛɛ a̧ de ŋma ye hi̧i̧ n'aa saa nin-a Luz. Nin ye'i nɛ́ mɔ‘i hɔ sɔsɔɔ.

²⁷Manase nyɛm so bíí Bɛt-Seaŋ in o ye nɛ zii nɛ̀ a̧, na, koo Tanak in o ye nɛ̀ zii nɛ̀ a̧, kóó o bíí nɛ ɔ sɛn Dɔr in o ye nɛ̀ zii nɛ̀ a̧, kóó o bíí Yiblɛam in o ye nɛ̀ zii nɛ̀ a̧, sɛka o bíí Mɛgido in o ye nɛ̀ zii nɛ̀ a̧, na mbɛt. Nɛ mɔ'ɔ nɛ o be Kanaŋ ɓɔna kana tɛ nù‘i siti.

²⁸Ŋgimbi nɛ o be Israɛl kpaa ŋgai kaɗi, wa foo o be Kanaŋ a tɛ ŋga tom, ɓɛɛ wa ndak wa na.

²⁹O bezaŋ Efraim ndak o be Kanaŋ nɛ ɔ so sɛn Gezɛr na, ɓɛɛ o be Kanaŋ ɓɔn mgbara o bezaŋ Efraim sɛn Gezɛr.

³⁰O bezaŋ Zabulɔŋ ndak so o be Kitrɔŋ na, kóó o be Nahalɔl na mbɛt, ɓɛɛ o be Kanaŋ ɓɔn mgbara o bezaŋ Zabulɔŋ, ɓɛɛ wa ya de nɛ ŋga tom ha̧ wa.

³¹O bezaŋ Asɛr ndak so o be Ako, o be Sidɔŋ, o be Alab, o be Akzib, o be Hɛlba, o be Afik in o be Rehob na.

³²O bezaŋ Aser ɔɔ kɔ‘i mgbara o be Kanaŋ nɛ ɔ so tɛ nù‘i, wen wa ndak so wa yinɛ na.

³³O bezaŋ Nɛftalii ndak so o be Bɛt-Sɛmɛs in o bíí Bɛt-Anat na, ɓɛɛ wa ɔ mgbara o be Kanaŋ nɛ ɔ so tɛ nù‘i; mɔ kpɔk, o be Bɛt-Sɛmɛs in o be Bɛt-Anat yaa tɛ ŋga tom.

³⁴O be Amɔr ndaka so o bezaŋ Dan si zu kaya, ɓɛɛ wa e ha̧ wa mɛ zir pii kɔ̧ ɗɔŋgɔ na.

³⁵O be Amɔr ɓɔna kana tɛ ɔa-a sɛn Har-Hɛrɛs, sɛn Ayalɔŋ in sɛn Salbim; ɓɛɛ ŋgimbi nɛ er o bíí nutua ko Jozɛf ŋgaia kaɗi, wa foo wa a tɛ ŋga tom.

³⁶Nù ko o be Amɔr ku̧u̧ naŋ nɛ tiger kaya Akrabim hɔ nɛnɛ tɛ gasa Ta ba nɛnɛ daŋnɛ.