Read Northwest Gbaya O WI-GƆN-KITA 11 Bible Online

O WI-GƆN-KITA 11 - Northwest Gbaya bible

O WI-GƆN-KITA 11

¹Jɛfte be Galad, ŋgaŋa wi-biro, duka so nɛ́ bem ko ŋma kó-de-mɔ nɛ mbɔɗɔnu; nɛ́ Galad a̧ koo a̧.

²Kóò ko Galad koo o be-wiwii ha̧ a̧ mbɛt. Ɗoŋ nɛ o bem nɔ‘i gasa lɛŋ kaɗi, wa ndaka Jɛfte yinɛ katɛ wa, tɔ̧ nɛnɛ ha̧ a̧‘e: «Mɛ beka kpa mɔɔ-oi dáà in yɛɛ na, wen mɛ́ nɛ́ bem ko ŋma gɔni okoo.»

³Jɛfte yuu mɔ yak nɛ nyɛi̧a-a katɛ o nya kɔ̧-a̧, nɛ́ɛ̀ dé ye nù Tob. O wi-de-gba̧a̧-mɔ na mɔi̧a ŋmaa yar nɛnɛ in a̧.

⁴Ɗoŋ ŋma ŋgimbi, o be Amɔŋ baa biro nɛ́ɛ̀ dúk nɛ̀ o be Israɛl.

⁵Hee mɔ'ɔ nɛ o be Amɔŋ tika zu o be Israɛl nɛ biro ga, o gasawi nú Galad yaka nɛ́ɛ̀ kii Jɛfte sɛn nù Tob.

⁶Wa tɔ̧ɔ̧ ha̧ a̧: «Mɛ̀ tɛ́, mɛ̀ dúk ti h’ɛ́ɛ́ wen h’ɛ́ɛ́ mɛ kpa ŋgai mɛ bi o be Amɔŋ.»

⁷Jɛfte kifa nú ha̧ o gasawi Galad: «Bó nɛ́ ɛ́nɛ́ a̧ sɛna so'm, ɓɛɛ k’ɛ́nɛ́ ndak am yinɛ nutua ko dáà kɔ‘m’ɛ na nde? Wen ge s’ɛnɛ ndak pata'm kinii wen nɛ ŋga bɔnɛ kpaa'nɛ ge?»

⁸O gasawi Galad kifa nú ha̧ Jɛfte: «Hee mɔ'ɔ nɛ ɛɛ tɛ sɛn tɛ mɛ kinii ga, mɛ̀ nɛ́ wen ha̧ mɛ mɛ tɛ in yɛɛ ha̧ mɛ mɛ bi o be Amɔŋ in ha̧ mɛ mɛ ɔ wan zu nú Galad lɛŋ nɛ oi-aa.»

⁹Jɛfte tɔ̧ɔ̧ ha̧ o gasawi Galad: «K’ɛ̀nɛ̀ kíí ha̧‘m mɛ tɛ̀ɛ́ bi o be Amɔŋ, kà Sɔ̧ a wa kɔ̧ er-am, mi tɛ ɔ wan zu'nɛ́.»

¹⁰O gasawi Galad tɔ̧ɔ̧ ha̧ Jɛfte: «Nɛ́ GASA WAN a̧ tɛ duk wi-sedaako k’ɛɛ, k’ɛ̀ɛ̀ nɛ́ dee hee mɔ'ɔ nɛ mɛ tɔ̧ɔ̧ ga na.»

¹¹Jɛfte kura si ɗoŋ in o gasawi Galad, ɓɛɛ o bíí Galad e a̧ nɛ̀ wan in gasa wi-biro kɔ-wa. Jɛfte wee ɗoŋ wen kɔ‘i woyo lɛŋ ti GASA WAN sɛn Mispa.

¹²Nɛ mɔ'ɔ nɛ Jɛfte toma o betom ak nɛ wannu ko o be Amɔŋ: «Mɔ nɛ yee mgbara yɛ in'nɛ̀ɛ́ wen h’ɛ́nɛ́ mɛ ba biro dúk nɛ̀‘m tɛ nù kɔ‘m nɛ ge?»

¹³Wannu ko o be Amɔŋ kifa nú ha̧ Jɛfte: «Tɛ daŋa-a ko o be Israɛl nɛ Egiptɛ, wa tɛ̀ɛ̀ húr nù kɔ‘m ku̧u̧naŋ-a sɛn Arnɔŋ hɔ nɛnɛ sɛn Yabɔk gɔm tik nɛnɛ sɛn Jurdɛn. Kinii, ɛ̀nɛ̀ há̧ nù k’ɛɛ piinɛ ɗoŋ h’ɛ́ɛ́ nɛ ga̧a̧-see.»

¹⁴Jɛfte toma o mbe bíí nɛnɛ sitɛ wannu ko o be Amɔŋ woyo.

¹⁵Wa nɛɛ tɔ̧: «Wen nɛ Jɛfte tɔ̧ nɛ mɔ'ɔ. O be Israɛl ba nù ko Mɔab, kóó nù ko o be Amɔŋ na.

¹⁶Mɔ kpɔk, ŋgimbi nɛ o be Israɛl gboo nɛ Egiptɛ, wa yaka nɛ ŋga-gbárà hɔ nɛnɛ sɛn tɛ Gbɛ̧ gba-tɔp, ɓɛɛ wa hɔ nɛnɛ sɛn Kadɛs.

¹⁷O be Israɛl toma o betom nɛnɛ ha̧ wannu Edɔm ɓɛɛ tɔ̧: ‹Ɛ̀nɛ̀ é war h’ɛ́ɛ́ mɛ ɓir nɛ nù k’ɛ́nɛ́ yak nɛnɛ.› Ɓɛɛ Wannu Edɔm kpɛk so na. Wa tɛɛ tom ha̧ wannu Mɔab, nɛ tɛɛ bɛ̧ mbɛt; ɓɛɛ o be Israɛl ɓɔn sɛn Kadɛs.

¹⁸O be Israɛl yaka nɛ ŋga-gbárà, wa gbaa Edɔm in Mɔab e nɛ nyɛi̧a-a gɔm nɛnɛ tik nɛ ti, e nú Mɔab nɛ war yee-wese. Wa ɔɔ nɛ kur Arnɔŋ, ɓɛɛ wa ye tɛ nù ko Mɔab na, wen Arnɔŋ nɛ gbìsí nù ko Mɔab.

¹⁹O be Israɛl toma o ŋma mbe bíí si sɛn tɛ Sihɔŋ wannu ko o be Amɔŋ, nɛ ɔ wan sɛn Hɛsbɔŋ, ɓɛɛ wa tɔ̧ ha̧ a̧: ‹Ɛ̀nɛ̀ é war h’ɛ́ɛ́ ɓir nɛ nù k’ɛ́nɛ́ si fara n’ɛɛ nɛ si sɛnɛ‘i.›

²⁰Ɓɛɛ Sihɔŋ e ha̧ o be Israɛl mɛ yak nɛ nù kɔ̧-a̧ na. Sihɔŋ mɔi̧a o bíí kɔ‘i lɛŋ nɛ́ɛ̀ ba gbagari sɛn Yasa, ɓɛɛ wa ba biro dúk nɛ̀ ŋmaa in o be Israɛl.

²¹GASA WAN Sɔ̧ ko Israɛl ee Sihɔŋ in o bíí kɔ‘i kɔ̧ er o be Israɛl, ɓɛɛ o be Israɛl bi wa. O be Israɛl baa nù ko o be Amɔr nɛ dee so ye hi̧i̧.

²²Wa baa nù ko o be Amɔr ku̧u̧naŋ-a nɛ foka-yì Arnɔŋ hɔ nɛnɛ nú Yabɔk; wa baa ŋga-gbárà nɛ war daŋa-wese gɔm nɛnɛ tik nú Jurdɛn.

²³Ɓɛɛ hee mɔ'ɔ nɛ GASA WAN Sɔ̧ ko Israɛl ndaka o be Amɔr yinɛ ti o be Israɛl ga, kɔ-mɛ, mɛ kɔ̧ɔ̧ mɛ ndak wa sɛnɛ yinɛ nde?

²⁴Bo nɛ mɛ a̧a̧ nɛ mɔ nɛ sɔ̧ kɔ-mɛ Kɛmɔs ha̧a̧ ha̧ mɛ na nde? Ɓɛɛ mɔ lɛŋ nɛ GASA WAN Sɔ̧ k’ɛɛ ee er yɛ beka duk nɛ k’ɛɛ na nde?

²⁵Kinii mɛ kɔ̧ɔ̧ mɛ usi'e mɛ a̧a̧ nɛ ŋgai gan Balak bem ko Sipɔr wannu Mɔab nde? A̧ kia wen in Israɛl wen bíí biro in a̧ nde?

²⁶Ɓɛɛ wen ge ɛnɛ ɓar so Hɛsbɔŋ in Yazɛr in o ye nɛ ya zik wa, ká bá nɛ̀ o ye ká̧ zaŋ Arnɔŋ er o be Israɛl ŋgimbi nɛ wa ɔɔ nɛ wan zu fara nɔ‘i tɛ pɛ gɔmŋmaa-taar na ge nde?

²⁷Kɔ‘m, mi de ŋma ɗaŋmɔ in mɛɛ na, ɓɛɛ mɛ̀ nɛ́ mɛ́ a̧ dee mɔ in am de na, de nɛ biro in am. Ɓɛɛ hee mɔ'ɔ nɛ GASA WAN duk nɛ wi-gɔn-kita ga, a̧ a̧ gɔ́n kita mgbara o be Israɛl in o be Amɔŋ sɔsɔɔ.»

²⁸Ɓɛɛ wannu Amɔŋ zii kɔ‘i wen nɛ Jɛfte toma nɛnɛ ha̧ a̧‘i na.

²⁹Ɔmi ko GASA WAN duka in Jɛfte. Jɛfte kura hɔ Galad, ɓir tik Manase. Nɛ̀ Manase, a̧ gɔma tik Mispɛ mɛ nú Galad; a̧ duka nɛ́ Mispɛ nú Galad ku nɛ gbìsì ko o be Amɔŋ.

³⁰Jɛfte ha̧a̧ nú ha̧ GASA WAN ɓɛɛ tɔ̧: «K’ɛ̀nɛ̀ á o be Amɔŋ kɔ̧ er-am nɛ mbetɛ,

³¹tɛ pia-a kɔ‘m nɛ tɛ wa, nɛ haya-tɛ, wi nɛ tɛ gbo ti mɛ kpɛk am, mi tɛ dɔ a̧ h’ɛ́nɛ́ nɛ̀ kpoo-sɔ̧.»

³²Jɛfte kuu gbìsí nù ko o be Amɔŋ wen bíí biro in wa, ɓɛɛ GASA WAN a wa kɔ̧ er-a.

³³Jɛfte gbina biro; a̧ bìí wa ku̧u̧naŋ-a nɛ Arɔɛr hɔ ká̧ Minit, ɓɛɛ a̧ ba ye ɓu-yiitoo, hegɔ hɔ nɛnɛ saaye Abɛl-Keramim. O be Israɛl bìì o be Amɔŋ nɛ̀ ɗáŋ-a nyɛmna, ɓɛɛ wa ya ɗɔɔ ŋgai ko o be Israɛl.

³⁴Ŋgimbi nɛ Jɛfte pii nɛ ɗoŋ pii tɛ kɔ‘i sɛn saaye Mispa, boko-bem kɔ̧-a̧ gboo we ti a̧ nɛ yɔyɛ mbɛr nɛ bi̧ɔ̧. Ɓɛɛ kpɔk bem kɔ̧-a̧ nɛ́ mɔ‘i, ŋma be-okoo, kóó be-wiwii kɔ̧-a̧ yak zu a̧ bo na.

³⁵Ŋgimbi nɛ Jɛfte zɔka a̧, a̧ a̧ka̧ laa tɛ-a, ɓɛɛ tɔ̧: «Ho! Boko-bem kɔ‘m, mɛ pi̧i̧ dita-see tɛ‘m; mɛ baa ŋga bɔnɛ pi̧ zu'm. Mi ha̧a̧ nú‘m ha̧ GASA WAN kaɗi, ɓɛɛ mi beka yak zu a̧ ɓɔna.»

³⁶Boko-bem kɔ̧-a̧ tɔ̧ɔ̧ ha̧ a̧: «Dáà kɔ‘m, ɛnɛ ha̧a̧ nú ha̧ GASA WAN kaɗi, ɛ̀nɛ̀ dé mɔ in am nyɛm nɛ ɗoŋ wen nɛ gboo nɛ nú‘nɛ́, wen nɛ̀ GASA WAN kifa er ha̧ o be Amɔŋ, o wisɛn k’ɛ́nɛ́ kaɗi.»

³⁷A̧ tɔ̧ɔ̧ ha̧ dáà kɔ̧-a̧ woyo: «Nɛ́ mɔ kpɔk a̧‘m ak er'nɛ́; ɛ̀nɛ̀ é ha̧‘m yar in o sɛm kɔ‘m si zu kaya tɛ fio-zɛ yiitoo, ha̧‘m nɛ́ɛ̀ hi̧i̧ kɔ̧a̧ bem n'am beka ko na'i.»

³⁸Dáà kɔ̧-a̧ kifa nú ha̧ a̧: «Mɛ̀ nɛ̀,» ɓɛɛ a̧ e a̧ yak si zu kaya mɛ, wen n'aa beka ba wíì mɛ ko bem na.

³⁹Fio-zɛ yiitoo yaka, ɓɛɛ a̧ pii ɗoŋ pii tɛ dáà kɔ̧-a̧. Dáà kɔ̧-a̧ dee mɔ nyɛm nɛ ɗoŋ ha̧a̧nú n'aa ha̧a̧ so'i. Boko-bem’ɛi iŋ so wiwii nɛti na, ɓɛɛ mɔ‘i kifi nɛ ŋma yuwar duka-a sɛn Israɛl.

⁴⁰Tɛ pɛ lɛŋ, o boko be Israɛl nɛ́ɛ̀ hi̧i̧ nɛ́ boko-bem ko Jɛfte be Galad tɛ zɛ naar.