Read Northwest Gbaya 1 SAMUƐL 30 Bible Online

1 SAMUƐL 30 - Northwest Gbaya bible

1 SAMUƐL 30

¹Tɛ taar zɛ, ŋgimbi nɛ David in o bíí kɔ‘i hɔɔ nɛnɛ sɛn Siklag, o be Amalɛk ɓara mɔ sɛn Nɛgɛb in sɛn Siklag; wa ɗaŋa ye Siklag, ɓɛɛ wa pi̧ wee sɛnɛ.

²Wa kaia o okoo, o obem in o gasawi lɛŋ nɛ̀ bara, ɓɛɛ wa gbɛ ŋma bíí kpɔk na. Wa kaia wa lɛŋ yak nɛnɛ.

³Ŋgimbi nɛ David in o bíí kɔ‘i pia hɔ saaye, wa zɔka ndé, ye bia wee lɛŋ; wa kaia o kóò kɔ-wa, o bem kɔ-wa mɛ be-wiwii-a in be-okoo-a yaknɛ.

⁴David in o bíí kɔ‘i lɛŋ ku̧u̧ naŋ hiɗa mɔ nɛ̀ ŋgaya-a; wa hi̧a̧ kɔ̧a̧, ŋgai kaɗa tɛ-wa lɛŋ fara hiɗa mɔ.

⁵Wa kaia o kóò ko David yiitoo lɛŋ nɛ̀ bara-biro yaknɛ. Nin o kóò nɔ‘i nɛ́ Ahinɔam zɔŋa Yizreɛl in Abigail, ko-oi Nabal, be Karmɛl.

⁶See David ɗaŋa nyɛmna wen o bíí lɛŋ tɔ̧ nɛ wen yoo a̧ nɛ ta gbɛ yinɛ. Nú o bíí kɔ̧-a̧ paŋ paŋ; o ndé ta nɛ o bem kɔ‘i mɛ be-wiwii-a in o be-okoo-a. Ɓɛɛ nɛ́ mɔ'ɔ nɛ̀ David kpaa mbe ŋgai wen zu GASA WAN Sɔ̧ kɔ‘i.

⁷A̧ tɔ̧ɔ̧ ha̧ Abiatar wi-ɗafi-sɔ̧, bem ko Ahimɛlɛk: «Mi ai nú ha̧ mɛ; mɛ̀ bá laa-ɗafi-sɔ̧ nɛ‘i sa'e Efod tɛnɛ ha̧‘m.» Ɓɛɛ Abiatar ba laa-ɗafi-sɔ̧ tɛnɛ ha̧ a̧.

⁸David nɛ̀ɛ̀ ak mɔ in GASA WAN; a̧ aka mɔ hee mɔ'ɔ ga: «Kà‘m ndak pata o wi nɔ'ɔ, ɓɛɛ mi tɛ kpa wa nde?» GASA WAN kifa nú: «Mɛ̀ ndák pata wa, mɛ tɛ kpa wa, ɓɛɛ mɛ tɛ gbo o bíí kɔ-mɛ.»

⁹David kura in o bíí gɔmŋmaa-mɔɔrɔ-ɗoŋ-kpɔk nɛ́ɛ̀ hɔ nú be-zer Bezɔr, ɓɛɛ o ŋma bíí kɔ̧-a̧ ɓɔn kɔ‘i hi̧i̧.

¹⁰O bíí gɔmŋmaa-yiitoo ɓɔna kɔ‘i hi̧i̧ wen wa mbɔia so nyɛmna, ɓɛɛ wa nyɛm mɛ ku be-zer Bezɔr na. Nɛ́ mɔ'ɔ nɛ̀ David in o bíí gɔmŋmaa-naar ndaka ɗoŋ o wi-ɓar-mɔ yaknɛ.

¹¹Wa nɛɛ kpa ŋma be Egiptɛ poo zɔ̧, ɓɛɛ wa ba a̧ tɛnɛ ha̧ David. Wa ha̧a̧ brɛt ha̧ a̧, ɓɛɛ a̧ nyɔŋ; wa ha̧a̧ yì ha̧ a̧, a̧ nɔ mbɛt.

¹²Wa ha̧a̧ makala waya-mbɔra ha̧ a̧ in sikila kora waya-nyak-dɔ̧ɔ̧ yiitoo; a̧ nyɔŋa, ɓɛɛ zu-a pii ɗoŋ. A̧ nyɔŋ so mɔ in nɔ yì na tɛ zɛ taar.

¹³David aka a̧: «Mɛ́ nɛ́ bíí ko o? Mɛ́ tɛ́ nɛ̀ déè?» A̧ kifa nú: «Mi nɛ́ be-ŋgai Egiptɛ, bara ko ŋma be Amalɛk. Wan kɔ‘m ea'm duk wen nɛ tɛ‘m nyim nyim zɛ taar kinii.

¹⁴Nɛ́ ɛɛ a̧ ɓara mɔ sɛn Nɛgɛb, nù ko o be Kɛrɛt, Nɛgɛb wan mɛ Juda in sɛn Nɛgɛb, nù ko Kalɛb. Ɛɛ pi̧i̧ wee tɛ ye Siklag mbɛt.»

¹⁵David aka a̧: «Mɛ tɛ mgbɔ‘m nɛnɛ ɗoŋ o wi-ɓar-mɔ nɔ‘i nde?» A̧ kifa nú: «Ɛ̀nɛ̀ kán mɔ ha̧‘m nɛ nin GASA WAN ndé, ɛnɛ beka gbɛ‘m na, in ɛnɛ beka ha̧‘m si ɗoŋ ha̧ wan kɔ‘m na mbɛt; ɓɛɛ mi tɛ mgbɔ‘nɛ́ nɛnɛ ɗoŋ o wi-ɓar-mɔ.»

¹⁶A̧ mgbɔɔ David nɛnɛ, ɓɛɛ ká o be Amalɛk pɛsa so pɛsi dam fara lɛŋ nyɔŋ nɛ̀ mɔ, nɔ nɛ̀ mɔ, de nɛ̀ gbaŋa nɛ̀ o dɔka mɔ nɛ̀ wa kaia so piinɛ nɛ̀ nù ko o be Filistii in nɛ̀ nú Juda.

¹⁷David gbɛɛ wa ku̧u̧naŋ-a mɛ gɔna-ndaa-zan hegɔ mɔ ga̧ nɛnɛ; ŋma bíí kpɔk mgbara wa nɛ duka kpasa bo na; kànà nɛ́ o be-ŋgaiwi gɔmŋmaa-naar nɛ̀ daŋa ŋgeloba yu nɛ̀ mɔ yak ɓɛɛ.

¹⁸David kaia o mɔ nɛ o be Amalɛk kaia so lɛŋ. A̧ kaia o kóò kɔ̧-a̧ yiitoo'i mbɛt.

¹⁹Ŋma bíí kpɔk nɛ ɓɔna mgbara o bem in o gasawi bo na. O geɗek mɔ kɔ-wa nɛ o wi-ɓar-mɔ kaia so hɔ nɛnɛ tɛ gasa mɔ lɛŋ, o mbɔi, o bem kɔ-wa mɛ wiwii hɔ nɛnɛ tɛ o be-okoo-a lɛŋ, mɔ nɛ o wi nɔ‘i kaia so lɛŋ, David kaia si ɗoŋ.

²⁰David kaia o geɗek mɔ-dai hɔ tɛ o gasa-a lɛŋ; ɓɛɛ o wi nɛ̀ ya ti kɔr nɛ̀ o mɔ-dai nɔ‘i tɔ̧a̧: «Zɔk mɔɔ-oi-biro ko David!»

²¹David pia ɗoŋ kpa o oi bíí gɔmŋmaa-yiitoo nɛ mbɔia so, ɓɛɛ nɛ̀ kpa so ŋgai mɛ nɛ in a̧ na, o wan n'aa ee so ká̧ be-zer Bezɔr. Wa gboo we ti David in o bíí nɛ nɛ̀ɛ̀ so in a̧; David ɗɔŋa pii ti in o wi-biro kɔ‘i, ɓɛɛ fan wa.

²²Ɓɛɛ o wi-ɗaŋ in o wi-de-gba̧a̧-mɔ na nɛ nɛɛ so in David tɔ̧ nɛ̀ hee ger: «Hee mɔ'ɔ nɛ̀ wa nɛ in yɛɛ na ga, ɛɛ beka ha̧ o ŋma mɔɔ-oi-biro n’ɛɛ kaia piinɛ, yak zu kóò kɔ-wa in o bem kɔ-wa ha̧ wa na. Wa a̧ káí nɛ́ wa, ɓɛɛ wa a̧ yák.»

²³Ɓɛɛ David tɔ̧: «O nya'm, k’ɛ́nɛ́ de mɔ hegɔ zu mɔ nɛ GASA WAN ha̧a̧ h’ɛ́ɛ́ na. A̧ gbaka yɛ, ɓɛɛ a̧ fo o wi nɛ ɓara mɔ k’ɛɛ a kɔ̧ er yɛ.

²⁴Mɛ̀ nɛ́ o a̧ tɛ kɔ̧ ɗɔɔ wen k’ɛ́nɛ́ o nde? Wi nɛ̀ nɛ̀ɛ́ biro in wi nɛ pɛma tui tɛ kpa mɔ nyɛm ŋmaa. Wa tɛ kɛ̧ mɔ in o ŋmaa.»

²⁵Ku̧u̧naŋ-a nɛ wese'i, yuwar kɛ̧ɛ̧ mɔ‘i kifa nɛ́ heembea in yuwar duka-a ɓɔnsɛnɛ nɛ̀ duk hɔ sɔsɔɔ sɛn Israɛl.

²⁶Nɛ̀ wa hɔɔ sɛn Siklag kaɗi, David toma war mɔɔ-oi-biro ko o gasawi Juda ha̧ wa, nyɛm nɛ̀ ɗoŋ ye kɔ-wa. A̧ tɔ̧ɔ̧ wen e zu mɔɔ-oi-biro'i hee mɔ'ɔ ga: «Mɔ n'am kaia tɛ ɓaramɔ sɛn er o wisɛn ko GASA WAN nɛ́ mɔ'ɔ n'am tom war k’ɛ́nɛ́ h’ɛ́nɛ́‘i.»

²⁷A̧ toma ŋma ha̧ o wi Bɛtɛl, ha̧ o wi Ramot sɛn Nɛgɛb in o wi Yatir,

²⁸ha̧ o wi Arɔɛr, ha̧ o bíí Sifɛmɔt, ha̧ o bíí Ɛstɛmɔa;

²⁹ha̧ o bíí Rakal, ha̧ o bíí mɛ saaye Yerameɛl, ha̧ o bíí tɛ o ye ko o bezaŋ Kɛn,

³⁰ha̧ o bíí Ɔrma in o bíí Bɔr-Asaŋ, ha̧ o bíí Atak,

³¹in ha̧ o bíí sɛn Hebrɔŋ. A̧ toma mɔ dam fara n'aa duka so sɛnɛ in o bíí kɔ̧-a̧ lɛŋ.