Read Nova_Vulgata Regum III 6 Bible Online

Regum III 6 - Nova_Vulgata bible

Regum III 6

¹Factum est igitur quadringente simo et octogesimo anno egres sionis filiorum Israel de terra Aegypti, in anno quarto, mense Ziv — ipse est mensis secundus — regni Salomonis super Israel, aedificare coepit domum Domino.

²Domus autem, quam aedificabat rex Salomon Domino, habebat sexaginta cubitos in longitudine et viginti cubitos in latitudine et triginta cubitos in altitudine.

³Et porticus erat ante templum viginti cubitorum longitudinis iuxta mensuram latitudinis templi et habebat decem cubitos latitudinis ante faciem templi.

⁴Fecitque in templo fenestras cum marginibus et cancellis.

⁵Et aedificavit contra parietem templi tabulata per gyrum in parietibus domus per circuitum templi et Dabir et fecit latera in circuitu.

⁶Tabulatum, quod subter erat, quinque cubitos habebat latitudinis et medium tabulatum sex cubitorum latitudinis et tertium tabulatum septem habens cubitos latitudinis; gradus enim posuit in domo per circuitum forinsecus, ut non ingrederentur trabes in muros templi.

⁷Domus autem cum aedificaretur, lapidibus dedolatis atque perfectis aedificata est; et malleus et securis et omne ferramentum non sunt audita in domo, cum aedificaretur.

⁸Ostium lateris inferioris in parte erat domus dextrae, et per cochleam ascendebant in medium latus et a medio in tertium.

⁹Et aedificavit domum et consummavit eam; texit quoque domum laquearibus cedrinis.

¹⁰Aedificavit ergo stratum contra omnem domum quinque cubitis altitudinis et iunxit domui lignis cedrinis.

¹¹Et factus est sermo Domini ad Salomonem dicens:

¹²“ Domus haec, quam aedificas, si ambulaveris in praeceptis meis et iudicia mea feceris et custodieris omnia mandata mea gradiens per ea, firmabo sermonem meum tibi, quem locutus sum ad David patrem tuum;

¹³et habitabo in medio filiorum Israel et non derelinquam populum meum Israel ”.

¹⁴Igitur aedificavit Salomon domum et consummavit eam.

¹⁵Et aedificavit parietes domus intrinsecus tabulis cedrinis; a pavimento domus usque ad summitatem parietum et usque ad laquearia operuit lignis intrinsecus et texit pavimentum domus tabulis abiegnis.

¹⁶Aedificavitque viginti cubitorum a posteriore parte templi tabulis cedrinis a pavimento usque ad superiora; et fecit ei intrinsecus Dabir, id est sancta sanctorum.

¹⁷Porro quadraginta cubitorum erat ipsum templum ante illud.

¹⁸Et cedrus in domo intrinsecus sculptas habebat colocynthidas et calices apertos florum. Omnia cedrinis tabulis vestiebantur, nec omnino lapis apparere poterat in pariete.

¹⁹Dabir autem in medio domus in interiori parte fecerat, ut poneret ibi arcam foederis Domini.

²⁰Habebat viginti cubitos longitudinis et viginti cubitos latitudinis et viginti cubitos altitudinis; et vestivit illud auro purissimo et fecit altare cedrinum ante Dabir.

²¹Domum quoque operuit Salomon intrinsecus auro purissimo et posuit catenas aureas ante Dabir.

²²Nihilque erat in templo, quod non auro tegeretur; sed et totum altare Dabir texit auro.

²³Et fecit in Dabir duos cherubim de lignis oleastri decem cubitorum altitudinis.

²⁴Quinque cubitorum ala cherub una et quinque cubitorum ala cherub altera, id est decem cubitos habentes a summitate alae unius usque ad alae alterius summitatem.

²⁵Decem quoque cubitorum erat cherub secundus, mensura par et effigies una erat duobus cherubim;

²⁶altitudinem habebat unus cherub decem cubitorum et similiter cherub secundus.

²⁷Posuitque cherubim in medio templi interioris; extendebant autem alas suas cherubim, et tangebat ala una parietem et ala cherub secundi tangebat parietem alterum; alae autem alterae in media parte templi se invicem contingebant.

²⁸Texit quoque cherubim auro.

²⁹Et omnes parietes templi per circuitum scalpsit variis caelaturis; et fecit in eis cherubim et palmas et calices apertos florum intrinsecus et foras.

³⁰Sed et pavimentum domus texit auro intrinsecus et extrinsecus.

³¹Et pro ingressu Dabir fecit valvas de lignis oleastri postesque cum marginibus quinque.

³²Et in duabus valvis de lignis oleastri scalpsit cherubim et palmas et calices apertos florum et vestivit ea auro operiens tam cherubim quam palmas et cetera auro.

³³Fecitque eodem modo pro introitu templi postes cum quattuor marginibus de lignis oleastri

³⁴et duas valvas de lignis abiegnis; et utraque valva duplex erat et versatilis.

³⁵Et scalpsit cherubim et palmas et calices apertos florum operuitque omnia laminis aureis.

³⁶Et aedificavit atrium interius tribus ordinibus lapidum politorum et uno ordine lignorum cedri.

³⁷Anno quarto fundata est domus Domini in mense Ziv;

³⁸et in anno undecimo, mense Bul — ipse est mensis octavus — perfecta est domus in omni opere suo et in universis utensilibus; aedificavitque eam annis septem.