Read Northwest Gbaya O WI-GƆN-KITA 9 Bible Online

O WI-GƆN-KITA 9 - Northwest Gbaya bible

O WI-GƆN-KITA 9

¹Abimɛlɛk bem ko Yerubal nɛɛ sɛn Sikɛm tɛ ko o nɔkɔ kɔ̧-a̧, ɓɛɛ a̧ tɔ̧ ha̧ o bíí nú-gara ko zɔmdáa ko nàà kɔ̧-a̧:

²«Mi aia nú h’ɛ́nɛ́, ɛ̀nɛ̀ pɛ́sí nyɛrɛ mɔ n'am tɛ tɔ̧ h’ɛ́nɛ́‘i ha̧ o gasawi Sikɛm lɛŋ. Duka-a ɗɔɔ bíí ɓu-mɔɔrɔ-ɗoŋ-yiitoo nɛ ya nɛ o bem ko Yerubal lɛŋ, in duka-a ɗɔɔ kpɔk bíí, nɛ́ ge-aa ge a̧ dee ge? Tɛ‘nɛ́ a̧ mbáŋ ɗoŋ-aa'e, mi nɛ́ tɔk tɛ‘nɛ́.»

³O nya ko naa kɔ̧-a̧ wee kana nɛ kpɔk kale wen kɔ̧-a̧‘i lɛŋ ha̧ o gasawi Sikɛm, ɓɛɛ taamɔ kɔ-wa lɛŋ duk yor ɗoŋ Abimɛlɛk, wen wa tɔ̧ɔ̧ so lɛŋ a nú ŋmaa'e ndé, a̧ nɛ nya kɔ‘i.

⁴Wa ha̧a̧ kɔya sede ɓu-mɔɔrɔ-ɗoŋ-yiitoo nɛ wa kpaa kɔ̧ tua-wor Bal-Berit ha̧ Abimɛlɛk, ɓɛɛ a̧ kai o kɔya sede nɔ‘i wen yea-a nɛ o wi-de-gba̧a̧-mɔ na in o gee wi-yara-a ha̧ wa mɛ ye ɗoŋ-aa.

⁵Ɓɛɛ nɛ mɔ'ɔ n'aa yaka hɔ tɛ ko dáà kɔ̧-a̧ sɛn saaye Ofra, ɓɛɛ tik zu o nya-a̧ ɓu-mɔɔrɔ-ɗoŋ-yiitoo gbɛ wa; mɛ̀ nɛ́ o bem ko Yerubal. A̧ gbɛɛ wa a nù sɛn kpɔk yí-go. Bíí kpɔk nɛ̀ kpasa mgbara wa nɛ́ Yotam, sɔŋkur bem ko Yerubal; a̧ kpasa wen n'aa hu̧sa̧ so hu̧si.

⁶O gasawi saaye Sikɛm in o bíí Bɛt-Milo mɔi̧a ŋmaa lɛŋ, ɓɛɛ de wan ha̧ Abimɛlɛk ti gasa te, ká̧ ŋma ta nɛ‘i baa e ŋgɔn sɛn Sikɛm.

⁷Nyɛrɛ mɔ ko Abimɛlɛk aa zer Yotam. Nɛ mɔ'ɔ nɛ Yotam tɛɛ yor zu kaya Garizim, ɓɛɛ tɔ̧ wen’ɛ nɛ hee ger sitɛ wa: «Ɛ́nɛ́ o gasawi Sikɛm, ɛ̀nɛ̀ zíí wen nú‘m, ɓɛɛ Sɔ̧ a̧ zíí wen k’ɛ́nɛ́ mbɛt.

⁸O te baa so yuwar yak mɛ nɛ̀ɛ́ tɛn nɔ̧́ a zu wi nɛ tɛ ɔ wan zu wa. Wa tɔ̧ɔ̧ ha̧ te-nɔ̧́: ‹Mɛ̀ ɔ́ wan zu yɛ!›

⁹Te-nɔ̧́ kifa nú ha̧ wa: ‹Mi tɛ e nɔ̧́ kɔ‘m nɛ̀ duk wen zɔna o sɔ̧ in o bíí duk, mɛ nɛ̀ɛ́ ɔ wan zu o dɔka te, mbɔi nɛnɛ géè nde?›

¹⁰Nɛ mɔ'ɔ nɛ o te tɔ̧ɔ̧ ha̧ te-mbɔra: ‹Kɔ-mɛ, mɛ̀ tɛ́ɛ̀ ɔ́ wan zu yɛ.›

¹¹Te-mbɔra kifa nú ha̧ wa: ‹A̧‘m é de ga̧a̧mɔ n'am duk sɛnɛ in de waya-a kɔ‘m duk, mɛ nɛ̀ɛ́ ɔ wan zu o dɔka te, mbɔi nɛnɛ géè nde?›

¹²O te tɔ̧ɔ̧ ha̧ nyak-dɔ̧ɔ̧: ‹Kɔ-mɛ, mɛ̀ tɛ́ɛ̀ ɔ́ wan zu yɛ.›

¹³Nyak-dɔ̧ɔ̧ kifa nú ha̧ wa: ‹A̧‘m é dɔ̧ɔ̧ kɔ‘m nɛ ha̧ desee ha̧ o sɔ̧ in o bíí duk, mɛ nɛ̀ɛ́ ɔ̀ wan zu o dɔka te, mbɔi nɛnɛ gee nde?›

¹⁴Ɓɛɛ o te lɛŋ tɔ̧ ha̧ mgboi-gata: ‹Kɔ-mɛ, mɛ̀ tɛ́ɛ̀ ɔ́ wan zu yɛ.›

¹⁵Ɓɛɛ mgboi-gata kifi nú ha̧ o te: ‹Kà nɛ́ bòò nɛ́ zu de taamɔ ɛ̀nɛ̀ tɛ tɛn nɛ nɔ̧́ a zu'm ha̧‘m mɛ ɔ wan zu'nɛ́, ɛ̀nɛ̀ tɛ́ɛ̀ hú̧sí ɗɔɔ gi̧ɔ̧-tɛ‘m; kà nɛ́ bòò hegɔ na, wee tɛ gɔm nɛ tɛ o tɛn nɛ duk tɛ‘m’ɛ, ɓɛɛ dɔɔ o gbatui Libaŋ a nu.›

¹⁶Kinii, k’ɛ̀nɛ̀ nɛ́ dee mɔ nɛ yuwar-a, nɛ̀ de taamɔ de nɛ wan ha̧ Abimɛlɛk, k’ɛ̀nɛ̀ nɛ́ dee mɔ in Yerubal in o bíí nutua kɔ̧-a̧ nɛ yuwar-a, k’ɛ̀nɛ̀ nɛ́ dee mɔ in a̧ nyɛm nɛ ɗoŋ tom kɔ̧-a̧,

¹⁷ɓɛɛ kà dáà kɔ‘m nɛ́ dee so kɔ‘i biro wen zu'nɛ́, kà a̧ nɛ́ ee so tɛ-a tɛ fio, kà a̧ nɛ́ gboo so ɛnɛ er o be Madiaŋ yinɛ,

¹⁸k’ɛ́nɛ́ sɔsɔɔ, ɛ́nɛ́ kura zu o bíí nutua ko dáà kɔ‘m; ɛ́nɛ́ gbɛɛ o bem kɔ̧-a̧ ɓu-mɔɔrɔ-ɗoŋ-yiitoo a nù sɛn kpɔk yí-go, ɓɛɛ ɛ́nɛ́ de wan ha̧ Abimɛlɛk bem ko kó-de-tom ko dáà kɔ‘m zu o gasawi Sikɛm wen nɛ̀ a̧ nɛ́ nya k’ɛ́nɛ́.

¹⁹K’ɛ̀nɛ̀ nɛ́ dee kànà mɔ in Yerubal in o bíí nutua kɔ̧-a̧ nɛ yuwar-a in nɛ de taamɔ, desee k’ɛ́nɛ́ a̧ tɛ́ nɛ̀ tɛ́ Abimɛlɛk, ɓɛɛ desee kɔ̧-a̧ a̧ tɛ́ nɛ̀ tɛ̀‘nɛ́ mbɛt.

²⁰Kà nɛ́ bòò hegɔ na, ŋma wee a̧ gbó nɛ̀ tɛ́ Abimɛlɛk a̧ dɔ́ o bíí Sikɛm in o bíí Bɛt-Milo a nù; ɓɛɛ wee k’ɛ́nɛ́ o bíí Sikɛm in o bíí Bɛt-Milo a̧ gbó dɔ́ Abimɛlɛk mbɛt.»

²¹Ɗoŋ mɔ‘i, Yotam yuu mɔ yak si saaye Beɛra; a̧ duka hi̧i̧ nyɛi̧ nɛ nya kɔ̧-a̧ Abimɛlɛk.

²²Abimɛlɛk ɔɔ wan zu Israɛl tɛ pɛ taar,

²³ɓɛɛ Sɔ̧ pi̧ sɛnmɔ mgbara o bíí Sikɛm in Abimɛlɛk; hegɔ wa dee ŋgazu in Abimɛlɛk.

²⁴Mɔ dee hegɔ ha̧ kifa-er fio ko o bem ko Yerubal ɓu-mɔɔrɔ-ɗoŋ-yiitoo mɛ de, ha̧ tɔk tɛ-wa mɛ si ɗoŋ zu Abimɛlɛk nya kɔ-wa nɛ̀ gbɛɛ so wa, in zu o gasawi Sikɛm nɛ̀ gbaka so Abimɛlɛk mɛ gbɛ o nya-a̧.

²⁵O gasawi Sikɛm kia yuwar mɛ ɗaŋ mɔ ha̧ Abimɛlɛk; wa toma o ŋma bíí hu̧si mgbara kaya mɛ ɓar mɔ er o wi-ɓir-war nɛ tɛ yak nù kɔ-wa'i lɛŋ. Nyɛrɛ mɔ‘i aa zer Abimɛlɛk.

²⁶Gal bem ko Ebɛd in o nya-a̧ tɛɛ ɓir nɛ nú Sikɛm; ɓɛɛ o gasawi nù‘i e ta nɛ a̧.

²⁷O gasawi nɔ‘i gboo si nú fɔ, nɛ́ɛ̀ ɓi o waya nyak-dɔ̧ɔ̧ kɔ‘i, ɓɛɛ wa vati. Wa dee gbaŋa, wa yee kɔ̧ tua ko sɔ̧ kɔ-wa. Sɛn hi̧i̧, wa nyɔŋa mɔ, nɔ nɛ mɔ, ɓɛɛ wa fom Abimɛlɛk.

²⁸Gal bem ko Ebɛd tɔ̧a̧: «Abimɛlɛk gana o bíí Sikɛm s’ɛɛ tɛ de bara ha̧ a̧ nde? Bo nɛ bem ko Yerubal in ko Zebul, gasawi ko o wi-biro kɔ̧-a̧ a̧ tɛ̀ɛ́ de so dee bara ha̧ o bíí ko Hamɔr dáà ko Sikɛm na nde? Wen ge s’ɛɛ tɛ de bara ha̧ a̧ ge?

²⁹Wa a̧ é so'm nɛ̀ wan zu dukbíí'ɛ; mi tɛ̀ɛ́ fo Abimɛlɛk tɛ wan yinɛ, ɓɛɛ mi tɔ̧ɔ̧ ha̧ a̧: A̧ a̧ káí o bíí a zu o wi-biro kɔ̧-a̧, a̧ a̧ tɛ́ ɛ̀ɛ̀ bí ŋmaa.»

³⁰Zebul wanye'i zia wen nɛ Gal bem ko Ebɛd tɔ̧a̧‘i, ɓɛɛ see-aa ɗaŋ nyɛmna.

³¹A̧ toma o ŋma bíí nɛ hu̧sa̧-a̧ mɛ dali wen'i ha̧ Abimɛlɛk nɛ̀ duk kɔ‘i sɛn saaye Aruma. Wa tɔ̧a̧: «Gal bem ko Ebɛd hɔɔ in o nya-wi sɛn Sikɛm; wa ir nɛ o bíí saaye'i mɛ de ŋgazu in'nɛ̀ɛ́.

³²Kinii, ɛ̀nɛ̀ kúr mɛ zɛ hɛ̧ɛ̧, ɛ́nɛ́ in o wi-biro nɛ a̧a̧ in'nɛ̀ɛ́, ɓɛɛ ɛ̀nɛ̀ hú̧sí sɛn zaŋbɛɛ.

³³Mɛ tutuyɛ, tɛ daŋa-wese, ɛ̀nɛ̀ nɛ́ɛ̀ bí ye'i, ɓɛɛ ŋgimbi nɛ Gal in o bíí kɔ‘i lɛŋ tɛ kur mɛ tɛɛ kpa'nɛ́, ɛnɛ tɛ de mɔ in a̧ hee mɔ'ɔ n’ɛnɛ kɔ̧ɔ̧ ga.»

³⁴Abimɛlɛk kura mɛ zɛ‘i in o wi-biro kɔ‘i lɛŋ; wa nɛɛ kɛ̧ tɛ fara naar, ɓɛɛ wa hu̧si mgbák ká̧ Sikɛm.

³⁵Gal bem ko Ebɛd gboo yor nú garo ye, ɓɛɛ Abimɛlɛk in o wi-biro kɔ‘i dik nɛ fara nɛ wa hu̧sa̧ so sɛnɛ‘i.

³⁶Nɛ Gal zɔka o wi-biro nɔ‘i, a̧ tɔ̧ɔ̧ ha̧ Zebul: «Mɛ̀ zɔ́k o wi-biro nɛ zir nɛ zu kaya mɛ tɛnɛ‘i.» Zebul kifa nú ha̧ a̧: «Mɔ‘i nɛ́ géé gi̧ɔ̧ kaya a̧ mɛ zɔk hee o bíí ga'i.»

³⁷Gal tɔ̧ɔ̧ woyo: «Mɛ̀ zɔ́k o bíí nɛ zir nɛ ká̧ Kɔn-nu tɛnɛ in o ŋma nɛ tɛ kɔ‘i nɛ war gasa te ko o Wan-gbana.»

³⁸Ɓɛɛ Zebul kifi nú ha̧ a̧: «Nú-mɛ nɛ ba nɛ wen hegɔ'ɔ a̧a̧ déè? Mɛ tɔ̧ɔ̧ so'e, Abimɛlɛk nɛ́ o s’ɛɛ tɛ de bara ha̧ a̧ o? O wi-biro nɛ mɛ ee so tɛ geemɔ'ɛ bo a̧a̧ na nde? Mɛ̀ gbó wan kinii, mɛ̀ bá biro dúk nɛ̀ wa gɔ.»

³⁹Gal gboo duk ti ha̧ o bíí Sikɛm, ɓɛɛ wa bi ŋmaa in Abimɛlɛk.

⁴⁰Gal yuu mɔ yak ɓɛɛ Abimɛlɛk ndak ɗoŋ-aa; o bíí fee nɛ dɔka-a hɔ nɛnɛ nú garo ye.

⁴¹Ɓɛɛ Abimɛlɛk si ɗoŋ si fara kɔ‘i sɛn Aruma; hegɔ Zebul ndaka Gal in o nya-a̧ wen ká wa tɛɛ ɔ ye sɛn Sikɛm.

⁴²Mɔ sa̧a̧, ɓɛɛ o bíí saaye de mɛ nɛ kpɛɛfɔ; nyɛrɛmɔ‘i aa zer Abimɛlɛk.

⁴³Abimɛlɛk kaia o bíí kɔ‘i kɛ̧ tɛ fara taar. Wa gbaa mbaŋtol sɛn zaŋbɛɛ; ŋgimbi nɛ wa zɔka o bíí gbo nɛ saaye, wa tika zu wa gbɛ nɛ wa.

⁴⁴Abimɛlɛk in o bíí kɔ‘i nɛɛ nɛ haya-a kpe nú garo yea-a si saaye, ɓɛɛ o oi bíí kɔ̧-a̧ nɛ kɛ̧ɛ̧ so kɔ‘i tɛ fara yiitoo gbɛɛ kɔ-wa nɛ o bíí nɛ ya nɛ zaŋbɛɛ nɛnɛ.

⁴⁵Mɛ tutuyɛ hegɔɔ hɔ ga̧a̧mɔ, Abimɛlɛk bìí biro nɛ ŋgaya-a; a̧ gbina garo tɛ kpɔk wese'i, kum o bíí nɛ a̧a̧ saaye'i lɛŋ, dɔ o mɔ nɛ a̧a̧ saaye'i lɛŋ a nù gbuɗuk, ɓɛɛ a̧ sɛ tɔŋ a oi-aa.

⁴⁶Ŋgimbi nɛ o gasawi nɛ ya kɔ̧ ŋgárá Sikɛm zia nyɛrɛmɔ‘i, wa yuu mɔ lɛŋ si kɔ̧ di̧i̧ ɗɔɔ tua ko sɔ̧ nɛ wa sa'e Bal-Berit.

⁴⁷Wa tɔ̧ɔ̧ ha̧ Abimɛlɛk: «O bíí kɔ̧ ŋgárá Sikɛm mɔi̧a ŋmaa lɛŋ si kɔ̧ tua'i.»

⁴⁸Ɓɛɛ Abimɛlɛk daŋ si zu kaya Salmɔŋ in o wi-biro nɛ nɛɛ in a̧; a̧ baa kpi̧i̧ kɔ̧-a̧, ɓir nɛ̀ gbaa-er te, ba nɛ ŋgɔn, e zu koŋgó ɓaa-a, ɓɛɛ a̧ tɔ̧ ha̧ o wi-biro nɛ yaa in a̧: «Mɔ n’ɛnɛ zɔka'm fara dea-a'i, ɛ̀nɛ̀ dé mbɛt nɛ haya-a.»

⁴⁹Ɓɛɛ wa kpɔk kpɔk gɔm o te, ɓɛɛ wa gbar duk ɗoŋ Abimɛlɛk; wa nɛɛ mɔi̧ o te nɔ‘i gbisi nú di̧i̧‘i, wa pi̧i̧ wee tɛ o te nɔ‘i e nú o bíí nɛ yaa so hi̧i̧. Hegɔ o bíí Migdal-Sikɛm kuma lɛŋ. Wiwii in o okoo nɛ fee lɛŋ dee hee bíí booro ga.

⁵⁰Abimɛlɛk nɛɛ biro si saaye Tebɛk; a̧ kpee ye e nù, ɓɛɛ a̧ ba.

⁵¹Ŋma ŋgárá duka so mgbák see ye'i; o okoo in o wiwii mɔi̧a ŋmaa lɛŋ si kɔ̧ a̧. O wi nɔ‘i kpee nú ŋgárá e zu, ɓɛɛ wa daŋ si zu a̧ ŋgɔn mɛ.

⁵²Abimɛlɛk nɛɛ kànà hegɔɔ hɔ tɛ ŋgárá‘i ɓɛɛ a̧ de mɛ ba. A̧ daŋa nɛnɛ hɔ mgbák nú-a mɛ pi̧ wee sɛnɛ,

⁵³ɓɛɛ ŋma okoo ba ta-hɔ̧n-mbɔɗɔmɔ yo nɛ zu-a mbaŋ.

⁵⁴Ahai, Abimɛlɛk saa baka-nyaŋa kɔ‘i, ɓɛɛ tɔ̧ ha̧ a̧: «Mɛ̀ dák gba-paa kɔ-mɛ a̧ mɛ̀ gbɛ́ nɛ‘m, wen ká o bíí tɛ tɔ̧‘e nɛ́ okoo a̧ gbɛa'm.» Baka-nyaŋa kɔ̧-a̧ toka a̧, ɓɛɛ a̧ fe.

⁵⁵O be Israɛl zɔka ndé Abimɛlɛk fea kaɗi, ɓɛɛ wa si ɗoŋ si tɛ kɔ-wa.

⁵⁶Nɛ́ hegɔ a̧ Sɔ̧ kifa nɛ er ɗaŋmɔ nɛ Abimɛlɛk dee so in dáà kɔ‘i, gbɛ nɛ o nya-wi ɓu-mɔɔrɔ-ɗoŋ-yiitoo.

⁵⁷Sɔ̧ foo ɗaŋmɔ nɛ o bíí Sikɛm dea so pi̧ zu wa woyo. Nɛ́ hegɔ a̧ fom ko Yotam bem ko Yerubal hɔɔ nɛ̀ gba̧a̧.