Read Northwest Gbaya O WI-GƆN-KITA 5 Bible Online

O WI-GƆN-KITA 5 - Northwest Gbaya bible

O WI-GƆN-KITA 5

¹Wese'i, Debɔra in Barak bem ko Abinɔam bia gima tɔ̧ nɛnɛ hee mɔ'ɔ ga:

²«Ŋgimbi nɛ o gasawi ha̧ nú sɛn Israɛl, ŋgimbi nɛ dukbíí ha̧ tɛ̀ wen bíí biro, ɛ̀nɛ̀ zɔ́n GASA WAN!

³O wannu, ɛ̀nɛ̀ zii! O be-wan, ɛ̀nɛ̀ yéŋ zer'nɛ́! Kɔ‘m, mi tɛ bìì gima ha̧ GASA WAN, mi tɛ zɔn GASA WAN Sɔ̧ ko Israɛl.

⁴GASA WAN, ŋgimbi n’ɛnɛ gboo so nɛ̀ Sɛir, ŋgimbi n’ɛnɛ ɓira nɛ̀ nú gbara Edɔm, nù naka so, kórò hɔɔ so, o tura-zan kifa nɛ yì lɛŋ.

⁵O kaya gbɔsa so ti GASA WAN ko Sinai, ti GASA WAN Sɔ̧ ko Israɛl.

⁶Ŋgimbi-wan ko Samgar bem ko Anat, ŋgimbi-wan ko Yaɛl, ŋma wi-de-gɛnɛ ɓir yuwar na, ɓɛɛ o wi-ba-war ba so nɛ o gɔŋa-war.

⁷O wan sɛn Israɛl lɛŋ kpa so ŋgai na, hɔ ŋgimbi nɛ mɛ Debɔra baa nɛ zu-mɛ nɛ̀ ŋgɔn, hɔ ŋgimbi nɛ mɛ baa zu-mɛ nɛ̀ ŋgɔn, nàà ko Israɛl!

⁸Wi zɔk so nɛ o ŋma mbe sɔ̧, ɓɛɛ mgbara o gasa ye mɔɔrɔ, wi zɔk so ŋgee, kóó sɛ́ɛ̀ kpɔk, wen o bíí booro-ɓu-naar nɛ ya sɛn Israɛl na.

⁹See-am a̧a̧ in o wan Israɛl, in o wi nɛ ha̧ tɛ mgbara dukbíí! Ɛ̀nɛ̀ zɔ́n GASA WAN.

¹⁰Ɛnɛ o wi nɛ daŋ bu nana-tuifuu, ɛnɛ o wi nɛ ya zu o kirki, in ɛnɛ o wi-ba-war, ɛ̀nɛ̀ bíí gima.

¹¹Ɛ̀nɛ̀ zíí sumbura mɔ ko o wi-tortɛ sɛn ká̧ gɔna-yi, fara ba yì.[3] Sɛn hi̧i̧, wa tɔ̧ nɛ nyɛrɛ o gbina biro ko GASA WAN, o gbina biro nɛ̀ ŋgai kɔ̧-a̧ sɛn Israɛl; dukbíí ko GASA WAN zira pii nú garo ye kɔ-wa.

¹²Mɛ̀ tún, mɛ̀ tún, Debɔra! Mɛ̀ ŋmá nú-mɛ tɛ gima! Mɛ̀ kúr, Barak, bem ko Abinɔam, mɛ̀ káí o bara-biro kɔ-mɛ piinɛ!

¹³Oi o bíí nɛ ɓɔna kpasa zira pii mgbara o gasawi; o bíí ko GASA WAN zira pii mgbara o ŋgaŋa-wi wen am.

¹⁴O wi-gan[4] o be Amalɛk tɛɛ nɛ Efraim; nɛ̀ ɗoŋ mɛ, Bɛnjamin a̧a̧ mgbara o wi-biro kɔ-mɛ. O wi-ya-zu o wi-biro tɛɛ kɔ-wa nɛ war Makir, ɓɛɛ o wi-ba-dɔra-wan tɛ kɔ‘i nɛ Zabulɔŋ.

¹⁵O be-wan Isakar a̧a̧ kɔ‘i in Debɔra, ɓɛɛ Barak ndak kɔ‘i pata-a nɛ war kɔ̧ ɗɔŋgɔ; nú-gara ko Rubɛn zaŋa kɔ‘i nɛ wen, wa nyɛm so mɛ e zu mɔ wen tɛa-a na.

¹⁶Wen ge mɛ ɓɔna kɔ-mɛ sɛn kɔ̧ ɓoramɔ zii nɛ fol ko o mɔ-dai ge nde? Mgbara o bíí nú-gara ko Rubɛn, akamɔ ɔ dɔka nyɛmna.

¹⁷Galad ɔ kɔ‘i nɛ̀ kur Jurdɛn, ɓɛɛ nɛ̀ kɔ-mɛ Dan, wen ge mɛ ɓɔn kɔ-mɛ kɔ̧ kombon ge? Asɛr duk kɔ‘i ká̧ zaŋ gba-tɔp; a̧ ɔ kɔ̧-a̧ nú yì.

¹⁸O bíí Zabulɔŋ in o bíí Nɛftalii, tɛɛ fe yí biro zu kaya mɛ ɓɔn.

¹⁹O wannu gɔma tɛnɛ, wa bìí biro, ɓɛɛ o wannu Kanaŋ bi biro sɛn Tanak ká̧ yí Mɛgido; mɔ kpɔk, wa ba ŋma bu-mbɔi nɛ mɔɔ-oi-biro kóó tikiɗi na.

²⁰O sɔra bìí biro nɛ yiwese mɛ; wa dee biro in Sisɛra nɛ yuwar kɔ-wa.

²¹Gba̧‘a̧ foka-yì so’ɛ, foka-yì Kisɔŋ kaia wa yaknɛ lɛŋ! Sɔ̧-tɛ‘m, mɛ̀ nɛ́ nɔ̀ nɛ̀ kpee-see.

²²O kɔtɔ-naŋ nyaŋa kɔna nù; ɛ̀nɛ̀ má yì, o wi-daŋ-nyaŋa, ɛ̀nɛ̀ má yì.

²³Betom ko GASA WAN tɔ̧a̧: ‹Ɛ̀nɛ̀ fóm Mɛroz. Ɛ̀nɛ̀ tók ɗaŋ yoŋgo a zu o bíí Mɛroz, wen wa tɛ mɛ gbak GASA WAN na; wa tɛ mɛ gbak GASA WAN in ŋgaŋa wi-biro na.›

²⁴Zɔnamɔ a̧ dúk nɛ ko Yaɛl kóò ko Hebɛr be Kɛnit, mgbara o dɔka okoo; zɔnamɔ a̧ dúk nɛ kɔ̧-a̧, mgbara o okoo ɔ kɔ̧ tua-laa!

²⁵Sisɛra aka so yì, ɓɛɛ Yaɛl ha̧ nɛ yibere ha̧ a̧; a̧ ha̧a̧ de yibere ha̧ a̧ nɛ yèé-nɔ-mɔ ko o wan.

²⁶A̧ nyɛi̧a er-a, ba te tua, ɓɛɛ er-a mɛ wiiko ba kɔ‘i nɛ dɔnɔ ko o wi-de-tom; a̧ mgboia ká̧ yí Sisɛra, ɓɛɛ tok ká̧ yi-a sar.

²⁷Sisɛra hɔ̧fa̧ tik nù, ɔ nù ɓɛɛ nyafi ti a̧; a̧ hɔ̧fa̧ tik nù fara'i nɛ fio ɗak-ɗak.

²⁸Nàà ko Sisɛra zɔka mɔ nɛ mgbara boi woi-tua ai nɛ nú: ‹Nɛ ge sa keekee-nyaŋa kɔ̧-a̧ ɓɔn hegɔ, pii na’ɛ ge? Wen ge o keekee-nyaŋa kɔ̧-a̧ kpan nɔ na ge?›

²⁹Ŋma haya okoo mgbara o zɔŋa-wan kɔ̧-a̧ kifa nú ha̧ a̧ tɔ̧ nɛnɛ:

³⁰‹Nɛ́ wen nɛ wa kpaa mɔɔ-oi biro sa wa kɛ̧, wi-biro kpɔk kpɔk a̧a̧ nɛ̀ be-zɔŋa kpɔk kóó yiitoo; laa-mbɔi nɛ ko Sisɛra, in o de dap laa kpɔk kóó yiitoo nɛ‘i toka tok ha̧ a̧ mɛ pi̧ ger-a.›

³¹GASA WAN, o wisɛn k’ɛ́nɛ́ lɛŋ a̧ kúm hee mɔ‘i ga, ɓɛɛ o sɛm k’ɛ́nɛ́ a̧ yá hee wese nɛ̀ daŋ nɛ̀ ŋgai ga.» Nù duka tɛ ga̧a̧mɔ tɛ pɛ ɓu-naar.