Read Northwest Gbaya TƆ̧Ɔ̧ HU̧SA̧MƆ 21 Bible Online

TƆ̧Ɔ̧ HU̧SA̧MƆ 21 - Northwest Gbaya bible

TƆ̧Ɔ̧ HU̧SA̧MƆ 21

¹Ɓɛɛ mi zɔk mbe yiwese in mbe nù, wen kuti yiwese in kuti nù yambala, gba-tɔp bó ɓɔna mbɛt.

²Mi zɔka mbe sa̧a̧ ye Jerusalɛm nɛ̀ zir nɛ̀ tɛ́ Sɔ̧ yiwese mɛ̀ tɛnɛ hee ŋma zɔŋa nɛ̀ ɗafa tɛ̀ mɛ́ ba wíì ga.

³Nɛ́ mɔ'ɔ n'am zia ŋma ŋgaya tiger ti damti mɛ‘e: «Fara-duk ko Sɔ̧ in o bíí nɛ́ mɔ'ɔ! A̧ tɛ duk in wa ɓɛɛ wa tɛ ya nɛ́ dukbíí kɔ̧-a̧. A̧ tɛ duk nɛ́ Sɔ̧ kɔ-wa nɛ̀ tɛ duk in wa.

⁴A̧ tɛ di̧ mi̧i̧kɔ̧a̧ lɛŋ yí-wa yinɛ. Fio beka bó ɓɔna; mɔ nɛ̀ tɔ̧‘e, zima-fio, hiɗamɔ, kóó bɔnɛ beka bó ɓɔna, wen gba̧‘a̧ duka-a yaka kaɗi.»

⁵Ɓɛɛ wi nɛ̀ duk zu damti'i tɔ̧́: «Zɔ́k kinii, mi dee mɔ lɛŋ nɛ̀ mbe-a.» Ɓɛɛ a̧ tɔ̧́ woyo'e: «Mɛ̀ yɔ́r mɔ'ɔ: o wen nɔ'ɔ nɛ́ kpasawen nɛ̀‘i nyɛma mɛ e ta nɛnɛ.»

⁶Nɛ́ mɔ'ɔ n'aa tɔ̧ɔ̧ ha̧‘m woyo'e: «Mɔ lɛŋ nyɛma sɛnɛ kaɗi. Mi nɛ́ Alfa in Omega, ku̧u̧naŋ-mɔ in kaɗa-mɔ mbɛt. Wi nɛ̀ wɔ-yì gbɛ a̧, mi tɛ ha̧ yì-duka-kpasa ha̧ a̧ géè.

⁷Wi nɛ̀ tɛ gan zu mɔ tɛ kpa mɔɔ-oi'i; mi tɛ duk nɛ́ Sɔ̧ kɔ̧-a̧ ɓɛɛ a̧ duka nɛ́ bem kɔ‘m.

⁸Ɓɛɛ war ko o wi-nɔ-ŋgiɗi na, o wi-bɛ̧-kɔ̧ɔ̧ɗɔɔwen, o wi-de-mɔɔ-búù, o wi-gbɛ-zu, o wi-de-mɔɔ-nyɛr, o wi-de-mɔɔ-kifi, o wi-gasi géé-sɔ̧, o wi-ndela lɛŋ, mɔ nɛ̀ wa tɛ kpa nɛ́ tɔp-wee-baraadu: yiitoo fio nɛ́ mɔ‘i.»

⁹Nɛ́ mɔ'ɔ nɛ̀ ŋma kpɔk mgbara o betom mɛ yiwese mɔɔrɔ-ɗoŋ-yiitoo nɛ̀ kasi o be-ɗele mɔɔrɔ-ɗoŋ-yiitoo nɛ̀ duna nɛ̀ o sɔŋkur ŋgamɔ mɔɔrɔ-ɗoŋ-yiitoo tɛ̀ɛ́ tɔ̧ wen’ɛ ha̧‘m: «Mɛ̀ tɛ́ ha̧‘m usi zɔŋa nɛ̀ Be-sami hara mɛ ba nɛ̀ kóò ha̧ mɛ́.»

¹⁰A̧ baa'm nɛ̀ ŋgai ko Ɔmi si zu gasa kusa kaya mɛ̀, ɓɛɛ usi sa̧a̧ ye Jerusalɛm, nɛ̀ zira nɛ̀ tɛ́ Sɔ̧ yiwese mɛ̀ tɛnɛ ha̧‘m.

¹¹Mgbák gasamɔ ko Sɔ̧ toka tɛ Jerusalɛm. Sa̧a̧mɔ nɛ̀ duk sɛnɛ duk hee ta nɛ̀ gɛnɛ-a ɔ ŋgaya ga, kóó hee ŋma ta ga ŋgɛ́lɛ́lɛ́ nɛ̀ duk tok nɛnɛ ga mbɛt.

¹²O ŋgárá-biro kɔ̧-a̧ duk nɛ̀ ndota-a in nɛ̀ kusa-a mbɛt. Nú garo ye'i ɓu-zua-yiitoo a̧a̧ só sɛnɛ nɛ̀ o betom mɛ yiwese ɓu-zua-yiitoo yor nú wa. Nin o zuduk be Israɛl ɓu-zua-yiitoo yɔra so nú garo nɔ‘i mbɛt.

¹³Nú garo taar zɔk mɔ si daŋa-wese, taar si ká̧-zan-mɛ́-ŋgɔn, taar si ká̧-zan-mɛ́-ɗɔɔ ɓɛɛ oi-aa taar zɔk mɔ si yee-wese.

¹⁴Wa aa só o ta ɓu-zua-yiitoo ɗɔɔ naŋ ŋgárá ye'i, ɓɛɛ wa yɔr nin o betom ko Be-sami ɓu-zua-yiitoo tɛ o ta nɔ‘i.

¹⁵Betom mɛ yiwese nɛ̀ duka tɔ̧ nɛ̀ wen ha̧‘m'i kasi so nɛ́ mɔɔ-we-mɔ nɛ̀ duk hee tòrò-lɔr ga er-a wen wee ye'i, in o nú garo ká bá nɛ̀ ŋgárá.

¹⁶Dura ye'i in pɛsa-a nyɛma ŋmaa. A̧ wee ye'i nɛ̀ tòrò ɓɛɛ kpa nɛ́ kilomɛtrɛ booro-yiitoo-nɛ-gɔmŋmaa-yiitoo; dura-a in pɛsa-a in kusa-a nyɛma ŋmaa lɛŋ.

¹⁷A̧ baa nɛ́ yuwar-wee-mɔ ko bíí we nɛ̀ ŋgárá‘i ɓɛɛ kpa mɛtrɛ ɓu-mɔɔrɔ-ɗoŋ-yiitoo-zua-yiitoo.

¹⁸Mɔ nɛ̀ wa mbòó nɛ̀ ŋgárá ye'i nɛ́ o toka-ta nɛ‘i sa'e jaspɛ, ɓɛɛ ye'i lɛŋ nɛ́ gba de sa̧a̧ lɔr hee bu bereŋ ta ga ŋgɛ́lɛ́lɛ́.

¹⁹Naŋ ye'i lɛŋ nɛ́ toka-ta nɛtɛ nɛtɛ nɛ̀ gɛnɛ-a ɔ ŋgaya; kuti ta'i tok tok, nin-a nɛ́ jaspɛ, yiitoo-aa nɛ̀ tu̧-a̧ hee gba̧a̧-yí-zan ga, nin-a nɛ́ safir, taar-a nɛ̀ mbui-a, nin-a nɛ́ kalsedoan, naar-a nɛ̀ mbui-a harɗaŋ, nin-a nɛ́ emerod,

²⁰mɔɔrɔ-a nɛ́ ta-kui, nin-a nɛ́ sardɔan, mɔɔrɔ-ɗoŋ-kpɔk-a nɛ̀ gbɛ̧-a̧, nin-a nɛ́ kornalin, mɔɔrɔ-ɗoŋ-yiitoo-aa nɛ̀ mbui-a, nin-a nɛ́ krisolit, mɔɔrɔ-ɗoŋ-taar-a tok tok kɛn-kɛn, nin-a nɛ́ beril, mɔɔrɔ-ɗoŋ-naar-a nɛ̀ tara-a, nin-a nɛ́ topaz, ɓu-a nɛ̀ mbui-a vaka-vuku, nin-a nɛ́ krizopraz, ɓu-zua-kpɔk-a dúk hee ta-gi̧ɔ̧ ga, nin-a nɛ́ yasɛntɛ; ɓu-zua-yiitoo-aa dap-aa zaŋa ŋmaa nɛtɛ nɛtɛ, nin-a nɛ́ ametist.

²¹O nú garo ɓu-zua-yiitoo nɛ́ gba̧a̧-kísí ɓu-zua-yiitoo; ɓɛɛ nú garo kpɔk kpɔk nɛ́ gba̧a̧-kísí kpɔk. Bee-gara ye'i lɛŋ nɛ́ gba de sa̧a̧ lɔr hee bu bereŋ ta ga ŋgɛ́lɛ́lɛ́.

²²Ɓɛɛ mi zɔk tua ko Sɔ̧ saaye'i na, wen tua ko Sɔ̧ saaye'i nɛ́ Gasa Wan Sɔ̧ nɛ̀ a̧a̧ nɛ̀ ŋgayamɔ lɛŋ in Be-sami ɓɛɛ.

²³Wen ko ye'i bó nɛ̀ wese in nyaŋa-zɛ mɛ ba zu a̧ na, wen nɛ́ gasamɔ ko Sɔ̧ a̧ nyɛk zu a̧, ɓɛɛ sa̧a̧mɔ kɔ̧-a̧ nɛ́ Be-sami.

²⁴O tugun bíí tɛ́ nɛ̀ nɔ̀ tɛ̀ sa̧a̧mɔ ko ye'i, ɓɛɛ o wannu zaŋnu kaia o mɔɔ-wan kɔ‘i nɛnɛ a sɛnɛ.

²⁵O nú garo ye'i beka kpe na kpoo nɛ kpoo, wen zɛ beka de hi̧i̧ ɓɔna.

²⁶O tugun bíí tɛ́ kai gasamɔ in mbɔi kɔ‘i nɛnɛ sɛnɛ.

²⁷Ŋma ndiŋmɔ beka ye hi̧i̧ na, kóó o wi-de-mɔɔ-nyɛr in o wi-ndela na mbɛt, kànà nɛ́ o wi nɛ̀ nin-wa yɔra zaŋ kalata duka-kpasa ko Be-sami ɓɛɛ.