Read Northwest Gbaya TƆ̧Ɔ̧ HU̧SA̧MƆ 9 Bible Online

TƆ̧Ɔ̧ HU̧SA̧MƆ 9 - Northwest Gbaya bible

TƆ̧Ɔ̧ HU̧SA̧MƆ 9

¹Mɔɔrɔ betom mɛ yiwese dɔma mbia kɔ‘i; nɛ́ mɔ'ɔ n'am zɔka ŋma sɔra nɛ̀ hɔ̧fa̧ nɛ̀ yiwese mɛ̀ tik nù, ɓɛɛ wa ha̧ mɔɔ-hu̧i-nú o kɔ̧ tɛ ɗuka-fara ha̧ a̧.

²A̧ hu̧i̧a̧ nú ɗuka-fara ɓɛɛ zi-wee zuɗi gbonɛ hee wee kɔ̧ gasa lɔk ga; wese in búk mbɛt baa tum gír-gír.

³O gba-dɔya gboo nɛ̀ tɛ zi-wee'i kpe zu nù. Wa ha̧a̧ ŋgai ha̧ o gba-dɔya nɔ‘i mɛ duk hee o tore zaŋnu ga.

⁴Wa dora o gba-dɔya nɔ‘i wen ká wa tɛ́ɛ̀ nyɔŋ zɔ̧, o wa̧a̧-te, kóó ŋma te kpɔk na. Mɔ nɛ̀ wa tɛ́ ɗaŋ kana, mɛ̀ nɛ́ o bíí nɛ̀ tumbal ko Sɔ̧ bó sɔnti-wa na.

⁵Sɔ̧ ha̧a̧ yuwar ha̧ o gba-dɔya mɛ usi bɔnɛ ha̧ o wi nɔ‘i tɛ fio-zɛ mɔɔrɔ, ɓɛɛ bó nɛ́ wen gbɛ́ɛ́ wa na. Nyimmɔ-bɔnɛ ko o gba-dɔya nɔ‘i duk hee tore a̧ nyɔŋa wi ga.

⁶Zaŋ fio-zɛ mɔɔrɔ tɛ́ ŋgimbi'i, o bíí tɛ kii mɛ fe, ɓɛɛ fio beka ba wa na. Wa tɛ kɔ̧ mɛ fe, ɓɛɛ fio tɛ yu wa.

⁷O gba-dɔya nɔ‘i ya hee o nyaŋa nɛ̀‘i hɛra wen biro ga; duk hee laasɔ̧i̧-wan nɛ̀‘i dee nɛ̀ lɔr a̧a̧ zu wa ga, ɓɛɛ saŋa-yí-wa hɔɔ ŋmaa in saŋa-yí bíí.

⁸Mui̧-zu-wa duk hee mui̧-zu okoo ga, ɓɛɛ gba̧a̧-nin-wa ya hee gba̧a̧-nin dila ga.

⁹Dúk hee wa pi̧i̧ nɛ́ laa-boi ga, ɓɛɛ giti wɔr-ɓaa-wa nɔi̧ hee giti gíí keekee nɛ̀ o nyaŋa gbur si yí biro ga.

¹⁰Dom-wa a̧a̧ sɛnɛ hee ko tore ga, nɛ̀ sɛɛ-a a̧a̧ nú-a, ɓɛɛ ŋgai kɔ-wa duk tɛ o dom-wa nɔ‘i wen usa bɔnɛ ha̧ o bíí tɛ fio-zɛ mɔɔrɔ.

¹¹Wannu kɔ-wa nɛ́ betom mɛ yiwese wan mɛ́ tɛ̀ ɗuka-fara nɛ‘i sa nin-a nɛ̀ nú hébreu'e «Abadɔŋ», in nɛ̀ nú grɛk'e «Apoliɔŋ» (mɛ̀ nɛ́ wen nɛ̀ tɔ̧‘e: «Wi-ɗaŋ-mɔ»).

¹²Kuti bɔnɛ yaka kaɗi, ɓɛɛ o ŋma bɔnɛ yiitoo tɛ hɔ nɛ̀ ɗoŋ woyo.

¹³Mɔɔrɔ-ɗoŋ-kpɔk betom mɛ yiwese dɔma mbia kɔ‘i, ɓɛɛ mi zii ŋma tiger nɛ̀ gbo nɛ̀ kɔ̧ o zak sɛn fara-ɗafi-sɔ̧ nɛ̀‘i dee nɛ̀ lɔr nɛ̀ duk ti Sɔ̧.

¹⁴Tiger'i tɔ̧ɔ̧ ha̧ mɔɔrɔ-ɗoŋ-kpɔk betom mɛ yiwese nɛ̀ kasi kalata'e: «Mɛ̀ búr o betom mɛ yiwese naar nɛ̀‘i hɛra nɛ̀ nyak-boi nɛ̀ ya nú nana-yí Efrat a nù.»

¹⁵Nɛ́ mɔ'ɔ nɛ̀ wa bura o betom mɛ yiwese naar nɛ̀ yaa so zu naŋ pɛm nɛ̀ ŋgimbi, wese, fio-zɛ in pɛ nɛ̀ wa tɛ́ gbɛ nɛ̀ o bíí zaŋnu tɛ̀ kɛ̧a̧-a̧ kpɔk tɛ́ fara taar'i.

¹⁶Ɓɛɛ dɔka o wi-daŋ-nyaŋa duka so nɛ́ booro zu booro; mi zia so dɔka wa nɛ̀ wa tɔra.

¹⁷O nyaŋa in o wi-daŋ-nyaŋa n'am zɔka so tɛ̀ hɔɔ-zu'i nɛ́ mɔɔ nɔ‘i. Wa pi̧i̧ so nɛ́ laa-boi nɛ̀ gbɛ̧-a̧ hee wee ga, nɛ̀ tu̧-a̧ hee safir ga in nɛ̀ raka-a hee baraadu ga mbɛt. Zu o nyaŋa nɔ‘i duk hee zu o dila ga; ɓɛɛ wee in zi-wee ba nɛ̀ baraadu gbo nɛ̀ kɔ̧ nú-wa.

¹⁸Nɛ́ o ŋga mɔɔ nɔ'ɔ taar’ɛ: wee, zi-wee, in baraadu nɛ̀ gbó nɛ̀ kɔ̧ nú-wa'i a̧ kuma kɛ̧a̧-bíí zaŋnu kpɔk tɛ́ fara taar'i.

¹⁹Wen ŋgai ko o nyaŋa nɔ‘i duk sɛn kɔ̧ nú-wa in tɛ dom-wa. O dom-wa hɔɔ ŋmaa in gɔk; zu-wa a̧a̧ sɛnɛ, ɓɛɛ nɛ́ mɔ‘i a̧ wa gbɛ nɛ̀ bíí.

²⁰Ɓɛɛ war ko oi bíí nɛ̀ fe so tɛ o ŋgamɔ nɔ‘i na, wa zik tɛ-wa mɛ e tom nɛ̀ er-wa dea[8] duk na. Ɓɛɛ wa ɓɔn kànà tɛ̀ wora ɗaŋ-sɔ̧ in o géé-sɔ̧ nɛ̀‘i dee nɛ̀ lɔr, nɛ̀ sede, nɛ̀ ndɛrɛ, nɛ̀ ta in te, nɛ̀ nyɛm mɛ zɔk mɔ, mɛ zii mɔ, in mɛ nɛ̀ nɔ̀ na mbɛt.

²¹Wa e o gbɛɛ-zu in o mɔɔ-dua kɔ-wa, in dee mɔɔ-dàlà ká bá nɛ̀ mɔɔ-zuzu kɔ-wa'i duk na mbɛt.