Read Nova_Vulgata Exodus 21 Bible Online

Exodus 21 - Nova_Vulgata bible

Exodus 21

¹Haec sunt iudicia, quae propones eis:

²Si emeris servum Hebraeum, sex annis serviet tibi; in septimo egredietur liber gratis.

³Si solus intraverit, solus exeat; si habens uxorem, et uxor egredietur simul.

⁴Sin autem dominus dederit illi uxorem, et pepererit filios et filias, mulier et liberi eius erunt domini sui; ipse vero exibit solus.

⁵Quod si dixerit servus: "Diligo dominum meum et uxorem ac liberos, non egrediar liber",

⁶afferet eum dominus ad Deum et applicabit eum ad ostium vel postes perforabitque aurem eius subula; et erit ei servus in saeculum.

⁷Si quis vendiderit filiam suam in famulam, non egredietur sicut servi exire consueverunt.

⁸Si displicuerit oculis domini sui, cui tradita fuerat, faciat eam redimi; populo autem alieno vendendi non habebit potestatem, quia fraudavit eam.

⁹Sin autem filio suo desponderit eam, iuxta morem filiarum faciet illi.

¹⁰Quod si alteram sibi acceperit, cibum et vestimentum et concubitum non negabit.

¹¹Si tria ista non fecerit ei, egredietur gratis absque pretio.

¹²Qui percusserit hominem, et ille mortuus fuerit, morte moriatur.

¹³Qui autem non est insidiatus, sed Deus illum tradidit in manus eius, constituam tibi locum, in quem fugere debeat.

¹⁴Si quis de industria occiderit proximum suum et per insidias, ab altari meo evelles eum, ut moriatur.

¹⁵Qui percusserit patrem suum aut matrem, morte moriatur.

¹⁶Qui furatus fuerit hominem sive vendiderit eum sive inventus fuerit in manu eius, morte moriatur.

¹⁷Qui maledixerit patri suo vel matri, morte moriatur.

¹⁸Si rixati fuerint viri, et percusserit alter proximum suum lapide vel pugno, et ille mortuus non fuerit, sed iacuerit in lectulo,

¹⁹si surrexerit et ambulaverit foris super baculum suum, impunitus erit, qui percusserit, ita tamen, ut operas eius deperditas et impensas pro medela restituat.

²⁰Qui percusserit servum suum vel ancillam virga, et mortui fuerint in manibus eius, ultioni subiacetur.

²¹Sin autem uno die vel duobus supervixerit, non subiacebit poenae, quia pecunia illius est.

²²Si rixati fuerint viri, et percusserit quis mulierem praegnantem et abortivum quidem fecerit, sed aliud quid adversi non acciderit, subiacebit damno, quantum maritus mulieris expetierit, et arbitri iudicaverint.

²³Sin autem quid adversi acciderit, reddet animam pro anima,

²⁴oculum pro oculo, dentem pro dente, manum pro manu, pedem pro pede,

²⁵adustionem pro adustione, vulnus pro vulnere, livorem pro livore.

²⁶Si percusserit quispiam oculum servi sui aut ancillae et luscos eos fecerit, dimittet eos liberos pro oculo.

²⁷Dentem quoque si excusserit servo vel ancillae suae, dimittet eos liberos pro dente.

²⁸Si bos cornu percusserit virum aut mulierem, et mortui fuerint, lapidibus obruetur, et non comedentur carnes eius; dominus autem bovis innocens erit.

²⁹Quod si bos cornupeta fuerit ab heri et nudiustertius, et contestati sunt dominum eius, nec recluserit eum, occideritque virum aut mulierem: et bos lapidibus obruetur, et dominum illius occident.

³⁰Quod si pretium ei fuerit impositum, dabit pro anima sua, quidquid fuerit postulatus.

³¹Filium quoque vel filiam si cornu percusserit, simili sententiae subiacebit.

³²Si servum vel ancillam invaserit, triginta siclos argenti dabit domino; bos vero lapidibus opprimetur.

³³Si quis aperuerit cisternam vel foderit et non operuerit eam, cedideritque bos vel asinus in eam,

³⁴dominus cisternae reddet pretium iumentorum; quod autem mortuum est, ipsius erit.

³⁵Si bos alienus bovem alterius vulneraverit, et ille mortuus fuerit, vendent bovem vivum et divident pretium; cadaver autem mortui inter se dispertient.

³⁶Sin autem notum erat quod bos cornupeta esset ab heri et nudiustertius, et non custodivit eum dominus suus, reddet bovem pro bove et cadaver integrum accipiet.

³⁷Si quis furatus fuerit bovem aut ovem et occiderit vel vendiderit, quinque boves pro uno bove restituet et quattuor oves pro una ove.