Read Northwest Gbaya 1 SAMUƐL 22 Bible Online

1 SAMUƐL 22 - Northwest Gbaya bible

1 SAMUƐL 22

¹David yaka hi̧i̧ nɛ́ɛ̀ hu̧si kɔ̧ di̧i̧ ko Adulam. O nya-a̧ in o bíí nutua ko dáà kɔ̧-a̧ lɛŋ zia mɔ‘i, ɓɛɛ wa zir nɛ́ɛ̀ kpa a̧ hi̧i̧.

²O wi-bɔnɛ, o wi-nyamandoi, o wi-ɗaŋsee, wa lɛŋ mɔi̧a ŋmaa si kpa David, ɓɛɛ a̧ ɔ wan zu wa. O bíí nɛ̀ nɛɛ kpa a̧ dee hee bíí gɔmŋmaa-naar ga.

³David kura hi̧i̧ yak si Mispɛ nú Mɔab, ɓɛɛ a̧ tɔ̧ ha̧ wannu Mɔab: «Ɛ̀nɛ̀ é war ha̧ dáà in nàà kɔ‘m mɛ tɛ̀ɛ́ duk in'nɛ̀ɛ́ hɛ̧ɛ̧ hɔ wese n'am tɛ iŋ mɔ nɛ Sɔ̧ tɛ de wen am sɛ.»

⁴David mgbɔɔ wa si ti wannu Mɔab, ɓɛɛ wa ya hi̧i̧ ŋgimbi n'aa ɓɔna nɛnɛ fara hu̧sa̧-a̧.

⁵Gad wi-tɔ̧-wen oi nú Sɔ̧ tɔ̧ɔ̧ ha̧ David: «Ká mɛ́ hu̧si fara’ɛ na, mɛ̀ yé tɛ nù ko Juda.» Ɓɛɛ David yak si kɔ̧ kombo Hɛrɛd.

⁶Saul zia nyɛrɛ kpaa David nɛ wa kpaa in o bíí nɛ nɛɛ in a̧, ɓɛɛ Saul a̧a̧ so sɛn Gibea. A̧ duka duk ɗɔɔ ŋma be te[14] zu ŋma be kaya, ɓɛɛ sɛ́ɛ̀ kɔ̧-a̧ duka er-a. O gasa wi-biro kɔ̧-a̧ lɛŋ yor nɛ ŋgɔn katɛ a̧.

⁷Nɛ́ mɔ'ɔ nɛ̀ Saul tɔ̧ɔ̧ ha̧ o gasa wi-biro kɔ‘i nɛ yora katɛ a̧ ŋgimbi'i: «O be Bɛnjamin, ɛ̀nɛ̀ zìì! Ɛ́nɛ́ taa'e bem ko Jɛse nyɛma mɛ ha̧ o fɔ-nyɔnɔ in o fɔ-nyak-dɔ̧ɔ̧ h’ɛ́nɛ́ nde? A̧ nyɛma mɛ e'nɛ́ nɛ̀ wan zu o wi-biro booro, kóó zu o wi-biro gɔmŋmaa,

⁸s’ɛnɛ ee nú wen dee ɗaŋmɔ in am nde? Bem kɔ‘m ee nú in bem ko Jɛse, ɓɛɛ ɛnɛ kɔ̧ so mɛ tɔ̧ ha̧‘m na. Ŋma bíí kpɔk mgbara'nɛ́ mɛ de ko ha̧‘m bo na. Ŋma bíí mgbara'nɛ́ mɛ tɔ̧ ha̧‘m'e, bem kɔ‘m a nɛ wen ha̧ wi-de-tom kɔ‘m David mɛ kifi wisɛn kɔ‘m wó, bo na mbɛt; kóó h’ɛ́nɛ́ mɛ tɔ̧‘e ndé, a̧ hu̧sa̧ wen gbɛɛ am hee mɔ'ɔ n'aa de sɔsɔɔ ga wó, bo na mbɛt.»

⁹Dog, ŋma be Edɔm nɛ yora katɛ o gasa wi-biro ko Saul kifa nú ha̧ a̧: «Mi zɔka bem ko Jɛse; a̧ tɛ so tɛɛ pii Nɔb, sɛn tɛ ko Ahimɛlɛk bem ko Ahitub.

¹⁰Ahimɛlɛk nɛɛ ak mɔ in GASA WAN wen a̧, ɓɛɛ a̧ ha̧ mɔɔ-nyɔŋ ha̧ a̧. A̧ ha̧a̧ gba-paa ko Goliat be Filistii ha̧ a̧ mbɛt.»

¹¹Nɛ́ mɔ'ɔ nɛ̀ wannu saa Ahimɛlɛk wi-ɗafi-sɔ̧, bem ko Ahitub in o bíí nutua kɔ̧-a̧ lɛŋ nɛ yaa so nɛ o wi-ɗafi-sɔ̧ sɛn saaye Nɔb tɛnɛ sɛn tɛ kɔ‘i.

¹²Saul tɔ̧a̧: «Bem ko Ahitub, mɛ̀ zíí wen’ɛ!» Ahimɛlɛk kifa nú ha̧ a̧: «Nyaa, mi nɛ́ mɔ'ɔ.»

¹³Saul aka a̧: «Wen ge ɛnɛ in bem ko Jɛse, ɛnɛ ee nú wen dee ɗaŋmɔ in am ge? Mɛ ha̧a̧ brɛt in gba-paa ha̧ a̧; mɛ aka mɔ in Sɔ̧ wen a̧ mbɛt, wen ha̧ a̧ mɛ kur zu'm, ɓɛɛ ha̧ a̧ mɛ hu̧si kii nɛnɛ mɛ gbɛ‘m hee mɔ'ɔ nɛ de sɔsɔɔ ga.»

¹⁴Ahimɛlɛk kifa nú ha̧ wannu: «Ŋma bíí sɛn mgbara o wi-de-tom k’ɛ́nɛ́ hɛ̧ɛ̧ lɛŋ n’ɛnɛ tɛ we nɛ David sɛn tɛ mɔ ko mbɔɔzu nɛ́ o? Nɛ́ o mgbara wa hɛ̧ɛ̧ lɛŋ a̧ duka be-for wannu kaɗi o? Nɛ́ o mgbara wa hɛ̧ɛ̧ lɛŋ a̧ duka wan-pɛm'nɛ́ kaɗi o? Nɛ́ o mgbara wa hɛ̧ɛ̧ a̧ tɛ tu̧u̧ hee David ga o?

¹⁵Mɛ̀ nɛ́ sɔsɔɔ a̧‘m ku̧u̧ nɛ naŋ aka mɔ in Sɔ̧ wen a̧ nde? Ká wannu de ŋgamɔ in wi-de-tom kɔ‘i, kóó in o bíí nutua kɔ̧-a̧ na, wen wi-de-tom k’ɛ́nɛ́ iŋ kɔ‘i mɔ‘i na kóó tikiɗi. Mi bo kɔ‘m zaŋ-aa na.»

¹⁶Wannu kifa nú ha̧ a̧: «Mɛ Ahimɛlɛk, mɛ in o bíí nutua ko dáà kɔ-mɛ lɛŋ, ɛnɛ tɛ fe.»

¹⁷Wannu tɔ̧ɔ̧ ha̧ o betom nɛ ya katɛ a̧‘i hee mɔ'ɔ ga: «Ɛ̀nɛ̀ káí o wi-ɗafi-sɔ̧ ko GASA WAN, ɓɛɛ ɛ̀nɛ̀ gbɛ́ wa lɛŋ; wen wa mbɛt, wa gbaka David. Wa iŋa'e a̧ yu nɛ mɔ, ɓɛɛ wa mbaŋ tɛ‘m na.» O ŋgaiwi ko wannu kɔ̧ so kɔ‘i mɛ gbɛ o wi-ɗafi-sɔ̧ ko GASA WAN na.

¹⁸Nɛ́ mɔ'ɔ nɛ̀ wannu tɔ̧ɔ̧ ha̧ Dog: «Mɛ̀ káí o wi-ɗafi-sɔ̧ nɔ'ɔ, mɛ̀ gbɛ́ wa.» Nɛ́ mɔ'ɔ nɛ̀ Dog, be Edɔm zika tɛ ɓɛɛ gbɛ wa lɛŋ a nù. Bíí n'aa gbɛɛ wese'i lɛŋ dee bíí ɓu-mɔɔrɔ-ɗoŋ-taar-zua-mɔɔrɔ nɛ pi̧i̧ nɛ yɛ́m-yɛ́m laa-ɗafi-sɔ̧ nɛ‘i sa'e Efod.

¹⁹Saul gbɛɛ mɔ lɛŋ nɛ gba-paa sɛn Nɔb, ye ko o wi-ɗafi-sɔ̧: o wiwii in o okoo, o obem in o be-zɔɗi, o ndai, o tuifuu in o sami.

²⁰Bíí nɛ yuu mɔ yak kpɔk nɛ Abiatar, ŋma bem ko Ahimɛlɛk, be-koo Ahitub; bem’ɛi maa yì nɛɛ kpa David.

²¹A̧ tɔ̧ɔ̧ ha̧ David ndé: «Saul kuma o wi-ɗafi-sɔ̧ ko GASA WAN lɛŋ.»

²²David kifa nú ha̧ Abiatar: «Mi iŋa so kànà kɔ‘m mɛ wese'i ndé, Dog, be Edɔm nɛ duka hi̧i̧ tɛ tɔ̧ mɔ nɛ yaka lɛŋ ha̧ Saul. Ɓɛɛ kinii mi iŋa'e, o bíí nutua ko dáà kɔ-mɛ lɛŋ fee wen zu'm.

²³Mɛ̀ dúk in am, ká kíì de mɛ na; wi nɛ tɛ kii mɛ gbɛ mɛ, wi’ɛi kii nɛ fio kɔ‘m mbɛt; wen kinii mi tɛ pɛm mɛ.»