Read Nova_Vulgata Paralipomenon II 11 Bible Online

Paralipomenon II 11 - Nova_Vulgata bible

Paralipomenon II 11

¹Venit autem Roboam in Ie rusalem et convocavit univer sam domum Iudae et Beniamin, centum octoginta milia electorum bellantium, ut dimicaret contra Israel et converteret ad se regnum suum.

²Factusque est sermo Domini ad Semeiam hominem Dei dicens:

³“ Loquere ad Roboam filium Salomonis regem Iudae et ad universum Israel, qui est in Iuda et Beniamin:

⁴Haec dicit Dominus: Non ascendetis neque pugnabitis contra fratres vestros. Revertatur unusquisque in domum suam, quia mea hoc gestum est voluntate ”. Qui cum audissent sermonem Domini, reversi sunt nec perrexerunt contra Ieroboam.

⁵Habitavit autem Roboam in Ierusalem et aedificavit civitates muratas in Iuda.

⁶Exstruxitque Bethlehem et Etam et Thecue,

⁷Bethsur quoque et Socho et Odollam

⁸necnon Geth et Maresa et Ziph,

⁹sed et Aduram et Lachis et Azeca,

¹⁰Saraa quoque et Aialon et Hebron, quae erant in Iuda et Beniamin civitates munitissimas.

¹¹Cumque clausisset eas muris, posuit in eis principes ciborumque horrea et olei et vini.

¹²Sed et in singulis urbibus fecit armamentarium scutorum et hastarum firmavitque eas summa diligentia et imperavit super Iudam et Beniamin.

¹³Sacerdotes autem et Levitae, qui erant in universo Israel, venerunt ad eum de cunctis sedibus suis.

¹⁴Levitae relinquentes suburbana et possessiones suas transierunt ad Iudam et Ierusalem, eo quod abiecisset eos Ieroboam et posteri eius, ne sacerdotio Domini fungerentur.

¹⁵Qui constituit sibi sacerdotes excelsorum et daemoniorum vitulorumque, quos fecerat.

¹⁶Sed sequentes eos et de cunctis tribubus Israel quicumque dederant cor suum, ut quaererent Dominum, Deum Israel, venerunt Ierusalem ad immolandum victimas Domino, Deo patrum suorum.

¹⁷Et roboraverunt regnum Iudae et confirmaverunt Roboam filium Salomonis per tres annos; ambulaverunt enim in viis David et Salomonis annis tantum tribus.

¹⁸Duxit autem Roboam uxorem Mahalath filiam Ierimoth filii David et Abihail filiae Eliab filii Isai,

¹⁹quae peperit ei filios Iehus et Samariam et Zoom.

²⁰Post hanc quoque accepit Maacha filiam Absalom, quae peperit ei Abia et Ethai et Ziza et Salomith.

²¹Amavit autem Roboam Maacha filiam Absalom super omnes uxores suas et concubinas; nam uxores decem et octo duxerat, concubinas autem sexaginta. Et genuit viginti octo filios et sexaginta filias.

²²Constituit vero in capite Abiam filium Maacha ducem super fratres suos; ipsum enim regem facere cogitabat.

²³Et sapienter filios suos dispersit in cunctis finibus Iudae et Beniamin in universis civitatibus muratis. Praebuitque eis escas plurimas et multas petivit uxores.