Read Nova_Vulgata Genesis 30 Bible Online

Genesis 30 - Nova_Vulgata bible

Genesis 30

¹Cernens autem Rachel quod infecunda esset, invidit sorori et ait marito suo: “ Da mihi liberos, alioquin moriar ”.

²Cui iratus respondit Iacob: “ Num pro Deo ego sum, qui privavit te fructu ventris? ”.

³At illa: “ Ecce, inquit, famula mea Bilha; ingredere ad illam, ut pariat super genua mea, et habeam ex illa et ego filios ”.

⁴Deditque illi Bilham famulam suam in coniugium. Quae,

⁵ingresso ad se Iacob, concepit et peperit filium.

⁶Dixitque Rachel: “ Iudicavit mihi Deus et exaudivit vocem quoque meam dans mihi filium ”; et idcirco appellavit nomen illius Dan.

⁷Rursumque Bilha famula Rachel concepit et peperit Iacob alterum filium, et

⁸ait Rachel: “ Certamina Dei certavi cum sorore mea et invalui ”; vocavitque eum Nephthali.

⁹Sentiens Lia quod parere desisset, sumpsit Zelpham ancillam suam et tradidit eam Iacob in uxorem.

¹⁰Quae peperit Iacob filium.

¹¹Dixitque Lia: “ Feliciter! ”; et idcirco vocavit nomen eius Gad.

¹²Peperit quoque Zelpha ancilla Liae Iacob alterum filium.

¹³Dixitque Lia: “ Pro beatitudine mea! Beatam quippe me dicent mulieres ”; propterea appellavit eum Aser.

¹⁴Egressus autem Ruben tempore messis triticeae, repperit in agro mandragoras, quas Liae matri suae detulit. Dixitque Rachel: “ Da mihi partem de mandragoris filii tui ”.

¹⁵Illa respondit: “ Parumne tibi videtur, quod praeripueris maritum mihi, ut etiam mandragoras filii mei auferas? ”. Ait Rachel: “ Dormiat ergo tecum hac nocte pro mandragoris filii tui ”.

¹⁶Redeuntique ad vesperam Iacob de agro egressa est in occursum eius Lia et: “ Ad me, inquit, intrabis, quia mercede conduxi te pro mandragoris filii mei ”. Dormivitque cum ea nocte illa.

¹⁷Et exaudivit Deus Liam, concepitque et peperit Iacob filium quintum

¹⁸et ait: “ Dedit Deus mercedem mihi, quia dedi ancillam meam viro meo ”; appellavitque nomen illius Issachar.

¹⁹Rursum Lia concepit et peperit Iacob sextum filium

²⁰et ait: “ Donavit me Deus dono bono; hac vice honorabit me maritus meus, eo quod genuerim ei sex filios ”; et idcirco appellavit nomen eius Zabulon.

²¹Post quem peperit filiam nomine Dinam.

²²Recordatus quoque Deus Rachelis exaudivit eam Deus et aperuit vulvam illius.

²³Quae concepit et peperit filium dicens: “ Abstulit Deus opprobrium meum ”;

²⁴et vocavit nomen illius Ioseph dicens: “ Addat mihi Dominus filium alterum! ”.

²⁵Nato autem Ioseph, dixit Iacob ad Laban: “ Dimitte me, ut revertar in patriam et ad terram meam.

²⁶Da mihi uxores et liberos meos, pro quibus servivi tibi, ut abeam; tu nosti servitutem, qua servivi tibi ”.

²⁷Ait illi Laban: “ Inveniam gratiam in conspectu tuo; augurio didici, quia benedixerit mihi Deus propter te.

²⁸Constitue mercedem tuam, quam dem tibi ”.

²⁹At ille respondit: “ Tu nosti quomodo servierim tibi et quanti in manibus meis facti sint greges tui.

³⁰Modicum habuisti, antequam venirem ad te, et nunc multiplicatum est vehementer, benedixitque tibi Dominus ad introitum meum. Nunc autem quando providebo etiam domui meae? ”.

³¹Dixitque Laban: “ Quid tibi dabo? ”. At ille ait: “ Nihil mihi dabis; si feceris, quod postulo, iterum pascam et custodiam pecora tua.

³²Gyrabo omnes greges tuos hodie; separa cuncta pecora varia et maculosa et, quodcumque furvum in ovibus et maculosum variumque in capris fuerit, erit merces mea.

³³Respondebitque mihi cras iustitia mea; quando veneris, ut inspicias mercedem meam, omnia, quae non fuerint varia et maculosa in capris et furva in ovibus, furti me arguent ”.

³⁴Dixit Laban: “ Gratum habeo, quod petis! ”.

³⁵Et separavit in die illo hircos striatos atque maculosos et omnes capras varias et maculosas, omne, in quo album erat, et omne furvum in ovibus, et tradidit in manu filiorum suorum.

³⁶Et posuit spatium itineris trium dierum inter se et Iacob, qui pascebat reliquos greges Laban.

³⁷Tollens ergo Iacob virgas virides populeas et amygdalinas et ex platanis, ex parte ita decorticavit eas, ut in his, quae spoliata fuerant, candor appareret.

³⁸Posuitque virgas, quas ex parte decorticaverat, in canalibus, ubi effundebatur aqua, ut, cum venissent greges ad bibendum, ante oculos haberent virgas et in aspectu earum conciperent.

³⁹Factumque est ut in ipso calore coitus greges intuerentur virgas et parerent striata et varia et maculosa.

⁴⁰Agnos autem segregavit Iacob et posuit gregem ex adverso striatorum et omnium furvorum in grege Laban et constituit sibi greges seorsum neque statuit eos cum grege Laban.

⁴¹Quotiescumque igitur calefiebant pecora robusta, ponebat Iacob virgas in canalibus aquarum ante oculos pecorum, ut in earum contemplatione conciperent.

⁴²Quando vero pecora debilia erant, non ponebat eas. Factaque sunt debilia Laban et robusta Iacob;

⁴³ditatusque est homo ultra modum et habuit greges multos, ancillas et servos, camelos et asinos.