Read Northwest Gbaya O WI-GƆN-KITA 16 Bible Online

O WI-GƆN-KITA 16 - Northwest Gbaya bible

O WI-GƆN-KITA 16

¹Samsɔŋ yaka si Gaza, a̧ kpaa ŋma okoo-de-mɔ nɛ mbɔɗɔnu, ɓɛɛ a̧ ye kɔ̧ tua ɗoŋ-aa.

²Wa tɔ̧ɔ̧ ha̧ o bíí Gaza'e: «Samsɔŋ hɔɔ hɛ̧ɛ̧.» Wa yara pɛm nɛ a̧ mɔ sa̧ nɛnɛ sɛn nú garo ye. Wa yaa nɛ oi nú-wa tɔ̧ nɛnɛ‘e: «Ɛ̀ɛ̀ pɛ́m nɛ gɔna-ndaa-zan, ɓɛɛ ɛɛ gbɛɛ a̧.»

³Samsɔŋ ɔɔ kɔ‘i nù hɔ tɛ ɗuka-zɛ, ɓɛɛ kur kɔ‘i yak; a̧ zuɗa kpar-nú garo ye'i gu nɛ o dor-toyo, kai a zu kóŋgó-ɓaa-a yak nɛnɛ si sɛn zu kaya[9] nɛ zɔk ŋmaa in Hebrɔŋ.

⁴Ɗoŋ mɔ‘i, Samsɔŋ kɔ̧ɔ̧ ŋma okoo si war kɔ̧ ɗɔŋgɔ Sɔrɛk; nin kóò‘i nɛ Dalila.

⁵O wannu Filistii mɔɔrɔ nɛɛ kpa be-zɔŋa'i, ɓɛɛ a wen ha̧ a̧: «Mɛ̀ ɔ́r a̧ a̧ mɛ̀ zɔ́k mɔ nɛ de ha̧ a̧ mɛ kpa nɛ ŋgai hegɔ'ɛ, in mɔ n’ɛɛ tɛ de mɛ gan nɛ a̧ mɛ hɛr a̧, h’ɛ́ɛ́ mɛ ba nɛ ŋgai kɔ̧-a̧ yinɛ; ɓɛɛ k’ɛɛ, ɛɛ kpɔk kpɔk tɛ ha̧ kɔya bu-mbɔi booro-kpɔk-nɛ-gɔmŋmaa ha̧ mɛ.»

⁶Dalila aka Samsɔŋ: «Mɛ̀ tɔ̧́ mɔ nɛ de ha̧ mɛ mɛ kpa nɛ ŋgai hegɔ'ɛ ha̧‘m zii, in mɔ nɛ‘i tɛ de hɛr nɛ mɛ ba nɛ ŋgai kɔ-mɛ yinɛ.»

⁷Samsɔŋ kifa nú ha̧ a̧: «Kà‘i hɛ́r am nɛ mbe tɔr hɔkɔ mɔɔrɔ-ɗoŋ-yiitoo, ŋgai kɔ‘m tɛ kaɗi, ɓɛɛ mi tɛ duk hee géé bíí ga.»

⁸O wannu Filistii kaia o tɔr hɔkɔ mɔɔrɔ-ɗoŋ-yiitoo tɛnɛ ha̧ Dalila, ɓɛɛ a̧ hɛr Samsɔŋ.

⁹O bíí hu̧sa̧ kɔ̧ gɔna-bɛr-tua kɔ̧-a̧, ɓɛɛ a̧ hiɗi mɔ tɔ̧ nɛnɛ ha̧ Samsɔŋ: «O be Filistii kɛra mɛ kaɗi Samsɔŋ!» Samsɔŋ ŋmana nyak nɔ‘i lɛŋ a nù hee be nyak-garaazi nɛ wee ndala ga; hegɔ wa iŋ fara nɛ ŋgai kɔ̧-a̧ hu̧si sɛnɛ na.

¹⁰Dalila tɔ̧ɔ̧ ha̧ Samsɔŋ: «Mɛ ɔra nɛ‘m de nɛ ndela ha̧‘m. Kinii mɛ̀ tɔ̧́ mɔ nɛ‘i tɛ de hɛr nɛ mɛ ha̧‘m.»

¹¹Samsɔŋ kifa nú ha̧ a̧: «Kà‘i hɛ́r so'm nɛ mbe nyak nɛ‘i tɛ hɛr nɛ mɔ na, ŋgai kɔ‘m tɛ́ kaɗi, ɓɛɛ mi kifa héé gee bíí ga.»

¹²Dalila kaia mbe nyak hɛr nɛ a̧, ɓɛɛ hiɗi mɔ: «Samsɔŋ, o be Filistii kɛra mɛ kaɗi!» O bíí hu̧sa̧ so kɔ̧ gɔna-bɛr-tua kɔ̧-a̧. Samsɔŋ ŋmana nyak nɛ wa hɛra nɛ er-a'i hee géé garaazi ga.

¹³Dalila tɔ̧ɔ̧ ha̧ Samsɔŋ: «Hɔ kinii mɛ ɔr kànà nɛ‘m tɔ̧ nɛ wen ndela ha̧‘m. Mɛ̀ úsí mɔ nɛ‘i tɛ de hɛr nɛ mɛ ha̧‘m.» Samsɔŋ kifa nú ha̧ a̧: «Kà‘i bá ɗɛka-mui̧-zu'm mɔɔrɔ-ɗoŋ-yiitoo mbali nɛ garaazi hee mɔ'ɔ nɛ‘i de nɛ zɔ̧-laa ga, ɓɛɛ kà‘i mgbóí nɛ̀ te-de-laa, ŋgai kɔ‘m tɛ kaɗi, ɓɛɛ mi duka hee gee bíí ga.»

¹⁴Dalila yɔka Samsɔŋ pi̧ ya, ɓɛɛ a̧ ba ɗɛka-mui̧-zu-a mɔɔrɔ-ɗoŋ-yiitoo mbali nɛ garaazi hee mɔ'ɔ nɛ‘i de nɛ zɔ̧-laa ga, ɓɛɛ a̧ mgboi nɛ̀ te-de-laa. A̧ hiɗa mɔ: «Samsɔŋ, o be Filistii kɛra mɛ kaɗi!» A̧ kura zu ya, a̧ ŋmana zɔ̧-laa, ɓɛɛ a̧ zuɗi te pi̧ nù.

¹⁵Dalila tɔ̧ɔ̧ ha̧ a̧: «Wen ge mɛ tɔ̧‘e wi kɔ̧a̧‘m, ɓɛɛ see-mɛ bo tɛ‘m na ge? Mɛ ɔra'm war taar kinii, ɓɛɛ mɛ́ tɔ̧ ndaa ŋgai kɔ-mɛ ha̧‘m na.»

¹⁶Hee mɔ'ɔ nɛ Dalila ŋgii nɛ a̧ nukuri nɛ a̧ wese lɛŋ nɛ o wen ga, mɔ‘i gana zu Samsɔŋ; nɔɔ-ŋgiɗi kɔ̧-a̧ kaɗa hɔ tɛ fio.

¹⁷A̧ hu̧i̧a̧ see-aa lɛŋ ha̧ Dalila, ɓɛɛ a̧ tɔ̧ ha̧ a̧: «Pai tɛ hɔ zu'm na wen wa ea'm ha̧ Sɔ̧ ká‘m ɓɔna kɔ̧ zaŋ naa kɔ‘m. Kà wa nɛ́ kpuia zu'm, ŋgai kɔ‘m tɛ kaɗi, ɓɛɛ mi duka hee géé bíí ga.»

¹⁸Dalila zɔka'e, a̧ hu̧i̧a̧ see-aa lɛŋ ha̧ a̧, ɓɛɛ tom sa o wannu Filistii tɛnɛ tɔ̧ nɛnɛ: «Ɛ̀nɛ̀ tɛ̀; kinii, a̧ hu̧i̧a̧ see-aa lɛŋ ha̧‘m.» O wannu Filistii daŋa pii tɛ-a, ɓɛɛ ká wa a̧a̧ nɛ bu-mbɔi er-wa.

¹⁹Dalila yɔka Samsɔŋ pi̧ ya sɛn gɔn ku, ɓɛɛ sa ŋma be Filistii nɛ tɛɛ kpui mui̧-zu-a mɔɔrɔ-ɗoŋ-yiitoo'i lɛŋ. Ŋgai kɔ̧-a̧ gboo tɛ-a, ɓɛɛ a̧ ku̧ naŋ ziɓa-a.

²⁰Dalila hiɗa mɔ tɔ̧ nɛnɛ ha̧ a̧: «Samsɔŋ, o be Filistii kɛra mɛ kaɗi!» Samsɔŋ kura zu ya ɓɛɛ ta'e, wi tɛ misi̧ hee kuti-a ga ɓɛɛ wi yuu er-wa. A̧ iŋ kɔ̧-a̧ ndé, GASA WAN ee a̧ duk kaɗi na.

²¹O be Filistii baa a̧, ɓɛɛ o yí-a yiitoo lɛŋ. Wa mgbɔɔ a̧ yaknɛ si Gaza. Wa gbama nyak ndɛrɛ yiitoo hɛr nɛ a̧. A̧ duka zik nɛ mɔɔ-hɔ̧n-fuu sɛn kɔ̧ tua zɔɓɔ.

²²Ɓɛɛ ɗoŋ nɛ wa kpuia zu-a kaɗi, mui̧-zu-a ku̧u̧ naŋ hɔa-a woyo.

²³O wannu Filistii mɔi̧a ŋmaa ha̧ wa mɛ de gasa ɗafa-sɔ̧ ha̧ sɔ̧ kɔ-wa Dagɔŋ de nɛ yɔyɛ. Wa tɔ̧a̧: «Sɔ̧ k’ɛɛ foo Samsɔŋ wisɛn k’ɛɛ pi̧ kɔ̧ er yɛ.»

²⁴Dukbíí zɔka Samsɔŋ, ɓɛɛ wa gasi sɔ̧ kɔ-wa tɔ̧ nɛnɛ‘e: «Sɔ̧ k’ɛɛ foo wisɛn k’ɛɛ pi̧ kɔ̧ er yɛ. Nɛ́ a̧ a̧ ɗaŋa so nù k’ɛɛ dɔk nɛ fio mgbara yɛ.»

²⁵Hee mɔ'ɔ nɛ wa lɛŋ duk nɛ tortɛ ga, wa tɔ̧a̧: «Ɛ̀nɛ̀ mgbɔ́ Samsɔŋ tɛnɛ ha̧ a̧ de zɛŋ h’ɛ́ɛ́ zɔk.» Wa pi̧i̧ tom nɛ́ɛ̀ mgbɔ Samsɔŋ tɛnɛ; a̧ dee zɛŋ ha̧ wa, ɓɛɛ wa ba a̧ e mgbara mbiŋ-tua.

²⁶Samsɔŋ tɔ̧ɔ̧ ha̧ ŋgaiwi-usi-war tɛnɛ ha̧ a̧‘i: «Mɛ̀ mgbɔ́‘m ha̧‘m tam mbiŋ nɛ tɔn tua’ɛ, ha̧‘m ɛk tɛ‘m nɛnɛ.»

²⁷O wiwii in o okoo duna so tua ko sɔ̧ kɔ-wa'i. O wannu Filistii mɔɔrɔ lɛŋ mɔi̧a so ŋmaa hi̧i̧. Nɛ̀ zu tua mbɛt, o wiwii in o okoo booro-taar yaa hi̧i̧ zɔk nɛ dee zɛŋ ko Samsɔŋ.

²⁸Samsɔŋ kɔfa GASA WAN, ɓɛɛ tɔ̧: «GASA WAN Sɔ̧, mi ai nú h’ɛ́nɛ́, tɛ‘nɛ́ a̧ mbáŋ ɗoŋ-am, ɛ̀nɛ̀ há̧ ŋgai ha̧‘m, kóó nɛ́ war kpɔk sɔsɔɔ'ɛ ha̧‘m kifi er ɗaŋmɔ ha̧ o be Filistii oi yí‘m yiitoo nɛ wa oo yínɛ́'ɛ.»

²⁹Samsɔŋ tama mbiŋ-see-tua yiitoo nɛ tɔn tua yor nɛnɛ‘i. A̧ pi̧i̧ er-a mɛ wiiko kasi nɛ ŋma mbiŋ, ɓɛɛ a̧ kasi ɓii mbiŋ nɛ er-a mɛ gale.

³⁰A̧ tɔ̧a̧: «A̧‘m fe in o be Filistii.» A̧ sata nɛ ŋgai, ɓɛɛ tua gbin a zu o wannu Filistii in o bíí lɛŋ nɛ yaa so hi̧i̧. O wi n'aa gbɛɛ tɛ fio kɔ̧-a̧ gana o bíí n'aa gbɛɛ ŋgimbi n'aa duka nɛnɛ kpasa.

³¹O nya kɔ̧-a̧ in o bíí nutua ko dáà kɔ̧-a̧ lɛŋ zira tɛ́ɛ̀ ba wɔr-aa daŋ nɛnɛ nɛ́ɛ̀ gun sɛn mgbara Sorea in Ɛstaɔl kɔ̧ pɛsi-fio ko dáà kɔ̧-a̧ Manɔa. Samsɔŋ duka zu o be Israɛl tɛ pɛ ɓu-yiitoo.