Read Northwest Gbaya TƆ̧Ɔ̧ HU̧SA̧MƆ 13 Bible Online

TƆ̧Ɔ̧ HU̧SA̧MƆ 13 - Northwest Gbaya bible

TƆ̧Ɔ̧ HU̧SA̧MƆ 13

¹Nɛ́ mɔ'ɔ n'am zɔka ŋma saɗi nɛ̀ daŋa nɛ̀ ɗɔɔ gba-tɔp, nɛ̀ a̧a̧ nɛ̀ zak ɓu in zu mɔɔrɔ-ɗoŋ-yiitoo; laasɔ̧i̧-wan a̧a̧ see zu zak kpɔk kpɔk, ɓɛɛ ŋma yɔramɔ-ɗaŋ-nin Sɔ̧ a̧a̧ tɛ̀ zu nɔ‘i mbɛt dam sɛnɛ lɛŋ.

²Saɗi n'am zɔka'i hɔɔ ŋmaa in gɔ̧, o naŋ-a duk hee naŋ baŋgiiɗoŋ[10] ga, ɓɛɛ kɔ̧ nú-a duk hee kɔ̧ nú dila ga. Ndiɓa ha̧a̧ ŋgayamɔ in damti kɔ‘i, ká bá nɛ̀ gba zɔm ŋgai ha̧ a̧.

³Wa ee da̧i̧ tɛ ŋma zu saɗi'i hee a̧ tɛ fe fee ga, ɓɛɛ gba-da̧i̧-fio kɔ̧-a̧‘i wii. Ɗɛɗɛ o bíí zu nu lɛŋ gɔna, ɓɛɛ wa nɛ́ ɗoŋ saɗi'i.

⁴Wa gasa ndiɓa wen n'aa ha̧a̧ ŋgai ha̧ saɗi'i, wa zɔna saɗi'i mbɛt tɔ̧ nɛnɛ‘e: «Mɛ̀ nɛ́ o'o tɛ ba zu we nɛ̀ saɗi’ɛ mɛ bi biro in a̧ o?»

⁵Nɛ́ mɔ'ɔ nɛ̀ wa ha̧a̧ yuwar ha̧ a̧ mɛ tɔ̧ ɗaŋ wen, ɗaŋ nɛ̀ nin Sɔ̧, ɓɛɛ wa ha̧ ŋgai ha̧ a̧ mɛ de mɔ hegɔ tɛ́ fio-zɛ ɓu-naar-zua-yiitoo.

⁶Nɛ́ mɔ'ɔ n'aa ku̧u̧ naŋ tɔ̧ɔ̧ ɗaŋ wen zu Sɔ̧, ɗaŋ nɛ̀ nin Sɔ̧ gu nɛ̀ fara-duk ko Sɔ̧ in o wi nɛ̀ fara-duk kɔ-wa nɛ́ yiwese mɛ̀ mbɛt.

⁷Wa ha̧a̧ yuwar ha̧ a̧ mɛ bi biro in o sá̧á̧-bíí[11] in ha̧ a̧ mɛ gan wa, ɓɛɛ wa ha̧ ŋgai ha̧ a̧ mɛ ɔ wan zu o zuduk bíí, o dukbíí, o bíí nɛ̀ tɔ̧ nú nɛtɛ nɛtɛ in o tugun bíí lɛŋ.

⁸O bíí zaŋnu’ɛ lɛŋ, mɛ̀ nɛ́ wen nɛ̀ tɔ̧‘e o wi nɛ̀ nin-wa yɔr nɛ̀ ku̧u̧naŋ-a mɛ zaŋ kalata duka-kpasa ko Be-sami na, tɛ gas'a.

⁹«Bíí nɛ̀ a̧a̧ nɛ̀ zer a̧ zíí mɔ'ɔ!

¹⁰Wi nɛ̀ mɔ yɔra so wen-aa'e, a̧ tɛ de bara, tɛ de bara; wi nɛ̀ mɔ yɔra so wen-aa'e, a̧ tɛ fe nɛ́ fio-gba-paa, tɛ fe kànà nɛ́ fio-gba-paa. Hegɔ kinii, mɛ̀ nɛ́ ŋgimbi ha̧ o bíí ko Sɔ̧ mɛ nɔ ŋgiɗi zu kɔ̧ɔ̧ɗɔɔwen kɔ-wa.»

¹¹Ɓɛɛ mi zɔk ŋma saɗi nɛ̀ daŋ nɛ̀ ɗɔɔ nù mɛ̀ tɛnɛ; zak-a yiitoo hee zak vala be-sami ga, ɓɛɛ a̧ tɔ̧́ wen hee ndiɓa ga.

¹²A̧ baa ŋgai ko kuti saɗi'i de nɛ̀ mɔ lɛŋ nɛ̀ gbaayí-a mbɛt. A̧ dee ha̧ zaŋnu in o bíí zaŋnu mɛ gasi kuti saɗi nɛ̀ da̧i̧ kɔ̧-a̧ wia'i.

¹³A̧ dee o ŋga mɔɔ-gɔn-ɗɛɗɛ, de nɛnɛ ha̧ wee mɛ zir nɛ̀ yiwese mɛ̀, nɛ̀ gbaayí o bíí lɛŋ pii zu nù.

¹⁴A̧ ɔra o bíí zaŋnu nɛ̀ o mɔɔ-gɔn-ɗɛɗɛ nɛ̀‘i ha̧a̧ yuwar ha̧ a̧ mɛ de nɛ̀ gbaayí kuti saɗi'i. Nɛ́ mɔ'ɔ n'aa dee ha̧ wa mɛ dui ŋma mɔ wen saɗi nɛ̀ baa so da̧i̧-gba-paa ɓɛɛ ká kpasi'i, wen zɔna saɗi'i.

¹⁵Wa ha̧a̧ ŋgai ha̧ saɗi nɛ̀ wa duia'i mɛ ta mɔ in mɛ tɔ̧ wen; hegɔ, a̧ nyɛma mɛ ha̧ nú ha̧ wa mɛ gbɛ kóó o nde nɛ̀ beka gasi kuti saɗi nɛ̀‘i duia'i na.

¹⁶A̧ tɔ̧ɔ̧ ha̧ wa mɛ gɔn dap kɔ̧-a̧ tɛ er-wi mɛ wiiko, kóó sɔnti bíí lɛŋ: o bem, o gasawi, o wanmbɔi, o wisan, o wi nɛ̀ bó nɛ́ bara na, in o bara mbɛt.

¹⁷Ɓɛɛ kóó o ndé nɛ̀ dap ko saɗi'i, kóó yɔramɔ nɛ̀ usi mɔ nɛ̀ nyɛma ŋmaa in nin saɗi'i bó tɛ-a̧ na, beka nyɛm mɛ hi̧fi̧ ŋma mɔ, kóó mɛ ɗɔr ŋma mɔ na. Wi nɛ̀ a̧a̧ nɛ̀ iŋa-mgbara-mɔ a̧ tɔ̧́ mɔ nɛ̀ yɔramɔ usi tɛ̀ nin saɗi'i.

¹⁸Ŋgimbi kɛ̧ɛ̧-mgbara-mɔ nɛ́ mɔ'ɔ. Wi nɛ̀ a̧a̧ nɛ̀ iŋamɔ nyɛma mɛ iŋ mɔ nɛ̀ dap saɗi'i usi, wen dap saɗi'i nɛ́ nin bíí. Yɔramɔ‘i nɛ́ gɔmŋmaa-mɔɔrɔ-ɗoŋ-kpɔk nɛ ɓu-mɔɔrɔ-ɗoŋ-kpɔk-zua-mɔɔrɔ-ɗoŋ-kpɔk.