Read Northwest Gbaya 1 SAMUƐL 24 Bible Online

1 SAMUƐL 24 - Northwest Gbaya bible

1 SAMUƐL 24

¹David daŋa nɛ̀ hi̧i̧ nɛ́ɛ̀ hu̧si ŋga-gbárà Ɛn-Gedi.

²Ŋgimbi nɛ Saul pia ɗoŋ nɛ tɛ ndaka o be Filistii kaɗi, wa tɔ̧ɔ̧ ha̧ a̧: «David a̧a̧ sɛn ŋga-gbárà Ɛn-Gedi.»

³Saul kaia o ŋga wi-biro booro-taar sɛn mgbara o be Israɛl lɛŋ, ɓɛɛ wa yak mɛ nɛ̀ɛ́ kii David in o bíí kɔ‘i. Wa nɛɛ mɛ kii wa sɛn mgbara kaya ko Gbadua-zaŋbɛɛ.

⁴Nɛ́ mɔ'ɔ n'aa hɔɔ ká̧ ɓoramɔ ko o sami nɛ̀ duka so ká̧ war. Ŋma di̧i̧ duka so hi̧i̧; nɛ́ mɔ'ɔ nɛ̀ Saul yee kɔ̧ a̧ mɛ nɛ zaŋbɛɛ. David in o bíí kɔ‘i lɛŋ yaa so kɔ‘i ndaa di̧i̧‘i.

⁵Nɛ́ mɔ'ɔ nɛ̀ o bíí ko David tɔ̧ɔ̧ ha̧ a̧: «Ɛ̀nɛ̀ zɔ́k wese nɛ GASA WAN tɔ̧ɔ̧ so nɛnɛ nɛ́ mɔ'ɔ. A̧ tɔ̧ɔ̧ so: ‹Mi ee wisɛn kɔ-mɛ kɔ̧ er-mɛ; mɛ̀ dé mɔ nɛ mɛ kɔ̧ɔ̧ mɛ de nɛ̀ a̧ lɛŋ.› » David kura gɛ́ɗɛ́k nɛ́ɛ̀ gɔn nú gba-laa ko Saul.

⁶Ɓɛɛ nɛ ɗoŋ, ɗɛɗɛ-a̧ gɔna wen n'aa ɓira nú gba-laa ko Saul.

⁷A̧ tɔ̧ɔ̧ ha̧ o bíí kɔ̧-a̧: «GASA WAN a̧ dor am tɛ dee ɗaŋmɔ in wi nɛ̀ GASA WAN tɛna nɔ̧́ a zu-a. Mi beka tam tɛ-a na, wen nɛ̀ GASA WAN tɛna nɔ̧́ a zu-a.»

⁸Wen nɛ David tɔ̧a̧‘i, dora o bíí kɔ̧-a̧, ɓɛɛ wa tik zu Saul na. Nɛ́ mɔ'ɔ nɛ̀ Saul gboo nɛ̀ kɔ̧ di̧i̧‘i, ɓɛɛ ba yuwar kɔ‘i yak.

⁹David kura gbo nɛ̀ kɔ̧ di̧i̧ si zan, ɓɛɛ a̧ hiɗi mɔ ha̧ Saul. Saul gira tɛ zɔk mɔ si ɗoŋ, ɓɛɛ David hir gbɛ zugur nù, ba yí gu nù.

¹⁰David tɔ̧ɔ̧ ha̧ Saul: «Wen ge ɛnɛ zii wen nɛ o bíí tɔ̧ nɛnɛ‘e, mi kɔ̧ɔ̧ mɛ de ɗaŋmɔ in'nɛ̀ɛ́ ge?

¹¹Ɛnɛ zɔka nɛ yí‘nɛ́ sɔsɔɔ, GASA WAN ee'nɛ́ kɔ̧ er-am sɛn kɔ̧ di̧i̧. Wa tɔ̧ so nɛ́ wen gbɛɛ‘nɛ́, ɓɛɛ ko dea'm h’ɛ́nɛ́; mi tɔ̧a̧: er-am beka fo wan kɔ‘m na, wen a̧ nɛ́ wi nɛ GASA WAN tɛna nɔ̧́ a zu-a.

¹²Ho, dáà kɔ‘m, ɛ̀nɛ̀ zɔk, nú-laa k’ɛ́nɛ́ nɛ́ mɔ'ɔ nɛ̀ duk er-am’ɛ. Hee mɔ'ɔ n'am ɓira nú-laa k’ɛ́nɛ́, ɓɛɛ n'am gbɛ‘nɛ́ na ga, ɛ̀nɛ̀ íŋ‘e, mi bó nɛ́ wi-ɗaŋsee, kóó wi-de-ŋgazu na. Mi de ɗaŋmɔ in'nɛ̀ɛ́ na, ɓɛɛ k’ɛ́nɛ́, ɛnɛ kii nɛ yuwar mɛ gbɛ‘m.

¹³GASA WAN a̧ dúk nɛ́ wi-gɔn-kita mgbara'nɛ́ in am; GASA WAN a̧ kífí er oi nú‘m h’ɛ́nɛ́; ɓɛɛ kɔ‘m, er-am beka fo'nɛ́ na.

¹⁴Gba̧‘a̧ tua-wen tɔ̧ɔ̧ so'e: ‹Ɗaŋmɔ gbo nɛ̀ tɛ̀ o wi-ɗaŋ,› ɓɛɛ war kɔ‘m, er-am beka tam'nɛ́ na.

¹⁵Wannu Israɛl gboo naŋanɔ-biro ɗoŋ o? Ɛ́nɛ́ ndák nɛ́ ɗoŋ o? Ɛ́nɛ́ ndák nɛ́ ɗoŋ fio toyo! Ɛ́nɛ́ ndák nɛ́ ɗoŋ kpɛ̧!

¹⁶GASA WAN a̧ dúk nɛ́ wi-sedaako mgbara yɛ, a̧ a̧ gɔ́n kita zu'm in zu'nɛ́. GASA WAN a̧ zɔ́k mgbara mɔ kɔ‘m nɛ̀ sa̧a̧-a̧, ɓɛɛ a̧ a̧ gɔ́n kita ha̧‘m nɛ̀ yuwar-a; a̧ a̧ kpás'am er'nɛ́ yinɛ.»

¹⁷Ŋgimbi nɛ David kaɗa tɔ̧ɔ̧ wen ha̧ Saul, Saul tɔ̧a̧: «Mɛ̀ nɛ́ ger-mɛ nde, bem kɔ‘m David?» Ɓɛɛ Saul ŋma nú tɛ kɔ̧a̧.

¹⁸A̧ tɔ̧ɔ̧ ha̧ David: «Mɛ́ nɛ́ wi-de-mɔ nɛ̀ yuwar-a gan am, wen nɛ̀ mɛ dee demɔ in am, ɓɛɛ mi de kɔ‘m nɛ ɗaŋmɔ in mɛɛ.

¹⁹Sɔsɔɔ, mɛ usa dee demɔ kɔ-mɛ ha̧‘m, wen nɛ̀ GASA WAN foa'm pi̧ kɔ̧ er-mɛ, ɓɛɛ mɛ gbɛ‘m na.

²⁰Kà ŋma bíí kpa wisɛn kɔ‘i, a̧ e so a̧ ee mɛ ba yuwar kɔ̧-a̧ yak sɔɔ géè nde? GASA WAN a̧ gbák mɛ tɛ demɔ nɛ mɛ dee in am sɔsɔɔ.

²¹Kinii, mi iŋa nɛ mbetɛ‘e, mɛ tɛ ɔ wan, ɓɛɛ mɔɔ-wan ko Israɛl tɛ duk nɛ̀ nɔa-a er mɛ.

²²Kinii, mɛ̀ kán mɔ ha̧‘m nɛ̀ nin GASA WAN ndé, mɛ beka gbɛ o bezaŋ-am ɗoŋ fio kɔ‘m na, in mɛ beka bi nin-am yinɛ nú-gara ko dáà kɔ‘m na.»

²³David kàná mɔ hegɔ ti Saul. Nɛ́ mɔ'ɔ nɛ̀ Saul sii kɔ‘i si tɛ kɔ‘i, ɓɛɛ David in o bíí kɔ‘i daŋ si fara hu̧sa̧-a̧ kɔ‘i.