Read Northwest Gbaya RUTH 2 Bible Online

RUTH 2 - Northwest Gbaya bible

RUTH 2

¹Ŋma bíí ko wíì ko Naɔmi duka so nɛ́ ŋma gasawi nɛ̀ a̧a̧ nɛ̀ mbɔi. A̧ nɛ́ pɛ́r-nam ko Elimɛlɛk, nin-a nɛ́ Boaz.

²Ruth zɔŋa Mɔab tɔ̧ɔ̧ ha̧ Naɔmi: «Mi kɔ̧ɔ̧ mɛ nɛ̀ɛ́ sar oi alkamaari sɛn kpɛɛfɔ ko ŋma bíí nɛ̀ tɛ zɔk am nɛ̀ ko.» Ɓɛɛ Naɔmi kifi nú ha̧ a̧: «Bem kɔ‘m, mɛ̀ nɛ́ géè.»

³Ɓɛɛ a̧ nɛ́ɛ̀ ye ŋma kpɛɛfɔ ha̧ a̧ mɛ sar mɔ ɗoŋ o wi-mɔi̧-nyɔnɔ. Sɔnti-a dea, ɓɛɛ a̧ ye nɛ́ kpɛɛfɔ ko Boaz bíí nutua ko Elimɛlɛk.

⁴Duka, ɓɛɛ Boaz hɔ nɛ̀ Bɛtlɛhɛm; a̧ fana o wi-mɔi̧-nyɔnɔ hee mɔ'ɔ ga: «GASA WAN a̧ dúk in'nɛ̀ɛ́,» ɓɛɛ wa kifi nú ha̧ a̧: «GASA WAN a̧ tók de yoŋgo zu'nɛ́.»

⁵Boaz aka gasawi ko o wi-mɔi̧-nyɔnɔ kɔ‘i: «Boko-bem’ɛ nɛ́ kóò ko o?»

⁶Ɓɛɛ gasawi ko o wi-mɔi̧-nyɔnɔ kifi nú ha̧ a̧: «Mɛ̀ nɛ́ zɔŋa Mɔab nɛ̀ pia so nɛ̀ nú Mɔab in Naɔmi.

⁷A̧ tɛ̀ɛ̀ ak mɔ hɛ̧ɛ̧ mɛ tutuyɛ'ɛ mɛ sar mɔ ɗoŋ o wi-mɔi̧-nyɔnɔ, ɓɛɛ n'aa hɔɔ nɛnɛ‘i, a̧ tɛ duk nù hɔ̧ɔ̧ na.»

⁸Boaz tɔ̧ɔ̧ ha̧ Ruth: «Boko-bem kɔ‘m, mɛ̀ zìì, ká mɛ́ nɛ́ɛ̀ sar alkamaari sɛn ŋma gɔni kpɛɛfɔ na, ká mɛ́ yak fara’ɛ na. Mɛ̀ dúk kànà in o kó-de-tom kɔ‘m.

⁹Mɛ̀ zɔ́k fara nɛ̀ wa gɔn alkamaari sɛnɛ, ɓɛɛ mɛ̀ ndák pata wa. Mi tɔ̧ɔ̧ ha̧ o wi-de-tom kɔ‘m ká wa fo mɛ na. Kà wɔ-yì nɛ́ gbɛɛ mɛ, ɓɛɛ mɛ̀ nɛ́ɛ̀ nɔ yì nɛ̀ o kó-de-tom ɗuu a kɔ̧ kpánà.»

¹⁰Ruth guu yí nù, ɓɛɛ ak mɔ: «Mi dee hee ge s’ɛnɛ kɔ̧a̧‘m hegɔ nɛ̀ mi nɛ́ gɛnɛ'ɛ ge?»

¹¹Boaz kifa nú ha̧ a̧: «Wa wee ɗoŋ mɔ lɛŋ nɛ̀ mɛ dee in for-mɛ mɛ kóò ŋgimbi nɛ̀ wíì kɔ-mɛ fee nɛnɛ hɔ kinii ha̧‘m. Mɛ ee dáà kɔ-mɛ in nàà kɔ-mɛ in nù kɔ-mɛ nɛ̀ wa kòò mɛ sɛnɛ duk, ha̧ mɛ́ mɛ́ tɛ pii ŋma nù sɛn mgbara ŋma dukbíí nɛ̀ mɛ iŋ nɛti na.

¹²GASA WAN a̧ dé demɔ in mɛ̀ɛ́ oi demɔ nɛ̀ mɛ dea. GASA WAN Sɔ̧ ko Israɛl nɛ̀ mɛ tɛɛ mɛ́ gu ɗoŋ-aa'i a̧ há̧ mɔɔ-oi demɔ kɔ-mɛ ha̧ mɛ.»

¹³Ruth kifa nú ha̧ a̧: «Dáà kɔ‘m, ɛ̀nɛ̀ dé ko ha̧‘m. Zu-a nɛ‘m nyɛm ŋmaa in kó-de-tom k’ɛ́nɛ́ kpɔk na'i, ɛ́nɛ́ dee ha̧‘m mɛ kpa nɔɔ-ŋgiɗi, ɛ́nɛ́ tɔ̧ɔ̧ de wen ha̧‘m.»

¹⁴Ŋgimbi nyɔŋa mɔ hɔa, ɓɛɛ Boaz tɔ̧ ha̧ Ruth: «Mɛ̀ ɗɔ́ŋ pii ti, mɛ̀ nyɔ́ŋ mɔ[4] in yɛɛ.» Ruth duka nù mgbara o wi-mɔi̧-nyɔnɔ, ɓɛɛ Boaz ha̧ hana gba̧a̧ alkamaari ha̧ a̧. A̧ nyɔŋa mɔ zaŋ-aa sur, ɓɛɛ a̧ ba oi-aa e.

¹⁵Nɛ́ mɔ'ɔ n'aa kura mɛ sar alkamaari woyo, ɓɛɛ Boaz tɔ̧ ha̧ o wi-de-tom kɔ‘i: «Boko-bem’ɛ a̧ sár mɔ mgbara o sika-alkamaari mbɛt, ɓɛɛ ká ŋma bíí kii wen in a̧ na.

¹⁶Ɛ̀nɛ̀ dé gɔn-ta e nɛ̀ ŋma zu-alkamaari duk ha̧ a̧ mɛ dɔr, ɓɛɛ ká ŋma bíí tɔ̧ wen a zu a̧ na.»

¹⁷Ruth sara mɔ kpɛɛfɔ‘i hɔ ga̧a̧mɔ, a̧ gusa zu-alkamaari n'aa sara lɛŋ, ɓɛɛ a̧ kpa nɛ̀ dɔka-a hee kilo ɓu ga.

¹⁸A̧ baa sinɛ ɗoŋ saaye, a̧ usa mɔ n'aa sara ha̧ for-aa, ɓɛɛ a̧ ba oi nyɔŋmɔ n’àá nyɔŋa gbonɛ ha̧ a̧.

¹⁹For-aa aka a̧: «Mɛ sara mɔ déè sɔsɔɔ ge? Mɛ dee tom déè? GASA WAN a̧ tók de yoŋgo zu wi nɛ̀ dee demɔ in mɛ'ɛ.» Ɓɛɛ Ruth sa nin wan-fɔ‘i, a̧ tɔ̧a̧: «Nin wi n'am dee tom kpɛɛfɔ kɔ̧-a̧ sɔsɔɔ nɛ́ Boaz.»

²⁰Naɔmi tɔ̧ɔ̧ ha̧ be-for: «GASA WAN nɛ́ wan-de-demɔ in o bíí nɛ̀ ya kpasa in o wan nɛ fea. A̧ a̧ tók de yoŋgo zu Boaz. A̧ nɛ́ ŋma nam ko wíì k’ɛɛ nɛ̀ nyɛma mɛ gɔn zu yɛ.»

²¹Ruth zɔŋa Mɔab tɔ̧a̧: «Boaz tɔ̧ɔ̧ ha̧‘m ndé, a̧‘m dúk kɔ‘m in o kó-de-tom kɔ‘i hɔ wese nɛ̀ mɔi̧a-nyɔnɔ lɛŋ tɛ kaɗi.»

²²Naɔmi tɔ̧ɔ̧ ha̧ Ruth: «Bem kɔ‘m, mɛ̀ dúk in o kó-de-tom kɔ̧-a̧ siti. Ká mɛ́ ye ŋma gɔni kpɛɛfɔ na, wen ká ŋma bíí de ɗaŋmɔ in mɛɛ.»

²³Nɛ́ hegɔ sa Ruth duk in o kó-de-tom ko Boaz sar nɛ̀ oi alkamaari hɔ ŋgimbi nɛ̀ mɔi̧a-nyɔnɔ lɛŋ kaɗa, ɓɛɛ a̧ ɔ ɔa-a tɛ ko for-aa.