Read Northwest Gbaya 1 SAMUƐL 1 Bible Online

1 SAMUƐL 1 - Northwest Gbaya bible

1 SAMUƐL 1

¹Ŋma bíí duka so sɛn Ramatayim, mgbara o kaya Efraim; nin wi’ɛi nɛ́ Ɛlkana, bem ko Yeroam, bem ko Eliud, bem ko Tohu, bem ko Suf.

²A̧ a̧a̧ so nɛ̀ kóò yiitoo; nin ɛ̧ɛ̧ kpɔk’ɛ nɛ́ Ana, nin ɓii-aa nɛ́ Pɛnina. Pɛnina a̧a̧ so nɛ̀ o bem, ɓɛɛ Ana bo so kɔ‘i nɛ̀ bem na.

³Ti pɛ kpɔk kpɔk, Ɛlkana daŋ so nɛ̀ ye kɔ‘i mɛ nɛ̀ɛ́ gasi GASA WAN ko o gíí wi-biro, ɗafi nɛ̀ a̧ sɛn Silo. O wi-ɗafi GASA WAN nɛ yaa so hi̧i̧ nɛ́ o bem ko Elii yiitoo, Hofni in Pinas.

⁴Ŋgimbi lɛŋ nɛ Ɛlkana ɗafi sɔ̧, a̧ ha̧ nɛ ŋma war kpoo-sɔ̧ ha̧ kóò kɔ̧-a̧ Pɛnina in ha̧ o be-wiwii in o be-okoo ko Pɛnina dam wa kpɔk kpɔk,

⁵ɓɛɛ a̧ ha̧a̧ war gasa-a ha̧ Ana wen nɛ́ à̧ á̧ see-aa baa batɛ, kóó zu dea-a nɛ GASA WAN dee ha̧ a̧ mɛ yar ndɔra'i.

⁶Zu mɔ‘i, gɔya a̧ kii nɛ́ nú a̧ pi̧ nɛ foe tɛ-a wen nɛ̀ GASA WAN dee ha̧ a̧ mɛ yar ndɔra.

⁷Tɛ pɛ lɛŋ, ŋgimbi nɛ̀ wa nɛ́ kɔ̧ Tua ko GASA WAN, gɔya a̧ kii so kànà nɛ́ nú a̧. Hegɔ Ana hi̧i̧ nɛ kɔ̧a̧ bɛ̧ nɛ nyɔŋmɔ mbɛt.

⁸Ɓɛɛ wíì kɔ̧-a̧ Ɛlkana ak a̧: «Ana, wen ge mɛ hi̧i̧ kɔ̧a̧ ge? Mɛ nyɔŋ mɔ na wen ge? Mɛ duk nɛ̀ ɗaŋsee wen ge? Mi gan bem ɓu sɛn yí-mɛ na nde?»

⁹Ɗoŋ nɛ wa nyɔŋa mɔ in nɔɔ mɔ sɛn Silo kaɗi, Ana kura. Elii wi-ɗafi-sɔ̧ duk so kɔ‘i nɛ́ nù zu kiti kɔ‘i sɛn nú tua ko GASA WAN.

¹⁰Hee mɔ'ɔ nɛ see Ana ɗaŋa hɔ tɛ fio ga, a̧ kɔfa GASA WAN ɓɛɛ a̧ hi̧i̧ kɔ̧a̧ nɛ̀ dɔka-a nyɛmna.

¹¹A̧ ha̧a̧ nú-a hee mɔ'ɔ ga: «Ho! GASA WAN ko o gíí wi-biro! Ɛ̀nɛ̀ zɔ́k ɗaŋsee kɔ‘m, kó-de-tom k’ɛ́nɛ́, ɓɛɛ tɛ‘nɛ́ a̧ mbáŋ ɗoŋ am. Ká tɛ‘nɛ́ bi ɗoŋ am na. K’ɛ̀nɛ̀ ha̧ ŋma be-wiwii ha̧‘m, mi tɛ e a̧ ha̧ a̧ mɛ duk nɛ́ k’ɛ́nɛ́ ɓɔnsɛnɛ, ɓɛɛ pai beka hɔ ti zu-a na.»

¹²Hee mɔ'ɔ n'aa ba nɛ́ ŋgimbi tɛ kɔfa GASA WAN ga, Elii mbaɗi so nɛ́ nú-a.

¹³Ana tɔ̧ so nɛ́ wen nɛ̀ ɗɔɔ nú, nɛ́ ndara nú-a a̧ fo so mɔ ɓɛɛ, wi zii ger-a na. Elii ta kɔ‘i'e nɛ́ dɔ̧ɔ̧ a̧ gbɛ a̧.

¹⁴Ɓɛɛ Elii tɔ̧ ha̧ a̧: «Dɔ̧ɔ̧ tɛ gɔn yí-mɛ mɛ gese ge? Mɛ̀ nɛ́ɛ̀ dé ha̧ dɔ̧ɔ̧ kɔ-mɛ a̧ gɔ́n yí-mɛ.»

¹⁵Ana kifa nú ha̧ a̧: «Weyaa nyaa, mi nɛ́ okoo nɛ mɔ ba tɛ-a nyɛmna, mi nɔ dɔ̧ɔ̧, kà bó nɛ̀ ŋma mɔɔ-nɔ nɛ hao a̧a̧ sɛnɛ na mbɛt; mi kɔfi nɛ́ GASA WAN tɔ̧ nɛ̀ mɔ nɛ̀ ba tɛ‘m ha̧ a̧.

¹⁶K’ɛ́nɛ́ ba kó-de-tom k’ɛ́nɛ́ e tɛ geemɔ na. Mɛ̀ nɛ́ gasa bɔnɛ in dita-see kɔ‘m a̧ dé ha̧‘m mɛ tɔ̧ wen hɔ kinii.»

¹⁷Elii kifa nú ha̧ a̧: «Mɛ̀ sí ɗoŋ zaŋ ga̧a̧mɔ, ɓɛɛ Sɔ̧ ko Israɛl a̧ há̧ mɔ nɛ mɛ aka er-a'i ha̧ mɛ.»

¹⁸Ana tɔ̧a̧: «Ɛ̀nɛ̀ dé ko ha̧ kó-de-tom k’ɛ́nɛ́.» Ɓɛɛ kóò‘i ba yuwar yak; a̧ nyɔŋa mɔ, ɓɛɛ sɔnti-a bur.

¹⁹Ɛlkana in o bíí nutua kɔ‘i kura mɛ tutuyɛ sut; ɗoŋ nɛ wa gasa GASA WAN kaɗi, wa sii ɗoŋ tɛ kɔ-wa sɛn Rama. Ɛlkana duka in kóò kɔ‘i Ana, ɓɛɛ GASA WAN de ha̧ Ana mɛ ba zaŋ.

²⁰Ŋgimbi hɔa, ɓɛɛ Ana nɛ̀ baa so zaŋ ko nɛ̀ be-wiwii. A̧ aa nin-a'e Samuɛl,[1] wen a̧ tɔ̧a̧: «Mi kɔfa a̧ er GASA WAN.»

²¹Wíì kɔ̧-a̧ Ɛlkana kura in o bíí nutua kɔ‘i lɛŋ mɛ nɛ̀ɛ́ ɗafi sɔ̧ ha̧ GASA WAN nyɛm nɛ ɗoŋ mɔ nɛ‘i de tɛ pɛ kpɔk kpɔk, in ha̧ a̧ mɛ de mɔ nyɛm nɛ ɗoŋ ha̧a̧nú kɔ̧-a̧.

²²Ana nɛ kɔ‘i in wa na, wen a̧ tɔ̧ɔ̧ ha̧ wíì kɔ̧-a̧‘e: «Mi beka nɛ hi̧i̧ na hɔ ŋgimbi nɛ bem tɛ bɛ̧ bere; hegɔ‘i, mi tɛ mgbɔ a̧ nɛnɛ usi ha̧ GASA WAN, ɓɛɛ a̧ tɛ ɓɔn hi̧i̧ kpoo nɛ kpoo.»

²³Wíì kɔ̧-a̧ Ɛlkana kifa nú ha̧ a̧: «Mɛ̀ dé hee mɔ'ɔ nɛ mɛ kɔ̧ɔ̧ ga; ɓɛɛ mɛ̀ pɛ́m mɔ hɔ ŋgimbi nɛ bem tɛ bɛ̧ bere. Mɔ kpɔk, GASA WAN a̧ dé ha̧ ha̧a̧nú kɔ-mɛ mɛ hɔ gba̧a̧.»[2] Ana duka ha̧ nɛ̀ bere ha̧ bem hegɔɔ hɔ ŋgimbi nɛ bem bɛ̧ɛ̧ bere.

²⁴Nɛ̀ bem bɛ̧ɛ̧ bere kaɗi, a̧ baa a̧, ba wiwii ndai nɛ a̧a̧ nɛ pɛ taar, kilo fuu ɓu in dak dɔ̧ɔ̧, ɓɛɛ a̧ yak si kɔ̧ tua ko GASA WAN sɛn Silo, ká Samuɛl ɓɔna so nɛ obem.

²⁵Wa gɔna wiwii ndai'i, ɓɛɛ wa mgbɔ bem nɛnɛ ha̧ Elii.

²⁶Ana tɔ̧a̧: «Nyaa, mí áí nú h’ɛ́nɛ́, hee mɔ'ɔ n’ɛnɛ duk kpasa ga, mi nɛ okoo nɛ yora so katɛ‘nɛ́ hɛ̧ɛ̧ kɔfi nɛ̀ GASA WAN.

²⁷Nɛ́ wen zu bem’ɛ a̧‘m kɔfa so nɛ mɔ, ɓɛɛ GASA WAN kifi nú tɛ akamɔ kɔ‘m.

²⁸Ɓɛɛ kinii, mi ha̧ nɛ bem’ɛ siɗoŋ ha̧ GASA WAN, ha̧ a̧ mɛ de tom ha̧ GASA WAN ŋgimbi lɛŋ n'aa tɛ duk kpasa.» Nɛ́ mɔ'ɔ nɛ̀ wa guu nù ti GASA WAN sɛn hi̧i̧.