Read Northwest Gbaya TƆ̧Ɔ̧ HU̧SA̧MƆ 16 Bible Online

TƆ̧Ɔ̧ HU̧SA̧MƆ 16 - Northwest Gbaya bible

TƆ̧Ɔ̧ HU̧SA̧MƆ 16

¹Ɓɛɛ mi zíí ŋma zɔm tiger nɛ̀ tɔ̧́ wen nɛ̀ kɔ̧ tua ko Sɔ̧ mɛ̀ ha̧ o betom mɛ yiwese mɔɔrɔ-ɗoŋ-yiitoo'e: «Ɛ̀nɛ̀ nɛ́, ɛ̀nɛ̀ gbáí o be-ɗele-nyimsea ko Sɔ̧ mɔɔrɔ-ɗoŋ-yiitoo nɔ‘i a zu nù!»

²Nɛ́ mɔ'ɔ nɛ̀ kuti betom mɛ yiwese yaka nɛ́ɛ̀ gbai be-ɗele kɔ‘i, ɓɛɛ ɗaŋ gba-da̧i̧ nɛ̀ nyima-a bó nɛ́ mɔɔ-tɔ̧-na a tɛ̀ o bíí nɛ̀ yɔramɔ ko saɗi a̧a̧ tɛ-wa, in nɛ̀ gasi duia-mɔ kɔ̧-a̧.

³Yiitoo betom mɛ yiwese gbaia be-ɗele kɔ‘i a ɗɔɔ gba-tɔp, ɓɛɛ gba-tɔp'i kifi tɔk-tɛ fio; ɓɛɛ o mɔ nɛ̀ duk kpasa ɗɔɔ gba-tɔp'i fe lɛŋ.

⁴Taar betom mɛ yiwese gbaia be-ɗele kɔ‘i a ɗɔɔ nana-yì in o kpút-kpút, ɓɛɛ wa kifi tɔk.

⁵Ɓɛɛ mi zii tiger betom mɛ yiwese nɛ̀ a̧a̧ nɛ̀ ŋgai zu yì nɛ̀ tɔ̧a̧‘e: «Ɛ́nɛ́ nɛ́ wi-de-mɔ nɛ̀ yuwar-a, ɛ́nɛ́ nɛ́ sa̧a̧-wi nɛ̀ a̧a̧ sɛnɛ in nɛ̀ duka só, wen gɔna-kita k’ɛ́nɛ́ nyɛma sɛnɛ.

⁶Hee mɔ'ɔ nɛ̀ wa gbaia so tɔk-tɛ o sa̧a̧-bíí in ko o wi-tɔ̧-wen oi nú Sɔ̧ a nù ga, nɛ́ hegɔ s’ɛ́nɛ́ ha̧ tɔk ha̧ wa mɛ nɔ mbɛt, wen nyɛma nɛ̀ wa.»

⁷Ɓɛɛ mi zii ŋma tiger nɛ̀ tɔ̧ wen fara-ɗafi-sɔ̧‘e: «Ii, Gasa Wan Sɔ̧ nɛ̀ a̧a̧ nɛ̀ ŋgayamɔ lɛŋ, gɔna-kita k’ɛ́nɛ́ nyɛma sɛnɛ in duk nɛ̀ yuwar-a mbɛt.»

⁸Naar betom mɛ yiwese gbaia be-ɗele kɔ‘i a tɛ wese, ɓɛɛ wese kpa ŋgai mɛ dɔ bíí a nu nɛ̀ wee kɔ̧-a̧.

⁹Ŋga gbɛŋa-wee dɔɔ o wi nɔ‘i ɓɛɛ wa ɗaŋ nin Sɔ̧ nɛ̀ a̧a̧ nɛ̀ ŋgai zu o ŋgamɔ nɔ‘i, ɓɛɛ wa kpai duka-a kɔ-wa mɛ gasi Sɔ̧ na.

¹⁰Mɔɔrɔ betom mɛ yiwese gbaia be-ɗele kɔ‘i a zu damti ko saɗi, ɓɛɛ wan ko saɗi'i ba tum kpɔ̧ɔ̧-kpɔ̧ɔ̧; o bíí nyɔŋ nɛ́ leɓe wen bɔnɛ.

¹¹Wa ɗaŋa nin Sɔ̧ yiwese wen zu gba-da̧i̧ kɔ-wa; ɓɛɛ wa kpai deemɔ tɛ̀ duka-a kɔ-wa na.

¹²Mɔɔrɔ-ɗoŋ-kpɔk betom mɛ yiwese gbaia be-ɗele kɔ‘i a ɗɔɔ nana-yí Efrat, ɓɛɛ yì ɔ̧si̧ tá̧í̧-tá̧í̧ wen ee yuwar ha̧ o wannu nɛ̀ tɛ́ nɛ̀ war daŋa-wese mɛ̀.

¹³Mi zɔka o ŋma ɗaŋ ɔmi taar hee yaa-gbazal ga nɛ̀ gbo nɛ̀ kɔ̧ nú ndiɓa, in kɔ̧ nú saɗi'i, ká bá nɛ̀ kɔ̧ nú wi-tɔ̧-wen oi nú Sɔ̧ ndela.

¹⁴O mɔɔ nɔ‘i nɛ́ ɔmi ko o ɗaŋ-sɔ̧. O ɗaŋ ɔmi nɔ‘i taar'i de nɛ́ o ŋga mɔɔ-gɔn-ɗɛɗɛ, ɓɛɛ wa nɛ̀ɛ́ kpa o wannu zu nù'ɛ lɛŋ mɛ mɔi̧ wa wen bíí biro tɛ gasa wese ko Sɔ̧ nɛ̀ a̧a̧ nɛ̀ ŋgayamɔ lɛŋ.

¹⁵«Zɔ́k, mi tɛ́ tɛ̀ hee wi-zuzu ga. Bíí nɛ̀ duk nɛ̀ yí in nɛ̀ zɔk laa kɔ‘i nɛ̀ de-a, wen ká a̧ tɛ́ɛ̀ duk nɛ̀ mgbìí ká bíí tɛ̀ɛ́ zɔk zim tɛ-a, dúk nɛ̀ desee!»

¹⁶Nɛ́ mɔ'ɔ nɛ̀ wa mɔi̧a o wannu nɔ‘i lɛŋ si fara nɛ̀‘i sa nɛ̀ nú hébreu'e Harmagedɔŋ.

¹⁷Mɔɔrɔ-ɗoŋ-yiitoo betom mɛ yiwese gbaia be-ɗele kɔ‘i a yí-zan, ɓɛɛ ŋma zɔm tiger tɔ̧ wen nɛ̀ tɛ́ damti nɛ̀ kɔ̧ tua ko Sɔ̧ mɛ tɛnɛ‘e: «Nyɛma sɛnɛ kaɗi.»

¹⁸Ɓɛɛ o pi̧i̧-kórò, o mbaŋa-kórò in o giti mɔ de mɔ; nù naka nɛ̀ ŋgaya-a hee mɔ'ɔ nɛ̀ tɛ́ de nɛti ku̧u̧naŋ nɛ̀ o bíí a̧a̧ nɛnɛ zaŋnu’ɛ na ga.

¹⁹Gasa ye mbaŋa kɛ̧ tɛ́ fara taar, ɓɛɛ o gasa ye ko o tugun bíí tir a nù. Tɛ́ Sɔ̧ mbaŋa ɗoŋ Babilɔŋ yaa-gásì, wen ha̧ Sɔ̧ mɛ ha̧ be-ɗele nɛ̀ dɔ̧ɔ̧-nyimsea kɔ̧-a̧ kpa̧i̧ kɔ̧ a̧‘i ha̧ Babilɔŋ mɛ nɔ.

²⁰O see-kisi lɛŋ pɛsa sót-sót ɓɛɛ o kaya yambali ɗaŋ.

²¹O ɓɔrɔ nɛ̀ ɔ dita hee kilo ɓu-naar ga aia nɛ̀ yiwese a zu o bíí, ɓɛɛ o bíí ɗaŋ nin Sɔ̧ wen bɔnɛ-ɓɔrɔ, wen bɔnɛ‘i nɛ́ ŋma zɔm ŋgamɔ nyɛmna.