Read Nova_Vulgata Paralipomenon I 18 Bible Online

Paralipomenon I 18 - Nova_Vulgata bible

Paralipomenon I 18

¹Factum est autem post haec, ut percuteret David Phili sthim et humiliaret eos et tolleret Geth et filias eius de manu Philisthim

²percuteretque Moab, et fierent Moabitae servi David offerentes ei tributum.

³Et percussit David etiam Adadezer regem Soba in regione ad Emath, quando perrexit, ut dilataret imperium suum usque ad flumen Euphraten.

⁴Cepit ergo David mille quadrigas eius et septem milia equites ac viginti milia virorum peditum; subnervavitque omnes equos curruum, exceptis centum quadrigis, quas reservavit sibi.

⁵Supervenit autem et Syrus Damascenus, ut auxilium praeberet Adadezer regi Soba; sed et huius percussit David viginti duo milia virorum

⁶et posuit praesidium in Syria Damasci, ut Syria quoque serviret sibi et offerret tributum. Adiuvitque eum Dominus in cunctis, ad quae perrexerat.

⁷Tulit quoque David arma aurea, quae habuerant servi Adadezer, et attulit ea in Ierusalem;

⁸necnon de Tebah et Chun urbibus Adadezer aeris plurimum, de quo fecit Salomon mare aeneum et columnas et vasa aenea.

⁹Quod cum audisset Thou rex Emath, percussisse videlicet David omnem exercitum Adadezer regis Soba,

¹⁰misit Adoram filium suum ad regem David, ut salutaret eum et congratularetur, eo quod pugnasset cum Adadezer et percussisset eum; adversarius quippe erat Thou Adadezer.

¹¹Sed et omnia vasa aurea et argentea et aenea consecravit rex David Domino cum argento et auro, quod tulerat ex universis gentibus, tam de Idumaea et Moab et filiis Ammon, quam de Philisthim et Amalec.

¹²Abisai vero filius Sarviae percussit Edom in valle Salis decem et octo milia

¹³et constituit in Edom praesidium, ut serviret Idumaea David. Salvavitque Dominus David in cunctis, ad quae perrexerat.

¹⁴Regnavit ergo David super universum Israel et faciebat iudicium atque iustitiam cuncto populo suo.

¹⁵Porro Ioab filius Sarviae erat super exercitum, et Iosaphat filius Ahilud a commentariis.

¹⁶Sadoc autem filius Achitob et Achimelech filius Abiathar sacerdotes et Susa scriba.

¹⁷Banaias vero filius Ioiadae super legiones Cherethi et Phelethi; porro filii David primi ad manum regis.