Read Nova_Vulgata Paralipomenon I 23 Bible Online

Paralipomenon I 23 - Nova_Vulgata bible

Paralipomenon I 23

¹Igitur David senex et plenus dierum regem constituit Sa lomonem filium suum super Israel

²et congregavit omnes principes Israel et sacerdotes atque Levitas.

³Numeratique sunt Levitae a triginta annis et supra, et inventa sunt triginta octo milia virorum.

⁴“ Ex his, inquit, praesint ministerio domus Domini viginti quattuor milia, praepositi autem et iudices sex milia;

⁵porro quattuor milia ianitores et totidem psaltae canentes Domino in organis, quae feci ad canendum ”.

⁶Et distribuit eos David per vices filiorum Levi Gerson videlicet et Caath et Merari.

⁷Filii Gerson: Ladan et Semei.

⁸Filii Ladan: princeps Iahiel et Zetham et Ioel, tres.

⁹Filii Semei: Salomith et Hoziel et Aran, tres; isti principes familiarum Ladan.

¹⁰Porro filii Semei: Iahath et Ziza et Iehus et Beria; isti filii Semei, quattuor.

¹¹Erat autem Iahath prior, Ziza secundus; porro Iehus et Beria non habuerunt plurimos filios, et idcirco in una familia unaque domo computati sunt.

¹²Filii Caath: Amram et Isaar, Hebron et Oziel, quattuor.

¹³Filii Amram: Aaron et Moyses. Separatusque est Aaron, ut sanctificaret sanctissima, ipse et filii eius in sempiternum, et adoleret Domino et serviret ei ac benediceret in nomine eius in perpetuum.

¹⁴Moysi quoque hominis Dei filii annumerati sunt in tribu Levi.

¹⁵Filii Moysi: Gersam et Eliezer.

¹⁶Filii Gersam: Subael primus.

¹⁷Fuerunt autem filii Eliezer: Rohobia primus, et non erant Eliezer filii alii; porro filii Rohobia multiplicati sunt nimis.

¹⁸Filii Isaar: Salomoth primus.

¹⁹Filii Hebron: Ieriau primus, Amarias secundus, Iahaziel tertius, Iecmaam quartus.

²⁰Filii Oziel: Micha primus, Iesia secundus.

²¹Filii Merari: Moholi et Musi. Filii Moholi: Eleazar et Cis;

²²mortuus est autem Eleazar et non habuit filios sed filias acceperuntque eas filii Cis fratres earum.

²³Filii Musi: Moholi et Eder et Ierimoth, tres.

²⁴Hi filii Levi in familiis suis, principes familiarum per vices et numerum capitum singulorum, qui faciebant opera ministerii domus Domini a viginti annis et supra.

²⁵Dixit enim David: “ Requiem dedit Dominus, Deus Israel, populo suo et habitat in Ierusalem usque in aeternum;

²⁶nec erit officii Levitarum, ut ultra portent tabernaculum et omnia vasa eius ad ministrandum.

²⁷Iuxta praecepta igitur David novissima, supputabitur numerus filiorum Levi a viginti annis et supra,

²⁸et erunt sub manu filiorum Aaron in cultum domus Domini pro atriis et exedris et in purificationem omnis rei sacrae et in ministerium templi Dei,

²⁹pro panibus propositionis et farina oblationis et laganis azymorum et pro sartagine et ad torrendum et super omne pondus atque mensuram.

³⁰Et stent mane ad confitendum et canendum Domino similiterque ad vesperam,

³¹tam in oblatione holocaustorum Domini quam in sabbatis et calendis et sollemnitatibus reliquis, iuxta numerum et caeremonias uniuscuiusque rei iugiter coram Domino.

³²Et custodiant observationes tabernaculi conventus et ritum sanctuarii et observationem filiorum Aaron fratrum suorum, ut ministrent in domo Domini ”.