Read Northwest Gbaya O WI-GƆN-KITA 4 Bible Online

O WI-GƆN-KITA 4 - Northwest Gbaya bible

O WI-GƆN-KITA 4

¹Ɗoŋ nɛ̀ Ehud fea kaɗi, o be Israɛl sii ɗoŋ tɛ dee mɔ ɗaŋ yí GASA WAN.

²GASA WAN aa wa kɔ̧ er Yabin wannu Kanaŋ nɛ ɔ sɛn Asɔr. Gasawi ko o wi-biro kɔ̧-a̧ duka nɛ́ Sisɛra nɛ ɔ kɔ‘i sɛn Arosɛt-Goyim.

³O be Israɛl aia nú sitɛ GASA WAN wen Yabin a̧a̧ so nɛ̀ keekee-nyaŋa gɔmŋmaa-mɔɔrɔ-ɗoŋ-naar, in a̧ usa so bɔnɛ ha̧ o be Israɛl tɛ pɛ ɓu-yiitoo.

⁴Ŋgimbi'i, wi-gɔn-kita ko o be Israɛl duka so nɛ́ ko-tɔ̧-wen oi nu Sɔ̧; nin-a nɛ Debɔra kóò ko Lapidot.

⁵A̧ ɔ so ɗɔɔ ndɛŋgɛ ko Debɔra mgbara Rama in Bɛtɛl mgbara kaya Efraim. O be Israɛl duka so nɛ́ nɛnɛ tɛ a̧ sɛn hi̧i̧, wen ɓaa wen kɔ-wa.

⁶Nɛ mɔ'ɔ n'aa toma nɛ́ɛ̀ sa Barak bem ko Abinɔam be Kɛdɛs nú Nɛftalii, ɓɛɛ a̧ tɔ̧ ha̧ a̧: «GASA WAN Sɔ̧ ko Israɛl tɔ̧ɔ̧ nɛ̀ mbetɛ‘e mɛ̀ nɛ́ɛ̀ mɔi̧ bíí zu kaya Tabɔr, ɓɛɛ mgbara o bem ko Nɛftalii in o bem ko Zabulɔŋ, mɛ̀ káí bíí booro-ɓu.

⁷Wi tɛ mgbɔ Sisɛra wan ko o wi-biro ko Yabin tɛnɛ ha̧ mɛ ɗɔɔ foka-yì Kisɔŋ gú nɛ̀ o keekee in o wi-biro kɔ̧-a̧. Wi tɛ fo wa a kɔ̧ er-mɛ.»

⁸Barak kifa nú ha̧ a̧: «K’ɛ̀nɛ̀ nɛ́ in am, mi tɛ nɛ; ɓɛɛ k’ɛ̀nɛ̀ nɛ́ in am na, mi beka nɛ na.»

⁹Ɓɛɛ Debɔra tɔ̧: «Mi tɛ́ nɛ̀ in mɛɛ. Mɔ kpɔk, yuwar nɛ mɛ tɛ ba lɛŋ, gasamɔ beka duk nɛ́ kɔ-mɛ na, wen GASA WAN tɛ e Sisɛra kɔ̧ er ŋma okoo.» Debɔra kura nɛ́ sitɛ Barak sɛn Kɛdɛs.

¹⁰Barak mɔi̧a o bezaŋ Nɛftalii in Zabulɔŋ; o wiwii duka nɛ́ booro-ɓu nɛ̀ nɛɛ in a̧, ká bá nɛ̀ Debɔra.

¹¹Hebɛr be Kɛn gbina so kɔ‘i e o bíí kɔ‘i, o bem ko Hobab, for Moisɛ, duk, ɓɛɛ a̧ nɛ́ɛ̀ de o tua-laa kɔ̧-a̧ ká̧ gasa te[2] sɛn Sanaim ká̧ Kɛdɛs.

¹²Wa mbaŋa tɛ Sisɛra ndé, Barak bem ko Abinɔam daŋa si zu kaya Tabɔr.

¹³Ɓɛɛ Sisɛra mɔi̧ o keekee-nyaŋa kɔ‘i gɔmŋmaa-mɔɔrɔ-ɗoŋ-naar lɛŋ in dukbíí nɛ a̧a̧ in a̧, ku̧u̧naŋ-a nɛ̀ Arosɛt-Goyim hɔ nɛnɛ tɛ foka-yì Kisɔŋ.

¹⁴Debɔra tɔ̧ɔ̧ ha̧ Barak: «Mɛ̀ kúr, wen wese nɛ GASA WAN ee Sisɛra kɔ̧ er-mɛ nɛ́ mɔ'ɔ. Nɛ̀ mbetɛ, GASA WAN yaka ti ha̧ mɛ kaɗi.» Barak zira nɛ̀ zu kaya Tabɔr in o bíí kɔ̧-a̧ booro-ɓu ɗoŋ-aa.

¹⁵Ɓɛɛ sɛn ti Barak, GASA WAN foo Sisɛra, o keekee-nyaŋa kɔ̧-a̧ in o wi-biro kɔ̧-a̧ e ti. Wa kuma wa nɛ gba-paa. Sisɛra zira zu keekee-nyaŋa kɔ‘i, yu mɔ nɛ̀ naŋ yak.

¹⁶Barak ndaka o wi-biro ko Sisɛra in o keekee-nyaŋa kɔ-wa hɔ sɛn Arosɛt-Goyim. O wi-biro ko Sisɛra lɛŋ kuma ɗɔɔ gba-paa; ŋma kpɔk ɓɔn na.

¹⁷Sisɛra yuu so mɔ nɛ̀ naŋ sitɛ tua-laa ko Yaɛl kóò ko Hebɛr be Kɛn, wen nɛ̀ ga̧a̧mɔ a̧a̧ so mgbara Yabin wannu Hasɔr in o bíí nutua ko Hebɛr be Kɛn.

¹⁸Yaɛl gboo kpa ŋmaa in Sisɛra, ɓɛɛ tɔ̧ ha̧ a̧: «Nyaa, ɛ̀nɛ̀ yór sɛn tɛ kɔ‘m hɛ̧ɛ̧, k’ɛ́nɛ́ yu ŋma mɔ na.» Sisɛra nɛɛ yor, ɓɛɛ Yaɛl fo a̧ si kɔ̧ tua kɔ‘i, gu borgo zu a̧ hu̧si nɛ a̧.

¹⁹Sisɛra tɔ̧ɔ̧ ha̧ a̧: «Wɔ-yì gbɛ‘m gbɛɛ, mi tɛ kpa ŋma be yì mɛ nɔ nde?» Yaɛl hu̧i̧a̧ nú kpáná-yibere ha̧ ha̧ a̧ nɔ, ɓɛɛ hu̧s'a̧ woyo.

²⁰Sisɛra tɔ̧ɔ̧ ha̧ Yaɛl: «Mɛ̀ yór nú tua-laa, ɓɛɛ kà ŋma bíí nɛ́ aka mɛ‘e: ‹Ŋma bíí a̧a̧ hɛ̧ɛ̧ nde?› Ɓɛɛ mɛ̀ tɔ̧́‘e weyaa.»

²¹Ɓɛɛ Yaɛl kóò ko Hebɛr ba ŋma te-tua in dɔnɔ, ɓɛɛ hai gɛɗɛk gɛɗɛk si ɗoŋ Sisɛra, mgboi ká̧ yí-a boɗok sar ba nù. Sisɛra nɛ mbɔia so nyɛmna ɓɛɛ nɛ tika so ya, fea.

²²Ŋgimbi'i ɓɛɛ ká Barak a̧ ndak ɗoŋ Sisɛra tɛnɛ‘i. Yaɛl gboo pii tɛ a̧, ɓɛɛ tɔ̧ ha̧ a̧: «Mɛ̀ tɛ́, mi tɛ usi wi nɛ mɛ kii'i ha̧ mɛ.» Barak yee tua, ɓɛɛ a̧ kpa nɛ wɔr Sisɛra fara ɔɔ nù nɛ̀ oi te sɛn ká̧ yí.

²³Nɛ́ wese'i a̧ Sɔ̧ baa nɛ ŋgai ko Yabin wannu Kanaŋ yinɛ sɛn ti o be Israɛl.

²⁴O be Israɛl kpaa ŋgai zu Yabin wannu Kanaŋ hegɔ nɛnɛ hɔ ŋgimbi nɛ wa gbɛɛ nɛ a̧.