Read Northwest Gbaya O WI-GƆN-KITA 13 Bible Online

O WI-GƆN-KITA 13 - Northwest Gbaya bible

O WI-GƆN-KITA 13

¹O be Israɛl sii ɗoŋ tɛ dee mɔ ɗaŋ yí GASA WAN, ɓɛɛ a̧ a wa kɔ̧ er o be Filistii tɛ pɛ ɓu-naar.

²Ŋma be Sorea, nú-gara ko Dan a̧a̧ so sɛnɛ, nin-a nɛ Manɔa; kóò kɔ̧-a̧ yara so nɛ ndɔra.

³Betom ko GASA WAN hɔɔ zu ha̧ ko-yar-ndɔra'i ɓɛɛ tɔ̧ ha̧ a̧: «Mi iŋa'e mɛ́ nɛ́ ko-yar-ndɔra nɛ̀ bó nɛ̀ bem na. Mɛ tɛ ba zaŋ, ɓɛɛ mɛ tɛ ko be-wiwii.

⁴Kinii, ká mɛ́ nɔ́ dɔ̧ɔ̧, kóó ŋma ŋga mɔ na; ká mɛ́ nyɔŋ ŋma ndiŋ mɔ na,

⁵wen mɛ tɛ ba zaŋ, ɓɛɛ mɛ koo be-wiwii. Mɛ beka kpui zu-a nɛ pai na, wen bem’ɛi tɛ duk nɛ́ ko Sɔ̧ nɛ̀ kɔ̧ zaŋ nàà kɔ̧-a̧ mɛ gbonɛ; nɛ́ bem’ɛi a̧ tɛ ku̧ naŋ kpasa Israɛl er o be Filistii.»

⁶Kóò‘i sii ɗoŋ tɛ kɔ‘i, ɓɛɛ tɔ̧ ha̧ wii: «Ŋma bíí ko Sɔ̧ tɛɛ pii tɛ‘m; a̧ hɔɔ ŋmaa in betom ko Sɔ̧. A̧ dee kíì pi̧ tɛ‘m nyɛmna; mi ak fara n'aa tɛ nɛnɛ na, a̧ sa nin-a ha̧‘m na mbɛt.

⁷A̧ tɔ̧ɔ̧ ha̧‘m: ‹Mɛ tɛ ba zaŋ, ɓɛɛ mɛ tɛ ko be-wiwii. Kinii ká mɛ́ nɔ́ dɔ̧ɔ̧ na, ká mɛ́ nɔ́ ŋma ŋga mɔ na, ká mɛ́ nyɔŋ ŋma ndiŋ mɔ na mbɛt, wen bem’ɛi tɛ duk nɛ́ ko Sɔ̧ ku̧u̧naŋ-a nɛ̀ kɔ̧ zaŋ nàà kɔ̧-a̧ hɔ nɛnɛ wese fio kɔ̧-a̧.› »

⁸Nɛ mɔ'ɔ nɛ Manɔa aia nú ha̧ GASA WAN ɓɛɛ tɔ̧: «GASA WAN, ɛ̀nɛ̀ dé ko, ɛ̀nɛ̀ dé ha̧ bíí ko Sɔ̧ n’ɛnɛ toma'i mɛ tɛ pii tɛ yɛ woyo, ha̧ a̧ mɛ usi mɔ n’ɛɛ tɛ de wen bem’ɛi ŋgimbi nɛ‘i tɛ ko nɛ a̧.»

⁹Sɔ̧ zia kɔfa mɔ ko Manɔa, ɓɛɛ betom kɔ̧-a̧ tɛ tɛ kóò‘i woyo. A̧ duk so nɛ́ nù kpɛɛfɔ, ɓɛɛ ká wíì kɔ̧-a̧ Manɔa bo so in a̧ na.

¹⁰Ahai, kóò‘i maa yì nɛ́ɛ̀ tɔ̧ ha̧ wíì kɔ‘i'e: «Wi’ɛ nɛ tɛɛ so tɛ‘m’ɛ pia ɗoŋ.»

¹¹Manɔa kura ndak pata kóò kɔ‘i sitɛ wi’ɛi, ɓɛɛ ak a̧: «Wi nɛ tɔ̧ɔ̧ so wen ha̧ kóò'ɛ nɛ ɛnɛ nde?» A̧ kifa nu'e: «Nɛ́ mi nɛ mbetɛ.»

¹²Manɔa tɔ̧ɔ̧ ha̧ a̧: «Kinii, hee wen k’ɛ́nɛ́ tɛ hɔ gba̧a̧ ga, nɛ́ ge a̧ bem’ɛi tɛ de ge? Ɛɛ tɛ de mɔ in a̧ hee ge?»

¹³Betom ko GASA WAN tɔ̧ɔ̧ ha̧ Manɔa: «Kóò'ɛ a̧ dor tɛ̀ tɛ́ mɔ lɛŋ n'am tɔ̧ɔ̧ ha̧ a̧‘i.

¹⁴A̧ beka nyɔŋ ŋma mɔ nɛ tɛ́ nɛ tɛ waya nyak-dɔ̧ɔ̧ na, a̧ beka nɔ dɔ̧ɔ̧ na, a̧ beka nɔ ŋga mɔ na. A̧ beka nyɔŋ ndiŋ mɔ na, a̧ tɛ mbo zu tɛ mɔ lɛŋ n'am tɔ̧ɔ̧ ha̧ a̧‘i.»

¹⁵Manɔa tɔ̧ɔ̧ ha̧ betom ko GASA WAN: «Ɛ̀nɛ̀ dúk benaŋ hɛ̧ɛ̧ h’ɛ́ɛ́ gi be gbadua h’ɛ́nɛ́ sɛ.»

¹⁶Betom ko GASA WAN tɔ̧ɔ̧ ha̧ Manɔa: «Kóó mɛ dora so'm, mi beka nyɔŋ mɔ kɔ-mɛ na; ɓɛɛ kà mɛ́ nɛ kɔ̧ɔ̧ mɛ dɔ kpoo-sɔ̧, mɛ̀ dɔ́ ha̧ GASA WAN.» Manɔa iŋ so kɔ‘i'e nɛ́ betom ko GASA WAN na.

¹⁷Manɔa tɔ̧ɔ̧ ha̧ betom ko GASA WAN: «Nin'nɛ́ nɛ o k’ɛɛ de k’ɛɛ tu̧u̧ tɛ‘nɛ́ ŋgimbi nɛ wen k’ɛ́nɛ́ tɛ hɔ gba̧a̧ o?»

¹⁸Betom ko GASA WAN kifa nú ha̧ a̧: «Wen ge mɛ kɔ̧ɔ̧ mɛ iŋ nin-am ge? Nin-am nɛ́ mɔ̀ nɛ̀ ɔ ɗuka.»

¹⁹Manɔa baa be gbadua in ha̧a̧mɔ nɛ́ɛ̀ ha̧ ha̧ GASA WAN zu ta, ha̧ wi nɛ deemɔ kɔ̧-a̧ ɔ ɗuka. Manɔa in kóò kɔ‘i ya so zɔk nɛ mɔ.

²⁰Ŋgimbi nɛ leɓe-wee daŋa nɛnɛ nɛ fara-ɗafi-sɔ̧ si yiwese, betom ko GASA WAN daŋa nɛ̀ poo wee si yiwese. Manɔa in kóò kɔ‘i zɔka mɔ‘i, ɓɛɛ tik nù gu yí-wa nù.

²¹Betom ko GASA WAN usi tɛ ha̧ Manɔa in kóò ɓɔna; nɛ́ hi̧i̧ a̧ Manɔa iŋa nɛnɛ‘e, wi’ɛi nɛ́ betom ko GASA WAN nɛ mbetɛ.

²²Manɔa tɔ̧ɔ̧ ha̧ kóò kɔ‘i: «Ɛɛ tɛ fe nɛ mbetɛ, wen n’ɛɛ zɔka Sɔ̧.»

²³Kóò kɔ̧-a̧ tɔ̧ɔ̧ ha̧ a̧: «Kà bó só ha̧ GASA WAN mɛ gbɛ yɛ, bo nɛ a̧ tɛ̀ɛ́ kpɛk dɔɔ-kpoo-sɔ̧ in ha̧a̧mɔ k’ɛɛ na. A̧ beka usi so mɔɔ nɔ‘i lɛŋ h’ɛ́ɛ́ na in bo nɛ a̧ tɛ̀ɛ́ tɔ̧ so mɔ n’ɛɛ tɛ de h’ɛ́ɛ́ tɛ ŋgimbi’ɛ na.»

²⁴Kóò‘i koo nɛ̀ be-wiwii, ɓɛɛ a̧ a nin-a nɛ Samsɔŋ. Bem gasa, ɓɛɛ GASA WAN tok de yoŋgo ha̧ a̧.

²⁵Nɛ́ sɛn Mahane-Dan, mgbara Sore in Ɛstaɔl a̧ Ɔmi ko GASA WAN ku̧u̧ nɛ naŋ dee tom tɛ Samsɔŋ.