Read Northwest Gbaya JUDƐ 1 Bible Online

JUDƐ 1 - Northwest Gbaya bible

JUDƐ 1

¹Nɛ́ mi Judɛ, wi-de-tom ko Jesu Krist, nya Jak a̧ tom kalata’ɛ ha̧ o wi nɛ̀ Sɔ̧ saa, nɛ̀ ya tɛ̀ kɔ̧ɔ̧mɔ ko Sɔ̧ Dáà, ɓɛɛ nɛ̀ Jesu Krist pɛm wa[1].

²Deako, ga̧a̧mɔ in kɔ̧ɔ̧mɔ a̧ dúk in'nɛ̀ɛ́ nɛ̀ dɔka-a.

³O sɛm kɔ‘m, mi kɔ̧ɔ̧ so nyɛmna mɛ́ yɔr kalata h’ɛ́nɛ́ zu yuwar kpasa-a k’ɛ́ɛ́ lɛŋ; ɓɛɛ mi zɔka'e gana a̧‘m yɔ́r mɔ‘i h’ɛ́nɛ́ kinii mɛ́ ha̧ nɔɔ-ŋgiɗi h’ɛ́nɛ́ wen dee biro-kɔ̧ɔ̧ɗɔɔwen nɛ̀ Sɔ̧ ha̧a̧ ha̧ o sa̧a̧-bíí war kpɔk'i.

⁴Wen o ŋma bíí yee mgbara'nɛ́ nɛ̀ hu̧sa̧-a̧ nɛ̀ yɔramɔ a̧a̧ so zu wa ɓeemɛ ha̧ kita mɛ́ tik wa; wa nɛ́ o wi-ɗaŋ nɛ̀ kpai nɛ́ deemɔ nɛ̀ ta-tɛ ko Sɔ̧ k’ɛ́ɛ́ yor nɛ̀ ɗoŋ ɗaŋ duka-a kɔ-wa mɛ́ usi'e mɔ‘i ɔ dee, ɓɛɛ wa kafi nɛ́ kpɔk Gasawi k’ɛ́ɛ́ nɛ̀ dúk nɛ́ Gasa Wan Jesu Krist.

⁵Kóó ɛ́nɛ́ iŋa so mɔ lɛŋ nɛ̀ de-a kaɗi, mi kɔ̧ɔ̧ mɛ́ mbaŋ tɛ‘nɛ́‘e Gasa Wan gboo o bíí kɔ‘i nú Egiptɛ, ɓɛɛ tɛ́ɛ̀ kum o wi nɛ̀ dee ŋgazu woyo.

⁶O betom mɛ yiwese nɛ̀ kpa so desee zu fara kɔ‘i na, ee fara-duk kɔ-wa dúk; ɓɛɛ Sɔ̧ hɛr wa kai a ti tum kpoo nɛ kpoo pɛm nɛ̀ gasa kita wan mɛ́ gasa Wese.

⁷War ko Sɔdɔm in Gɔmɔr, ká bá nɛ̀ o be ye katɛ wa lɛŋ nɛ̀ pi̧i̧ so tɛ-wa tɛ̀ deemɔ nɛ̀ mbɔɗɔnu in nɛ̀ kɔ̧ɔ̧ so mɛ́ de mɔ nɛ̀‘i nyɛm so mɛ́ de na, wa ya zɔk nɛ̀ bɔnɛ-wee ɓɔnsɛnɛ, ɓɛɛ mɔ‘i dúk nɛ́ mɔɔ-usi-mɔ ha̧ bíí.

⁸O wi nɔ'ɔ mbɛt, de nɛ pɛrti mɔ‘i; taamɔ kɔ-wa'i bá nɛ́ wa pi̧ tɛ̀ dee ndiŋmɔ a tɛ-wa, fɛŋ nɛ̀ Wan ko Sɔ̧, e nɛ̀ o gasa betom mɛ yiwese tɛ geemɔ.

⁹Kóó nɛ́ gasa betom Michɛl nɛ̀ see-zu ŋgimbi nɛ̀ wa kpɛr so nɛnɛ in Wan-ɗaŋmɔ wen zu wɔr Moisɛ nyɛm so mɛ́ gɔn kita-dara zu a̧ na. Ɓaa mɔ n'aa tɔ̧ɔ̧ ha̧ a̧ nɛ́ mɔ'ɔ: «Gasa Wan a̧ úsí bɔnɛ ha̧ mɛ́!»

¹⁰Ɓɛɛ ko o wi nɔ'ɔ, mɔ nɛ̀ wa iŋ na, wa a̧ da̧‘i; be yuwar iŋamɔ kɔ-wa hee saɗi ga'i tɛ gbɛ wa géè.

¹¹Bɔnɛ a̧a̧ zu wa! Wen wa ba nɛ́ yuwar deemɔ ko Kain; wa yee tɛ̀ yɔɔ-kaya ko Balam wen kpaa sede, ɓɛɛ wa fe fio-ŋgazu hee ko Korea ga.

¹²Nɛ́ o wi nɔ‘i a̧ de ndiŋmɔ a tɛ nyɔŋmɔ ko o nya-wi mgbara'nɛ́, foe de wa tɛ̀ kpiki-nyɔŋmɔ nɛ̀ wa nyɔŋ‘i na: wa nɛ́ géé tura-zan nɛ̀ búk ba dam fara lɛŋ'ɛ, wa hɔɔ ŋmaa in te nɛ wai na kóó tɛ́ ŋgimbi-a mbɛt, nɛ̀ búk zuɗa pi̧ nù nɛ̀ oi ku̧nin-a, ɓɛɛ nɛ́ fio war yiitoo. Wa nɛ́ hama-yì.

¹³Ɗaŋmɔ kɔ-wa dui dui pi̧ nɛ̀ foe zu wa hee duia gba-tɔp ga. Wa nɛ́ o yámbálá-káyá, ɓɛɛ Sɔ̧ e wa ha̧ wa mɛ́ ɓɔn ti ɗuka tum ɓɔnsɛnɛ kpoo nɛ kpoo.[2]

¹⁴Mɛ̀ nɛ́ wen zu wa a̧ Enɔk, mɔɔrɔ-ɗoŋ-yiitoo bezaŋ Adam, tɔ̧ɔ̧ so nɛ̀ wen oi nú Sɔ̧‘e: «Gasa Wan a̧ tɛ́ in o zɔm sa̧a̧ gii wi-biro kɔ‘i,

¹⁵mɛ̀ gɔn kita zu o bíí lɛŋ, mɛ́ gan o wi-ɗaŋ lɛŋ tɛ dee mɔɔ-gbɛ-zu in o zɔm kpoko-wen nɛ̀ o ɗaŋwi tɔ̧ɔ̧ so ha̧ Sɔ̧‘i.»

¹⁶O wi nɔ‘i nɛ́ mɔɔ nɔ‘i nɛ̀ mbetɛ! Wa nɛ́ o wi-ku̧i-mɔ in o wi-ɗaŋsee. Taamɔ kɔ-wa lɛŋ dúk zu wɔ-mɔ nɛ̀ a̧a̧ tɛ wa! Nɛ́ o zɔm wen a̧ gbó kɔ̧ nú-wa, ɓɛɛ wa tu̧ tɛ o bíí wen kpaa yí-mɔ er wa.

¹⁷Ɓɛɛ war k’ɛ́nɛ́, o sɛm kɔ‘m, tɛ‘nɛ́'ɛ mbaŋ ɗoŋ wen nɛ̀ o betom ko Gasa Wan k’ɛ́ɛ́ Jesu Krist usa so h’ɛ́nɛ́ nɛti.

¹⁸Wa tɔ̧ɔ̧ so h’ɛ́nɛ́‘e: «Tɛ́ sɔŋkur ŋgimbi o gíí wi-mam-bíí tɛ hɔ, nɛ̀ taamɔ kɔ-wa lɛŋ tɛ duk zu ɗaŋ wɔ-mɔ nɛ̀ a̧a̧ tɛ wa.»

¹⁹O wi nɔ‘i nɛ́ mɔɔ nɔ‘i nɛ̀ mbetɛ! Wa baa nɛ́ kɛ̧ɛ̧-mgbara-bíí tɛnɛ, taamɔ kɔ-wa nɛ́ wan mɛ́ zaŋnu’ɛ, wa bó nɛ̀ Sa̧a̧ Ɔmi na.

²⁰Ɓɛɛ ɛ́nɛ́ o sɛm kɔ‘m, ɛ̀nɛ̀ yór nɛ̀ nɔa-a zu kɔ̧ɔ̧ɗɔɔwen k’ɛ́nɛ́ nɛ̀ ɔ sa̧a̧, ɓɛɛ ɛ̀nɛ̀ kɔ́fí Sɔ̧ nɛ̀ ŋgai ko Sa̧a̧ Ɔmi.

²¹Ɛ̀nɛ̀ yá ɓɔn zaŋ kɔ̧ɔ̧mɔ ko Sɔ̧, pɛm nɛ̀ deako kó Gasa Wan k’ɛ́ɛ́ Jesu Krist nɛ̀ tɛ́ de, wen h’ɛ́nɛ́ mɛ duk kpasa kpoo nɛ kpoo.

²²Ɛ̀nɛ̀ dé kó ha̧ o wi-we-mɔ-nɛ-kíì,

²³ɓɛɛ ɛ̀nɛ̀ zúɗí wa yinɛ yí wee ha̧ wa mɛ kpasi; ɓɛɛ nɛ̀ ko o oi bíí, ɛ̀nɛ̀ zɔ́k wa nɛ̀ kó in nɛ̀ kíì, ɓɛɛ ɛ̀nɛ̀ sɛ́n wa hɔ tɛ laa kɔ-wa nɛ̀ ndiŋ tɛ-wa baa sɛnɛ‘i.

²⁴Wi nɛ̀ nyɛma mɛ pɛm'nɛ́ k’ɛ́nɛ́ tɛ́ɛ̀ tik kóó tikiɗi, in nɛ̀ nyɛma mɛ de h’ɛ́nɛ́ mɛ duk tɛ gasamɔ kɔ̧-a̧ nɛ̀ desee, nɛ̀ ŋma be wen tikiɗi bó zu'nɛ́ na,

²⁵nɛ́ Sɔ̧ kpɔk, wan-kpasi yɛ nɛ̀ ɗoŋ Gasa Wan k’ɛ́ɛ́ Jesu Krist: gasamɔ, tu̧u̧-tɛ-mɔ, ŋgayamɔ in ɔɔ-wan nɛti ɓeemɛ, kinii, hegɔ yaknɛ kpoo nɛ kpoo a̧ dúk nɛ́ kɔ̧-a̧. Aamɛn.