Read Northwest Gbaya 1 SAMUƐL 11 Bible Online

1 SAMUƐL 11 - Northwest Gbaya bible

1 SAMUƐL 11

¹Nahas be Amɔŋ baa biro dúk nɛ̀ Yabɛs nɛ duk nú Galad, ɓɛɛ kɛr a̧ e nù. O bíí Yabɛs lɛŋ tɔ̧ɔ̧ ha̧ Nahas: «Ɛ̀nɛ̀ nɔ́ tɔk in yɛɛ, ɓɛɛ ɛɛ tɛ ya ɗɔɔ ŋgai k’ɛ́nɛ́.»

²Nahas be Amɔŋ kifa nú ha̧ wa: «Mɔ n'am tɛ de nɔ nɛ tɔk in'nɛ̀ɛ́ nɛ mɔ'ɔ: mi tɛ o yí‘nɛ́ mɛ wiiko lɛŋ; hegɔ mi tɛ pi̧ gasa mɔɔ-foe zu Israɛl lɛŋ.»

³O gasawi Yabɛs kifa nú ha̧ a̧: «Ɛ̀nɛ̀ é ŋma be yuwar h’ɛ́ɛ́ tɛ zɛ mɔɔrɔ-ɗoŋ-yiitoo. Ɛ́ɛ́ tɛ a o betom dam nú Israɛl lɛŋ, ɓɛɛ kà ŋma bíí tɛ mɛ kpasi yɛ na, ɛɛ tɛ e tɛ yɛ h’ɛ́nɛ́.»

⁴O betom hɔɔ sɛn Gibea ye ko Saul, ɓɛɛ wa tɔ̧ mɔ‘i ha̧ o bíí; ɓɛɛ bíí lɛŋ a nú tɛ gayamɔ in hi̧a̧-kɔ̧a̧.

⁵Ŋgimbi'i Saul duk so nɛ ɗoŋ o ndai kɔ‘i pii nɛnɛ nɛ kpɛɛfɔ, ɓɛɛ a̧ tɔ̧: «Nɛ́ ge sɛka o bíí hi̧i̧ kɔ̧a̧ hegɔ'ɛ ge?» Wa wee ɗoŋ mɔ nɛ o bíí Yabɛs tɔ̧ɔ̧ ha̧ a̧.

⁶Ŋgimbi nɛ Saul zia mɔɔ nɔ‘i, ɔmi ko GASA WAN zira pii zu a̧, ɓɛɛ see-aa nyim nɛ ŋgaya-a.

⁷A̧ kaia ndai yiitoo, ɓɛɛ a̧ a̧k sɛ́kɛ́ɗɛ́-sɛ́kɛ́ɗɛ́. A̧ toma nɛ̀ o betom dam nú Israɛl lɛŋ nɛ̀ wen’ɛ: «Wi nɛ̀ beka nɛ́ ɗoŋ Saul in Samuɛl na, wi tɛ a̧k o ndai kɔ̧-a̧ hee mɔ'ɔ nɛ‘i a̧ka̧ nɛ o ndai nɔ'ɔ ga.» GASA WAN pi̧i̧ kíì zu dukbíí, ɓɛɛ wa yak hee kpɔk bíí ga.

⁸Saul tɔra wa lɛŋ sɛn Bezɛk. O be Israɛl lɛŋ duka nɛ́ booro-gɔmŋmaa-taar; o be Juda nɛ́ booro-ɓu-taar.

⁹A̧ tɔ̧ɔ̧ ha̧ o betom nɛ tɛɛ so: «Ɛ̀nɛ̀ tɔ̧́ ha̧ o bíí Yabɛs sɛn nú Galad ndé, sa̧a̧mɔ, ŋgimbi nɛ wese bé tɛ̀ɛ́ kpɔr, wa tɛ kpa o wi-gbak-wa.» Ɗoŋ nɛ o betom sia, wa tɔ̧ɔ̧ nyɛrɛ mɔ‘i ha̧ o bíí Yabɛs, ɓɛɛ o bíí Yabɛs kpa desee.

¹⁰Wa tɔ̧ɔ̧ ha̧ Nahas ndé: «Sa̧a̧mɔ, ɛɛ tɛ nɛ sitɛ‘nɛ́ h’ɛ́nɛ́ mɛ de mɔ lɛŋ n’ɛnɛ kɔ̧a̧ mɛ de in yɛɛ.»

¹¹Ɔɔ mɔ sa̧, ɓɛɛ Saul kɛ̧ duk wi-biro taar; tɛ gɔna ndaa-zan, wa yee kɔ̧ gbagari ko o be Amɔŋ. Wa gbɛɛ wa hegɔ hɔ ŋgimbi kpɔra wese. Oi o wan nɛ ɓɔna kpasa yuu mɔ yak, wa pɛsa kpɔk kpɔk.

¹²Nɛ́ mɔ'ɔ nɛ̀ o bíí aka Samuɛl: «Nɛ́ o'o tɔ̧ɔ̧ so'e Saul nyɛm mɛ ɔ wan zu yɛ na’ɛ o? Ɛ̀nɛ̀ é o wi nɔ‘i kɔ er yɛ h’ɛ́ɛ́ gbɛ wa yinɛ.»

¹³Ɓɛɛ Saul tɔ̧: «Wi beka gbɛ ŋma bíí pɛrti wese hegɔ'ɛ na, wen sɔsɔɔ, GASA WAN dee gasamɔ, ɓɛɛ Israɛl gbin biro.»

¹⁴Ɓɛɛ Samuɛl tɔ̧ ha̧ o bíí: «Ɛ̀nɛ̀ tɛ, ɛ̀ɛ̀ nɛ́ si Gilgal, ɛ̀ɛ̀ dé wan ha̧ Saul hi̧i̧ woyo.»

¹⁵Bíí lɛŋ nɛa si Gilgal; nɛ́ hi̧i̧ a̧ wa dee nɛ̀ wan ha̧ Saul sɛn ti GASA WAN. Wa ɗafa-sɔ̧ nɛ̀ yí GASA WAN wen kpaa ga̧a̧mɔ, ɓɛɛ Saul in o be Israɛl lɛŋ de nyɛŋɛ.