Read Northwest Gbaya 1 SAMUƐL 18 Bible Online

1 SAMUƐL 18 - Northwest Gbaya bible

1 SAMUƐL 18

¹Ŋgimbi nɛ David kaɗa nɛ tɔ̧ɔ̧ wen in Saul kaɗi, Jɔnataŋ ndaɗa in David, ɓɛɛ a̧ kɔ̧ a̧ hee kiitɛ-a ga.

²Wese'i Saul dora David, ɓɛɛ a̧ e ha̧ a̧ mɛ si ɗoŋ tɛ ko dáà kɔ̧-a̧ na.

³Jɔnataŋ nɔɔ tɔk in David wen a̧ kɔ̧ɔ̧ David hee kiitɛ-a ga.

⁴A̧ kpɔ̧i̧a̧ gasa laa n'aa duka nɛnɛ pi̧ tɛ David, laa kɔ̧-a̧ lɛŋ, a̧ ha̧a̧ ha̧ David gu nɛ̀ gba-paa in kusaa in o gasa kanda kɔ̧-a̧ lɛŋ.

⁵Fara lɛŋ nɛ Saul duka tom David si sɛnɛ, David gan nɛ zu mɔ; hegɔ Saul ee a̧ zu o gíí wi-biro. Dukbíí nɛ oi-aa lɛŋ in o wi-de-tom ko Saul kɔ̧ɔ̧ so David nyɛmna.

⁶Ŋgimbi nɛ David pia nɛnɛ in o be Israɛl ɗoŋ n'aa gbɛɛ nɛ be Filistii tɛ biro kaɗi, o okoo gboo nɛ̀ tɛ o ye Israɛl lɛŋ hiɗi nɛ mɔɔ-tortɛ we nɛ ti Saul; wa bia nɛ́ gima, yɔ nɛ yɔyɛ nyɛm nɛ ɗoŋ bi̧ɔ̧, gai nɛ mɔ nɛ nyɛŋɛ nyɛm nɛ ɗoŋ kuŋge.

⁷O okoo nɛ yɔ yɔyɛ‘i bia gima hee mɔ'ɔ ga: «Saul gbɛɛ o wisɛn kɔ‘i booro nɛ̀ dɔka-a, ɓɛɛ David gbɛɛ kɔ‘i nɛ̀ dɔka-a, nɛ‘i nyɛm mɛ tɔr na.»

⁸Gima'i de tɛ Saul na, ɓɛɛ see-aa nyim; a̧ tɔ̧a̧: «Wa tɔ̧‘e David gbɛɛ o wisɛn nɛ‘i nyɛm mɛ tɔr na, ɓɛɛ kɔ‘m nɛ́ booro gee nde ɓɛɛ; oi-aa nɛ wan ha̧ a̧ mɛ ba ɓɛɛ gɔ!»

⁹Saul zɔka David nɛ̀ ɗaŋ yí ku̧u̧naŋ-a nɛ wese'i.

¹⁰Mɔ sa̧a̧ mɛ tutuyɛ, ɓɛɛ ŋma ɗaŋ ɔmi nɛ tɛ̀ɛ́ nɛ tɛ Sɔ̧ tik zu Saul; ɓɛɛ gbana ba a̧ kɔ̧ tua kɔ̧-a̧. David mbɛr so kànà nɛ́ mɔɔ-mbɛr kɔ‘i hee mɔ'ɔ n'aa de ɓɔnsɛnɛ ga. Saul a̧a̧ so nɛ̀ sɛ́ɛ̀ er.

¹¹Saul baa sɛ́ɛ̀ kɔ‘i nɛ̀ ŋgɔn, ɓɛɛ tɔ̧ nɛ̀ kɔ̧ see: «Mi tɛ mgboi David ndaɗi nɛ̀ ŋgeŋ.» Nɛ́ mɔ'ɔ n'aa pi̧i̧ sɛɛ, ɓɛɛ David gui mɔ. Mɔ‘i dee war yiitoo wese'i.

¹²Saul yuu kíí David wen GASA WAN a̧a̧ so in a̧; ɓɛɛ ká a̧ yaka so Saul e duk kaɗi.

¹³Saul foo David nyɛi̧ nɛ fara kɔ̧-a̧; a̧ ee a̧ nɛ wan zu o bíí booro, ɓɛɛ David mgbɔ wa nɛ nɛnɛ tɛ o biro.

¹⁴Naŋanɔ biro ko David lɛŋ kaɗi nɛ̀ de-a; GASA WAN duka in a̧ ɓɔnsɛnɛ.

¹⁵Hee mɔ'ɔ nɛ Saul zɔka tom ko David nɛ́ nɔ̀ nɛ̀ de-a ga, a̧ yuu kíí a̧.

¹⁶O bíí sɛn Israɛl lɛŋ in sɛn nú Juda kɔ̧ɔ̧ David wen nɛ a̧ a̧ duk so ti tɛ nɛɛ biro in pia-a mbɛt.

¹⁷Saul tɔ̧ɔ̧ ha̧ David: «Mɛrab kaya be-okoo kɔ‘m nɛ́ mɔ'ɔ; nɛ́ a̧ a̧‘m tɛ ha̧ ha̧ mɛ nɛ̀ kóò. Mɛ̀ dé tom ha̧‘m hee wi-kpee-see ga, ɓɛɛ mɛ̀ bí o biro ko GASA WAN.» Saul taa so kɔ‘i'e, ká‘i tam tɛ a̧ nɛ er wi na, ha̧ a̧ fe fea-a er o be Filistii ɛ̧.

¹⁸David kifa nú ha̧ Saul: «Mi nɛ́ o, pɛ́r-nam kɔ‘m nɛ́ ge, nú-gara ko dáà kɔ‘m sɛn Israɛl nɛ́ ge nú-gara ge sɛka'm duk wii-kɔfɛ ko wannu ge nde?»

¹⁹Ɓɛɛ ŋgimbi nɛ Saul tɛ̀ɛ́ ha̧ nɛ̀ be-okoo kɔ‘i Mɛrab ha̧ David wó, wa tɛɛ ha̧ ha̧a̧ a̧ ha̧ Adriɛl, be Mehola.

²⁰Mikal be-okoo ko Saul kɔ̧ɔ̧ so David nyɛmna; ɓɛɛ bíí nɛ dali ha̧ Saul. Mɔ‘i dee tɛ Saul nyɛmna.

²¹Ɓɛɛ Saul tɔ̧: «Mi tɛ ha̧ be-okoo kɔ‘m ha̧ a̧, ha̧ mɛ duk sak wen a̧. O be Filistii tɛ gbɛ a̧.» Saul tɔ̧ɔ̧ ha̧ David woyo: «Sɔsɔɔ, mɛ tɛ duk nɛ́ wii-kɔfɛ kɔ‘m.»

²²Saul ha̧a̧ nú hee mɔ'ɔ ga ha̧ o wi-de-tom kɔ‘i: «Ɛ̀nɛ̀ tɔ̧́ nɛ hu̧sa̧-a̧ ha̧ David'e: ‹Mɛ baa see wannu nyɛmna, ɓɛɛ o wi-de-tom kɔ̧-a̧ lɛŋ kɔ̧ɔ̧ mɛ; mɛ̀ dúk wii-kɔfɛ ko wannu.› »

²³O wi-de-tom ko Saul nɛɛ tɔ̧ wen'i ha̧ David, ɓɛɛ David kifi nú ha̧ wa: «Tɛ zɔkamɔ k’ɛ́nɛ́, duka wii-kɔfɛ ko wannu nɛ́ geɗek mɔ nde? Kɔ‘m, mi nɛ́ wi-kɔsa, ŋma gba̧a̧-mɔ bo tɛ‘m na.»

²⁴O wi-de-tom ko Saul nɛɛ tɔ̧ wen'i ha̧ Saul: «Wen nɛ David tɔ̧a̧ nɛ mɔ'ɔ n’ɛɛ wee ɗoŋ-aa h’ɛ́nɛ́'ɛ.»

²⁵Saul kifa nú: «Ɛ̀nɛ̀ nɛ́ɛ̀ tɔ̧́ ha̧ David'e, wannu ak ŋma mbɔi kóó kpɔk er-a na; mɔ n'aa kii er-a nɛ́ mbii ko o be Filistii gɔmŋmaa nɛ tɛ duk hee kifa-er-ɗaŋmɔ ko wannu ha̧ wisɛn ga.» Saul taa so kɔ‘i ndé, dea-a ha̧ David mɛ tik er o be Filistii nɛ́ mɔ‘i.

²⁶O wi-de-tom ko Saul tɛɛ we ɗoŋ mɔ‘i ha̧ David, ɓɛɛ David zɔk mɔ‘i ɔ dee, wen ha̧ a̧ mɛ kifi nɛ wii-kɔfɛ ko wannu. Ɗoŋ-aa tɛ nyɛi̧ na,

²⁷ɓɛɛ David yak biro in o bíí kɔ‘i. A̧ gbɛɛ o be Filistii gɔmŋmaa-yiitoo, ɓɛɛ a̧ kai mbii kɔ-wa piinɛ ɓɛɛ wa tɔr nɛ dama-a ti wannu ha̧ David mɛ duk nɛ́ wii-kɔfɛ kɔ̧-a̧.

²⁸Saul zɔka'e GASA WAN a̧a̧ in David; a̧ zɔka mbɛt'e be-okoo kɔ̧-a̧ Mikal kɔ̧ɔ̧ a̧ nyɛmna.

²⁹Kíí David dee Saul gan kuti-a, ɓɛɛ Saul sɛn a̧ pi̧-er-tɛ-wee.

³⁰O wannu Filistii dee biro, ɓɛɛ dam ɗoŋ ŋgimbi lɛŋ nɛ wa de biro, David gbin nɛ biro gan o dɔka wi-duk-zu o wi-biro ko Saul, ɓɛɛ nin-a hur nyɛmna.