Read Northwest Gbaya O WI-GƆN-KITA 3 Bible Online

O WI-GƆN-KITA 3 - Northwest Gbaya bible

O WI-GƆN-KITA 3

¹O dukbíí nɛ GASA WAN ee mɛ we nɛ̀ o be Israɛl nɛ iŋ so biro Kanaŋ na nɛ́ mɔ'ɔ.

²Mɔ‘i duka nɛ́ usamɔ ha̧ o zuduk be Israɛl ɓɛɛ, wen usa ɗoŋ bíí biro ha̧ wa, wen wa iŋ so bíí biro nɛti na.

³O dukbíí nɔ‘i yaa so nɛ́ o be-wan Filistii mɔɔrɔ, o be Kanaŋ lɛŋ, o be Sidɔŋ gu nɛ o be Hiv nɛ ɔɔ so zu kaya Libaŋ lɛŋ, ku̧u̧naŋ-a tɛ kaya Bal-Ɛrmɔŋ hɔ Lebo-Hamat.

⁴Mɔ‘i dee hegɔ wen nɛ GASA WAN kɔ̧ɔ̧ so mɛ ba o dukbíí nɔ‘i we nɛ̀ o be Israɛl ha̧ a̧ mɛ iŋ kà wa nɛ mboo zu tɛ heembea nɛ‘i ha̧a̧ so ha̧ dáà kɔ-wa nɛ̀ ɗoŋ Moisɛ.

⁵O be Israɛl ɔɔ mgbara o be Kanaŋ, o be Hit, o be Amɔr, o be Periz, o be Hiv in o be Jebus.

⁶Wa baa o boko-bem kɔ-wa nɛ kóò; wa ha̧a̧ o boko-bem kɔ-wa nɛ kóò ha̧ o bui-bem kɔ-wa mbɛt, ɓɛɛ wa gasi o sɔ̧ kɔ-wa.

⁷O be Israɛl dee mɔ ɗaŋ yí GASA WAN. Tɛ-wa bìí ɗoŋ GASA WAN Sɔ̧ kɔ-wa, ɓɛɛ wa gasi nɛ o Bal in o Asɛra nɛ ya nɛ o géé-sɔ̧.

⁸See GASA WAN tu̧u̧ zu o be Israɛl, ɓɛɛ a̧ e wa kɔ̧ er Kusaŋ-Reseatayim, wannu Mesopotamii; o be Israɛl yaa ɗɔɔ ŋgai ko wannu'i tɛ pɛ mɔɔrɔ-ɗoŋ-taar.

⁹Wa aia nú ha̧ GASA WAN, ɓɛɛ a̧ ha̧ ŋma bíí mɛ kpasi wa. Wi’ɛi nɛ́ Otniɛl bem ko Kɛnaz, be-ɗoŋ Kalɛb.

¹⁰Ɔmi ko GASA WAN zira zu Otniɛl, hegɔ Otniɛl duka zu o be Israɛl. A̧ nɛɛ biro ɓɛɛ GASA WAN de ha̧ a̧ mɛ gan zu Reseatayim wannu Aram; Otniɛl ndaka wannu'i yinɛ zu Israɛl.

¹¹Israɛl duka tɛ ga̧a̧mɔ tɛ pɛ ɓu-naar, ɓɛɛ Otniɛl bem ko Kɛnaz fe.

¹²Nɛ mɔ'ɔ nɛ o be Israɛl ku̧u̧ naŋ dee mɔ ɗaŋ yí GASA WAN woyo, ɓɛɛ GASA WAN ha̧ ŋgai ha̧ Eglɔŋ wannu Mɔab mɛ kpa ŋgai zu o be Israɛl, wen nɛ̀ wa de nɛ́ mɔ ɗaŋ yí-a.

¹³Eglɔŋ kpaa ŋmaa in o be Amɔŋ ká bá nɛ̀ o be Amalɛk, ɓɛɛ wa nɛ́ɛ̀ bi o be Israɛl; wa baa Jeriko, ye-ndɛŋgɛ er o be Israɛl.

¹⁴O be Israɛl yaa ɗɔɔ ŋgai ko Eglɔŋ wannu Mɔab tɛ pɛ ɓu-zua-mɔɔrɔ-ɗoŋ-taar.

¹⁵O be Israɛl aia nú sitɛ GASA WAN, ɓɛɛ GASA WAN tom ŋma bíí wen kpasa wa; wi’ɛi nɛ́ Ehud bem ko Gera, bezaŋ Bɛnjamin nɛ̀ baa so nɛ́ gale. O be Israɛl toma garama ha̧ Eglɔŋ wannu Mɔab nɛ̀ Ehud.

¹⁶Ehud duia gba-paa nɛ nú-a yiitoo, dura-a nɛ reeta mɛtrɛ, ɓɛɛ a̧ hɛr guntir-aa ɗɔɔ laa nɛ war wiiko.

¹⁷A̧ ha̧a̧ garama n'aa baa tɛnɛ‘i ha̧ Eglɔŋ wannu Mɔab. Eglɔŋ duka so nɛ́ ŋma ŋmaŋa-wi nyɛmna.

¹⁸Ŋgimbi nɛ Ehud ha̧a̧ mɔɔ nɔ‘i kaɗi, a̧ mgbɔɔ o wi nɛ tuia garama'i e yuwar.

¹⁹Ɓɛɛ n'aa hɔɔ fara ko o géé-sɔ̧ ká̧ Gilgal kaɗi, a̧ zika tɛ-a pii ɗoŋ ɓɛɛ tɔ̧: «Wannu, mi a̧a̧ nɛ̀ ŋma hu̧sa̧ wen mɛ tɔ̧ h’ɛ́nɛ́.» Wannu tɔ̧ɔ̧ ha̧ o bíí kɔ‘i mɛ wɛr tɛ, ɓɛɛ o bíí lɛŋ nɛ yaa katɛ a̧ yak.

²⁰Ehud nɛ̀ɛ́ si katɛ wannu Eglɔŋ ká a̧ duk nɛ́ nù kɔ̧ ga̧a̧ gɔna bɛr tua-ɔm-tɛ nɛ‘i ee so ha̧ a̧. Ehud tɔ̧ɔ̧ ha̧ a̧: «Mi a̧a̧ nɛ̀ ŋma wen ko Sɔ̧ mɛ tɔ̧ h’ɛ́nɛ́.» Ɓɛɛ Eglɔŋ kur zu kiti kɔ‘i.

²¹Ehud pi̧i̧ er mɛ gale dak gba-paa kɔ‘i nɛ duka so ti ɗɔɔ laa guntir nɛ war wiiko tok nɛ̀ zaŋ wannu.

²²Gba-paa yee tɛ-a lɛŋ nɛ oi tuzu-a, ɓɛɛ nɔ̧́ tɛ-a kpe yí gba-paa lɛŋ, wen Ehud dak so paa'i tɛ wannu yinɛ na. Ehud gboo yak nɛ̀ woi-tua,

²³ɗoŋ n'aa mana o nú tua-ɔm-tɛ lɛŋ.

²⁴Ɗoŋ nɛ Ehud gboo yak kaɗi, o wi-de-tom ko wannu tɛɛ mɛ zɔk mɔ. Wa zɔka'e nú gɔna bɛr tua-ɔm-tɛ ko wannu gɔma gɔm, ɓɛɛ wa tɔ̧: «Ŋmafara a̧ ɓɔna fara nɛ zaŋbɛɛ sɛn kɔ̧ ga̧a̧ gɔna bɛr tua.»

²⁵Wa zɛma mɔ ɗoŋ-aa nyɛi̧, ɓɛɛ ɗɛɗɛ-wa gɔn wen wannu hú̧í̧ nú gɔna bɛr tua na. Wa baa mɔɔ-hu̧i nú tua, ɓɛɛ wa hú̧í̧. Wa kpaa nɛ wɔr wan kɔ-wa fara ɔ nù.

²⁶Ehud yuu so kɔ‘i mɔ yak ŋgimbi nɛ wa ɓɔna so kɔ-wa fara pɛm mɔ. A̧ yuu mɔ ɓir yak nɛ fara ko o géé-sɔ̧ si war Sɛra mɛ.

²⁷Ŋgimbi n'aa hɔɔ nú Israɛl, a̧ dɔma zak sɛn zu kaya Efraim, ɓɛɛ o be Israɛl dik a ɗoŋ-aa zir nɛ̀ kaya tɛnɛ pii ɗɔɔ, ɓɛɛ nɛ́ a̧ a̧ dúk ti ha̧ wa nɛnɛ.

²⁸A̧ tɔ̧ɔ̧ ha̧ wa: «Ɛ̀nɛ̀ tɛ́ ɗoŋ am, wen GASA WAN ee o wisɛn k’ɛ́nɛ́, o be Mɔab sɛn kɔ̧ er'nɛ́ kaɗi.» Wa zira nɛnɛ ɗoŋ-aa gɔm nú horo Jurdɛn, nɛ duk so sɛn nú Mɔab, wa e ha̧ ŋma bíí kpɔk mɛ ku yì na.

²⁹Ŋgimbi'i, wa gbɛɛ o be Mɔab lɛŋ hee bíí booro-ɓu ga; wi nɔ‘i lɛŋ nɛ́ o bíí nɛ a̧a̧ nɛ kpoo-tɛ in wa nɛ o ŋgaŋa-wi, ŋma kpɔk mgbara wa yu mɔ yak na.

³⁰Ku̧u̧naŋ-a nɛ́ wese'i, Israɛl baa Mɔab ɓɛɛ nù duk tɛ ga̧a̧mɔ tɛ pɛ ɓu-mɔɔrɔ-ɗoŋ-taar.

³¹Ɗoŋ fio ko Ehud nɛ́ Samgar bem ko Anat a̧ duka oi-aa. Samgar gbɛɛ o be Filistii gɔmŋmaa-mɔɔrɔ-dɔŋ-kpɔk nɛ ɓɛ̧i̧a be boi-tok-ndai; a̧ mbɛt, a̧ kpasa o be Israɛl.