Read Northwest Gbaya TƆ̧Ɔ̧ HU̧SA̧MƆ 3 Bible Online

TƆ̧Ɔ̧ HU̧SA̧MƆ 3 - Northwest Gbaya bible

TƆ̧Ɔ̧ HU̧SA̧MƆ 3

¹«Mɛ̀ yɔ́r kalata ha̧ betom ko Sɔ̧ nɛ̀ duk zu zuduk bíí ko Krist sɛn Sardɛs'e ndé: «Mɔ nɛ̀ wi nɛ̀ a̧a̧ nɛ̀ ɔmi ko Sɔ̧ mɔɔrɔ-ɗoŋ-yiitoo in sɔra mɔɔrɔ-ɗoŋ-yiitoo tɔ̧ nɛ́ mɔ'ɔ: Mi iŋa tom kɔ-mɛ; nin mɛ hu̧r'e, mɛ́ duk kpasa, ɓɛɛ mɛ fee kaɗi.

²Yí-mɛ a̧ háí, ɓɛɛ mɛ̀ zɔ́k be oi ŋgai kɔ-mɛ nɛ̀ ɓɔna benaŋ‘i, wen mi zɔka o tom kɔ-mɛ nyɛm yí Sɔ̧ kɔ‘m na.

³Tɛ-mɛ a̧ mbáŋ ɗoŋ mɔ nɛ̀ mɛ yamba in mɔ nɛ̀ mɛ zia so; mɛ̀ kásí mɔ‘i, ɓɛɛ mɛ̀ kpáí duka-a kɔ-mɛ. Kà mɛ̀ ɔ́ ya, mi tɛ kpaŋi mɛ́ hee wi-zuzu ga, ɓɛɛ mɛ́ beka iŋ ŋgimbi n'am tɛ kpaŋi nɛ̀ mɛ́ na.

⁴Ɓɛɛ o ŋma bíí kɔ-mɛ a̧a̧ Sardɛs nɛ̀ de ndiŋ a tɛ laa kɔ‘i na; wa tɛ pi̧ bu laa yak nɛnɛ in am wen tom kɔ-wa nyɛma sɛnɛ.

⁵O wi nɛ̀ tɛ gan zu mɔ tɛ pi̧ nɛ́ bu laa, mi beka bi nin-wa yinɛ zaŋ kalata duka-kpasa na, ɓɛɛ mi tɛ tɔ̧ ti Dáà in o betom kɔ̧-a̧‘e wa nɛ́ o bíí kɔ‘m.

⁶«Wi nɛ̀ a̧a̧ nɛ̀ zer a̧ zíí mɔ nɛ̀ Sa̧a̧ Ɔmi tɔ̧ ha̧ o zuduk bíí ko Krist.»

⁷«Mɛ̀ yɔ́r kalata ha̧ betom ko Sɔ̧ nɛ̀ duk zu zuduk bíí ko Krist sɛn Filadɛlfii'e ndé: «Mɔ nɛ̀ sa̧a̧ wi, mgbák wi nɛ̀ kasi mɔɔ-hu̧i̧-nú tua ko David, kà a̧ hú̧i̧ nú tua kaɗi, wi kpea-a bó na, ɓɛɛ kà a̧ kpé kaɗi, wi-hu̧i̧a̧-a̧ bó na mbɛt tɔ̧, nɛ́ mɔ'ɔ:

⁸Mi iŋa tom kɔ-mɛ; zɔ́k, mi hu̧i̧a̧ nú tua bóóŋ e ti mɛ, nɛ̀ ŋma bíí nyɛm mɛ kpe na; ŋgai kɔ-mɛ dɔk na, mɔ kpɔk, mɛ kasa wen kɔ‘m, mɛ kaf'am na mbɛt.

⁹Hegɔ, mi ha̧a̧ o wi nɛ̀ mɔi̧ kɔ̧ tua ko Satan ha̧ mɛ; mɛ̀ nɛ́ o wi nɛ̀ tɔ̧‘e wi nɛ́ Juif, ɓɛɛ wa bó nɛ́ Juif na mbɛt, wa de nɛ́ ndela. Mi tɛ de ha̧ wa mɛ nɛ̀ɛ́ gbɛ zugur-wa nù ti mɛ; hegɔ wa tɛ iŋ‘e mi kɔ̧ɔ̧ mɛ́.

¹⁰Hee mɔ'ɔ nɛ̀ mɛ kasa wen kɔ‘m nɛ̀ nɔɔ-ŋgiɗi ga, mi tɛ́ kasi mɛ mbɛt ŋgimbi nɛ̀ bɔnɛ tɛ tik zu bíí zaŋnu lɛŋ wen wea wa.

¹¹Mi hɛɗa mɛ pii ɗoŋ kaɗi; mɛ̀ kásí mɔ nɛ̀ mɛ a̧a̧ nɛnɛ‘i nɛ̀ de-a, wen ká ŋma bíí tɛ̀ɛ́ ba laasɔ̧i̧-wan kɔ-mɛ.

¹²Wi nɛ̀ tɛ gan zu mɔ, mi tɛ e a̧ hee mbiŋ-tua ga sɛn kɔ̧ tua ko Sɔ̧ kɔ‘m, ɓɛɛ a̧ beka gbo ɓɔna. Mi tɛ́ yɔr nin Sɔ̧ kɔ‘m tɛ-a in nin ye ko Sɔ̧ kɔ‘m tɛ-a in mbe nin-am mbɛt; ye'i nɛ́ mbe Jerusalɛm nɛ̀ zir nɛ̀ yiwese nɛ̀ tɛ́ Sɔ̧ kɔ‘m mɛ̀ tɛnɛ.

¹³«Wi nɛ̀ a̧a̧ nɛ̀ zer a̧ zíí mɔ nɛ̀ Sa̧a̧ Ɔmi tɔ̧ ha̧ o zuduk bíí ko Krist.»

¹⁴«Mɛ̀ yɔ́r kalata ha̧ betom ko Sɔ̧ nɛ̀ duk zu zuduk bíí ko Krist sɛn Laodisee ndé: «Mɔ nɛ̀ Aamɛn, mgbák wi-sedaako nɛ̀ a̧a̧ nɛ̀ mboozu, wan nɛ̀ Sɔ̧ baa de nɛ̀ mɔ lɛŋ nɛ̀ ku̧u̧naŋ-a mɛ̀, tɔ̧ nɛ́ mɔ'ɔ:

¹⁵Mi iŋa tom kɔ-mɛ; wen nɛ̀ mɛ duk nɛ̀ gɛ̧ɛ̧-aa, kóó nɛ̀ wee-aa na mbɛt. Mɛ́ tɛ̀ɛ́ duk só nɛ̀ gɛ̧ɛ̧-aa kóó nɛ̀ wee-aa!

¹⁶Ɓɛɛ hee mɔ'ɔ nɛ̀ mɛ duk woloe, bó nɛ́ gɛ̧ɛ̧-aa in wee-aa na mbɛt ga, mi tɛ fɔ̧i̧ mɛ pi̧ nù!

¹⁷Wen mɛ‘e wi nɛ́ wanmbɔi, wi kpaa mbɔi nyɛmna, ŋma mɔ nɛ̀ tɛ́ ɓan wi bó na; ɓɛɛ mɛ́ iŋ kɔ-mɛ‘e, wi nɛ́ wi-kɔsa, nɛ̀ o bíí zɔk nɛ̀ kó, wi nɛ́ wisan, wi-boma-yí in wi-mgbìí na.

¹⁸Nɛ́ hegɔ s'am tɔ̧ mbɔrɔ ha̧ mɛ‘e, mɛ̀ hí̧fí̧ nɛ́ sa̧a̧ lɔr nɛ̀‘i nɔi̧a tɛ́ wee sɛn er-am, wen ha̧ mɛ mɛ kpa mbɔi. Mɛ̀ hí̧fí̧ bu laa er-am mɛ́ pì̧ wen ká mɛ́ tɛ́ɛ̀ duk nɛ̀ mgbìí, ká‘i zɔk zim tɛ-mɛ ɓɛɛ ká búù ba mɛ; mɛ̀ hí̧fí̧ nyina-a-yí er-am mɛ́ à yí-mɛ wen ha̧ mɛ́ mɛ́ zɔk mɔ.

¹⁹Mɛ̀ nɛ́ o wi n'am kɔ̧a̧ lɛŋ a̧‘m gusi mgbɔ nɛ̀ wa pii ɗoŋ tɛ‘m; mɛ̀ é see-mɛ tɛ tom ɓɛɛ mɛ̀ kpáí duka-a kɔ-mɛ.

²⁰Zɔ́k, mi yor nú tua kɔn nɛ̀ mɔ. Kà ŋma bíí zíí tiger-am, ɓɛɛ kà a̧ hú̧í̧ nú tua ha̧‘m, mi tɛ ye kɔ̧ tua kɔ̧-a̧ ɓɛɛ ɛ́ɛ́ nyɔŋa mɔ in ŋmaa.

²¹Wi nɛ̀ tɛ gan zu mɔ, mi tɛ e ha̧ wi’ɛi mɛ duk zu damti kpɔk in am, hee mɔ'ɔ n'am gana so nɛ̀ zu mɔ, ɓɛɛ mi duk zu damti kpɔk in Dáà kɔ‘m’ɛ ga.

²²«Wi nɛ̀ a̧a̧ nɛ̀ zer a̧ zíí mɔ nɛ̀ Sa̧a̧ Ɔmi tɔ̧́ ha̧ o zuduk bíí ko Krist.»